Kumbi Ndikhumbika Kupemphera kwa Atuŵa Mtima?

Vo Bayibolu limuka

Awa. Bayibolu likamba kuti tikhumbika kupemphera kwaku Chiuta pe kuziya mu zina laku Yesu. Yesu wangukambiya akusambira ŵaki kuti: “Kweni yimwi mupempherengi viyo: Awusefwi akuchanya, zina linu lipaturiki.” (Mateyu 6:9) Iyu wanguŵakambiyapu cha kuti apempherengi kwa atuŵa mtima, angelu, pamwenga ku munthu munyaki weyosi kupatuwaku Chiuta.

Yesu wangukambiya so akusambira ŵaki kuti: “Ini ndini nthowa, uneneska ndi umoyu. Palivi munthu yo watuza kwa Ada kwambula kuziya mwaku ini.” (Yohane 14:6) Mwaviyo, Chiuta wakupaska mazaza Yesu pe kuti watiŵeyeriyengi mumalu mwidu.—Aheberi 7:25.

Kumbi ndingapemphera kwaku Chiuta kweniso kwa atuŵa mtima?

Dangu linyaki pa Marangu 10 ndakuti: “Ini AMBUYA Chiuta waku ndini Chiuta wasanji.” (Chituwa 20:5, Mazu Ghaku Chiuta) Kumbi Chiuta ‘ngwasanji’ munthowa wuli? Mazu ngamumphata mu Bayibolu la New American Bible ngakamba kuti iyu “wakhumba kuti ŵanthu asopengi iyu pe.” Chiuta wakhumba kuti ŵanthu apempherengi kwaku iyu pe mbwenu.—Yesaya 48:11.

Titimuguŵisa Chiuta asani tipemphera ku munthu weyosi, chinanga mbanthu atuŵa mtima pamwenga angelu akupaturika. Pa nyengu yo wakutumika Yohane wakhumbanga kusopa mungelu, mungelu yo wangumukaniza ndipu wangumukambiya kuti: “Ungachitanga viyo cha! Nani nde kapolu munyaku ŵaka ndipuso nde kapolu munyawu wa abali ŵaku ŵeniwo ŵe ndi ntchitu yakupereka ukaboni waku Yesu. Sopa Chiuta!”—Chivumbuzi 19:10.