SAMBIRU 11

Mukambengi Nkhani Ndi Mtima Wosi

Aroma 12:11

FUNDU YAKUDUMUWA: Mukambengi nkhani ndi mtima wosi kuti muchiski akuvwisiya.

Namwi mukwaskikengi ndi vo musambiza. Pa nyengu yo munozgeke nkhani yinu, ŵanaŵaniyani kukhumbika kwa uthenga wo we mu nkhani yo. Mukhumbika kunozgeke mwakukwana kuti mukakambengi kutuliya mu mtima.
Muŵanaŵaniyengi akuvwisiya. Muŵanaŵaniyengi mo nkhani yo mwamuŵerenga pamwenga kusambiza yingawovye akuvwisiya. Ndipu saniyani nthowa zo mungachikonkhoske nkhani yinu mwakuvwika umampha kuti yikaŵafiki pa mtima akuvwisiya.
Musambizengi kutuliya mu mtima. Mukambengi nkhani ndi mtima wosi. Mugwiriskiyengi ntchitu majesichala nge mo mulongolore nyengu zosi ndipu chisku chinu nachu chilongongi mo muvwiya.

Mungagwiriskiyanga ntchitu jesichala limoza mwakuwerezawereza cha nge kuti nkhalusu, chifukwa venivi vingatimbanyizga akuvwisiya. Ndipu muchitengi majesichala po mphakwenere. Mukambengi nkhani ndi mtima wosi ukongwa asani mukhumba kukonkhoska fundu zikuluzikulu ndipuso kuchiska akuvwisiya kuchitapu kanthu. Nge mo takambiya, mukambengi nkhani ndi mtima wosi, kweni mungajumphiskanga mwesu cha, chifukwa venivi vingachitiska akuvwisiya kuvuka ndi nkhani yinu.