Nchitu Yakukhumbika Ukongwa
1. Kumbi kuwonga kwidu uteŵeti kutiwovyengi kuchitanji?
1 Kumbi nchifukwa wuli nyengu zosi tichiskika kuti tigwiriskiyengi nchitu nyengu, nthazi ndi chuma chidu pa uteŵeti? Chifukwa chakuti palivi so nchitu yinyaki yakukhumbika ukongwa kuphara iyi. Asani tiwona vakutuwapu vamampha va nchitu iyi, tiŵengi ndi mtima wakukhumbisiska kugwira mwanthazi nchitu yo yazamuchitika so cha.—Machi. 20:24.
2. Kumbi nchitu yakupharazga yitovya wuli kuti zina likuru laku Yehova litozgeki?
2 Yitozga Zina Laku Yehova: Nchitu yakupharazga yilongo kuti Ufumu waku Yehova wo uwusika ndi Yesu Khristu userengi m’malu mwa maboma ngosi nga ŵanthu ndipu umaliskengi masuzgu ngo ŵanthu akumana nangu. (Mate. 6:9, 10) Yehova wakuzgika chifukwa chakuti iyu yija ndiyu we ndi nthazi yakutitaska ku matenda ndi nyifwa. (Yesa. 25:8; 33:24) Chifukwa chakuti tiziŵika ndi zina laki, ŵanthu anyaki wo awona mijalidu yidu yamampha ndi phamphu lidu, angamukankhuska. (1 Pet. 2:12) Tituŵa ndi likondwa likulu chifukwa chakuziŵiska zina laku Yehova, Ambuya Mura Kuruska Weyosi.—Sumu 83:18.
3. Kumbi ŵanthu wo avwiya uthenga wa Ufumu alonde vitumbiku wuli?
3 Yitaska Maumoyu: Yehova ‘wakhumba cha kuti yumoza wanangiki kweni wakhumba kuti wosi alapi.’ (2 Pet. 3:9) Kweni kumbi ŵanthu angaziŵa wuli vinthu vo Yehova wativiwona kuti vamampha pamwenga viheni asani palivi yo wangaŵasambiza? (Yona 4:11; Ŵaro. 10:13-15) Asani ŵanthu avwiya uthenga wamampha, asintha umoyu wawu ndi kuleka vinthu viheni vo achitanga. (Mika. 4:1-4) Kweniso, atuŵa ndi chilindizga chamampha chakuzilonde umoyu wambula kumala. Nchitu yidu yakupharazga ndi kusambiza yitaska taŵeni ndi wo atitivwa. (1 Timo. 4:16) Te ndi udindu wakuzirwa ukongwa pa nchitu yakukhumbika ukongwa iyi.
4. Nchifukwa wuli titenere kuchita phamphu ukongwa panchitu yakupharazga za Ufumu ndi kupanga akusambira?
4 Pambula kuswera yapa, suzgu yikulu yizisengi umaliru wamabuchibuchi pa charu chambula urunji ichi. Wosi wo ŵe ku chigaŵa chaku Yehova azamupozomoka. Mwaviyo, nchitu yakupharaza ndi kupanga akusambira yo yichitika mazuŵa nganu njakukhumbika kuchitika mwaliŵi ukongwa, njakuzirwa ndipuso njakwanduliska. Titenere kuyiŵika panthazi pa vinthu vosi vo tichita paumoyu widu.—Mate. 6:33.