“Muŵi ndi Kajalidu Kakutowa mu Amitundu”

1. Nchifukwa wuli tikhumbika kuzilongo mijalidu yamampha pa unganu wachigaŵa?

¹ Chaka chechosi asani te pa unganu wachigaŵa ŵanthu awona vo tichita. Mwaviyo, titenere kuja ndi jalidu lamampha chifukwa timiya Chiuta yo tisopa. (Ŵal. 20:26) Mijalidu yidu yamampha kweniso kuvwala ndi kujitoweska kwidu, vitenere kulongo kuti tilondo nadi Khristu. Kumbi tingazichita wuli kuti pa nyengu ya unganu wachigaŵa, ‘tiziŵi ndi kajalidu kakutowa mu amitundu’ vo vazamuchitiska kuti Awuskefwi akuchanya atumbikiki?—1 Pet. 2:12.

2. Kumbi ndi nyengu niyi yo titenere kulongo mijalidu yachikhristu asani te pa unganu?

² Mulongongi Mijalidu Yachikhristu: Chanju cho tilongo Akhristu anyidu kweniso mo tichitiya vinthu ndi ŵanthu “akubwaru,” vipambana ukongwa ndi jalidu lakujanja lo ŵanthu ŵe nalu m’charu ichi. (Ŵakol. 3:10; 4:5; 2 Tim. 3:1-5) Chinanga kuti ŵanthu wo tikumana nawu kweniso wo tigulaku vinthu angatinangiya, tikhumbika kuchita nawu vinthu mwaulemu ndipuso mwakuzizipizga. Asani ŵanthu a muchigaŵa cho tichitiyaku unganu atiwovya mu nthowa yinyaki titenere kuŵawonga.

3. Kumbi apapi atenere kukumbukanji ndipu nchifukwa wuli?

³ Apapi atenere kuyesesa kuphwere ŵana ŵawu pamalu nga unganu, pakuchigula vinthu kweniso kwekosi ko aja. (Nthanthi 29:15) Bwana wa pa hotelu yinyaki, wangukambiya banja linyaki kuti: “Titikuyanjani mwaŵanthu imwi. Mabanja nginu ndipuso ŵana ŵinu ŵe ndi nkharu yamampha kweniso mbaulemu. Anchitu ŵidu wosi akamba vamampha vaku imwi ndipu tatingi tikondwengi asani mwajanga panu sabata yeyosi.”

4. Pa nyengu yo te kumalu nga unganu, kumbi titenere kukumbukanji pa nkhani ya kavwalidu?

⁴ Kuvwala Umampha: Pa nyengu ya unganu, titenere kuvwala umampha ndipuso mwaulemu kuti tipambani ndi mo avwaliya ŵanthu a m’charu ichi. (1 Tim. 2:9) Titenere cha kuvwala mwachiwuzgawuzga asani tiluta pamwenga tiwe ku unganu ndipuso pa nyengu yakupumuwa. Venivi vitiwovyengi kuti tileki kuchita soni kuvwala mabaji ngidu nga unganu ndipuso kupharazga mwamwaŵi. Asani tivwalengi umampha ndipuso tilongongi nkharu yamampha pa unganu wachigaŵa wa 2014, vichitiskengi kuti ŵanthu a maŵanaŵanu ngamampha ayambi kusambira uthenga wa m’Bayibolo wakutaska umoyu kweniso vikondwesengi Yehova.—Zef. 3:17.

Vakukhumbika Kukumbuka pa Unganu Wachigaŵa wa 2014

◼ Nyengu ya Unganu: Unganu wamukwamba 8:20 mulenji mazuŵa ngosi ngatatu. Pa nyengu iyi, tosi titenere kuchija pasi kuti unganu ukayambi mwaulemu ndipuso mwadongosolu. Pa Chinkhondi ndi Chisulu unganu wamumala 3:55 musana. Pa Sabata unganu wamumala 2:50 musana.

◼ Unganu Wavyaru: Muvyaru vinyaki muchitikengi unganu wavyaru. Apharazgi wo alivi kudanika ku unganu wenuwu asani angaluta, vingachitiska kuti kukaje ŵanthu anandi. Asani mukhumba kuluta ku unganu unyaki m’malu mwakuluta ku unganu wo mpingu winu ulutengi, mungalutanga ku unganu wavyaru cha.

◼ Kwakumika Magalimotu ndi Njinga: Kumalu ngosi ngakuchitiyaku unganu kwazamuja malu ngakukwana ngakumikaku magalimotu ndi njinga. Titikuchiskani mosi kuzikoliyana ndi akalindi wo azakukuwovyani. Weyosi watenere kuzikiya galimotu pamwenga njinga yaki wechendasaniyi malu ngakuja.

◼ Kusungiyana Malu: Asani mwafika pamalu nga unganu, mungachichimbiyanga cha kuti mukasaniyi malu ngo mukhumba nge kuti muchita maphara ndi Akhristu anyinu. Mtima wakujipereka wo utitovya kukhumbiya anyidu vamampha, utitiziŵikiska kuti ndisi Akhristu auneneska ndipuso uchitiska ŵanthu wo awona kuthamika Chiuta. (Yoh. 13:34, 35; 1 Ŵakor. 13:4, 5; 1 Pet. 2:12) Ŵija wo mutenere kuziŵasungiya malu mbanthu wo mwazamulutiya nawu limoza, wo muja nawu nyumba yimoza kweniso wo musambira nawu Bayibolo. Pe malu ngo asungiya ŵanthu akukota ndipuso wo atama. Chifukwa chakuti malu ngo asungiya ŵanthu ŵenaŵa ngaja ngamana, pakhumbika ŵaka munthu yumoza pamwenga ŵaŵi wo angazija nawu limoza kuti akaŵawovyengi.

◼ Chakurya Chamusana: Chondi muzipingiyi limu chakurya chamusana m’malu mwakuchigula chakurya kunyaki pa nyengu yakupumuwa. Mungazipinga tchipisi, mpunga, mboholi, vigawu ndi vakumwa vakuzizirisa kukhosi. Moŵa uzomerezgeka cha pamalu nga unganu.

◼ Vakupereka: Pa nyengu ya unganu wachigaŵa, tingalongo kuti tiwonga vosi vo vanozgeka pa unganu wenuwu mwakupereka ndalama kuti ziwovyi pa nchitu ya pacharu chosi. Asani tikhumba kupereka cheki titenere kuchilemba kuti, “Association of Jehovah’s Witnesses of Malawi.”

◼ Munkhwala: Asani mutama ndipu mutumwa munkhwala wapade, wonesesani kuti mwapingiya limu chifukwa kumalu nga unganu kwamuŵavi. Wo ŵe ndi nthenda ya shuga ndipu agwiriskiya nchitu matholora, aziwonesesi kuti atingataya bwekabweka cha.

◼ Ngozi: Tikhumbika kuziphwere kuti tikaleki kupwetekeka chifukwa chakuti tatelemuka ndipuso taguŵa. Chaka chechosi ŵanthu apwetekeka chifukwa cha sapatu zo avwala, ukongwa za chiphundulu chitali. Tingachita umampha kuvwala sapatu zamampha zo zititiyana kuti tikayendengi umampha m’malu ngakujitika ndipuso malu nganyaki.

◼ Wo Atondeka Kuvwa: Unganu wachigaŵa wazamufwatulikiya m’Chineneru cha Manja ku Blantyre, Kasungu, Lilongwe, Luchenza, Magawa, Mkanda, Mangochi, Mzuzu, Mnadzi, Nchalo, Nkhata Bay, Songani ndi malu nganyaki. Chipharazgu chakukwaskana ndi nkhani yeniyi chazamuperekeka pa chigaŵa chakwamba, pa zuŵa lakwamba la unganu.

◼ Tinjinga Takwendeskamu Ŵana ndi Mipandu Yitali: Vinthu venivi vikhumbika cha kuvipingiya ku unganu.

◼ Perefyumu: Tingazilongo kuti titanja anyidu asani tazamuleka kupaka mafuta ndipuso perefyumu wakununkhira ukongwa vo vingazichitiska kuti Akhristu anyidu azikhosomongi pamwenga kusuzgika mu nthowa yinyaki.—1 Ŵakor. 10:24.

◼ Mafomu nga Kaonaneni ndi Wachidwi Uyu (S-43): Mafomu yanga mwamulembapu vinthu vakukwaskana ndi munthu wakunweka yo mwakumupharazgiya mwamwaŵi pa nyengu ya unganu. Mafomu ngo mwamulemba, mukangapereki ku Dipatimenti ya Mabuku pamwenga ku mlembi wa mpingu winu asani mwawere kunyumba.

◼ Mafoni nga M’manja: Mukathyengi mafoni nginu kuti ngakaleki kutimbanyizga anyinu unganu we mukati.

◼ Kujambula Mazu: Vipangizu vinu vakujambuliya mazu kuchivilumikiza cha ku magesi pamwenga ku vipangizu vakukweze mazu. Mutenere kuchivigwiriskiya nchitu mwakuphwere kuti vizileki kutimbanyizga anyinu.

◼ Kujambula Vithuzi: Asani mwamujambula vithuzi unganu we mukati, mungachigwiriskiyanga nchitu fulashi cha.

◼ Uteŵeti Wakujipereka: Munthu weyosi yo wakhumba kuchigwiraku nchitu pa unganu wachigaŵa, watenere kuchikumana ndi abali wo ŵe mu Dipatimenti ya Uteŵeti Wakujipereka. Ŵana wo ŵechendafiki vyaka 16 nawu angachigwiraku nchitu yeniyi mwakulongozgeka ndi apapi ŵawu pamwenga munthu munyaki yo wazomerezgeka ndi apapi a ŵana wo.