Madhota ma nga phasa kharini muthu a nga duswa libandlani?

1-2. a) Jehovha o wona kharini muthu a girago gighoho khu nya gigwenye? b) Ginani egi Jehovha a vbwetago gu khuye sighohi si gira?

JEHOVHA kha tsakiswi khu mavbanyelo nyo vivbe. Uye a ngu nyenya gighoho. (Ndzi. 5:4-6) Uye o vbweta gu khuye hi engisa milayo yaye nyo lulame a hi ningago khu gu thumisa Lito laye. Ganiolu, Jehovha a ngu dziti gu khuye ethu kha ha vbeleya, nigu kha hi na nga si kodza gu mu engisa khu gu vbeleya. (Ndzi. 130:3, 4) Ambari ulolo, uye a ngu nyenya “vathu nya guvivbedwe khu myonyo va thumisago wuwadi nya wukhongolo wa Nungungulu wathu gasi gu dzi emeleya va manega ni mavbanyelo nya dzitshoni.” (Judha 4) Bhibhiliya yari khiyo Nungungulu a na ‘fuvisa vathu va si mu ningigo githawo’ ga nyimbi ya Arimagedhoni.— 2 Ped. 3:7; Gutu. 16:16.

² Ganiolu, Jehovha kha vbweti gu khuye ne ni moyo a fuviswa. Kha nga hi nga si wona ga dzindrima dzi vbindridego, Bhibhiliya yari khiyo Jehovha o “vbweta gu khuye vatshavbo va dzi laya.” (2 Ped. 3:9) Madhota nya Makristo ma ngu pimedzeya Jehovha tepo ma zamago khu gulaphisa-monyo ni gu phasa sighohi gu dzi laya si bwe si wusedza wupari waso ni Jehovha. Nya mba tsakisa khu gu, khandri sighohi satshavbo si dzi layago. (Isa. 6:9) Ambari olu madhota ma zamago kheno ni eno gu phasa sighohi gu dzi laya, vambe va ngu simama gu beya khu hungo omu nya mavbanyelo nyo vivbe. Ganiolu, ginani ma yedego gu gira ga giemo nya nga egi?

“MUTHU NYA GUVIVBE MU YEDE GU MU DUSA VBAKARI GWANU”

3. a) Gileletelo muni egi Bhibhiliya yi ningago maningano ni sighohi si gu mba dzilaya? b) Khu ginani hi nga ganeyago gu khethu gighohi gi di dzi hatheya gyabune gu duswa libandlani?

³ Gya gu tshuka gighohi nyo khaguri gi si dzi laye, gimwalo gimbe gilo madhota ma nga girago vbavbandze nyo landrisi gileletelo gi gomogo omu ga 1 Vakorinto 5:13 gi gu khigyo: “Muthu nya guvivbe mu yede gu mu dusa vbakari gwanu.” Gasi gu ganeya lisine, gighohi gi di dzi hatheya gyabuni mihimbo yeyi; gyo vbwera mihandro nya esi gia nga yala. (Gal. 6:7) Khu ginani hi ganeyago isoso? Kholu igyo gi di veta khu magata satshavbo esi madhota ma nga gira gasi gu gi phasa gu dzi laya. (2 Dzipf. 17:12-15) Igyo gi yeyedzide khu mithumo yagyo gu khigyo kha gi dzini gu vbanya khu milayo ya Jehovha. — Dhet. 30:19, 20.

4. Khu ginani libandla li tiviswago tepo gighohi gi gu mba dzi laya gi duswago libandlani?

⁴ Tepo gighohi gi gu mba dzi laya gi duswago libandlani, gi na lerwi gitiviso gasi gu tivisa libandla gu khilo muthu yoyo digide gu khala Fakazi ya Jehovha.b Makungo nya gitiviso gegi khandri gu theya dzitshoni muthu yoyo. Vbavbandze nya isoso, gyo girwa gasi gu phasa libandla gu landrisa gileletelo nya Bhibhiliya nya gu digi gu dzi “tshanganisa” ni muthu yoyo “ne gu hodza” naye kamo. (1 Kor. 5:9-11) Jehovha a na ni sighelo nyo pwale nyo hi ninge gileletelo gegi. Mupostoli Pawulo lovide gu khuye: “Livhirina yidugwana yi ngu gugumugisa wuguvbi watshavbo.” (1 Kor. 5:6) Sighohi si gu mba dzi laya si nga gira gu gukhodwa ga vale va dzi garadzago gu vbanya khu milayo ya Jehovha nyo lulame gu vbola. — Mav. 13:20; 1 Kor. 15:33.

5. Hi yede gu mu wona kharini muthu nyo khaguri a dusidwego libandlani, nigu khu ginani?

⁵ Hi yede gu wona kharini muthu nyo khaguri a dusidwego libandlani? Ambari olu hi ngu mba tshangana naye, hi yede gu mu wona nga nvuta yi nga dzimeya na siri nga gighohi gi gu mwalo rendre. Nvuta yi nga dzimeya, yi nga si kodza gu mana ndziya nyo bweleye tshambini. Dundruga gu khuwe nvuta yoyo yi nga ba yi dzimede yi dzi hendzeledzide ga Jehovha. Kha nga olu iyo yi gu mba vbanya guya khu milayo ya Jehovha olu, yo gira gu khatshi nala tshambini. (Ezek. 18:31) Nya gu tsakise khu gu yo ba yi nga romo tepo, Jehovha a dzi emisede gu yeyedza wuhindzi muthu yoyo a gu hunga gu dzi laya. Madhota ma nga pimedzeya kharini giyeyedzo gya Jehovha tepo ma khataleyago mahungu ya ava va nga duswa libandlani?

EDZI MADHOTA MA PHASAGO KHIDZO AVA VA DUSIDWEGO LIBANDLANI

6. Dzindziya muni edzi madhota ma na dzi thumisago gasi gu phasa oyu a dusidwego libandlani?

⁶ Ina muthu a dusidwego libandlani o digwa enga, a si phaswi khu muthu gasi gu wuya ga Jehovha? Ne vbadugwana! Tepo gighohi gi gu mba dzilaya gi embedwago gu pwani gi na duswa libandlani, kometi nya madhota yi na mu tshamuseya gu khiyo ginani a yedego gu gira gasi a wuyeleya libandlani. Gu diga isoso, madhota ma na gira simbe silo gambe. Ga siemo nya singi, ayo ma na embeya gighohi gyogyo gu khayo ma ngu tsakeya gu tshangana gambe nagyo hwane nya migima nyo khaguri gasi ma wona gu khayo gi vbindrugedzide mwendro ne. Gighohi gya gu dzumeya gu tshangana gambe navo, madhota ma na thumisa tshangano wowo wu na girwago hwane nya migima nyo khaguri gasi gu kutsa muthu yoyo gu dzi laya. Abari gu gighohi gi si dzi laye ga tepo yoyo ma na tshanganago nagyo, madhota ma nga gi lomba gambe gu tshangana nagyo hwane nya migima nyo khaguri gasi ma gi kutsa gu dzi laya.

7. Madhota ma ngu pimedzeya kharini wuhindzi wa Jehovha tepo ma khataleyago mahungu ma ganeyago khu vale va nga duswa libandlani? (Jeremiya 3:12)

⁷ Madhota ma ngu dzi garadza gu yeyedza wuhindzi wa Jehovha tepo ma khataleyago mahungu ya vale va nga duswa libandlani. Khu giyeyedzo, Jehovha kha vireya gu khuye vathu vaye nya mba engisa va Israyeli wa gale va pheya khavo gu gira gilogyo. Vbavbandze nya isoso, uye a di dzi emisede gu gira gilogyo ambari kamo na va si yeyedzi ne ni tshota mweyo nya gu dzi laye. Kha nga hi nga si wona ga dzindrima dzi vbindridego, Jehovha yeyedzide wuhindzi waye khu gu embeya muprofeti Hoseya gu divaleya mwangadzi waye ambari olu a nga ba a simama gu gira gighoho nya gikhongolo. (Hos. 3:1; Mal. 3:7) Madhota ma ngu pimedzeya giyeyedzo gya Jehovha, khu kharato, ma ngu dzina khu monyo wawe watshavbo gu phasa gighohi gu bweleleya ga Jehovha nigu ayo kha ma garadzisi giemo. — Leri Jeremiya 3:12.

8. Gipimaniso egi Jesu a gi khumbugidego maningano ni gyanana gi nga ba gi dzimede gyo yeyedza kharini wuhindzi wa Jehovha? (Luka 15:7)

⁸ Dundruga edzi papayi nya gyanana gi nga ba gi dzimede gi khumbugwago omu nya gipimaniso gya Jesu a dzipwidego khidzo. Tepo a nga wona gyanana gyaye na gi bweleya gaya papayi a di ‘khuga khu gututuma a ya gi abrasari a bwe a gi bhejari.’ (Luka 15:20) Dundruga gu khuwe papayi kha vireya kala gyanana gi mu lomba divalelo. Ganiolu, a di pheya khuye gu gira gilogyo, a gu esi vapapayi vatshavbo nya lihaladzo va girago. Madhota ma ngu dzi garadza gu phara khu ndziya yayimweyo vale va nga duga khu tshambini. Ayo mo vbweta gu khayo dzinvuta dzi nga dzimeya dzi ‘wuya gaya.’ (Luka 15:22-24, 32) Li ngu manega litsako nya likhongolo ngudzu ndzadzini ni mafuni tepo gighohi gi dzi layago! — Leri Luka 15:7.

9. Ginani egi Jehovha a embeyago ava va nga duswa libandlani?

⁹ Kala avba hi si kodzide gu wona gu khethu Jehovha kha dzumeyi gu khuye sighohi si gu mba dzi laya si simama libandlani. Ganiolu, uye gambe kha va tsukuli. Uye o vbweta gu khuye va dzi laya. Libhuku la Hoseya 14:4 li ngu yeyedza esi Jehovha a nga dzi emiseya gu gira khu sighohi si dzi layago, ilo lari khilo: “Nyi na dusa gu mba tumbega gwawe, nyi va gola khu monyo wangu watshavbo, kholu likhulo langu li na duga avbo gwawe.” Giyeyedzo gya Jehovha gi ngu kutsa madhota gu vega gupima ga silo satshavbo muthu a girago si yeyedzago gu khiso a dzi layide khu lisine. Gu diga isoso, gu dzi emiseya ga Jehovha gu ngu kutsa gambe ava va nga dzi hambanisa ni tshambi, va bweleya gaya.

10-11. Madhota ma nga gira kharini gasi ma zama gu phasa vale va gu na ni myaga nya yingi na va dusidwe libandlani?

¹⁰ Ganiolu, ahati vale va gu na ni myaga nya yingi na va dusidwe libandlani? Adzina vathu vovo va digide gu gira gighoho gi nga va gira va duswa libandlani. Nigu ga simbe siemo, avo ne kha va dundrugi gu khayo ginani gi nga va dusisa libandlani. Ambari ga gevbini giemo, madhota ma yede gu vbwetedzeya dzindziya nya gu wuseye vathu vovo. Ndrani nya liendro lolo, madhota ma na dzi ningedzeya gasi ma gombeya ni muthu yoyo ni gu mu kutsa gu bweleleya libandlani. Lisine gu, abari gu muthu yoyo womo khu myaga nya yingi vbavbandzi nya hengeledzano, nya mba kanakana uye vbode ngudzu khu liphuvboni. Ganiolu, a gu yeyedza gu khuye a ngu dzina gu bweleleya libandlani, madhota ma nga gira malulamiselo nya gu a gimbidzisedwa gihevbulo nya Bhibhiliya ambari kamo na si wuyisedwe. Ga satshavbo siemo, madhota khayo basi ma nga hadzi gu hatha muthu gasi gu mu gimbidziseya gihevbulo nya Bhibhiliya.

¹¹ Na va gu pimedzeya pweya-wusiwana wa Jehovha, madhota ma ngu dzi garadza gasi gu phasa vathu nya vangi gu dziti gu khavo lidimba li tulegide gasi va wuya. Ni gevbini gighohi gi dzi layago khu lisine, gi nga bweleleya hengeledzanoni nya mba hweya. — 2 Kor. 2:6-8.

12. a) Ga siemo muni madhota ma yedego gu hunga silo khu wugengeyi? b) Khu ginani hi gu mba yela gu pimisa gu khethu Jehovha kha na nga divaleya simbe sighohi? (Wona tshamuselo wa vbavbatshi.)

¹² Ga simbe siemo, madhota ma yede gu dzi woneya na ma si wuyiseyi muthu nyo khaguri. Khu giyeyedzo, a gu tshuka muthu a gira gighoho nya gu sagareye gyanana, a khala muwugeyi mwendro a gira makungo nya gu tshule mutshadho nya mba na gighelo nyo pwale, madhota ma yede gu tiyisega gu khavo muthu yoyo a dzi layide khu lisine mwendro ne. (Mal. 2:14; 2 Thim. 3:6) Madhota ma yede gu vhikeya libandla. Ganiolu, hi yede gu dundruga gambe gu khethu Jehovha a na hakha khu mandza mavili sighohi satshavbo si dzi layago khu lisine si bwe si diga mavbanyelo yaso nyo vivbe. Ambari olu madhota ma yedego gu dzi woneya tepo ma khataleyago mahungu nya vawugeyi, ayo kha ma yeli gu pimisa gu khayo vathu vava gima kha va na nga divaledwa khu Jehovha.c— 1 Ped. 2:10.

ESI LIBANDLA LI NGA GIRAGO

13. Khu gwevbini gu hambana gu gomogo avba nya edzi hi pharago khidzo muthu a nga kawukwa ni muthu a nga duswa libandlani?

¹³ Kha nga hi nga si wona ga ndrima yi vbindridego, dzimbe dzitepo libandla li ngu tivisa gu khilo muthu nyo khaguri a di kawukwa, ga giemo gegi hi nga simama gu tshangana ni muthu yoyo kholu hi ngu dziti gu khethu a dzi layide nigu kha giri gambe esi nyo vivbe. (1 Thim. 5:20) Uye a gu gira gipandre nya libandla nigu a ngu dzina gu tiyiswa gasi a simama gu gira silo nya sadi. (Hebh. 10:24, 25) Ganiolu, kha hi na nga phara muthu a dusidwego libandlani khu ndziya nyo fane. Kha hi giri “wupari” ni vathu vovo ne gu ‘hodza navo.’ — 1 Kor. 5:11.

14. Makristo ma nga thumisa kharini livhalo lawe li nga trenarwi gasi gu emisana ni ava va nga duswa libandlani? (Wona fotu.)

¹⁴ Ina gileletelo gi gomogo omu ga 1 Vakorinto 5:11 gyo thula gu khigyo kha hi yeli gu kovhidhari muthu a nga duswa libandlani gasi ata mitshanganoni mwendro gu losana naye tepo a tago mitshanganoni? Khu lisine ne. Lisine gu ethu kha hi na nga gira wupari naye. Ganiolu, Makristo ma nga thumisa livhalo lawe li trenaridwego khu Bhibhiliya gasi gu hunga gu khavo va na kovhidhari muthu a nga duswa libandlani a gu nongo mwendro adzina saye nari muthu a khalago vbafuvbi gwawe gasi ata wona mitshangano. Ganiolu, ahati a gu tshuka muthu yoyo ata mitshanganoni, hi yede gu mu phara kharini? Gale yoyo, hi di si losi vathu vovo. Avba gambe, Mukristo ni Mukristo a yede gu thumisa livhalo laye li nga hevbudzwa khu Bhibhiliya gasi gu hunga isoso. Vambe va nga dzipwa na va tshulegide gu losa mwendro gu hoyozeya muthu a nga duswa libandlani tepo a tago mitshanganoni. Ganiolu, kha hi na nga vbedza tepo nya yingi na hi gu bhula ni muthu yoyo mwendro gu gira wupari naye.

15. Sighohi muni si tshamusedwago omu ga 2 Johane 9-11? (Wona gambe kwadru yi gu khiyo “Ina Pawulo ni Johane va di gu ganeya khu gighoho gya gimwegyo?”)

¹⁵ Vambe va nga dzi wudzisa gu khavo: ‘Ina Bhibhiliya kha hi ganeyi gu khiyo muthu a gu losa muthu a nga duswa libandlani o patega naye gighohoni?’ (Leri 2 Johane 9-11.) Mongo nya livhesi leli lo yeyedza gu khilo gileletelo gegi gyo thuma ga vale va gu vawugeyi mwendro va andrisago mavbanyelo nyo vivbe. (Gutu. 2:20) Khu kharato, a gu tshuka muthu a andrisa mavbanyelo nyo vivbe mwendro sihevbudzo sa vawugeyi, madhota kha ma na nga wuseya muthu yoyo. Lisine gu adzina saye ga litshigu nyo khaguri avo va na dzi laya. Ganiolu, kala iyoyo ethu hi na simama na hi si losi muthu yoyo mwendro gu mu kovhidhari gasi ata mitshanganoni.

PIMEDZEYA WUHINDZI NI PWEYA-WUSIWANA WA JEHOVHA

16-17. a) Ginani egi Jehovha a vbwetago gu khuye sighohi si gira? (Ezekiyeli 18:32) b) Madhota ma nga thuma kharini ni Jehovha tepo ma zamago gu phasa gighohi gu dzi laya?

¹⁶ Ginani hi nga gi hevbula ga dzindrima nya Mukhedziseyi wowu? Jehovha kha vbweti gu khuye ne ni moyo a fuviswa! (Leri Ezekiyeli 18:32.) Uye o vbweta gu khuye sighohi si wuya gwaye. (2 Kor. 5:20) Khiso si girago Jehovha gukhugeya gale a kutsa vathu vaye gu diga mavbanyelo yawe nyo vivbe va bwe va wuya gwaye. Madhota ma ngu thuma ni Jehovha gasi gu phasa vale va nga gira gighoho nya gikhongolo gu dzi laya. — Rom. 2:4; 1 Kor. 3:9.

¹⁷ Nga dundrugeya khu litsako li manegago ndzadzini gya gu tshuka gighohi gi dzi laya! Papayi wathu wa ndzadzini, Jehovha, a ngu dzi buza khu litsako lolo tepo a wonago mweyo nya dzinvuta dzaye na dzi bweleya libandlani. Lihaladzo lathu khu Jehovha li ngu simama gu engedzeya tepo hi dundrugeyago khu wuhindzi, wuwadi ni pweya-wusiwana waye.— Luka 1:78.