Ntchitu Yakudaniya Ŵanthu ku Unganu Wachigaŵa
1. Kumbi tiyambengi zukwanji kugwira nchitu yakudaniya ŵanthu ku unganu wachigaŵa?
1 Tiyeruzgiyi kuti mupenja kunozge abali ŵinu kweniso anyinu phwandu lamampha ukongwa, ndipu mwagwiriskiya nchitu ndalama zinandi kuti munozgi phwandu lenili. Kumbi mungachita mphwayi kuŵadana? Mwakuyana ŵaka, penga so nchitu yikulu yakunozga unganu wachigaŵa wa chaka chinu. Yehova watipaska mwaŵi wakudana ŵanthu kuti ŵazi ku unganu uwu. Tazamukwamba kugwira nchitu iyi asani kwaja sabata zitatu kuti uchitiki. Nchinthu wuli cho chingatiwovya kuti tizigwiri nchitu iyi mwaphamphu?
2. Nchinthu wuli cho chingatiwovya kuti tizigwiri mwaphamphu nchitu yakudana ŵanthu?
2 Kukumbuka mo tiyanduliya ndi maunganu nga chigaŵa ngo Yehova watitinozge, kungatiwovya kuti tizigwiri mwaphamphu nchitu yakudaniya ŵanthu ku unganu. (Yes. 65:13, 14) Titenere so kukumbuka kuti titaya ŵaka nyengu cha kugwira nchitu iyi chifukwa anyaki wo titiŵadana atuza pa unganu. (Wonani bokosi lakuti, “Ntchitu Yakudaniya Ŵanthu ku Unganu wa Chigaŵa Yitovya.”) Yehova watumbikika chifukwa cha phamphu lidu chinanga kuti tiziŵa cha kuti mbalinga wo azamukuza pa unganu. Nchitu iyi yilongo kuti Yehova ngwakupaska.—Sumu 145:3, 7; Chiv. 22:17.
3. Kumbi tazamugwira wuli nchitu yakugaŵiya timapepala?
3 Wupu wa ŵara utenere kuwona vo mpingu wawu ungachita kuti uzigaŵiyi timapepala muchigaŵa chawu chosi. Ŵara atenere so kuwona asani mphakwenere kusiya timapepala panyumba zo palivi ŵanthu pamwenga kuchigaŵiya kumalu ngo kusanirika ŵanthu anandi muchigaŵa chawu. Pa Chisulu tingagaŵiya magazini limoza ndi kapapela kakudaniya ŵanthu ku unganu asani mphakwenere. Pakumaliya pa nchitu iyi, tazamukondwa ukongwa kuti tinguyigwira mwaphamphu ndipu tingudana ŵanthu anandi kuti azivwisiyi unganu wo Yehova wangutinozge.