Jalidu Lidu Lamampha Litumbika Chiuta

1. Nchifukwa wuli ŵanthu aswera cha kuziŵa kuti Akaboni aku Yehova ŵe ndi unganu wachigaŵa?

¹ Ŵanthu aswera cha kuziŵa kuti te ndi unganu wachigaŵa. M’malu nganandi mo muchitikiya unganu wachigaŵa, ŵanthu aziŵa kuziya m’nyuzipepala, wayilesi ndi vinyaki vaviyo. Nyumba zinandi zo ze pafupi ndi malu nga unganu zizaza ndi ŵanthu wo ŵaza ku unganu ndipu ŵanthu a m’chigaŵa cho awona kuti alendu anandi avwala mabaji. Fundu zakundondoloskapu izi zititikumbuska kuti tijengi ndi jalidu lamampha lo litumbika Yehova asani te kumalu nga unganu.—1 Pet. 2:12.

2. Kumbi kavwalidu kidu kamampha kangawovya wuli kuti Chiuta watumbikiki?

² Muvwalengi Mwaulemu: Mbuneneska kuti tikhumbika kuvwala mwaulemu asani te pa unganu. Kweniso asani taluta kuchigula vinthu ku masitolu pamwenga kwekosi ko tingaluta, ŵanthu atitiziŵa liŵi kuti te ndi unganu chifukwa chakuwona mo tivwaliya. Chinanga kuti tikhumbika kuvwala malaya ngapachanya pe cha pa vakuchitika vinyaki, titenere mbwenu kuvwala mwaulemu m’malu mwakuvwala chiwuzgawuzga. Ŵanthu wo atitiwona atenere kupambaniska ndi mo ŵanthu anandi avwaliya m’charu ichi. (Ŵar. 12:2) Titenere so kuvwala baji la unganu chifukwa ndilu lingawovya kuti ŵanthu atiziŵi kuti te ndi unganu. Venivi vingapereka so mwaŵi wakuti tipharazgiyi ŵanthu ndipuso vingawovya kuti abali ndi azichi atiziŵi liŵi.

3. Kumbi tingalongo wuli ulemu pa unganu wachigaŵa?

³ Ulemu: Po ŵanthu anandi mbakujanja ndipuso ambula kuwonga m’charu ichi, kuchita vinthu mwaulemu kungachichiska ŵanthu wo tapempha kuti tigoni m’nyumba zawu ndipuso ku masitolu. (2 Tim. 3:1-5) Tikhumbika cha kujiŵanaŵaniya isi pe, kweni tikaŵanaŵaniyengi so anyidu asani tamukhumba kusungiya malu ŵanthu anyaki pamwenga asani tama pa mzeri kuti tilonde mabuku ngo ngamutuzgika pa unganu. (1 Ŵakor. 10:23, 24) Munthu munyaki yo wangusanirikapu pa unganu wanguti: “Palivi nkhani yo yingukambika pa unganu yo ndikumbukapu, kweni ndiluwa cha nkharu yamampha ya Akaboni aku Yehova.”

4. Nchifukwa wuli tikhumbika kujipereka kugwira nchitu pa unganu wachigaŵa asani tingafiska?

⁴ Anchitu Akujipereka: Akhristu auneneska aziŵika chifukwa cha kujipereka kwawu. (Sumu 110:3) Kumbi mungajipereka kuti mukawovyi pa unganu wachigaŵa? Pa unganu unyaki wachigaŵa, abali ndi azichi 600 angujipereka kuti atowesi pa malu nga unganu. Ŵenechu a malu ngo angukamba kuti: “Ivi vichitika yapa vakuziziswa ukongwa ndipu techendaviwonepu. Ndivwisisa cha kuti ŵanthu wosi yaŵa achita kujipereka waka kuti agwiri nchitu iyi.” Tikhumbisiska kuti tizisanirikepu pa maunganu nga chigaŵa nga 2013 kuti tizivwisiyi ndi kusambira pe cha, kweniso kutumbika Chiuta.

[Chithuthuzi papeji 3-6]

Vakukhumbika Kukumbuka pa Unganu Wachigaŵa wa 2013

◼ Nyengu ya Unganu: Unganu wamukwamba 8:20 mulenji mazuŵa ngosi ngatatu. Panyengu iyi, tosi titenere kuchija pasi kuti unganu ukayambi mwadongosolu. Pazuŵa lakwamba ndi lachiŵi unganu wamumala 3:55 ndi musana. Pazuŵa lakumaliya unganu wamumala 2:45 musana.

◼ Kwakumika Magalimotu: Malu ngosi ngakuchitiyaku unganu ngazamuja ndi malu ngakukwana ngakumikaku magalimotu ndi njinga. Titikuchiskani mosi kuzikoliyana ndi akalindi wo azamugwira nchitu yeniyi. Weyosi watenere kuchiwonesesa kuti wakiya galimotu pamwenga njinga yaki wechendasaniyi malu ngakuja.

◼ Kusungiyana Malu: Mutenere kuŵasungiya malu ŵija wo mwaziya nawu limoza pamwenga wo muja nawu nyumba yimoza, kweniso wo musambira nawu Bayibolo.—1 Ŵakor. 13:5.

◼ Chakurya Chamusana: Chondi pingiyani limu chakurya cha msana m’malu mwa kuchigula chakurya kunyaki pa nyengu ya kupumuwa. Mukhoza kupinga tchipisi, mpunga wakubika, mboholi, vigawu ndi vakumwa vakuzizirisa kukhosi. Moŵa uzomerezgeka cha pamalu nga unganu.

◼ Vakupereka: Tingalongo kuti tiwonga vosi vo vanozgeka pa unganu wachigaŵa mwakupereka ndalama kuti ziwovyi pa nchitu ya pacharu chosi. Cheki chechosi cho chingaperekeka pa unganu wa chigaŵa chitenere kuperekeka ku “Association of Jehovah’s Witnesses of Malawi.”

◼ Ngozi Ndipuso Matenda Ngamabuchibuchi: Asani munthu watama mwamabuchibuchi pa unganu, kumanani ndi kalindi yo mwe nayu pafupi kuti waziŵiski abali wo ŵe mu Dipatimenti ya Chipatala kuti apereki chovyu chakwenere.

◼ Munkhwala: Asani mwe ndi matenda ngakulu ngo ngakhumbika munkhwala wapade, wonesesani kuti mwapingiya limu munkhwala chifukwa kumalu nga unganu kwamuŵavi. Asani mutama nthenda ya Shuga ndipu mugwiriskiya nchitu matholora, wonesesani kuti mutingataya bwekabweka cha.

◼ Wo Atondeka Kuvwa: Unganu wachigaŵa wo wamuchitikiya ku Blantyre, Kasungu, Lilongwe, Luchenza, Magawa, Mangochi, Mzuzu, Nkhata Bay, Songani ndi malu nganyaki wazamufwatulikiya so m’Chineneru cha Manja. Chipharazgu chakukwaskana ndi nkhani yeniyi chazamuperekeka pa chigaŵa chakwamba, pa zuŵa lakwamba la unganu.

◼ Kujambula Mazu: Vipangizu vakujambuliya mazu vingalumikizikanga cha ku magesi pamwenga ku vipangizu vakukweze mazu ndipu mutenere kuvigwiriskiya nchitu mwakuphwere kuti vileki kutimbanyizga ŵanthu anyaki.

◼ Kujambula Vithuzi: Asani mujambula vithuzi unganu we mukati, mungagwiriskiyanga nchitu fulashi cha.

◼ Mafoni nga M’manja: Mukathyengi mafoni nginu kuti ngakaleki kutimbanyizga ŵanthu anyaki unganu we mukati.

◼ Mafomu Ngakuziŵiskiya ko Munthu Wakunweka Waja: Asani mwachikumana ndi munthu wakunweka pa nyengu ya unganu, mungachigwiriskiya nchitu fomu yakuti, Kaonaneni ndi Wachidwi Uyu (S-43). Apharazgi atenere kupinga fomu yeniyi pakuluta ku unganu. Mafomu ngo mwamulemba mukangapereki ku Dipatimenti ya Mabuku pamwenga ku mlembi wa mpingu winu asani mwawere ku nyumba.

◼ Uteŵeti Wakujipereka: Likondwa lo tisaniya chifukwa chakusanirika pa maunganu lingaŵa likulu asani titijipereka pakugwira nawu nchitu zo zichitika pa maunganu. (Mac. 20:35) Munthu weyosi yo wakhumba kujipereka watenere kuchikumana ndi abali wo ŵe mu Dipatimenti ya Uteŵeti Wakujipereka pa unganu wachigaŵa. Ŵana wo ŵechendafiki vyaka 16 nawu angagwiraku nchitu yeniyi mwakulongozgeka ndi apapi ŵawu pamwenga munthu munyaki yo wazomerezgeka ndi apapi a mwana yo.