Jehovha o vbweta gu khuye libandla li phara kharini ava va giridego sighoho nya sikhongolo?

1. Jehovha o vbweta gu khuye vathu vatshavbo va gira ginani?

JEHOVHA vangide vathu a bwe a va ninga gutshulega. Uwe wa gu thumisa giningwa gegi tepo u hungago makungo. Gu dzi hendzeledza ga Jehovha ni gu gira gipandre nya ndranga Yaye khayo makungo nya lisima ngudzu aya muthu a nga hungago. Jehovha o vbweta gu khuye vatshavbo va gira isoso. Khu ginani? Kholu uye a ngu haladza vathu nigu a gu va suveya silo nya sadi. Uye a gu vbweta gu khuye va tsaka khu gu gira wupari naye va bwe va vbanya kala gupindruga. — Dhet. 30:19, 20; Gal. 6:7, 8.

2. Jehovha a gu va wona kharini vale va si dzi layigo? (1 Johane 2:1)

² Ambari ulolo, Jehovha kha gurumedzi muthu gasi gu mu thumeya. Uye a gu dzumeleya gu khuye moyo ni moyo wathu a hunga esi a vbwetago gu gira. Ahati a gu tshuka Mukristo a bhabhatisidwego a ndraga nayo wa Nungungulu khu gu gira gighoho nya gikhongolo. A gu mba dzi laya, a yede gu duswa libandlani. (1 Kor. 5:13) Ambari ulolo, Jehovha a gu vireya gu khuye muthu yoyo a bweleya gwaye. Khu lisine, egi khigyo gighelo nya lisima gi kutsidego Jehovha a gira malulamiselo nyo hi ninge dzegiso, gasi si kodzega gu divaledwa sighoho sa vale va dzi layago. (Leri 1 Johane 2:1.) Nungungulu wathu nya lihaladzo a gu lomba vatshavbo va giridego sighoho nya sikhongolo gasi va dzi laya. — Zak. 1:3; Rom. 2:4; Jak. 4:8.

3. Ginani hi na ganeyago khigyo avba nya ndrima yeyi?

³ Jehovha a gu vbweta gu khuye hi manega ni mawonelo yaye maningano ni vale va giridego sighoho. Ndrima yeyi, yi na ganeya khedzi hi nga girago khidzo isoso. Tepo u yi lerigo, wona edzi 1) si nga ba si khathaledwa khidzo sighoho nya sikhongolo libandlani la Korinto ga lizana myaga nyo pheye, 2) sileletelo esi Pawulo a ningedego madhota gasi gu phasa gighohi gi dzi layidego ni 3) edzi matimo yaya nya Bhibhiliya ma yeyedzago khidzo mawonelo ya Jehovha khu Makristo ma giridego sighoho nya sikhongolo.

EDZI SI NGA BA SI KHATHALEDWA KHIDZO SIGHOHO NYA SIKHONGOLO GA LIZANA MYAGA NYO PHEYE

4. Ginani gi giregidego libandlani nya liphya la Korinto? (1 Vakorinto 5:1, 2)

⁴ Leri 1 Vakorinto 5:1, 2. Ndrani nya liendro laye nya wuraru nya wumisiyonariyu, Pawulo pwide mahungu nya mba tsakisa maningano ni esi si nga ba si girega libandlani nya liphya la Korinto. Ndriyathu nyo khaguri a di giride wubhayi ni mwangadzi wa papayi waye. Iso a giridego si di gu thisa nigu si di ‘si tidwi ambari khu vanyamayigo.’ Libandla kha la nga ba li dzumeleya basi mavbanyelo yoyo, ganiolu va di gu dzumeleya muthu yoyo gu simama libandlani. Vambe si nga gira na va pimiside gu khavo va di gu yeyedza wuhindzi nga Jehovha. Ganiolu, Jehovha kha nga ba a tsakiswa khu mavbanyelo yoyo. Khu kotani nya mavbanyelo yaye nyo vivbe, ava va nga ba va si khozeyi Jehovha va di gu tshunganeya va bwe va ganeya silo nyo vivbe khu vathu va Jehovha. Uye gambe a di hadzi gu kutsedzeya mambe Makristo gu mu pimedzeya. Ganiolu, ginani egi Pawulo a kutsidego libandla gu gira?

5. Ginani egi Pawulo a kutsidego Makristo libandlani la Korinto gu gira, nigu a di gu vbweta gu ganeya ginani? (1 Vakorinto 5:13) (Wona fotu.)

⁵ Leri 1 Vakorinto 5:13. Khu gu kutswa khu liphuvbo nya guage, Pawulo a di loveya lidangaliya libandla la Korinto, a va embeya gu khuye ava va si dzi layigo va yede gu duswa libandlani. Makristo nyo tumbege ma di yede gu va phara kharini vathu vovo? Pawulo a di va kutsa gu “diga gu dzi tshanganisa” navo. Isoso si di gu thula ginani? Pawulo a va tshamusede gu khuye gileletelo gegi gi di gu pata gu mba ‘hodza ni vathu nya nga vovo.’ (1 Kor. 5:11) Gu khala u hodza ni muthu nyo khaguri, si nga gu gira u gira wupari naye. Khu kharato, si ngu pwala gu ba Pawulo a kutside vandriyathu libandlani gasi va si vbungadzi ni vathu vovo. Isoso si di hadzi gu vhikeya libandla ga mikutsedzelo nya mba yadi. (1 Kor. 5:5-7) Gimbe gambe khu gu, ha gu diga gu vbungadza navo, si na va gira va pwisisa gu khavo esi va giridego si khunguvanyiside Jehovha. Khavbovbo, vapwa dzitshoni va bwe va dzi laya.

6. Lidangaliya la Pawulo li kuhide kharini libandla gumogo ni mwama wule a nga ba a ghohide?

⁶ Hwane nya gu ba Pawulo a rumede lidangaliya lolo Makristo ya Korinto, dzi wudziside gu khuye va di hadzi gu li hakha kharini! Khu gu gimbiya nya tepo, Tito a di mu reseya mahungu nya yadi. Libandla li di hakhide gwadi lidangaliya la Pawulo. (2 Kor. 7:6, 7) Va di gu landriside sileletelo saye. Na yi gu vbindride tepo nyo khaguri, hwane nya gu ba va hakhide lidangaliya laye, mwama wule a di yeyedzide gudzilaya. Uye a di gu vbindrugedzide mavbanyelo yaye a bwe a pheya gu landrisa milayo nyo lulame ya Jehovha. (2 Kor. 7:8-11) Khu gu landreya, ginani egi Pawulo a kutsidego libandla gu gira?

EDZI LIBANDLA LI NGA BA LI YEDE GU PHARA KHIDZO GIGHOHI GI DZI LAYIDEGO

7. Ginani gi giregidego khu gu ba mwama wule a dusidwe libandlani? (2 Vakorinto 2:5-8)

⁷ Leri 2 Vakorinto 2:5-8. Pawulo a di wona gu khuye ‘tsayiso wu ningidwego muthu yoyo wu di gu enede.’ Khu mambe malito, khu gu ba mwama wule a kawukidwe, si di gu mu phaside gasi a dzi laya, nigu libandla kha la nga ba li yede gu simama gu mu kawuka. — Hebh. 12:11.

8. Ginani gambe Pawulo a embedego libandla gasi gu gira?

⁸ Pawulo a di embeya libandla gu khuye: “Gu vbwetega mu mu divaleya mu bwe mu mu thaveleya”, mu bwe “mu mu yeyedza gu khenu mu nga gu mu haladza.” Khu kotani nya olu mwama wule a nga ba a dzi layide, Pawulo a di embeya madhota gasi ma mu dzumeleya, a wuya libandlani. Pawulo a di gu vbweta gu khuye madhota ma mu tiyisegisa khu malito ni sigiro gu khayo ma mu divalede, nigu ma ngu mu haladza. Isoso si di gu yeyedza gu khiso ma di gu tsaka khu gu ba a wide libandlani.

9. Khu ginani adzina vambe va kangamidego gu divaleya ndriyawe a giridego gighoho nya gikhongolo?

⁹ Ina si garadzede vandriyathu nyo khaguri libandlani gu hakha muthu yoyo a dzi layidego? Matimo kha ma si khumbugi isoso, ganiolu adzina si giregide. Vambe adzina va di ngo gorogide khu sigaradzo a vangidego libandlani ni gu ba a thede dzitshoni vathu nyo khaguri. Nigu vambe va nga ba va dzi garadzeya gu engisa sileletelo sa Jehovha, si nga gira na si va garadzede gu mu hakha libandlani, khu kotani nya olu a giridego sighoho nya sikhongolo. (Fananisa ni Luka 15:28-30.) Ganiolu, khu ginani si nga ba siri sa lisima gu libandla li yeyedza lihaladzo nya lisine ga ndriyathu a wuyidego libandlani?

10-11. Ginani gi nga hadzi girega madhota ma gu tshuka ma bomba gu divaleya ndriyawe a dzi layidego?

¹⁰ Nga dundrugeya khesi si nga hadzi gu girega ma gu tshuka madhota ma si dzumeleyi gu khayo muthu a dzi layidego a wuya libandlani mwendro libandla li si yeyedzi lihaladzo muthu yoyo? Uye a di hadzi vandramedwa khu gudzipwa nandru nya gukhongolo nyo bwe “a vbeya tshivba.” Adzina a di hadzi gu pimisa gu khuye gigaradzo gyaye gi mwalo rendre. A pimisa gu khuye Jehovha gima kha na nga mu divaleya nigu ambari a gu vbindrugedza mavbanyelo gimwalo gi na vbindrugedzago.

¹¹ Ambari a gu ba ndriyathu nyo khaguri a giride gighoho nya gikhongolo kharini, vandriyathu libandlani va gu mba mu divaleya, si nga mu gira a luza wupari waye ni Jehovha. Khu ginani? Kholu isoso si di hadzi gu pwana gwadi ni mavbanyelo nya litsoro ni gu mba na wuhindzi ya Sathane, wulangani nyo pimedzeye Jehovha, a divaleyago. Khu kharato, avo va di hadzi gu thumiswa khu Sathane gasi gu songa vambe khu liphuvboni. — 2 Kor. 2:10, 11; Efes. 4:27.

12. Libandla li di hadzi gu pimedzeya kharini Jehovha?

¹² Libandla la Korinto li di hadzi gu pimedzeya kharini Jehovha nasiri Sathane? Khu gu phara ava va dzi layidego nga edzi Jehovha a va pharago khidzo. Wona esi valovi nyo khaguri nya Bhibhiliya va ganedego khu Jehovha. Dhavhidhe a di khuye: Uye ‘khwadi nigu a ngu tsetselela.’ (Ndzi. 86:5) Mikeya a di lova gu khuye: “Khu mani uwe Nungungulu a fananago ni uwe, u tsetselelago guvivba, ni gu divalela guyeyisa.” (Mik. 7:18) Nigu Isaya a di lova gu khuye: “Muthu nya guvivbedwe khu monyo a na dige ndzila yaye nya guwegele, ni uyo nyamba lulama a na dige mipimiso yaye; a na vbindrugedze mavbanyelo a wuya ga Pfhumu Nungungulu, uye a na mu pwela gisiro, wuyani ga Nungungulu wathu, kholu tade khu wuhindzi ni gutsetselela.” — Isa. 55:7.

13. Khu ginani madhota ma nga ba yede gu dzumeleya mwama wule a giridego gighoho a wuya libandlani? (Wona kwadru “Mwama wule wa Korinto a wuyisedwe khu tepo muni?”)

¹³ Gasi gu pimedzeya Jehovha, libandla la Korinto li di yede gu hakha mwama wule a dzi layidego va bwe va mu yeyedza lihaladzo. Pawulo a di ganeya gu khuye libandla la gu divaleya mwama wule a nga dzi laya, li na ba li yeyedza gu khilo li “ngu engisa siloni satshavbo.” (2 Kor. 2:9) Ambari olu mwama wule a nga duswa libandlani khu migima nyo khaguri, uye a dzi layide. Khu kharato, madhota kha ma nga ba yede gu hweya gu mu dzumeleya a wuya libandlani.

PIMEDZEYA GULULAMA NI WUHINDZI WA JEHOVHA

14-15. Ginani hi gi hevbulago khesi si giregidego Korinto? (2 Pedro 3:9) (Wona fotu.)

¹⁴ Edzi ma nga pharwa khidzo mahungu ya mwama wule nya gighohi wa libandlani la Korinto, ma di lowa gasi “gu hi hevbudza.” (Rom. 15:4) Matimo yaya ma gu hi hevbudza gu khayo Jehovha kha dzumeleyi vale va girago sighoho nya sikhongolo ni gu mba dzi laya va simama libandlani. Vambe va nga pimisa gu khavo khu kotani nya olu Jehovha a gu na ni wuhindzi, a nga dzumeleya muthu a ghohidego a bwe a si dzi laye a simama libandlani, ganiolu Jehovha kha yeyedzi kharato wuhindzi waye. Jehovha a na ni wuhindzi, ganiolu kha dzumeleyi mavbanyelo yatshavbo nigu milayo yaye nya esi nya sadi ni esi nya mba sadi kha yi vbindrugedzi. (Judha 4) Khu kharato, ha gu dzumeleya gighohi gi si dzi layigo gi simama libandlani, libandla latshavbo li na ba li romo mhangoni. — Mav. 13:20; 1 Kor. 15:33.

¹⁵ Ambari ulolo, hi hevbude gu khethu Jehovha kha vbweti gu khuye ne ni moyo a fuviswa. Tepo yatshavbo sa gu kodzega, uye a gu vbweta gu vbulugisa vathu. Uye a gu yeyedza wuhindzi vathu va vbindrugedzago mapimo yawe ni sigiro sawe va bwe va wusedza wupari wawe naye. (Ezek. 33:11; leri 2 Pedro 3:9.) Khu kharato, tepo mwama wule wa Korinto a nga dzi laya a bwe a vbindrugedza mavbanyelo yaye, Jehovha a di leleteya libandla gasi gu mu divaleya va bwe va mu dzumeleya a wuya gambe libandlani.

16. Wa gu dzipwa kharini khedzi mahungu ma pharidwego khidzo libandlani la Korinto?

¹⁶ Esi si giregidego libandlani la Korinto sa gu yeyedza gu khiso Jehovha a na ni lihaladzo nya likhongolo ni gu a lulamide. (Ndzi. 33:5) Guti isoso si ngu hi kutsa gu engedzeya gu mu dhumisa. Hi ngu bonga ngudzu khu gu ba Jehovha ari ni wuhindzi, kholu hatshavbo hi si ghohi nigu hi ngu vbweta gu divaledwa. Hatshavbo hi na ni sighelo gasi gu bonga Jehovha khu dzegiso, wu girago gu si kodzega gu divaledwa sighoho sathu. Si ngu thaveleya gu dziti gu khethu Jehovha a ngu haladza vathu vaye nigu a ngu va suveya silo nya sadi!

17. Siwudziso muni hi na bhulago khiso ga dzindrima dzi landreyago?

¹⁷ A gu tshuka muthu nyo khaguri a gira gighoho nya gikhongolo muhuno, madhota libandlani ma nga pimedzeya kharini lihaladzo la Jehovha ma bwe ma phasa muthu yoyo gasi gu dzi laya? Libandla ginani li yedego gu gira, madhota ma gu hunga gu dusa mwendro gu dzumeleya muthu nyo khaguri a wuya libandlani? Siwudziso sesi hi na bhula khiso ga dzindrima dzi landreyago.