Mo Tingagwiriskiya Ntchitu Vinthu Vakuvwisiya
1. Kusazgapu pa vinthu vakulembeka, kumbi te ndi vinthu wuli vinyaki?
1 Ŵanthu anandi aŵerenga nkhani zakukondwesa kweniso zauneneska pa jw.org. (Wak. 12:10) Kumbi mukugwiriskiyapu ntchitu vinthu vakuvwisiya? Vinthu ivi vitovya ŵanthu anandi kuti avwisiyengi nkhani zinandi zo ze pa webusayiti yidu. Kumbi vinthu vakuvwisiya vingatiwovya wuli?
2. Kumbi tingagwiriskiya wuli ntchitu vinthu vakuvwisiya asani tisambira Bayibolu pakutija kweniso asani tichita kusopa kwa pabanja?
2 Asani Tisambira Bayibolu Pakutija Pamwenga pa Kusopa kwa Pabanja: Kuvwisiya Bayibolu, magazini ndi vinthu vinyaki vakuvwisiya asani te paulendu pamwenga asani tigwira ntchitu yinyaki kungatiwovya kuti tigwiriskiyi ntchitu mwazeru nyengu yidu. (Ŵaef. 5:15, 16) Pa kusopa kwa pabanja tingavwisiya vinthu venivi ndi kulondo m’buku lidu vo viŵerengeka. Kuvwisiya vinthu venivi asani tisambira Bayibolu pakutija kungatiwovya kuti tisambiri kuŵerenga mwalusu kweniso kuti tisambiri chineneru.
3. Kumbi vinthu vakuvwisiya vingawovya ukongwa ayani mu uteŵeti?
3 Mu Uteŵeti: Ŵanthu wo aleka kusaniya nyengu yakuŵerenge angayanja kuvwisiya vinthu vakuvwisiya. Pamwenga asani takumana ndi munthu wa chineneru chinyaki kweniso wo atanja kuvwisiya uthenga wa Ufumu mu “chineneru chawu,” tingaŵagaŵiya vinthu venivi. (Mac. 2:6-8) M’madera nganyaki ŵanthu atanja ukongwa kuvwisiya nkhani. Mwakuyeruzgiyapu, ŵanthu a ku Laos akonkhoske ŵana ŵawu vinthu vo vikuchitika kali ukongwa, ndipu ivi vitovya kuti nkhani zilekengi kuluwika. Ŵanthu anandi ku Africa asambira vinthu asani avwisiya nthanu.
4. Kumbi ndi mafumbu nanga ngo tingajifumba asani tipenja kuwovya ŵanthu a m’chigaŵa chidu?
4 Kumbi ŵanthu a m’chigaŵa chinu angayanja kuvwisiya vinthu venivi mu chineneru chawu? Kumbi mukugaŵiyapu munthu vinthu venivi kuti wavwisiyi? Mungakopa vinthu venivi pa webusayiti yidu ndi kuviŵika m’ma CD. Mungagaŵiya ma CD ngenanga limoza ndi buku pamwenga magazini ngo akujambulamu mazu kuti ngakamuwovyengi kulondo asani wavwisiya CD. Asani tagaŵiya munthu CD yo akujambulamu mazu nga buku, kabuku, kapepala pamwenga magazini, tilembengi palipoti lidu la uteŵeti wakumunda. Vinthu vakuvwisiya vikupangika kuti vitiwovyi asani tisambira Bayibolu pakutija kweniso asani tipanda mbewu zauneneska za Ufumu.—1 Ŵakor. 3:6.