1 Bakorinto

15 Lino bakwesu ndimuyeezya makani mabotu ngondakaambilizya kulindinywe,+ aayo ngomwakatambula alimwi ngomutobela cakusitikila. 2 Kwiinda mulingawo lino mulafwutulwa ikuti mukakatile kumakani mabotu ngondakaambilizya kulindinywe, ccita kuti mwakaba basyomi cabuyo.

3 Nkaambo akati kazintu zyakusaanguna nzyondakamwaambila kuli ceeco ncondakatambula andime, cakuti Kristo wakafwa kutegwa atwaangulule kuzibi zyesu kweelana ancaamba Magwalo;+ 4 ikuti wakazikkwa,+ wakabusyigwa+ mubuzuba bwatatu+ kweelana ancaamba Magwalo;+ 5 akuti wakalibonya kuli Kefasi,*+ mpoonya akuli bali Kkumi Ababili.+ 6 Kuzwa waawo wakalibonya kubakwesu bainda ku 500 aciindi comwe,+ ibunji bwabo tucili limwi, pele bamwi baloona mulufwu. 7 Kuzwa waawo wakalibonya kuli Jakobo,+ mpoonya akubaapostolo boonse.+ 8 Pele ciindi camamanino wakalibonya akulindime+ mbuli kumwana wakazyalwa ciindi kacitanakkwana.

9 Nkaambo ndendime muniini akati kabaapostolo boonse, alimwi tandeeleli kwiitwa kuti ndimwaapostolo, nkaambo ndakapenzya mbungano ya Leza.+ 10 Pele kwiinda muluzyalo lwa Leza ndili boobu mbondibede lino. Alimwi luzyalo ndwaakandifwida tiilwakaba lwabuyo pe, pele ndakabeleka cakulitakata kubainda boonse; nokuba boobo tandili ndime pe, pele nduzyalo lwa Leza ilulaandime. 11 Nokuba boobo, kufwumbwa naa ndime naa mbambabo, oobu mbotukambauka alimwi oobu mbomwakasyoma.

12 Lino ikuti kakukambaukwa kuti Kristo wakabusyigwa kubafwu,+ ino nkaambo nzi bamwi akati kanu ncobaambila kuti kunyina bubuke bwabafwu? 13 Ikuti naa ncobeni kunyina bubuke bwabafwu, nkokuti Kristo tanaakabusyigwa pe. 14 Pele ikuti naa Kristo tanaakabusyigwa, kukambauka kwesu ncobeni nkwabuyo alimwi alwalo lusyomo lwanu ndwabuyo. 15 Kunze lyaboobo, alimwi twaba bakamboni ba Leza bakubeja,+ nkaambo tupa bumboni kubejelezya Leza kwiinda mukwaamba kuti wakamubusya Kristo,+ pele walo ngwaatakabusya ikuti naa ncobeni bafwu tabakabusyigwi. 16 Nkaambo ikuti naa bafwu tabakabusyigwi, nkokuti Kristo tanaakabusyigwa pe. 17 Kunze lyaboobo, ikuti naa Kristo tanaakabusyigwa, lusyomo lwanu ndwabuyo; mucili muzibi zyanu.+ 18 Mpoonya abalo aabo boona mulufwu kabakamantene a Kristo bakaloba.+ 19 Ikuti naa ikulangila Kristo kwesu kakuli kwabuumi obuno bulikke, nkokuti tuleetezya kapati kwiinda muntu uuli woonse.

20 Pele mubwini Kristo wakabusyigwa kubafwu, walo uuli ngomicelo mitaanzi yabaabo bakoona mulufwu.+ 21 Nkaambo mbwaanga lufwu lwakaboola kwiinda mumuntu omwe,+ abwalo bubuke bwabafwu bulaboola kwiinda mumuntu omwe.+ 22 Nkaambo mbubonya muli Adamu boonse balafwa,+ mbubonya buyo muli Kristo boonse bayoopegwa buumi.+ 23 Pele umwi aumwi ulabusyigwa aciindi cakwe ceelede: kusaanguna Kristo uuli njemicelo mitaanzi,+ mpoonya aabo bazulilwa kuli Kristo bayoobusyigwa kuciindi cakubako kwakwe.+ 24 Mpoonya kumamanino, uyoopa Bwami kuli Leza wakwe alimwi Usyi, aakumana kunyonyoona mfwulumende zyoonse abweendelezi boonse alimwi anguzu zyoonse.+ 25 Nkaambo weelede kulela kali mwami kusikila Leza akabikke basinkondonyina boonse kunsi aamaulu aakwe.+ 26 Sinkondo wamamanino uuyoonyonyoonwa, ndufwu.+ 27 Nkaambo Leza “wakabombya zintu zyoonse kunsi aamaulu aakwe.”+ Pele nokwaambwa kuti ‘zintu zyoonse zyakabombesyegwa,’+ cilalimvwisya kuti eeci tacibikkilizyi Leza ooyo wakabombya zintu zyoonse kulinguwe.+ 28 Pele Leza aakumana kubombya zintu zyoonse kumwanaakwe, mpoonya Mwana ooyo awalo uyoolibombya kuli Leza ooyo wakabombya zintu zyoonse kulinguwe,+ ikutegwa Leza abe mweendelezi wazintu zyoonse.+

29 Ikuti naa bafwu tabakabusyigwi, ino nimpindu nzi njobayoojana aabo babbapatizyigwa kutegwa babe bafwu?+ Ikuti naa bafwu kunyina nobayoobusyigwa, ino nkaambo nzi abalo ncobali mukubbapatizyigwa kutegwa babe bafwu? 30 Ino nkaambo nzi andiswe ncotuli muntenda ciindi coonse?+ 31 Abuzuba ndijanika muntenda yalufwu. Eeci ncamasimpe mbubonya mbuli lukkomano ndondijisi kujatikizya ndinywe bakwesu muli Kristo Jesu Mwami wesu. 32 Ikuti naa mbuli bantu bamwi* ndakalwana abanyama babutambo ku Efeso,+ ino eeci cindigwasya buti mebo? Ikuti bafwu tabakabusyigwi, nkokuti “atulye akunywa, nkaambo kayi juunza tuyoofwa.”+ 33 Muteenwi pe. Kuyanzana abantu babyaabi kunyonganya zilengwa zibotu.*+ 34 Amusinsimuke munzila yabululami alimwi mutabi nimucita cibi pe, nkaambo bamwi tabajisi luzyibo lwa Leza. Ndaamba boobu kutegwa ndimuusye nsoni.

35 Nokuba boobo, umwi inga wabuzya kuti: “Ino bafwu bayoobusyigwa buti? Inzya, ino bayoobuka amubili uuli buti?”+ 36 Yebo omufwubafwuba! Ncosyanga tacibi cuumi pe ccita kuti casaanguna kufwa. 37 Alimwi kujatikizya ncosyanga, tosyangi mubili uuyookomena pe, pele usyanga nseke buyo, ibe yawiiti naa iimbi buyo; 38 pele Leza ulaipa mubili mbuli mbwayanda, alimwi nseke imwi aimwi ulaipa mubili wanjiyo. 39 Taili mibili yoonse iikozyenye pe, kuli mubili wabantu, kuli mubili waŋombe, kuli mubili wabayuni alimwi amubili wanswi. 40 Alimwi kuli mibili yakujulu amibili yaanyika;+ pele bulemu bwamibili yakujulu mbumbi,+ abwalo bulemu bwamibili yaanyika mbumbi. 41 Bulemu bwazuba mbumbi, alimwi abulemu bwamwezi mbumbi,+ abwalo bulemu bwanyenyeezi mbumbi; mubwini nyenyeezi imwi aimwi iliindene kunyenyeezinyina kubulemu.

42 Mbobubede oobo abubuke bwabafwu. Mubili wazikkwa ulabola; pele wabusyigwa tauciboli limbi pe.+ 43 Ulazikkwa kausampukide; ulabusyigwa mubulemu.+ Ulazikkwa kautajisi nguzu; ulabusyigwa munguzu.+ 44 Ulazikkwa kauli mubili wanyama; ulabusyigwa kauli mubili wamuuya. Ikuti kakuli mubili wanyama, nkokuti awalo mubili wamuuya nkouli. 45 Mbokulembedwe buya kuti: “Muntu wakusaanguna Adamu wakaba muumi.”+ Adamu wamamanino wakaba muuya uupa buumi.+ 46 Nokuba boobo, mubili wamuuya tauli wakusaanguna pe. Mubili wanyama nguusaanguna, mpoonya nokuya kube wamuuya. 47 Muntu wakusaanguna wakazwa anyika alimwi wakabumbwa abulongo;+ muntu wabili wakazwa kujulu.+ 48 Mbubonya mbwabede ooyo wakabumbwa abulongo, mbobabede abalo aabo bakabumbwa abulongo; alimwi mbubonya mbwabede ooyo wakazwa kujulu, mbobabede abalo aabo bakujulu.+ 49 Alimwi mbwaanga tuli mucinkozya cayooyo wakabumbwa abulongo,+ mbubonya buyo tuyooba mucinkozya cayooyo wakazwa kujulu.+

50 Pele bakwesu ndimwaambila kuti, mubili wanyama abulowa taukonzyi kunjila mu Bwami bwa Leza, mbubonya kubola mbokutakwe lubazu mukutabola. 51 Amubone! Ndimwaambila maseseke aa Leza aakuti: Tatukooni toonse mulufwu pe, pele toonse tuyoosandulwa,+ 52 mukaindi kaniini buyo, mukulaba kwaliso, muciindi cakulila kwamweembo wamamanino. Nkaambo mweembo uyoolila+ eelyo bafwide bayoobusyigwa amibili iitaboli alimwi tuyoosandulwa. 53 Nkaambo mubili ooyu uubola weelede kusama mubili uutaboli,+ alimwi mubili ooyu uufwa weelede kusama mubili uutafwi.+ 54 Pele mubili ooyu uubola waakusama kutabola, amubili ooyu uufwa waakusama kutafwa, ayoozuzikizyigwa majwi aalembedwe aakuti: “Lufwu lwamenwa mane kukabe kutamani.”+ 55 “O lufwu, ino luli kuli luzundo lwako? O lufwu, ino luli kuli lumoola lwako?”+ 56 Lumoola iluletela lufwu ncibi,+ alimwi nguzu zyacibi zizwa ku Mulawo.*+ 57 Pele aalumbwe Leza, nkaambo ulatupa luzundo kwiinda mu Mwami wesu Jesu Kristo!+

58 Aboobo nomuyandwa bakwesu, amukakatile,+ mutazungaani pe,+ lyoonse amube azintu zinji zyakucita mumulimo wa Mwami, mbokunga mulizyi kuti kubeleka kwanu nkomubelekela Mwami takuli kwabuyo pe.+