Mazuŵa Ngatatu Ngakuti Tikasisipuliki Mwauzimu
1. Kumbi tamuyanduwa wuli ndi unganu wachigaŵa wa chaka chinu?
1 M’charu chaku Satana chakutchujuka mwauzimu ichi, Yehova walutirizga kusisipuwa ateŵeti ŵaki. (Yesa. 58:11) Unganu wachigaŵa njimoza mwa nthowa zo Yehova watitipaskiya nthazi. Kumbi tinganozgeke wuli kuti tikasisipuliki ndi kusipuwa anyidu mwauzimu, po unganu wachigaŵa wa chaka chinu we pafupi kuchitika?—Ntha. 21:5.
2. Kumbi ndi vinthu wuli vo titenere kunozgeke limu kweche sonu?
2 Asani mwechendayambi kunozgeka, yambiyanipu limu kweche sonu kunozga vakuchita vinu vosi pamwenga va ku nchitu asani mugwira nchitu yakulembeka kuti mukasaniriki pa unganu wachigaŵa mazuŵa ngosi ngatatu. Kumbi mwaŵerengese kali nyengu yo mungayenda kuluta ku malu nga unganu alinga kuti mukafikengi ndi kusaniya malu ngakujapu unganu wechendayambi? Tingakhumba nadi cha kuti tikaleki kusanirikapu pa chakurya chosi chauzimu chakupaska nthazi cho Yehova watinozge! (Yesa. 65:13, 14) Kumbi mwanozga kali malu ngo mwamugona ndipuso po muyendiyengi?
3. Kumbi ndi fundu nizi zo zingatiwovya kuti tiziyanduwi mwakukwana ndi pulogilamu ya unganu limoza ndi mabanja ngidu?
3 Kumbi nchinthu wuli cho chakukuwovyani kuti mukaleki kutimbanyizgika maŵanaŵanu po unganu we mkati? Asani nkhwamachitika, mukapumuwengi mwakukwana pa unganu, mwakugona liŵi ndi usiku. Mukalereskengi wakukamba nkhani. Mukajulengi Bayibolo linu ndi kuŵerenge nayu limoza lemba lelosi lo wazumbuwa. Mukalembengi fundu zakudumuwa. Mabanja ngangachichita umampha kuchija pamoza alinga kuti apapi akawovyengi ŵana ŵawu kuti akavwisiyengi mwakuphwere ukongwa. (Ntha. 29:15) Mungachita umampha so kuzikambiskananga fundu zo zakambika pa unganu mazulu ngengosi nge banja. Kuti banja linu lizilutirizgi kusisipulika asani unganu wamala, pa nyengu ya Kusopa kwa Pabanja mukhoza kuzipatuwanga nyengu yakukambiskana fundu zinyaki zo mwasambira pa unganu ndipuso mo banja linu lingazigwiriskiya nchitu.
4. Kumbi tingawovya wuli ŵanthu anyaki a mu mpingu widu kuti nawu akasisipuliki mwauzimu?
4 Wovyani Ŵanthu Anyaki Kuti Nawu Akasisipuliki: Tikhumba kuti anyidu nawu azisisipuliki ndi unganu wenuwu. Kumbi mu mpingu winu mwe ndi apharazgi akukota pamwenga anyaki wo akhumbika kuŵawovya kuti akasaniriki ku unganu wachigaŵa? Kumbi mukhoza kuŵawovya? (1 Yoha. 3:17, 18) Ŵara a mpingu, ukongwa wo awonere timagulu, atenere kuwonesesa kuti apharazgi yaŵa awovyeka.
5. Kumbi Tazamugwira Wuli Nchitu Yakugaŵaiya Timapepala Takudaniya Ŵanthu ku Unganu? (Wonani bokosi lo le pa peji 5.)
5 Nge po taja tichichitiya kuvuli uku, masabata ngatatu unganu wechendayambi tazamugwira nchitu yakudaniya ŵanthu ku unganu. Mipingu yitenere kuja ndi chilatu chakuzigaŵiya timapepala tawu tosi takudaniya ŵanthu ku unganu ndipuso kuziyesesa kumaliza chigaŵa chawu.
6. Kumbi mijalidu yamampha yingasisipuwa wuli anyidu?
6 Mijalidu Yamampha Yisisipuwa: Nchinthu chakukondweska ukongwa kuja pamoza ndi Akhristu anyidu wo atesesa kulongo mijalidu yamampha, chinanga kuti tija mnyengu yo ŵanthu anandi ‘mbakujanja’ ndipuso ambula kuŵanaŵaniya anyawu. (2 Timo. 3:2) Tilongo kuti te ndi mijalidu yamampha asani tifika pamalu nga unganu mwaulemu ndipuso asani tisungiya malu ŵanthu ŵija wo tatuliya nawu limoza kunyumba, wo taziya nawu limoza pa galimotu yidu pamwenga wo tisambira nawu Bayibolo. Tivwiya ulongozgi wa cheyamani asani watitipempha kuti tije pasi ndi kuvwisiya sumu zakulongo kuti unganu uyambengi. Tilongo kuti te ndi mijalidu yamampha asani tituthya foni yidu kuti yileki kutimbanyizga anyidu pulogilamu ye mkati. Tilongo so kuti te ndi nkharu yamampha mwakuleka kuŵereŵeta, kulembelana mauthenga nga pa foni, kurya pamwenga kwendakwenda unganu we mkati.
7. Kumbi isi tingasisipulika wuli ndipuso kusisipuwa anyidu po ticheza ndi abali?
7 Kucheza Kwakusisipuwa: Maunganu ngatitipaska mwaŵi ukulu wakuti tikondwi ndi Akhristu anyidu ndipuso ubali wa pacharu chosi. (Sumu 133:1-3) Mwalekiyanji kuti mukayambi ndimwi ‘kutandawuwa mitima’ yinu kuti mukakumani ndi abali ndi azichi wo amusanirika pa unganu uwu kutuwa mu mipingu yinyaki? (2 Ŵako. 6:13) Jani ndi chilatu chakuti mukaziŵani ndi munthu yumoza pamwenga banja limoza zuŵa lelosi. Nyengu yakupumuliya yititipaska mpata wakuti tingachita venivi. Mwaviyo, tikapingi chakurya chakupepuka kuti tikaryi ndi kucheze pamoza ndi anyidu pa malu nga unganu kuruska kuti tikaryi ku nyumba zakuguliskiyaku chakurya. Ivi vingatiwovya kuti tizisaniyi vitumbiku chifukwa chakuja pa ubwezi wakukho ndi anyidu.
8. Kumbi nchifukwa wuli titenere kujipereka kuti tikagwiri nchitu pa unganu, nanga tingachita wuli venivi?
8 Nchinthu chakukondweska ukongwa kugwira nchitu limoza ndi Akhristu anyidu mu uteŵeti wakupatulika! Kumbi mungajipreka kuti muziwovyi mu dipatimenti pamwenga kovya mpingu winu pa nchitu yakutozga malu? (Sumu 110:3) Asani mwapaskika nchitu yeyosi cha yakuti mukachiti, mungachita umampha kuŵanaŵaniya kuti mukafiki ku Dipatimenti ya Uteŵeti Wakujipereka pa unganu wachigaŵa. Unandi ngwamapha uchitiska kuti nchitu yije yakukondweska ndipuso yambula kufyo.
9. Kumbi nchifukwa wuli titenere kuphwere ukongwa ndi vo tichita kweniso kawonerekeru kidu pa nyengu ya unganu?
9 Jalidu Lidu Lisisipuwa Ŵanthu wo Atitiwona: Titenere kuchita vinthu vakukulongo kuti te pa unganu asani pulogilamu ye mkati pe cha kweni kwa mazuŵa ngosi ngatatu. Ŵanthu wo atitiwona asani te ku malu ngo kuchitikiya unganu atenere kuwona mphambanu pakati paku isi ndi ŵanthu wo mbakaboni cha. (1 Pet. 2:12) Titenere kuvwala ndi kujitowesa mwakutumbika Yehova asani te pa malu nga unganu, ko tigona ndipuso ku malu ngakuryiya. (1 Timo. 2:9, 10) Kuvwala mabaji kwakutiwovya kuti ŵanthu akatiziŵi kuti te ayani ndipuso vakutipaska mwaŵi wakuŵakambiya va unganu kweniso kuŵapharazgiya.
10. Kumbi nchakuchitika nichi cho chilongo kuti jalidu la Akhristu lichitiska kuti tichiti ukaboni wamampha?
10 Kumbi jalidu lamampha likwaska wuli anyidu pa nyengu ya unganu? Nyuzipepala yinyaki yingukamba kuti bwana wa pamalu nganyaki ngo panguchitikiya unganu wanguti: “Ŵanthu yaŵa mbaulemu ukongwa. Tikondwa ukongwa kuja nawu chaka chechosi.” Chaka chamala munthu munyaki yo ndi Kaboni cha wangutaya kachikwama ka ndalama ku malu ngo kwagonanga ŵanthu wo anguza ku unganu. Akaboni ŵati apereka kachikwama kwa bwana wa pa malu ngakugona alendu vinthu vosi ve mukati, bwana uyu wangukambiya mwenechu kuti: “Muwongi kuti Akaboni aku Yehova ndiwu achitanga unganu wawu pafupi yapa, ndipu yiwu pe ndiwu agonana kunu. Akaŵengi ŵanthu anyika mwakawonanga cha kachikwama ko.”
11. Kumbi titenere kuja ndi chilatu wuli po unganu wachigaŵa we pafupi kuchitika, nanga nchifukwa wuli?
11 Unganu wachigaŵa wa chaka chinu we pafupi kuchitika. Kuti pulogilamu ya unganu ndipuso vakuchitika pa unganu vikaŵi vakusisipuwa, abali atayiyapu nyengu ndi nthazi zawu. Jani ndi chilatu chakuti muzisanirikepu mazuŵa ngosi ngatatu nga unganu ndipu nozgekani kuti muzilonde vo Yehova ndi gulu laki akunozgiyani. Jani akunozgeka kuti mukachiskani ndi anyinu kuziya mu vakuchita vinu vamampha, kucheza kwamampha ndipuso jalidu lamampha. Mwaviyo imwi ndipuso anyinu mujivwengi nge po munyaki wa ŵanthu wo angufika pa unganu wa chaka chamala wangukambiya kuti, “Ndazamuluwapu cha chakuchitika chakukondweska nge ichi!”
[Fundu yo yakonkhoskeka papeji 3]
Nge po taja tichichitiya kuvuli uku, masabata ngatatu unganu wechendayambi tazamugwira nchitu yakudaniya ŵanthu ku unganu
[Fundu yo yakonkhoskeka papeji 4]
Titenere kuvwala ndi kujitowesa mwakutumbika Yehova asani te pa malu nga unganu, ko tigona ndipuso ku malu ngakuryiya
Jani akunozgeka kuti mukachiskani ndi anyinu kuziya mu vakuchita vinu vamampha, kucheza kwamampha ndipuso jalidu lamampha
[Bokosi papeji 5]
Kumbi Tazamugwira Wuli Nchitu Yakugaŵaiya Timapepala Takudaniya Ŵanthu ku Unganu?
Kuti tizimalizi chigaŵa chidu chosi, tizikambengi mazu ngamanavi. Pavuli pakuti tatauzgana nawu tingakamba kuti: “Tigwira nchitu yakudaniya ŵanthu ku unganu wachigaŵa yo yichitika pacharu chosi chapasi. Londiyani kapepala yaka. Vinandi valembeka pa kapepala kenaka.” Peji lakwamba la kapepala yaka ndakuchitiska munthu kuti waŵi ndi linweka, mwaviyo pakupereka mulongoni papeji lenili. Longoni kuti mwe ndi likondwa pakugwira nchitu iyi. Asani mugaŵa timapepala iti pa Chisulu ndi pa Sabata, mugaŵiyengi so ndi magazini asani nkhwakwenere.