DEUTERONOMO

1 Ngaaya majwi Musa ngaakaambila bana Israyeli boonse munkanda mumbali aa Jordano, muzibanda zili kumbele lya Sufi, akati ka Parana, Tofeli, Labani, Hazeroti a Dizahabu. 2 Kuli musinzo weendwa mazuba aali 11 kuzwa ku Horebu kuyoosika ku Kadesi-barinea+ kwiinda nzila iitozya ku Cilundu ca Seiri. 3 Mubuzuba bwakusaanguna bwamwezi wa 11 mumwaka wa 40,+ Musa wakaambila bana Israyeli makani oonse Jehova ngaakamulailide kuti abaambile. 4 Eeci cakacitika naakamana kuzunda Sihoni+ mwami wabana Amori iwakali kukkala ku Hesiboni, alimwi a Ogi+ mwami wa Basani ooyo iwakali kukkala ku Asitaroti, ku Edrei.+ 5 Kabali mumbali aa Jordano munyika ya Moabu, Musa wakabapandulwida Mulawo ooyu,+ wakati:

6 “Katuli ku Horebu Jehova Leza wesu wakatwaambila kuti, ‘Mwakkala ciindi cilamfwu mumalundu aaya.+ 7 Amunyamuke muunke mumalundu aabana Amori+ akuli basimukobonyina ibali mu Araba,+ mumalundu, mu Sepela, mu Negebi akunkomwe yalwizi,+ inyika yabana Kanana alimwi a Lebano,*+ kusikila kumulonga mupati wa Firate.+ 8 Amubone, ndamupa nyika. Amwiinke mukaibweze nyika Jehova njaakakonkezya kuli bamauso, kuli Abrahamu, Izaka+ a Jakobo,+ kuti uyoobapa njiyo, balo alunyungu lwabo.’+

9 “Alimwi kuciindi eciya ndakamwaambila kuti, ‘Mebo ndelikke tandikonzyi kunyamuna mukuli wakumweendelezya pe.+ 10 Jehova Leza wanu wamuvwuzya, alimwi mwavwula kapati mbuli nyenyeezi zyakujulu.+ 11 Jehova Leza wabamauso aamuvwuzye+ ziindi zili cuulu akumulongezya mbubonya mbwaakamusyomezya.+ 12 Ino mebo ndelikke inga ndacikonzya buti kunyamuna mukuli wakumweendelezya akulanganya mazwanga aanu?+ 13 Amusale bamaalumi basongo, bacenjede alimwi ibalaaluzyibo kuzwa kumisyobo yanu, kutegwa ndibabikke kuba basilutwe banu.’+ 14 Mpoonya nywebo mwakaingula kuti, ‘Eeco ncootwaambila kuti tucite cili buyo kabotu.’ 15 Aboobo ndakabweza baalumi basongo alimwi balaaluzyibo kuzwa kumisyobo yanu akubabikka kuba basilutwe banu, basilutwe babantu bali zyuulu, basilutwe babantu bali myaanda, basilutwe babantu bali makumi aali musanu, basilutwe babantu bali makumi alimwi abasololi bamisyobo yanu.+

16 “Ndakalailila babetesi banu aciindi eciya kuti, ‘Nomubeteka banabokwanu, mweelede kubeteka cakululama+ akati kamuntu amwanookwabo naa amweenzu.+ 17 Tamweelede kusalulula mukubeteka kwanu.+ Mweelede kubeteka muntu buyo mbubonya mbuli muntu uulemenede.+ Tamweelede kuyoowa muntu pe,+ nkaambo nomubeteka mwiiminina Leza;+ alimwi kuti mulandu wamuyumina, mweelede kuuleta kulindime kutegwa nduulanganye.’+ 18 Alimwi aciindi eciya ndakamulailila zintu zyoonse nzyomweelede kucita.

19 “Mpoonya twakanyamuka kuzwa ku Horebu akweenda munkanda iilya mpati alimwi iiyoosya kapati+ njomwakabona munzila kamuya kumalundu aabana Amori+ mbubonya Jehova Leza wesu mbwaakatulailila, mane limwi twakasika ku Kadesi-barinea.+ 20 Eelyo ndakamwaambila kuti, ‘Lino mwasika kumalundu aabana Amori, nyika eeyo Jehova Leza wesu njaatupa. 21 Amubone, Jehova Leza wanu wamupa nyika. Kamuya mukaibweze, mbubonya Jehova Leza wabamauso mbwaakamwaambila.+ Mutayoowi pe nokuba kukankama.’

22 “Nokuba boobo, nyoonse mwakaboola kulindime akundaambila kuti, ‘Twalomba tusaangune kutuma bantu kuti bakaitwele nyika akuzootwaambila nzila njotweelede kutola alimwi aminzi njotuyoojana.’+ 23 Muzeezo ooyo wakandibotela aboobo ndakasala baalumi bali 12 akati kanu, omwe kuzwa kumusyobo umwi aumwi.+ 24 Eelyo bakanyamuka akuunka kumalundu+ akuyoosika ku Kkuti* lya Esikoli akutwela nyika. 25 Bakabweza micelo imwi yamunyika eeyo akwiileta kulindiswe alimwi bakatulwiida kuti, ‘Nyika eeyo Jehova Leza wesu njaatupa nimbotu.’+ 26 Pele mwakakaka kuunka alimwi mwakazangila Jehova Leza wanu akukaka kutobela malailile aakwe.+ 27 Mwakali kutongooka mumatente aanu akwaamba kuti, ‘Jehova wakatusulaika nkakaambo kaako ncaakatugwisyila mucisi ca Egepita kuti atwaabe mumaanza aabana Amori, kutegwa atunyonyoone. 28 Ino nkuubusena buli buti nkotuya? Banabokwesu batutyompya*+ kwiinda mukwaamba kuti, “Bantu mbotwakabona okuya mbaasinguzu alimwi mbalamfwu kwiinda ndiswe,+ minzi yabo mipati alimwi ilijisi mabaya aasika kujulu alimwi twakabona abana ba Anakimu.”’+

29 “Aboobo ndakamwaambila kuti, ‘Mutabayoowi pe nokuba kukankama.+ 30 Jehova Leza wanu ulamusololela akumulwanina+ mbubonya mbwaakacita mu Egepita kamulangilila.+ 31 Alimwi munkanda mwakalibonena mbwaakamunyamuna Jehova Leza wanu mbubonya mbuli usyi mbwanyamuna mwanaakwe, kufwumbwa nkomwakaunka kusikila limwi mwasika kubusena oobu.’ 32 Pele nokuba kuti ndakamwaambila majwi oonse aaya, tiimwakamusyoma Jehova Leza wanu pe,+ 33 ooyo iwakali kumusololela mulweendo lwanu, akumulangawida busena bwakuti muyake zilawo. Wakali kulibonya mumulilo ciindi camasiku amukkumbi ciindi camasyikati kutegwa amutondezye nzila njomweelede kutola.+

34 “Ciindi coonse eeci Jehova wakali kuswiilila majwi aanu, eelyo wakanyema kapati akukonka kuti,+ 35 ‘Kunyina naba omwe akati kabantu aaba bazyalani eeli libi ibayoobona nyika mbotu njondakakonkezya kuti ndiyakwiipa kuli bamauso,+ 36 pele buyo Kalebe mwana wa Jefune. Walo uyakwiibona alimwi nyika eeyo njaakatwela ndiyakwiipa kulinguwe akubana bakwe akaambo kakuti watobela Jehova amoyo woonse.*+ 37 (Jehova wakandinyemena andime akaambo kandinywe alimwi wakati, “Anduwe tokanjili munyika eeyo.+ 38 Joshua mwana wa Nuni uukubelekela+ nguuyonjila munyika eeyo.+ Komuyumya,*+ nkaambo nguuyoosololela bana Israyeli kuti bakone nyika.”) 39 Alimwi bana banu aabo mbomwakaamba kuti bayoosaalwa,+ abana banu aabo sunu ibatanazyiba kwaandaanya cibotu acibi, balo bayoonjila munyika eeyo alimwi ndiyoobapa njiyo kuti ibe yabo.+ 40 Pele nywebo, amunyone muye kunkanda kunzila yaku Lwizi Lusalala.’+

41 “Mpoonya nywebo mwakandivwiila kuti, ‘Twabisizya Jehova. Tulaunka kuyoolwana mbubonya Jehova Leza wesu mbwaatulailila!’ Aboobo umwi aumwi wanu wakabweza zilwanyo zyakwe alimwi mwakali kuyeeya kuti cakali cintu cuuba-uba kutanta cilundu.+ 42 Pele Jehova wakati kulindime, ‘Kobaambila kuti: “Mutaunki pe kukulwana, nkaambo tandikooba andinywe.+ Ikuti muunke, basinkondonyoko bayoomuzunda.”’ 43 Aboobo ndakamwaambila, nokuba boobo tiimwakaswiilila pe. Pele mwakakaka kutobela malailile aa Jehova alimwi cakulisumpula mwakaunka kuti mutante cilundu. 44 Mpoonya bana Amori ibakali kukkala mucilundu oomo bakaboola kulindinywe akumutandaanya mbuli nzuki zitandaanya muntu, alimwi mwakamwaikizyanya kunjila mu Seiri mane akuyoosika ku Horima. 45 Aboobo mwakapiluka akutalika kulilila Jehova, pele Jehova tanaakamuswiilila pe nokuba kucenjeka kutwi kwakwe kulindinywe. 46 Nkakaambo kaako ncomwakazumanana kukkala ku Kadesi mazuba manji boobu.

2 “Mpoonya twakanyona akugama kunkanda munzila iitozya ku Lwizi Lusalala, mbubonya Jehova mbwaakandaambila,+ alimwi twakeenda mazuba manji mumbali aa Cilundu ca Seiri. 2 Mpoonya Jehova wakati kulindime, 3 ‘Mweenda kwaciindi cilamfwu mumbali aacilundu eeci. Lino amunyone mutozye kunyika. 4 Kobalailila bantu kuti: “Mulainda mumunyinza wabanabokwanu, ibana ba Esau+ ibakkala mu Seiri,+ alimwi bayoomuyoowa+ pele mweelede kucenjela kapati. 5 Mutazwangani ambabo pe nkaambo nsikamupi nyika yabo niiceya, ndakapa Cilundu ca Seiri kuli Esau kuti cibe cakwe.+ 6 Mweelede kubabbadela cakulya ncomuyoolya alimwi amaanzi ngomuyoonywa.+ 7 Nkaambo Jehova Leza wanu wamulongezya mumilimo yanu yoonse. Ulikuzyi kabotu kweenda nkomweenda munkanda eeyi iitalikomeneni. Jehova Leza wanu walaandinywe mumyaka yoonse eeyi iili 40 alimwi tiimwabula cintu cili coonse pe.”’+ 8 Aboobo twakabaindilila banabokwesu, ibana ba Esau+ ibakkala mu Seiri, akusiya nzila iitozya ku Araba, Elati a Ezioni-geberi.+

“Kuzwa waawo twakanyona akwiinda nzila iitozya kunkanda ya Moabu.+ 9 Kumane Jehova wakandaambila kuti, ‘Mutakataliki kulwana abana Moabu nkaambo tandikamupi nyika yabo pe. Inyika ya Ari ndakaipa kubana ba Loti kuti ibe yabo.+ 10 (Kaindi bana Emi+ bakakkala mulinjiyo, bakali bantu basinguzu, banji alimwi balamfwu mbuli ba Anakimu. 11 Abalo ba Refaimu+ bakali kubonwa mbuli ba Anakimu,+ alimwi bana Moabu bakali kubaita kuti bana Emi. 12 Kaindi bana Hori+ bakali kukkala mu Seiri, pele bana ba Esau bakabaatula akubajaya akukkala munyika yabo+ mbubonya bana Israyeli mbobayoocita kunyika yalukono lwabo, eeyo Jehova njayoobapa.) 13 Lino amunyamuke muzabuke Kkuti* lya Zeredi.’ Aboobo twakazabuka Kkuti* lya Zeredi.+ 14 Myaka njotwakeenda kuzwa mu Kadesi-barinea kusikila notwakazabuka Kkuti* lya Zeredi yakakkwana 38, kusikila izyalani lyabaalumi basikalumamba lyakamaninina kufwa munkambi, mbubonya Jehova mbwaakakonkezya kulimbabo.+ 15 Janza lya Jehova lyakabanyonyoona kuti bazwe munkambi, mane bakamana doo.+

16 “Lino mbobakamanina buyo kufwa baalumi basikalumamba akati kabantu,+ 17 Jehova alimwi wakandaambila kuti, 18 ‘Sunu mulainda mucilawo cabana Moabu, nkokuti mu Ari. 19 Mwainda afwaafwi abana Amoni, mutabapenzyi naa kubalwana nkaambo nsikamupi nyika yabo niiceya pe, kuti ibe lukono lwanu nkaambo ndakaipa kubana ba Loti kuti ibe lukono lwabo.+ 20 Ayalo nyika eeyi yakali kubonwa kuti ninyika yaba Refaimu.+ (Kaindi ba Refaimu bakali kukkala mulinjiyo, alimwi bana Amoni bakali kubaita kuti ba Zamuzumi. 21 Bakali bantu basinguzu, banji alimwi balamfwu mbuli ba Anakimu;+ pele Jehova wakabanyonyoona kubusyu bwabana Amoni alimwi aaba bakabaatula akukkala munyika yabo. 22 Mbubonya mbwaakacitila bana ba Esau ibakali kukkala ku Seiri+ ciindi naakanyonyoona bana Hori+ kubusyu bwabo kutegwa babaatule akukkala munyika yabo kusikila sunu. 23 Eelyo kujatikizya bana Avimu, bakakkede mutunzi mucilawo ca Gaza+ kusikila ba Kafitorimu+ ibakazwa ku Kafitori* nobakabanyonyoona akukkala munyika yabo.)

24 “‘Amunyamuke, muunke akuzabuka Kkuti lya Arinoni.*+ Amubone, ndaaba Sihoni+ imwami wa Hesiboni muna Amori mumaanza aanu. Aboobo amumulwane akubweza nyika yakwe. 25 Buzuba obuno ndilatalika kupa kuti bantu boonse baansi ibayoomvwa mpuwo yanu bamuyoowe. Alimwi bayoonyongana akukankama* akaambo kandinywe.’+

26 “Mpoonya ndakatuma batumwa kuzwa kunkanda ya Kedemoti+ kuya ku Mwami Sihoni wa Hesiboni amajwi aaluumuno aakuti,+ 27 ‘Tulomba kuti twiinde mucisi cako. Tulainda buyo munzila. Tatukoonyona kululyo naa kulumwensyi pe.+ 28 Tuyoolya buyo cakulya akunywa maanzi ngoyootusambala. Tulomba buyo kwiinda 29 –kusikila tukazabuke mulonga wa Jordano akunjila munyika eeyo Jehova Leza wesu njaakatupa. Oobu mbombubo bana ba Esau ibakkala mu Seiri abana Moabu ibakkala mu Ari mbobakatucita.’ 30 Pele Mwami Sihoni wa Hesiboni tanaakatuzumizya kwiinda mucisi cakwe nkaambo Jehova Leza wanu wakazumizya kuti moyo wakwe uyume,+ kutegwa amwaabe mumaanza aanu mbubonya mbomubwene sunu.+

31 “Kumane Jehova wakandaambila kuti, ‘Bona, ndatalika kale kwaaba Sihoni anyika yakwe mumaanza aanu. Amutalike kwiibweza nyika yakwe.’+ 32 Sihoni naakaboola abantu bakwe boonse kuti atulwane ku Jahazi,+ 33 Jehova Leza wesu wakamwaaba mumaanza eesu, aboobo twakamuzunda abana bakwe alimwi abantu bakwe boonse. 34 Aciindi eeco twakasaala minzi yakwe yoonse akwiinyonyoona, kubikkilizya abaalumi, bamakaintu abana. Kunyina muntu ngotwakasiya kali muumi.+ 35 Twakabweza buyo banyama bavwubwa azisaalo zimbi zyamuminzi njotwakasaala. 36 Kuzwa ku Aroeri,+ uuli kunkomwe ya Kkuti lya Arinoni* (kubikkilizya amunzi uuli kukkuti), mane kusikila ku Gileadi, kunyina munzi wakatwaalila kunjila. Jehova Leza wesu wakayaaba yoonse mumaanza eesu.+ 37 Nokuba boobo, tiimwakaiguma nyika yabana Amoni,+ nkomwe yoonse ya Kkuti* lya Jaboki+ alimwi aminzi iili mumalundu, naa busena buli boonse Jehova Leza wesu mbwaakamukasya.

3 “Mpoonya twakanyona akutozya nzila yaku Basani. Kumane Ogi imwami waku Basani wakaboola abantu bakwe boonse kuzootulwana ku Edrei.+ 2 Aboobo Jehova wakandaambila kuti, ‘Utamuyoowi pe, nkaambo ndilamwaaba mumaanza aako abantu bakwe boonse anyika yakwe, alimwi uyoomucita mbubonya mbookacita Sihoni mwami wabana Amori, iwakali kukkala mu Hesiboni.’ 3 Aboobo Jehova Leza wesu wakamwaaba awalo Mwami Ogi wa Basani abantu bakwe boonse mumaanza eesu, alimwi twakazumanana kubajaya kusikila boonse bafwa. 4 Mpoonya twakaibweza minzi yakwe yoonse. Kunyina munzi nouba omwe ngotwatakabanyanga, twakabanyanga minzi iili 60, cilawo coonse ca Arigobi, ibwami bwa Ogi ku Basani.+ 5 Minzi eeyi yoonse yakayakilidwe bulambo bulamfwu, milyango aminkulwa yayo, antoomwe atunzi tunji kapati itwatakayakilidwe. 6 Nokuba boobo twakainyonyoona+ mbubonya mbotwakacita ku Mwami Sihoni wa Hesiboni, notwakanyonyoona minzi yakwe yoonse kubikkilizya abaalumi, bamakaintu abana.+ 7 Banyama boonse bavwubwa azisaalo zyamuminzi twakazibweza.

8 “Aciindi eeco twakabanyanga nyika bami bobilo babana Amori+ aabo ibakali mucilawo ca Jordano, kuzwa ku Kkuti lya Arinoni* kusikila ku Cilundu ca Herimoni;+ 9 (bana Sidoni bakali kwiita cilundu ca Herimoni kuti Sirioni, eelyo bana Amori bakali kuciita kuti Seniri), 10 minzi yoonse yakali anyika iiyalene, nyika ya Gileadi yoonse aya Basani yoonse kusikila ku Saleka aku Edrei,+ iminzi yabwami bwa Ogi ku Basani. 11 Nkaambo Mwami Ogi wa Basani alikke ngowakasyeede akati kaba Refaimu. Macila* aakwe akali aabutale, alimwi nkwaacili mu Raba, imunzi wabana Amoni. Alampa tukokola* tuli fwuka atukokola tone mubwamba kweelana ambobakali kweeleka tukokola. 12 Aciindi eeco twakaibweza nyika eeyi: kuzwa kunyika ya Aroeri+ iili ku Kkuti lya Arinoni,* acisela camalundu aaku Gileadi alimwi minzi yayo ndakaipa kubana Rubeni abana Gadi.+ 13 Eelyo nyika ya Gileadi iyakasyaala alimwi anyika ya Basani yamubwami bwa Ogi ndazipa kucisela camusyobo wa Manase.+ Cilawo coonse ca Arigobi, caku Basani cakazyibidwe kuti ninyika yaba Refaimu.

14 “Jairi+ mwana wa Manase wakabweza cilawo coonse ca Arigobi+ kusikila kumunyinza wabana Gesuri abana Maakati,+ aboobo minzi eeyo ya Basani wakayuulika zina lyakwe lyakuti Havoti-jairi*+ kusikila sunu. 15 Alimwi Makiri ndamupa Gileadi.+ 16 Bana Rubeni abana Gadi ndabapa kuzwa ku Gileadi+ kusikila ku Kkuti lya Arinoni,* kkuti eeli mpolili akati kauli ngomunyinza, alimwi akusika ku Jaboki, ikkuti kalili ngomunyinza wabana Amoni, 17 a Araba, Jordano amunyinza wanguwo, kuzwa ku Kinereti kusikila ku Lwizi lwa Araba, Lwizi lwa Munyo,* aansi eeni mpocigolela cilundu ca Pisiga kulubazu lwakujwe.+

18 “Mpoonya ndakamupa malailile aaya aakuti, ‘Jehova Leza wanu wamupa nyika eeyi kuti ibe yanu. Baalumi banu boonse bakonzya kuya kunkondo abalibambile nkondo akuzabuka kumbele lyabanabokwanu ibana Israyeli.+ 19 Pele buyo bamakaintu banu, bana banu abanyama banu bavwubwa (Ndilizyi kuti mulivwubide banyama banji kapati) mbobatisyaale muminzi njindamupa, 20 kusikila Jehova akabape kulyookezya banabokwanu mbubonya mbuli ndinywe, eelyo abalo baakubweza nyika eeyo Jehova Leza wanu njayoobapa mutala lya Jordano. Mpoonya muyoopiluka, umwi aumwi kulukono lwakwe ndondamupa.’+

21 “Aciindi eeco ndakalailila Joshua+ kuti: ‘Walibonena ameso zyoonse Jehova Leza wanu nzyaacita kubami aaba bobilo. Jehova uyoocita mbubonya oobo kumami oonse aamunyika ooko nkomuya.+ 22 Tamweelede kubayoowa pe nkaambo Jehova Leza wanu nguumulwanina.’+

23 “Kuciindi eeco ndakakombelezya Jehova kuti, 24 ‘O Mwami Singuzuzyoonse Jehova, watalika kunditondezya ndemubelesi wako bupati bwako ajanza lyako lyanguzu,+ nkaambo ngwani akati kabaleza kujulu naa anyika uukonzya kucita milimo iili boobu iigambya mbuli yako?+ 25 Kondizumizya kaka, ndizabuke kuti ndikabone nyika mbotu iili mutala lya Jordano, nyika mbotu eeyi yamalundu alimwi a Lebano.’+ 26 Pele Jehova wakacilindinyemenede akaambo kandinywe+ alimwi tanaakandiswiilila pe; pele Jehova wakati kulindime, ‘Mbubo lino! Utakandaambili limbi makani aaya. 27 Koya utante atala aacilundu ca Pisiga+ akulanga kumbo, kunyika, kumusanza akujwe wiibone nyika ameso aako, nkaambo tokauzabuki mulonga ooyu wa Jordano.+ 28 Kobikka Joshua+ kuba musololi alimwi umukulwaizye akumuyumya-yumya, nkaambo nguuyoosololela+ bantu aaba alimwi ngonguwe uuyoobapa kuti bakone nyika njotiibone.’ 29 Eezyi zyoonse zyakacitika notwakakkede mukkuti kumbele lya Beti-peori.+

4 “Lino O Israyeli, swiilila milawo ambeta nzyendikuyiisya kuti uzicite kutegwa kopona+ akuti ukanjile akukona nyika eeyo Jehova Leza wabamauso njayookupa. 2 Tamweelede kuyungizya nokuba kugwisya cintu kumajwi ngendimulailila,+ kutegwa mubambe milawo ya Jehova Leza wanu njendimulailila.

3 “Mwakalibonena ameso aanu Jehova ncaakacita kujatikizya Baala waku Peori; kufwumbwa muntu wakali kutobela Baala waku Peori Jehova Leza wanu wakamunyonyoona kuzwa akati kanu.+ 4 Pele nywebo nomwakakatila kuli Jehova Leza wanu nyoonse mucili baumi kusikila sunu. 5 Amubone, ndamuyiisya milawo ambeta,+ mbubonya Jehova Leza wangu mbwaakandilailila kutegwa mukazitobele munyika njayoomupa kuti ibe yanu. 6 Mweelede kuzibamba cakulomya,+ nkaambo kucita boobu kulamupa busongo+ akumvwisya+ kumeso aabantu ibayoomvwa milawo eeyi yoonse, alimwi bayakwaamba kuti, ‘Masimpe musyobo ooyu mupati, mbantu basongo alimwi bamvwisya.’+ 7 Sena kuli musyobo uumbi mupati uujisi baleza ibali afwaafwi anguwo mbuli Jehova Leza wesu mbwali afwaafwi andiswe kufwumbwa ciindi notumwiita?+ 8 Alimwi sena kuli musyobo uumbi mupati uujisi milawo iiluleme ambeta zili mbuli Mulawo ooyu woonse ngondamupa sunu?+

9 “Pele buyo amubikkile maano akucenjela ncobeni, kuti mutalubi zintu nzyomwakabona ameso aanu akuti zitazwi mumyoyo yanu mazuba oonse aabuumi bwanu. Alimwi mweelede kubazyibya nzizyo bana banu abazyukulu banu.+ 10 Buzuba nimwakaima kumbele lya Jehova Leza wanu ku Horebu, Jehova wakandaambila kuti, ‘Kobunganya bantu antoomwe kulindime kutegwa ndibaambile majwi aangu,+ baiye kundiyoowa+ mazuba oonse ngobali baumi anyika alimwi akuti bayiisye bana babo.’+

11 “Aboobo mwakaboola afwaafwi akwiima munsi aacilundu, alimwi cilundu cakali kuyaka mulilo mane kusikila mujulu; kwakali mudima akkumbi lisiya mbi.+ 12 Eelyo Jehova wakatalika kwaambaula andinywe kuzwa mukati kamulilo.+ Mwakamvwa buyo majwi alikke,+ pele taakwe ncomwakabona pe.+ 13 Mpoonya wakamwaambila cizuminano cakwe,+ eeco ncaakamulailila kuti mucite, nkokuti Milawo Iili Kkumi.*+ Kuzwa waawo wakailemba amabwe obilo aapapalete.+ 14 Alimwi Jehova wakandilailila aciindi eeco kuti ndimuyiisye milawo ambeta nzyomweelede kuyootobela munyika eeyo njomuyoobweza.

15 “Aboobo amucenjele ncobeni–nkaambo taakwe ncomwakabona mubuzuba obuya Jehova naakaambaula andinywe ku Horebu mukati kamulilo– 16 kuti mutabisyi kwiinda mukulipangila cikozyanyo cibezedwe cacintu cili coonse, cili mbuli mwaalumi naa mukaintu,+ 17 cili mbuli munyama waanyika uuli woonse naa cili mbuli muyuni uuli woonse uuluka mujulu,+ 18 cili mbuli cintu cili coonse ceenda anyika naa cili mbuli nswi iili yoonse yamumaanzi.+ 19 Alimwi mwalanga kujulu akubona zuba, mwezi anyenyeezi, nkokuti makamu oonse aakujulu, mutoongelezyegwi kuti mutalike kuzikotamina akuzikomba.+ Jehova Leza wanu wazyaaba kubantu boonse baansi. 20 Pele nywebo ndinywe baabo Jehova mbaakayokola mubbibi lyamulilo wakunyenguluzya butale, nkokuti kuzwa mu Egepita, kuti mube bantu bakwe bamugeme*+ mbuli mbomubede sunu.

21 “Jehova wakandinyemena akaambo kandinywe,+ mane wakakonka kuti tandeelede kuzabuka Jordano naa kunjila munyika mbotu eeyo Jehova Leza wanu njayoomupa kuti ibe lukono lwanu.+ 22 Nkaambo ndilafwa munyika iino; tandikouzabuka mulonga wa Jordano,+ pele nywebo mulazabuka alimwi muyookona nyika eeyi mbotu. 23 Amucenjele kuti mutalubi cizuminano ca Jehova Leza wanu ncaakapangana andinywe+ akuti mutalipangili cikozyanyo cakubeza cacintu cili coonse Jehova Leza wanu ncaakamukasya.+ 24 Nkaambo Jehova Leza wanu mulilo uumpa cakumaninina,+ ngu Leza uuyanda kuti kakombwa buyo alikke.+

25 “Ikuti naa mukazyale bana akuba abazyukulu alimwi akupona ciindi cilamfwu munyika, mpoonya mukabisye akupanga cikozyanyo cakubeza+ cacintu cili coonse akucita zibi mumeso aa Jehova Leza wanu akumunyemya,+ 26 ndaita julu anyika kuti zibe bakamboni buzuba buno, ikuti ncobeni muyoofwambaana kufwa munyika eeyo njomuyookona mwazabuka Jordano. Tamukoongoli mulinjiyo pe, pele muyoonyonyoonwa cakumaninina.+ 27 Jehova uyoomumwaisya akati kabamasi,+ alimwi mbasyoonto buyo ibayoofwutuka+ mumasi aayo Jehova nkwayoomutandila. 28 Ooko muyookomba baleza bazisamu abaleza bamabwe ibakapangwa amaanza aabantu,+ baleza ibatakonzyi kubona, kumvwa, kulya naa kununkizya.

29 “Ikuti mukamuyandaule Jehova Leza wanu ooko, ncobeni muyoomujana,+ ikuti mukamuyandaule camoyo wanu woonse abuumi bwanu boonse.+ 30 Kumazuba aaboola kumbele mwaakupenga kapati eelyo zintu zyoonse eezyi zyaakumucitikila, muyoopiluka kuli Jehova Leza wanu akuswiilila jwi lyakwe.+ 31 Nkaambo Jehova Leza wanu ngu Leza siluse.+ Takamulekelezyi naa kulekela kuti munyonyooke naa kuluba cizuminano ncaakakonkezya kuli bamauso.+

32 “Lino amubuzye makani aaciindi camusyule kamutanabako, kuzwa buzuba Leza naakalenga muntu anyika; amuvwuntauzye kuzwa kumasimpilo aamwi aajulu kusikila kumasimpilo aambi. Sena kuli cintu cipati boobu cakacitika kale naa cintu cili boobu cakamvwigwa?+ 33 Sena kuli bantu bambi bakamvwa jwi lya Leza kaambaula mukati kamulilo mbuli ndinywe mbomwakamvwa akuzumanana kupona?+ 34 Naa sena Leza kuli naakasolede kubweza musyobo umwi kuti ube wakwe kuzwa akati kamusyobo uumbi kubelesya mbeta, zitondezyo, maleele,+ nkondo,+ janza lyanguzu,+ janza litandabede amilimo iiyoosya+ mbubonya Jehova Leza wanu mbwaakamucitila mucisi ca Egepita kamulangilila? 35 Nywebo mwakatondezyegwa kutegwa muzyibe kuti Jehova ngo Leza mwini-mwini;+ kunyina uumbi kunze lyanguwe.+ 36 Wakapa kuti mumvwe jwi lyakwe kuzwa kujulu kutegwa amululamike, alimwi anyika wakamutondezya mulilo wakwe mupati, amajwi aakwe mwakaamvwa kuzwa mukati kamulilo.+

37 “Akaambo kakuti wakali kubayanda bamauso alimwi wakasala lunyungu lwabo,+ mwazumanana kupona alimwi wakamugwisya mu Egepita kali andinywe anguzu zyakwe zinji. 38 Wakatanda misyobo mipati alimwi iilaanguzu kwiinda ndinywe kuzwa kubusyu bwanu, kutegwa amulete akumupa nyika yayo kuti ibe lukono lwanu mbuli mbokubede sunu.+ 39 Aboobo sunu amuzyibe akucibikka mumyoyo yanu kuti Jehova ngo Leza mwini-mwini kujulu aanyika.+ Taakwe uumbi pe.+ 40 Mweelede kubamba malailile amilawo yakwe nzyendimulailila sunu, kutegwa zintu zimweendele kabotu abana banu, alimwi kutegwa mupone mazuba manji anyika eeyo Jehova Leza wanu njayanda kumupa.”+

41 Aciindi eeco Musa wakasala minzi yotatwe kujwe lya Jordano.+ 42 Ikuti umwi wajaya mweenzinyina cakutazyiba kali tanaakamusulide,+ weelede kutijila kuli umwi waminzi eeyi kutegwa apone.+ 43 Wakasala Bezeri,+ wabana Rubeni munkanda uuli anyika iiyalene, Ramoti+ wabana Gadi mu Gileadi+ alimwi a Golani wabana Manase mu Basani.+

44 Lino ngooyu Mulawo+ Musa ngwaakapa bana Israyeli. 45 Eezyi nzyeziyeekezyo, milawo ambeta Musa nzyaakaambila bana Israyeli nobakazwa mu Egepita,+ 46 mucilawo ca Jordano mukkuti lili kumbele aa Beti-peori,+ munyika ya Mwami Sihoni wabana Amori iwakali kukkala mu Hesiboni,+ ooyo Musa abana Israyeli ngobakazunda nobakazwa mu Egepita.+ 47 Bakaibweza nyika yakwe anyika ya Mwami Ogi wa Basani,+ bami bobilo babana Amori ibakali mucilawo ca Jordano nkocili kujwe, 48 kuzwa ku Aroeri+ uuli kunkomwe ya Kkuti lya Arinoni,* kusikila ku Cilundu ca Siyoni, nkokuti ku Herimoni,+ 49 alimwi anyika yoonse ya Araba mucilawo ca Jordano nkocili kujwe, kusikila ku Lwizi lwa Araba,* aansi eeni mpocigolela cilundu ca Pisiga.+

5 Mpoonya Musa wakaita bana Israyeli boonse akubaambila kuti: “Amuswiilile nobana Israyeli milawo ambeta nzyendimwaambila sunu, mweelede kuziiya akuzicita cakulomya. 2 Jehova Leza wesu wakapanga cizuminano andiswe ku Horebu.+ 3 Jehova tanaakapanga cizuminano eeci abamatata pe, pele wakacipanga andiswe toonse tobaumi notuli waano sunu. 4 Jehova wakaambaula andinywe cacigaminina kuzwa mucilundu mukati kamulilo.+ 5 Aciindi eeco ndakaliimvwi akati ka Jehova andinywe+ kuti ndimwaambile majwi aa Jehova, nkaambo mwakaliyoowede akaambo kamulilo alimwi tiimwakatanta mucilundu.+ Wakati:

6 “‘Ndime Jehova Leza wanu iwakamugwisya mucisi ca Egepita, muŋanda yabuzike.+ 7 Mutabi abaleza bambi kunze lyangu.*+

8 “‘Utalipangili cikozyanyo cibezedwe,+ nociba cili mbuli cintu cili coonse cili kujulu naa cili anyika naa cili mumaanzi kunsi aanyika. 9 Utazikotamini naa koongelezyegwa kuzikomba pe,+ nkaambo mebo nde Jehova Leza wako, ndime Leza uuyanda kuti bantu kabakomba buyo ndime endikke,+ uuleta cisubulo kubana akaambo kacibi cabamausyi, akubazyukulu akubazyukululwa babaabo ibandisulide,+ 10 pele uutondezya luyando lutamani kuzyuulu-zyuulu zyamazyalani aabantu aabo ibandiyanda akubamba milawo yangu.

11 “‘Utabelesyi zina lya Jehova Leza wako munzila iiteelede,+ nkaambo Jehova uyoomusubula ooyo uubelesya zina lyakwe munzila iiteelede.+

12 “‘Kobamba buzuba bwa Sabata akububona kuti bulisetekene, mbubonya Jehova Leza wako mbwaakakulailila.+ 13 Weelede kubeleka milimo yako yoonse mumazuba aali cisambomwe,+ 14 pele buzuba bwaciloba mbuzuba bwa sabata ya Jehova Leza wako.+ Toyelede kubeleka mulimo uuli woonse,+ yebo naba mwanaako musankwa naba mwanaako musimbi, muzike wako musankwa naba muzike wako musimbi naba musune* wako niiba mbongolo yako naba munyama wako wakuvwuba uuli woonse naba mweenzu uukkala mumunzi wako,*+ kutegwa muzike wako musankwa amuzike wako musimbi balyookezye mbubonya mbuli nduwe.+ 15 Koyeeya kuti wakali muzike mucisi ca Egepita alimwi akuti Jehova Leza wako wakakugwisya ooko ajanza lyanguzu litandabede.+ Nkakaambo kaako Jehova Leza wako ncaakakulailila kuti kobamba buzuba bwa Sabata.

16 “‘Lemeka bauso abanyoko,+ mbubonya Jehova Leza wako mbwaakakulailila, kutegwa upone mazuba manji akuti zintu zikweendele kabotu munyika Jehova Leza wako njaakupa.+

17 “‘Utajayi.+

18 “‘Utaciti bumambe.+

19 “‘Utabbi.+

20 “‘Utaambi kaambo kakubeja ciindi nopa bumboni kujatikizya mweenzinyoko.+

21 “‘Utanyonokeli mukaintu wamweenzinyoko.+ Utanyonokeli ŋanda yamweenzinyoko, nuuba muunda wakwe naa mubelesi wakwe musankwa naa mubelesi wakwe musimbi, naa iŋombe yakwe niiba mbongolo yakwe nociba cintu cili coonse camweenzinyoko.’+

22 “Milawo* eeyi Jehova wakayaamba kumbungano yanu yoonse acilundu, kuzwa mukati kamulilo, mukkumbi amumudima uusiya mbi,+ ajwi pati, alimwi taakwe ncaakayungizya pe; kuzwa waawo wakailemba amabwe obilo aapapalete akundipa ngawo.+

23 “Pele mbomwakamvwida buyo jwi kuzwa mukati kamudima, eelyo cilundu nocakali kuyaka mulilo,+ boonse basilutwe bamisyobo yanu abaalu banu bakaboola kulindime. 24 Mpoonya mwakati, ‘Jehova Leza wesu watutondezya bulemu bwakwe abupati bwakwe, alimwi twamvwa jwi lyakwe mukati kamulilo.+ Sunu twabona kuti anu Leza ulakonzya kwaambaula amuntu, eelyo muntu ooyo ulakonzya kuzumanana kupona.+ 25 Ino lino tulafwida nzi? Nkaambo ooyu mulilo mupati ulakonzya kutunyonyoona. Kuti alimwi katucimvwa jwi lya Jehova Leza wesu, masimpe tulafwa. 26 Ino nguni muntu uunga wamvwa jwi lya Leza muumi kaambaula mukati kamulilo mbuli mbotwamvwa swebo mpoonya wazumanana kupona? 27 Yebo ndonduwe weelede kuunka afwaafwi kutegwa ukaswiilile nzyatiiambe Jehova Leza wesu, mpoonya yebo nduwe utiitwaambile zyoonse Jehova Leza wesu nzyatiikwaambile, eelyo tulaswiilila akuzicita.’+

28 “Aboobo Jehova wakaswiilila majwi aanu ngomwakandaambila, eelyo Jehova wakati kulindime, ‘Ndaamvwa majwi bantu aaba ngobaamba kulinduwe. Zyoonse nzyobaamba zili buyo kabotu.+ 29 Nicali cibotu ikuti bantu aaba nibali amoyo uuli boobu wakundiyoowa+ akutobela milawo yangu yoonse;+ mpoonya zintu nizyali kubeendela kabotu abana babo lyoonse!+ 30 Koya ubaambile kuti: “Amupiluke kumatente aanu.” 31 Pele yebo kosyaala aano andime, ndikwaambile milawo yoonse amalailile oonse alimwi ambeta zyoonse nzyoyelede kubayiisya, nzyobeelede kucita munyika njindabapa kuti ikabe yabo.’ 32 Lino mweelede kucenjela kuti mucite mbubonya Jehova Leza wanu mbwaamulailila.+ Tamweelede kuleya kululyo naa kulumwensyi.+ 33 Mweelede kweenda munzila eeyo Jehova Leza wanu njaamulailila,+ kutegwa kamupona akuti zintu zimweendele kabotu akupona mazuba manji munyika eeyo njomuyoopegwa.+

6 “Lino eeyi njemilawo amalailile alimwi ambeta eezyo Jehova Leza wanu nzyaandilailila kuti ndimuyiisye, kutegwa mukazicite mwaakuzabuka akunjila munyika eeyo njomuyoobweza, 2 kutegwa kamumuyoowa Jehova Leza wanu akubamba milazyo amilawo yakwe yoonse njondimulailila–nywebo, bana banu abazyukulu banu+–mazuba oonse aabuumi bwanu kutegwa mupone mazuba manji.+ 3 Amuswiilile nobana Israyeli, alimwi mweelede kuzicita cakulomya, kutegwa zintu zimweendele kabotu akuti muvwule kapati munyika iikunka buci amukupa, mbubonya Jehova, Leza wabamauso mbwaakamusyomezya.

4 “Amuswiilile nobana Israyeli: Jehova Leza wesu, ngu Jehova omwe buyo.+ 5 Mweelede kuyanda Jehova Leza wanu amoyo wanu woonse,+ abuumi bwanu boonse alimwi anguzu zyanu zyoonse.+ 6 Aaya majwi ngondimulailila sunu ayelede kuba mumyoyo yanu, 7 alimwi mweelede kwaayiisya* bana banu+ akubandika ngawo ciindi nomukkede muŋanda yanu, aciindi nomweenda munzila, aciindi cakoona, alimwi aciindi cakubuka.+ 8 Amwaange kumaanza aanu kuti cibe ciibalusyo, alimwi ayelede kuba mbuli cakwaanga ankumo zyanu.+ 9 Amwaalembe aminsende yamilyango yamaanda aanu aamilyango yaminzi yanu.

10 “Eelyo Jehova Leza wanu aakumunjizya munyika njaakakonkezya kuli bamauso, Abrahamu, Izaka a Jakobo, kuti uyoomupa,+ nkokuti minzi mipati alimwi yeebeka njomwatakayaka,+ 11 amaanda aazwide zintu zibotu zyamisyobo-misyobo nzyomwatakabelekela, amigoti iisyidwe kale njomwatakasya, amyuunda yamisaansa amaolifa njomwatakabyala, eelyo mwaakulya akukkuta,+ 12 amukacenjele kuti mutakamulubi Jehova+ iwakamugwisya mucisi ca Egepita, muŋanda yabuzike. 13 Mweelede kumuyoowa Jehova Leza wanu+ akumubelekela,+ alimwi mweelede kunookonka muzina lyakwe.+ 14 Tamweelede kutobela baleza bambi, baleza bali boonse babantu bamuzingulukide,+ 15 nkaambo Jehova Leza wanu uuli akati kanu ngu Leza uuyanda kukombwa buyo alikke.+ Buyo-buyo bukali bwa Jehova Leza wanu buyoomubukila+ alimwi uyoomunyonyoona atala aanyika.+

16 “Tamweelede kusunka Jehova Leza wanu+ mbuli mbomwakamusunka ku Masa.+ 17 Mweelede kuba basungu kubamba milawo ya Jehova Leza wanu njaamupa akutobela ziyeekezyo alimwi amalailile ngaamupa kuti mutobele. 18 Mweelede kucita zintu ziluleme alimwi zibotu mumeso aa Jehova kutegwa zintu zimweendele kabotu akuti mukanjile akukona nyika mbotu eeyo Jehova njaakakonkezya kuli bamauso,+ 19 kwiinda mukwaatula basinkondonyoko boonse kuzwa kubusyu bwanu, mbubonya Jehova mbwaakasyomezya.+

20 “Kumbele bana banu baakumubuzya kuti, ‘Ino ziyeekezyo amilawo alimwi ambeta nzyaakamulailila Jehova Leza wesu zyaamba nzi?’ 21 mpoonya muyoobaambila kuti, ‘Twakali bazike ba Farao mu Egepita, pele Jehova wakatugwisya mu Egepita ajanza lili anguzu. 22 Aboobo katulangilila, Jehova wakacita zitondezyo amaleele, izipati alimwi izyakanyonyoona mu Egepita,+ kuli Farao akuli bamuŋanda yakwe boonse.+ 23 Alimwi wakatugwisya ooko kuti atulete kuno kutegwa atupe nyika eeyo njaakakonkezya kuli bamatata.+ 24 Mpoonya Jehova wakatulailila kuti katutobela milawo yoonse eeyi akuti katumuyoowa Jehova Leza wesu kutegwa zintu kazitweendela kabotu lyoonse,+ akuti katupona mbubonya mbotupona+ kusikila sunu. 25 Alimwi tuyakwaambwa kuti tuli balulami, ikuti twiitobela cakulomya milawo yoonse eeyi kubusyu bwa Jehova Leza wesu, mbubonya mbwaakatulailila.’+

7 “Eelyo Jehova Leza wanu aakumunjizya munyika eeyo njomuyoobweza ino-ino,+ uyoomutandila misyobo mipati:+ bana Heti, bana Girigasi, bana Amori,+ bana Kanana, bana Perizi, bana Hivi abana Jebusi,+ imisyobo iili ciloba mipati alimwi iili anguzu kapati kwiinda ndinywe.+ 2 Jehova Leza wanu uyoobaaba kulindinywe alimwi muyoobazunda.+ Mweelede kuyoobanyonyoona.+ Tamweelede kupanga cizuminano ambabo naa kubafwida lubomba pe.+ 3 Mutakabi nomukwatana ambabo pe. Tamweelede kukwasya bana banu basimbi kubana babo basankwa nokuba kulekela bana banu basankwa kukwata bana babo basimbi.+ 4 Nkaambo bayoopa kuti bana banu baleke kunditobela akutalika kukomba baleza bambi;+ eelyo bukali bwa Jehova buyoomubukila alimwi uyoomunyonyoona cakufwambaana.+

5 “Pele mboobu mbomweelede kubacita: Mweelede kumwaya zipaililo zyabo, kupwayaula misemu yabo yamabwe yakukomba,+ kugonkaula misemu yabo yazisamu yakukomba,*+ alimwi akuzyuumpa mumulilo zikozyanyo zyabo zibezedwe.+ 6 Nkaambo muli bantu basalala kuli Jehova Leza wanu, alimwi Jehova Leza wanu wamusala kuba bantu bakwe, ilubono lwakwe luyandisi,* akati kabantu boonse bali anyika.+

7 “Takuli kuti Jehova wakamuyanda akumusala+ akaambo kakuti mwakali banji kwiinda misyobo iimbi yoonse pe, nywebo mwakali basyoonto kwiinda misyobo yoonse.+ 8 Pele nkaambo kakuti Jehova ulamuyanda akuti wakali kuyanda kuzuzikizya cikonke cakwe ncaakakonka kuli bamauso,+ Jehova ncaakamugwisya ajanza lyanguzu kutegwa amununune kuzwa muŋanda yabuzike,+ kuzwa kujanza lya Farao imwami wa Egepita. 9 Mulizyi kabotu kuti Jehova Leza wanu ngo Leza mwini-mwini, Leza uusyomeka, uubamba cizuminano akutondezya luyando lutamani kucuulu camazyalani aabaabo bamuyanda akubamba milawo yakwe.+ 10 Pele aabo bamusulide uyoobapilusizya milandu yabo kwiinda mukubanyonyoona.+ Takamuki pe kusubula baabo bamusulide; uyoobapilusizya milandu yabo caantangalala. 11 Aboobo amubikkile maano kubamba milawo, malailile ambeta nzyondamulailila sunu, kwiinda mukuzicita.

12 “Ikuti mwazumanana kuswiilila mbeta eezyi akuzibamba alimwi akuzicita, Jehova Leza wanu uyoobamba cizuminano cakwe kulindinywe aluyando lutamani nzyaakakonkezya kuli bamauso. 13 Uyoomuyanda akumulongezya, akumuvwuzya. Masimpe, uyoomulongezya kuba abana banji,+ muyooba abutebuzi bunji, maila, waini mupya,+ mafwuta, bana baŋombe abampongo abambelele, munyika njaakakonkezya kuli bamauso kuti uyoomupa.+ 14 Muyooba musyobo uulongezyedwe akati kamisyobo yoonse;+ takukabi mwaalumi naba mukaintu akati kanu uutazyali naba munyama uuvwubwa uutazyali.+ 15 Jehova uyoogwisya malwazi oonse kulindinywe, alimwi takamuleteli malwazi mabi aali oonse aamu Egepita ngomuzyi.+ Pele uyakwaayumbila kulibaabo bamusulide. 16 Mweelede kubanyonyoona bantu boonse aabo Jehova Leza wanu mbaapa mumaanza aanu.+ Tamweelede kubeengelela pe,+ alimwi tamweelede kukomba baleza babo+ nkaambo kucita boobo kuyoomubeda kakole.+

17 “Ikuti naa mumyoyo yanu mwatalika kwaamba kuti, ‘Misyobo eeyi mipati kwiinda ndiswe. Ino tulaitanda buti?’+ 18 Tamweelede kubayoowa pe.+ Mweelede kuyeeya Jehova Leza wanu ncaakacita kuli Farao acisi ca Egepita coonse,+ 19 misunko mipati njomwakalibonena ameso, zitondezyo, maleele,+ janza lyanguzu alimwi litandabede eelyo Jehova Leza wanu ndyaakabelesya kumugwisya mu Egepita.+ Oobo mbwayoocita Jehova Leza wanu kumisyobo yoonse njomuyoowa.+ 20 Jehova Leza wanu uyoobapa kuyoowa, kusikila aabo bakasyeede+ alimwi ibakamuyubide bakanyonyooke. 21 Mutakankami akaambo kambabo pe, nkaambo Jehova Leza wanu uli andinywe,+ ngu Leza mupati uuyoosya.+

22 “Jehova Leza wanu uyakwiitanda asyoonto-syoonto misyobo eeyi kubusyu bwanu.+ Tamukazumizyigwi kubamana cakufwambaana pe, kutegwa banyama bamusyokwe batakavwuli akumwaasya. 23 Jehova Leza wanu uyoobaaba kulindinywe akubazunda cakumaninina kusikila bakanyonyooke.+ 24 Uyakwaaba bami babo mumaanza aanu,+ alimwi muyoozimaanya mazina aabo anyika.+ Kunyina naba omwe uuyoomukatazya+ kusikila mukabanyonyoone.+ 25 Mweelede kubaumpa mumulilo baleza babo bakubeza.+ Mutanyomeneni nsiliva angolida iili aali baleza babo naa kwiibweza kuti ibe yanu,+ kutegwa itakamubedi kakole, nkaambo ncisesemyo kuli Jehova Leza wanu.+ 26 Tamweelede kuleta zintu zisesemya mumaanda aanu zikonzya kupa kuti mweelele kunyonyoonwa mbuli nzizyo. Zyeelede kumusesemya alimwi mweelede kuzisulaika nkaambo zyeelede kunyonyoonwa.

8 “Mweelede kubikkila maano kutobela milawo yoonse njondamupa sunu, kutegwa kamupona,+ muvwule alimwi akuti mukanjile munyika eeyo Jehova njaakakonkezya kuli bamauso akwiibweza kuti ibe yanu.+ 2 Amuyeeye lweendo lulamfwu Jehova Leza wanu ndwaamweenzya mumyaka eeyi iili 40 munkanda,+ kutegwa amubombye akumusunka+ kutegwa azyibe zili mumyoyo yanu,+ kuti naa mulabamba milawo yakwe naa pe. 3 Aboobo wakamubombya akumulekela kuti mufwe nzala+ mpoonya wakamusanina mana,+ cakulya eeco nywebo alimwi abamauso ncomwatakazyi, kutegwa amuzyibye kuti teensi cinkwa cilikke ncaponena muntu, pele ulapona amajwi oonse aazwa kumulomo wa Jehova.+ 4 Zisani zyanu tiizyakazakala amaulu aanu tanaakazimba myaka yoonse eeyi iili 40.+ 5 Mulizyi kabotu mumyoyo yanu kuti Jehova Leza wanu wakali kumululamika mbubonya mbuli muntu mbwalulamika mwanaakwe.+

6 “Lino mweelede kubamba milawo ya Jehova Leza wanu kwiinda mukweenda munzila zyakwe alimwi akumuyoowa. 7 Nkaambo Jehova Leza wanu ulamunjizya munyika mbotu,+ inyika iijisi tulonga twamaanzi, tusensa alimwi amaanzi manji aazwa mukkuti amumalundu, 8 inyika yawiiti abbaale, misaansa, nkuyu amapomegranite,+ inyika yamafwuta aamaolifa abuci,+ 9 inyika eeyo imutakaceyi cakulya, momutakabuli cintu, nyika iijisi mabwe aali abutale alimwi mumalundu aayo muyoosya mukuba.

10 “Mwaakulya akukkuta, mweelede kuyootembaula Jehova Leza wanu akaambo kanyika mbotu njaamupa.+ 11 Amucenjele kuti mutakamulubi Jehova Leza wanu akukakilwa kubamba milawo yakwe ambeta zyakwe alimwi amilazyo yakwe nzyendimulailila sunu. 12 Mwaakulya akukkuta akuyaka maanda mabotu akukkala mulingawo,+ 13 zyaakuvwula ŋombe, mpongo ambelele zyanu, alimwi mwaakuba ansiliva angolida zinji, azintu zyoonse nzyomujisi zyaakuvwula, 14 mutakalekeli myoyo yanu kulisumpula+ akumupa kuluba Jehova Leza wanu, ooyo iwakamugwisya mucisi ca Egepita, kuzwa muŋanda yabuzike,+ 15 iwakamweenzya munkanda mpati alimwi iiyoosya kapati,+ imuli nzoka zikali atubanze alimwi anyika njumu iitakwe maanzi. Wakamugwisizya maanzi mubbwe liyumu+ 16 akumusanina amana+ munkanda, icakulya ncobatakazyi bamauso, kutegwa amubombye+ akumusunka, akuti zintu zikamweendele kabotu kumbele.+ 17 Ikuti mumyoyo yanu mukaambe kuti, ‘Nguzu zyangu amaanza aangu nzyezyandiletela lubono loonse oolu,’+ 18 amuyeeye kuti ngu Jehova Leza wanu uumupa nguzu zyakuti mujane lubono,+ kutegwa azuzikizye cizuminano cakwe ncaakakonkezya kuli bamauso, mbuli mbokubede sunu.+

19 “Ikuti mukamulube Jehova Leza wanu akutalika kutobela baleza bambi, kubakotamina akubakomba, ndimwaambila masimpe sunu kuti muyoofwa.+ 20 Muyoofwa mbubonya mbuli misyobo eeyo Jehova njanyonyoona kubusyu bwanu, nkaambo tiimwaswiilila jwi lya Jehova Leza wanu.+

9 “Amuswiilile nobana Israyeli, sunu mulazabuka mulonga wa Jordano+ kuti munjile akwaatula misyobo mipati alimwi iili anguzu kwiinda ndinywe,+ iminzi mipati alimwi iijisi mabaya aasika kujulu,+ 2 bantu basinguzu alimwi balamfwu, ibana ba Anakimu+ nywebo lwanu mbomuzyi alimwi mwakamvwa kakwaambwa kuti, ‘Nguni uunga walwisya bana ba Anaki?’ 3 Aboobo sunu mweelede kuzyiba kuti Jehova Leza wanu ulazabuka kumbele lyanu.+ Walo, mulilo uumpa cakumaninina+ alimwi uyoobanyonyoona. Uyoobazunda mumeso aanu kutegwa mukabaatule akubanyonyoona cakufwambaana, mbubonya Jehova mbwaamusyomezya.+

4 “Eelyo Jehova Leza wanu aakubatanda kubusyu bwanu mutakaambi kuti, ‘Nkaambo kabululami bwesu Jehova ncaatunjizya munyika eeyi kuti twiibweze ibe yesu.’+ Pele misyobo eeyi Jehova wiitanda kubusyu bwanu akaambo kabubi bwayo.+ 5 Takuli kuti nkaambo kabululami bwanu naa kubota kwamyoyo yanu ncomutiinjile akubweza nyika yabo kuti ibe yanu pe. Mubwini, nkaambo kabubi bwamisyobo eeyi Jehova Leza wanu ncaitandila kubusyu bwanu+ alimwi akuti Jehova azuzikizye cikonke ncaakakonkezya kuli bamauso, ba Abrahamu,+ Izaka+ a Jakobo.+ 6 Aboobo amuzyibe kuti teensi akaambo kabululami bwanu Jehova Leza wanu ncamupeda nyika eeyi mbotu kuti ibe yanu, nkaambo muli bantu basicinguni.*+

7 “Amuyeeye–mutalubi pe–mbomwakamunyemya Jehova Leza wanu munkanda.+ Kuzwa buzuba nomwakazwa mucisi ca Egepita kusikila kubusena obuno, mwali kumuzangila Jehova.+ 8 Nokuba ku Horebu mwakamunyemya Jehova cakuti Jehova wakakalala kapati akaambo kandinywe mane wakasika antaamu yakuyanda kumunyonyoona.+ 9 Nindakatanta mucilundu kuyootambula mabwe aapapalete, mabwe aapapalete aacizuminano+ Jehova ncaakapanga andinywe,+ ndakakkala mucilundu mazuba aali 40, syikati amasiku,+ kanditalyi nokuba kunywa maanzi. 10 Mpoonya Jehova wakandipa mabwe obilo aapapalete aakalembwa amunwe wa Leza, alimwi alingawo kwakalembedwe majwi oonse Jehova ngaakaamba kulindinywe mucilundu kuzwa akati kamulilo mubuzuba mbungano noyakabungana antoomwe.+ 11 Kumamanino aamazuba aali 40, syikati amasiku, Jehova wakandipa mabwe obilo aapapalete, mabwe aacizuminano, 12 alimwi Jehova wakandaambila kuti, ‘Nyamuka, koselemuka cakufwambaana, nkaambo bantu bako mbookagwisya mu Egepita babisya.+ Bafwambaana kuzwa munzila njondakabalailila kuti batobele. Balipangila cikozyanyo cifwulidwe.’+ 13 Mpoonya Jehova wakandaambila kuti, ‘Ndabona kuti bantu aaba mbaasicinguni.*+ 14 Lino kondileka ndibanyonyoone akuziminganya zina lyabo anyika, alimwi leka ndikupe kuba musyobo mupati alimwi uulaanguzu kwiinda mbabo.’+

15 “Kumane ndakavwuuluka akuselemuka kuzwa acilundu, eelyo cilundu nocakali kuyaka mulilo,+ ndakalijisi amabwe obilo aapapalete aacizuminano mumaanza aangu.+ 16 Mpoonya ndakalanga akubona kuti mwabisizya Jehova Leza wanu! Mwakalipangila moombe walubulo. Mwakafwambaana kuzwa munzila eeyo Jehova njaakamulailila.+ 17 Aboobo ndakabweza mabwe aayo obilo aapapalete akwaasowa ansi alimwi akwaapwaya kamulangilila.+ 18 Eelyo ndakavwuntama ansi kubusyu bwa Jehova, mbuli mbondakacita kusaanguna, mazuba aali 40, syikati amasiku. Tiindakali kulya naa kunywa maanzi+ akaambo kazibi zyoonse nzyomwakacita kwiinda mukubisya kubusyu bwa Jehova akumunyemya. 19 Nkaambo ndakaliyoowede akaambo kabukali bwa Jehova bupati+ naakamukalalila mane akusika antaamu yakuyanda kumunyonyoona. Nokuba boobo, Jehova wakandiswiilila alwalo lweendo oolo.+

20 “Jehova wakanyema kapati akaambo ka Aroni cakuti mane wakasika antaamu yakuyanda kumunyonyoona,+ pele awalo ndakamukombelezezya aciindi eeco. 21 Ndakabweza moombe+ ngomwakapanga, iwakamupa kubisya, akumuumpa mumulilo; ndakamupwayaula akumuziya kusikila bwaba busu, kuzwa waawo busu bwanguwo ndakabumwaya mukalonga ikakali kukunka kuzwa mucilundu.+

22 “Kuyungizya waawo, ku Tabera,+ ku Masa+ aku Kibiroti-hatava+ akwalo mwakamunyemya Jehova. 23 Ciindi Jehova naakamutuma kuzwa ku Kadesi-barinea+ akumwaambila kuti, ‘Kamuya mukabweze nyika eeyo njendiyoomupa!’ mwakamuzangila alimwi Jehova Leza wanu+ akukaka kutobela malailile aakwe, alimwi tiimwakamusyoma+ akumuswiilila. 24 Mwali kumuzangila Jehova kuzwa buzuba mbondakamuzyiba.

25 “Aboobo ndakazumanana kuvwuntama kubusyu bwa Jehova mazuba aali 40, syikati amasiku,+ ndakacita oobo nkaambo Jehova wakati ulamunyonyoona. 26 Alimwi ndakatalika kukombelezya Jehova akumwaambila kuti, ‘O Mwami Singuzuzyoonse Jehova, utabanyonyooni bantu bako. Ndubono lwako iluyandisi,+ aabo mbookanununa munguzu zyako zipati akubagwisya mu Egepita ajanza lyanguzu.+ 27 Koyeeya babelesi bako, Abrahamu, Izaka a Jakobo.+ Utalangi kuyuma kwamyoyo yabantu aaba akubisya kwabo alimwi azibi zyabo.+ 28 Buyo-buyo bantu bamucisi oomo mookatugwisya inga baamba kuti: “Jehova wakaalilwa kubanjizya munyika njaakabasyomezya alimwi akaambo kakuti wakabasulaika, wakabagwisizya kuti akabajaye munkanda.”+ 29 Nkaambo mbantu bako alimwi ndubono lwako iluyandisi,+ aabo mbookagwisya munguzu zyako zinji ajanza lyako litandabede.’+

10 “Kuciindi eeco Jehova wakandaambila kuti, ‘Beza mabwe obilo aapapalete mbuli aakusaanguna,+ wamana uboole kulindime mucilundu; alimwi weelede kupanga bbokesi lyacisamu. 2 Ndilalemba majwi mbuli ngondakalembede amabwe aapapalete aakusaanguna, aalya ngookapwaya, alimwi weelede kwaabikka mubbokesi.’ 3 Aboobo ndakapanga bbokesi lyacisamu camuunga akubeza mabwe obilo aapapalete mbuli aakusaanguna, eelyo ndakatanta mucilundu amabwe obilo aapapalete mumaanza.+ 4 Mpoonya amabwe aayo aapapalete, wakalemba majwi ngoonya ngaakalembede kusaanguna,+ Milawo Iili Kkumi,*+ aalya Jehova ngaakaamba kulindinywe mucilundu mukati kamulilo,+ buzuba mbungano noyakabungene;+ kumane Jehova wakandipa ngawo. 5 Mpoonya ndakapiluka akuselemuka kuzwa acilundu+ alimwi ndakabikka mabwe aapapalete mubbokesi ndyondakapanga, oomo mwaakakkala mbubonya Jehova mbwaakandilailila.

6 “Eelyo bana Israyeli bakanyamuka kuzwa ku Beeroti Bene-jakani kuya ku Mosera. Aroni wakafwa akuzikkwa nkoonya ooko,+ mpoonya Eleazara mwanaakwe wakaba mupaizi mubusena bwakwe.+ 7 Nobakazwa kooko bakaunka ku Gudigoda, kuzwa ku Gudigoda bakaunka ku Jotibata,+ inyika yatulonga tukunka maanzi.

8 “Aciindi eeco Jehova wakasala musyobo wa Levi+ kuti kabanyamuna bbokesi lyacizuminano ca Jehova,+ kwiima kumbele lya Jehova kuti bamubelekele alimwi akulongezya muzina lyakwe+ mbuli mbobacita asunu. 9 Nkakaambo kaako Levi ncatapedwe caabilo naa lukono antoomwe abanabokwabo. Jehova ndolukono lwakwe, mbubonya Jehova Leza wanu mbwaakamwaambila.+ 10 Mebo ndakakkala mucilundu mbubonya mbuli lweendo lwakusaanguna, mazuba aali 40 syikati amasiku,+ alimwi Jehova wakandiswiilila aaciindi eeco.+ Jehova tanaakali kuyanda kumunyonyoona. 11 Mpoonya Jehova wakati kulindime, ‘Koya kumbele lyabantu akulibambila kunyamuka, kutegwa banjile akubweza nyika eeyo njondakakonkezya kuli bamausyi kuti ndiyakwiipa kulimbabo.’+

12 “Lino nobana Israyeli, ino Jehova Leza wanu uyanda nzi kulindinywe?+ Ncayanda buyo nceeci: nkuyoowa Jehova Leza wanu+ akweenda munzila zyakwe zyoonse+ akumuyanda alimwi akumubelekela Jehova Leza wanu amoyo wanu woonse abuumi bwanu boonse,+ 13 alimwi akubamba milawo amalailile aa Jehova ngendimulailila sunu, kuti zintu zimweendele kabotu.+ 14 Amubone, ijulu ndilya Jehova Leza wanu, naaba majulu aamajulu, alimwi anyika kubikkilizya azintu zyoonse zili mumo.+ 15 Pele Jehova wakayanda buyo bamauso akupanga cilongwe ambabo, alimwi wakasala ndinywe nolunyungu lwabo+ akati kamisyobo yoonse, mbuli mbokubede sunu. 16 Lino mweelede kusalazya* myoyo yanu+ akuleka kuba basicinguni.*+ 17 Nkaambo Jehova Leza wanu ngu Leza wabaleza,+ Mwami wabami, Leza mupati, singuzu alimwi uuyoosya, uutasalululi+ naa kutambula cisinkamulomo. 18 Ulababeteka cabululami bamucaala abamukabafwu+ alimwi ulabayanda beenzu+ akubapa zyakulya azisani. 19 Anywebo mweelede kubayanda beenzu, nkaambo andinywe mwakali beenzu mucisi ca Egepita.+

20 “Mweelede kuyoowa Jehova Leza wanu, kumubelekela,+ kukakatila kulinguwe alimwi mweelede kunookonka muzina lyakwe. 21 Ngonguwe ngomweelede kutembaula.+ Ngu Leza wanu iwakamucitila zintu zyoonse eezyi zipati alimwi ziyoosya nzyomwabona ameso aanu.+ 22 Bamauso nobakaunka ku Egepita bakali buyo bantu bali 70,+ pele lino Jehova Leza wanu wamuvwuzya mbuli nyenyeezi zyakujulu.+

11 “Lyoonse mweelede kumuyanda Jehova Leza wanu+ akutobela malailile aakwe, milawo yakwe alimwi ambeta zyakwe. 2 Mulizyi kuti sunu ndaambila ndinywe, kutali bana banu balo ibatazyi alimwi ibatanabwene cisubulo Jehova Leza wanu+ ncapa, nguzu zyakwe,+ janza lyakwe lyanguzu+ alimwi ajanza lyakwe litandabede. 3 Tiibakabona zitondezyo amilimo njaakacita mu Egepita kuli Farao mwami wa Egepita akunyika yakwe yoonse;+ 4 noziba zintu nzyaakacita kuli basikalumamba bana Egepita, kumabbiza alimwi ankalaki zya Farao eezyo izyakanyikila mumaanzi aamu Lwizi Lusalala ciindi nobakali kumutandila, eelyo Jehova wakabanyonyweeda limwi.+ 5 Tiibakabona zintu nzyaakamucitila munkanda kusikila nomwakasika kubusena obuno, 6 nociba ncaakacita kuli Datani a Abiramu, ibana ba Eliabu mwana wa Rubeni, ciindi nyika noyakaasama akubamena antoomwe amikwasyi yabo amatente aabo azintu zyoonse zyuumi nzyobakajisi kubusyu bwabana Israyeli boonse.+ 7 Mwakalibonena ameso aanu milimo mipati yoonse Jehova njaakacita.

8 “Mweelede kubamba milawo yoonse njendimulailila sunu kutegwa muyume akuti muzabuke akunjila munyika iili mutala kuti mukaibweze, 9 alimwi akuti mupone mazuba manji+ munyika eeyo Jehova njaakakonkezya kuli bamauso kuti uyoobapa alunyungu lwabo,+ inyika iikunka buci amukupa.+

10 “Nyika njomuyoobweza taili mbuli nyika ya Egepita nkomwakazwa, ooko nkomwakali kusyanga mbuto akutilaila amaulu aanu mbubonya mbomukonzya kutilaila cisyu. 11 Pele nyika eeyo iili mutala njomuyoobweza, ninyika yamalundu amakkuti.+ Ninyika iitilailwa amvwula;+ 12 ninyika Jehova Leza wanu njabamba kabotu. Meso aa Jehova Leza wanu ali alinjiyo lyoonse, kuzwa kumatalikilo aamwaka kusikila kumamanino aamwaka.

13 “Ikuti mukalomye kubamba milawo yangu njendimulailila sunu akuyanda Jehova Leza wanu alimwi akumubelekela amoyo wanu woonse abuumi bwanu boonse,+ 14 ndiyoomuwisizya mvwula aciindi ceelede, mvwula yakumatalikilo ayakumamanino, alimwi muyootebula maila aanu akuba awaini mupya alimwi amafwuta.+ 15 Ndiyoomeneka bwizu musyokwe bwabanyama banu bavwubwa alimwi muyoolya akukkuta.+ 16 Amucenjele kuti myoyo yanu itakoongelezyegwi, kuti mukaleye akutalika kukotamina baleza bambi akubakomba.+ 17 Buyo-buyo bukali bwa Jehova buyoomubukila alimwi uyoojala julu kutegwa mvwula ikaleke kuwa+ akuti nyika itakapi butebuzi bwayo, eelyo muyoofwa cakufwambaana munyika mbotu eeyo Jehova njayoomupa.+

18 “Mweelede kwaabamba majwi aaya mumyoyo yanu akwaacita mubuumi bwanu akwaanga kumaanza aanu kuti abe ciibalusyo, alimwi ayelede kuba mbuli cakwaanga ankumo zyanu.+ 19 Mweelede kwaayiisya bana banu akwaabandika ciindi nomukkede muŋanda yanu aciindi nomweenda munzila aciindi cakoona alimwi aciindi cakubuka.+ 20 Amwaalembe aminsende yamilyango yamaanda aanu alimwi aamilyango yaminzi yanu, 21 kutegwa nywebo abana banu mukapone mazuba manji+ munyika eeyo Jehova njaakakonkezya kuli bamauso kuti uyoobapa,+ kufwumbwa buyo julu lyanooliko atala aanyika.

22 “Ikuti mwautobela cakulomya mulawo ooyu woonse ngondimulailila sunu akuucita, kuti kamumuyanda Jehova Leza wanu+ akweenda munzila zyakwe zyoonse alimwi akukakatila kulinguwe,+ 23 Jehova uyakwiitanda misyobo eeyi yoonse kubusyu bwanu,+ alimwi muyakwaatula misyobo mipati alimwi iili anguzu kwiinda ndinywe.+ 24 Kufwumbwa busena mbomuyoolyata buyooba bwanu.+ Kuzwa kunkanda kusikila ku Lebano, kuzwa ku Mulonga wa Firate kusikila kulwizi lwakumbo,* oobo mbuuyooba munyinza wanu.+ 25 Kunyina muntu uuyoomukatazya.+ Jehova Leza wanu uyoopa kuti bantu bamunyika eeyo yoonse njomuyoolyata bamuyoowe akukankama kubusyu bwanu,+ mbubonya mbwaakamusyomezya.

26 “Amubone, sunu ndamubikkila cilongezyo akusinganizyigwa:+ 27 nkokuti kulongezyegwa, ikuti naa mwatobela milawo ya Jehova Leza wanu njondimulailila sunu,+ 28 akusinganizyigwa, ikuti naa tiimwatobela milawo ya Jehova Leza wanu+ akuti naa mwaleya kuzwa munzila njendimulailila sunu akutobela baleza bambi mbomutazyi.

29 “Eelyo Jehova Leza wanu aakumunjizya munyika eeyo njomuyookona, mweelede kwaamba* cilongezyo aa Cilundu ca Gerizimu akusinganizyigwa aa Cilundu ca Ebala.+ 30 Sena malundu aaya taali mutala lya Jordano kulubazu lwakumbo,* munyika yabana Kanana ibakkala mu Araba, kulangana aa Giligala, kumbali aamasamu mapati aa More?+ 31 Nkaambo mulazabuka Jordano kuti munjile akubweza nyika eeyo Jehova Leza wanu njaamupa. Mwaakwiibweza akukkala mulinjiyo,+ 32 mweelede kucenjela kutegwa mukatobele milawo yoonse ambeta nzyendamupa sunu.+

12 “Lino njeeyi milawo ambeta nzyomweelede kulomya kutobela mazuba oonse ngomuli baumi munyika eeyo Jehova Leza wabamauso njayoomupa. 2 Mweelede kwaanyonyoona cakumaninina masena oonse ooko misyobo yoonse njomwaatula nkoyakali kukombela baleza bayo,+ atala aamalundu malamfwu, tulundu-lundu naa munsi aazisamu zifwefwema. 3 Mweelede kumwaya zipaililo zyabo, kupwayaula misemu yabo yamabwe yakukomba,+ kuumpa misemu yabo yazisamu yakukomba,* kugonkaula zikozyanyo zibezedwe zyabaleza babo+ alimwi mweelede kuzimaanya mazina aabaleza babo mubusena oobo.+

4 “Tamweelede kumukomba boobo Jehova Leza wanu pe.+ 5 Muciindi caboobo amuunke akuyandaula Jehova Leza wanu kubusena buli boonse mbwayoosala kuti abikke zina lyakwe akubusena nkwayookkala akati kamisyobo yanu yoonse.+ 6 Kubusena oobo nkonkuko nkomweelede kuleta zituuzyo zyanu zyuumpwa,+ zipaizyo zyanu, zipaanzi zyanu zyakkumi,+ zyakusanga zyanu,+ zituuzyo zyanu zyacikonke, zituuzyo zyanu zyakuliyandila+ abana bataanzi baŋombe zyanu, bambelele zyanu abampongo zyanu.+ 7 Nywebo abamumaanda aanu mweelede kulida kubusyu bwa Jehova Leza wanu+ akukondwa mumilimo yanu yoonse,+ nkaambo Jehova Leza wanu wamulongezya.

8 “Tamweelede kucita mbuli mbotucita waano sunu, kucita umwi aumwi ncabona kuti cililuleme mumeso aakwe, 9 nkaambo tamunanjila mubusena bwakulyookezya+ akulukono oolo Jehova Leza wanu ndwaamupa. 10 Mwaakuzabuka mulonga wa Jordano+ akukkala munyika eeyo Jehova Leza wanu njayoomupa, ncobeni uyoomupa kulyookezya kuli basinkondonyoko boonse bamuzingulukide, eelyo muyookkala cakuliiba.+ 11 Muyooleta zyoonse nzyondimulailila kubusena oobo Jehova Leza wanu mbwayoosala kuti abikke zina lyakwe+–zituuzyo zyanu zyuumpwa, zipaizyo zyanu, zipaanzi zyanu zyakkumi,+ zyakusanga zyanu azintu zyoonse nzyomuyoosala kuba zituuzyo zyanu zyacikonke ncomuyookonka kuli Jehova. 12 Muyookondwa kubusyu bwa Jehova Leza wanu,+ nywebo abana banu basankwa abasimbi, abazike banu basankwa abasimbi alimwi aba Levi bali muminzi* yanu, nkaambo tabapedwe caabilo naa lukono antoomwe andinywe.+ 13 Amucenjele kutegwa mutakatuuli zituuzyo zyanu zyakuumpa mubusena buli boonse mbomukonzya kubona.+ 14 Mweelede kutuula zituuzyo zyanu zyuumpwa kubusena oobo Jehova mbwaasala mucilawo comwe akati kazilawo zyamisyobo yanu, alimwi mweelede kucita zintu zyoonse nzyendimulailila kubusena oobo.+

15 “Pele kufwumbwa buyo mwalombozya nyama, mulakonzya kujaya munyama akulya+ kweelana azileleko Jehova Leza wanu nzyaamupa muminzi* yanu yoonse. Muntu uutasalali ayooyo uusalala balakonzya kwiilya, mbubonya mbomukonzya kulya konze naa insya. 16 Pele tamweelede kulya bulowa pe;+ mweelede kubutila ansi mbuli maanzi.+ 17 Tamukazumizyigwi kulida muminzi* yanu cipaanzi cakkumi camaila aanu, cawaini wanu mupya, camafwuta aanu naa bana bataanzi baŋombe zyanu naa bambelele zyanu naa bampongo zyanu,+ kufwumbwa zituuzyo zyanu zyacikonke naa zituuzyo zyanu zyakuliyandila naa zyakusanga zyanu. 18 Zintu eezyi mweelede kuzilida kubusyu bwa Jehova Leza wanu, mubusena oobo Jehova Leza wanu mbwayoosala+–nywebo abana banu basankwa abasimbi, abazike banu basankwa abasimbi alimwi aba Levi bali muminzi* yanu; alimwi mweelede kukondwa kubusyu bwa Jehova Leza wanu mumilimo yanu yoonse. 19 Amucenjele kutegwa mutakamulubi mu Levi+ mazuba oonse ngomuyookkala munyika yanu.

20 “Eelyo Jehova Leza wanu aakukomezya cilawo canu+ mbubonya mbwaakamusyomezya,+ alimwi mwaakwaamba kuti, ‘Ndiyanda kulya nyama,’ nkaambo mwalombozya kulya nyama, muyoolya nyama kufwumbwa mwaakulombozya kwiilya.+ 21 Ikuti kubusena oobo Jehova Leza wanu mbwayoosala kuti abikke zina lyakwe+ kakuli kule, nkokuti mulakonzya kujaya ŋombe naa mbelele naa mpongo zimwi Jehova nzyaakamupa, mweelede kuzilya muminzi* yanu kufwumbwa mwalombozya kulya nyama mbubonya mbondamulailila. 22 Mulakonzya kwiilya mbubonya mbomulya konze naa insya;+ muntu uusofweede amuntu uusalala boonse balakonzya kwiilya. 23 Pele amube masimpe kuti tamulyi bulowa pe,+ nkaambo bulowa mbobuumi+ alimwi tamweelede kulya nyama antoomwe abuumi. 24 Tamweelede kubulya pe. Mweelede kubutila ansi mbuli maanzi.+ 25 Tamweelede kubulya pe, kutegwa zintu zimweendele kabotu nywebo abana banu, nkaambo mucita cintu ciluleme mumeso aa Jehova. 26 Mweelede kubweza buyo zintu zyanu zisalala alimwi azituuzyo zyanu zyacikonke mwaboola kubusena oobo Jehova mbwayoosala. 27 Ooko muyootuula zituuzyo zyanu zyuumpwa, nyama abulowa,+ acipaililo ca Jehova Leza wanu, alimwi bulowa bwazipaizyo zyanu bweelede kutilwa acipaililo+ ca Jehova Leza wanu, pele nyama mulakonzya kwiilya.

28 “Amubikkile maano kutobela majwi aaya oonse ngondimulailila, kutegwa zintu kazimweendela kabotu lyoonse nywebo abana banu nkaambo mucita cintu cibotu alimwi ciluleme mumeso aa Jehova Leza wanu.

29 “Jehova Leza wanu aakunyonyoona misyobo eeyo njomuyakwaatula,+ alimwi mwaakukkala munyika yabo, 30 amukacenjele kuti mutakacegwi baakumana kunyonyoonwa kubusyu bwanu. Mutakataliki kubuzya kujatikizya baleza babo kuti, ‘Ino misyobo eeyi yakali kubakomba buti baleza bayo? Aswebo tulacita mbubonya oobo.’+ 31 Tamweelede kucita boobo kuli Jehova Leza wanu, nkaambo bakali kucita zintu zyoonse nzyasulide Jehova alimwi zimusesemya kuli baleza babo, nobaba bana babo basimbi abasankwa bakali kubaumpa lyoonse mumulilo kuli baleza babo.+ 32 Mweelede kwaatobela cakulomya majwi oonse ngondimulailila.+ Tamweelede kuyungizya naa kugwisya kulingawo.+

13 “Ikuti naa akati kanu kwabuka musinsimi naa siziloto eelyo wamupa citondezyo naa kucita cintu cigambya kutondezya ciyoocitika kumbele, 2 mpoonya citondezyo eeco naa cintu cigambya ncaakaamba cacitika ncobeni, alimwi wamwaambila kuti, ‘Atutobele baleza bambi akubakomba’ baleza aabo mbomutazyi, 3 mutaswiilili majwi aamusinsimi ooyo naa siziloto ooyo,+ nkaambo Jehova Leza wanu ulamusunka+ kuti azyibe naa mulamuyanda Jehova Leza wanu amoyo wanu woonse abuumi bwanu boonse.+ 4 Mweelede kutobela Jehova Leza wanu, alimwi mweelede kumuyoowa, kubamba milawo yakwe, kuswiilila jwi lyakwe; ngonguwe ngomweelede kubelekela alimwi mweelede kukakatila kulinguwe.+ 5 Pele musinsimi naa siziloto ooyo weelede kujaigwa,+ nkaambo ukulwaizya kuzangila Jehova Leza wanu–iwakamugwisya mucisi ca Egepita akumufwutula kuzwa muŋanda yabuzike–akumupa kuleya kuzwa munzila eeyo Jehova Leza wanu njaakamulailila kuti mweende mulinjiyo. Mweelede kugwisya bubi akati kanu.+

6 “Ikuti naa mwanookwanu, imwana wabanyoko, naa mwanaako musankwa naa musimbi naa mukaintu wako ngoyandisya naa mweenzinyoko ngomumvwana kapati wasola kukoongelezya kumbali akukwaambila kuti, ‘Atweende tukakombe baleza bambi,’+ baleza mbotazyi yebo nobaba bamauso, 7 baleza babantu bamuzingulukide, kufwumbwa naa bali afwaafwi anduwe naa bali kule, kuzwa kumagolelo aanyika kusikila kumagolelo aamwi, 8 utazumini naa kumuswiilila pe,+ nokuba kumweetelela naa kumufwida luzyalo, naa kumuvwuninina; 9 pele mweelede kumujaya.+ Yebo nduwe weelede kusaanguna kumupwaya bbwe kutegwa afwe, kuzwa waawo bantu boonse bayoomupwaya mabwe.+ 10 Mweelede kumupwaya mabwe kutegwa afwe,+ nkaambo wali kuyanda kumuleesya kuzwa kuli Jehova Leza wanu iwakamugwisya mucisi ca Egepita, muŋanda yabuzike. 11 Mpoonya bana Israyeli boonse bayoomvwa akuyoowa, alimwi taakwe nobayoocita limbi cintu cibi mbuli ceeci akati kanu.+

12 “Ikuti naa mwamvwa makani mumunzi umwi akati kaminzi yanu eeyo Jehova Leza wanu njaamupa kuti mukakkale, aakuti, 13 ‘Akati kanu kuli baalumi babuyo ibasola kuleesya bantu bamumunzi wabo, kabati: “Atweende tukakombe baleza bambi,” baleza mbomutazyi,’ 14 mweelede kwaalanga-langa makani aaya, akuvwuntauzya akubuzya-buzya kabotu-kabotu;+ eelyo mwasinizya kuti cintu eeci cisesemya cacitika ncobeni akati kanu, 15 mweelede kubajaya bantu bamumunzi ooyo apanga.+ Amuunyonyoone munzi ooyo azintu zyoonse zili mumo kubikkilizya abanyama bavwubwa.+ 16 Mpoonya mweelede kulundika zisaalo zyamumo zyoonse akati kalubuwa lwamunzi ooyo akuwuumpa munzi amulilo, eelyo zisaalo zyawo zyoonse ziyooba cituuzyo kuli Jehova Leza wanu. Munzi uyoozumanana kuba citantaala camatongo. Taweelede kuyakululwa pe. 17 Mutabwezi cintu niciba comwe cibikkidwe ambali kuti cinyonyoonwe,+ kutegwa Jehova aleke bukali bwakwe bupati akuti amufwide luzyalo akumuvwuzya, mbubonya mbwaakakonkezya kuli bamauso.+ 18 Nkaambo mweelede kuswiilila Jehova Leza wanu kwiinda mukubamba milawo yakwe yoonse njendimulailila sunu, kutegwa mucite ciluleme mumeso aa Jehova Leza wanu.+

14 “Muli bana ba Jehova Leza wanu. Mutalinengauli amibili yanu+ naa kupala masusu ankumo zyanu akaambo kamufwu.+ 2 Nkaambo muli bantu basalala+ kuli Jehova Leza wanu alimwi Jehova wamusala kuba bantu bakwe, ilukono lwakwe luyandisi,* akati kabantu boonse bali anyika.+

3 “Tamweelede kulya cintu cili coonse cisesemya.+ 4 Mbaaba banyama mbomukonzya kulya:+ ŋombe, mbelele, mpongo, 5 insya, konze, lubondwe, mpongo yamusyokwe, lweengu, nanja alimwi ambelele yamumalundu. 6 Mulakonzya kulya munyama uuli woonse uujisi nsumba zyaanzeene alimwi uuselula. 7 Pele tamweelede kulya banyama aaba baselula naa bajisi nsumba zyaanzeene: Nkamela, sulwe acibila, nkaambo balaselula pele tabajisi nsumba zyaanzeene. Balisofweede.+ 8 Ayalo ngulube, nkaambo ilijisi nsumba zyaanzeene pele tiiseluli. Ilisofweede. Tamweelede kulya nyama yazyo nokuba kuguma mitunta yazyo.

9 “Akati kazintu zyoonse zyamumaanzi, nzyeezyi nzyomukonzya kulya: Kufwumbwa cintu cijisi tuyambyo amakwa mulakonzya kulya.+ 10 Pele tamweelede kulya cintu cili coonse citajisi tuyambyo amakwa. Cilisofweede.

11 “Mulakonzya kulya kufwumbwa muyuni uusalala. 12 Pele mbaaba mbomuteelede kulya: sikwaze, cuungwe, sikube uusiya,+ 13 bimbe, balubanze bamisyobo-misyobo; 14 bacikwangala bamisyobo-misyobo, 15 impowani, tumba, cidada, baluunga bamisyobo-misyobo, 16 katumba kaniini, tumba wamatwi malamfwu, kakukubwi, 17 sifundwe, sikube, sikabaandwa, 18 tongola, bacibengelele bamisyobo-misyobo, ŋangayabayuni asimudima. 19 Bauka boonse bauluka balisofweede. Tabeelede kuligwa pe. 20 Kufwumbwa cilenge cuuluka cisalala mulakonzya kulya.

21 “Tamweelede kulya munyama uuli woonse iwakajanwa kafwide.+ Mulakonzya kupa mweenzu uuli muminzi* yanu, eelyo walo ulakonzya kulya, naa pe mulakonzya kumusambala munyama ooyo kumuzwakule. Nkaambo muli bantu basalala kuli Jehova Leza wanu.

“Tamweelede kujika kana kampongo mumukupa wabanyina.+

22 “Mwaka amwaka mweelede kubona kuti mwapa cipaanzi cakkumi cabutebuzi boonse bwamyuunda yanu.+ 23 Muyoolya cipaanzi cakkumi camaila aanu, cawaini wanu mupya, camafwuta aanu, abana bataanzi baŋombe zyanu, bampongo zyanu abambelele zyanu kubusyu bwa Jehova Leza wanu, mubusena oobo mbwayoosala kuti abikke zina lyakwe,+ kutegwa mwiiye kulemeka Jehova Leza wanu lyoonse.+

24 “Pele kuti naa busena oobo Jehova Leza wanu mbwayoosala kuti abikke zina lyakwe+ kabunooli kule andinywe alimwi kamutakonzyi kucinyamuna kuya kubusena oobo, (nkaambo Jehova Leza wanu uyoomulongezya), 25 nkokuti mulakonzya kucisambala akubweza mali akuunka kubusena oobo Jehova Leza wanu mbwayoosala. 26 Mpoonya mulakonzya kubelesya mali aayo kuula kufwumbwa cintu ncomuyanda–ŋombe, mbelele, mpongo, waini, zyakunywa zimbi zikola azintu zili zyoonse nzyomuyanda; alimwi muyoolida kubusyu bwa Jehova Leza wanu akusekelela, nywebo abamuŋanda yanu.+ 27 Tamweelede kubaluba ba Levi bali muminzi yanu,+ nkaambo tabapedwe caabilo naa ilukono akati kanu.+

28 “Kumamanino aamyaka yotatwe, mweelede kuleta cipaanzi cakkumi coonse cabutebuzi bwanu camwaka ooyo akucibikka muminzi yanu.+ 29 Eelyo mu Levi, uutapedwe caabilo naa lukono akati kanu, mweenzu, mucaala amukamufwu ibali muminzi yanu bayooboola akulya cakukkuta,+ kutegwa Jehova Leza wanu amulongezye mumilimo yanu yoonse njomucita.+

15 “Lyoonse kumamanino aamyaka iili ciloba mweelede kulekelelana zikwelete.+ 2 Mboobu mbomweelede kucita: Kufwumbwa muntu wakakweletesya mweenzinyina weelede kumulekelela cikwelete cakwe. Teelede kumusesa mweenzinyina naa munyina kuti amubbadele, nkaambo kulekelelana zikwelete kubusyu bwa Jehova kuyakwaambilizyigwa.+ 3 Muzwakule ulakonzya kumusesa,+ pele kufwumbwa cikwelete munyoko ncajisi kulinduwe weelede kumulekelela. 4 Nokuba boobo, takweelede kujanika mucete akati kanu pe, nkaambo ncobeni Jehova uyoomulongezya+ munyika eeyo Jehova Leza wanu njayoomupa kuti ibe lukono lwanu, 5 pele lilikke kuti mukaswiilile jwi lya Jehova Leza wanu akuutobela cakulomya mulawo woonse ooyu ngondimulailila sunu.+ 6 Nkaambo Jehova Leza wanu uyoomulongezya mbubonya mbwaakamusyomezya alimwi muyookweletesya bamasi banji, pele nywebo tamukakweleti pe;+ alimwi muyakweendelezya bamasi banji, pele nywebo tabakamweendelezyi pe.+

7 “Ikuti naa umwi munyoko akati kanu waba mucete mumunzi wanu, munyika eeyo Jehova Leza wanu njayoomupa, tamweelede kuyumya myoyo yanu naa kuvwunga maanza aanu kumunyoko ooyo mucete pe.+ 8 Mweelede kuvwungulula maanza aanu kulinguwe+ akumukweletesya kufwumbwa ncayandika naa ncabulide. 9 Amucenjele kuti mutakabi amizeezo mibi mumyoyo yanu akwaamba kuti, ‘Mwaka waciloba, imwaka wakulekelelana zikwelete waswena,’+ mpoonya mutakamufwidi luzyalo munyoko mucete akumwiima ncayandika. Ikuti walilila Jehova akaambo kandinywe, ciyoomubijila nywebo.+ 10 Mweelede kumupa amoyo woonse+ alimwi tamweelede kucita oobo amyoyo yobilo pe, nkaambo ndendilyo Jehova Leza wanu nayoomulongezya mumilimo yanu yoonse amuzintu zyoonse nzyomucita.+ 11 Nkaambo bacete banooliko lyoonse munyika.+ Nkakaambo kaako ncondimulailila kuti, ‘Mweelede kuvwungulula maanza aanu amoyo woonse kumunyoko uupengede amucete munyika yanu.’+

12 “Ikuti naa umwi akati kabanyoko, mu Hebrayo mwaalumi naa mukaintu, wasambalwa kulinduwe akukubelekela myaka iili cisambomwe, nkokuti mumwaka waciloba weelede kumuleka kuti aanguluke.+ 13 Alimwi ikuti naa wamwaangulula kuti aunke, toyelede kumulekela kuti aunke cinkwamaanza pe. 14 Weelede kumupa cintu cimwi amoyo woonse kuzwa kubutanga bwako bwambelele naa bwampongo alimwi akuzwa kucuumino cako camaila akucisinino cako camafwuta acawaini. Weelede kumupa kweelana ambwaakulongezya Jehova Leza wako. 15 Koyeeya kuti wakali muzike mucisi ca Egepita alimwi Jehova Leza wako wakakunununa. Nkakaambo kaako ncondikulailila kucita cintu eeci sunu.

16 “Pele kuti naa wakwaambila kuti, ‘Nsikookusiya pe!’ nkaambo ulakuyanda yebo abamuŋanda yako, alimwi mbwaanga walikkomene kukkala anduwe,+ 17 weelede kubweza kabulo kakudonkozya akumuyaamika kumulyango mpoonya akumudonkola kutwi, eelyo uyooba muzike wako lyoonse. Weelede kucita mbubonya oobo akumuzike wako musimbi. 18 Utaciboni kuba cintu ciyumu kumwaangulula kuti aunke, nkaambo milimo njaakubelekela mumyaka iili cisambomwe ilainda ziindi zyobilo amilimo yamubelesi uuvwola mali, alimwi Jehova Leza wako wakulongezya mumilimo yoonse yakacitwa.

19 “Weelede kupa mupoho naa mugutu naa mujembwe mutaanzi mubutanga bwako kuli Jehova Leza wako.+ Ŋombe* yako ntaanzi toyelede kwiibelesya mulimo uuli woonse nokuba kugela mwana wambelele mutaanzi naa wampongo yako. 20 Mwaka amwaka, yebo abamuŋanda yako mweelede kunoolya banyama aaba kubusyu bwa Jehova Leza wanu mubusena oobo Jehova mbwayoosala.+ 21 Pele kuti naa munyama kajisi kampenda–bulema, boofwu, naa kampenda kali koonse kapati–toyelede kumutuula kuli Jehova Leza wako.+ 22 Mweelede kumulya muminzi* yanu. Muntu uusofweede amuntu uusalala boonse balakonzya kwiilya nyama mbubonya mbobalya nyama yakonze ayansya.+ 23 Pele tamweelede kulya bulowa pe;+ mweelede kubutila ansi mbuli maanzi.+

16 “Amubambe mwezi wa Abibi,* alimwi mweelede kusekelela Pobwe Lyakwiindilila kuli Jehova Leza wanu+ nkaambo mumwezi wa Abibi, Jehova Leza wanu wakamugwisya mucisi ca Egepita masiku.+ 2 Alimwi mweelede kutuula ŋombe naa mbelele+ yacipaizyo ca Pobwe Lyakwiindilila kuli Jehova Leza wanu+ mubusena oobo Jehova mbwayoosala kuti abikke zina lyakwe.+ 3 Cipaizyo tamweelede kucilya antoomwe acintu cili coonse cijisi bumena;+ mazuba aali ciloba mweelede kulya zinkwa zitajisi bumena, izinkwa zyamapenzi, nkaambo mwakazwa cakubindaana mucisi ca Egepita.+ Kamucita oobu kutegwa kamubuyeeya buzuba mbomwakazwa mucisi ca Egepita mazuba oonse aabuumi bwanu.+ 4 Takweelede kujanwa fulaulu uukandidwe uujisi bumena akati kanu mucilawo canu coonse mazuba aali ciloba,+ alimwi taakwe nyama yacipaizyo ncomuyootuula kumangolezya mubuzuba bwakusaanguna iyeelede kusiigwa kusikila mafwumofwumo.+ 5 Tamukazumizyigwi kutuula cipaizyo ca Pobwe Lyakwiindilila mumunzi wanu uuli woonse Jehova Leza wanu ngwayoomupa. 6 Pele ciyoocitwa abusena oobo Jehova Leza wanu mbwayoosala kuti abikke zina lyakwe. Mweelede kutuula cipaizyo ca Pobwe Lyakwiindilila kumangolezya mbolyabbilila buyo zuba,+ aciindi cibikkidwe eelyo nomwakazwa mu Egepita. 7 Mweelede kwiijika akwiilya+ mubusena oobo Jehova Leza wanu mbwayoosala,+ eelyo mafwumofwumo muyoopiluka kumatente aanu. 8 Kwamazuba aali cisambomwe mweelede kulya zinkwa zitajisi bumena, eelyo mubuzuba bwaciloba kuyooba muswaangano uusetekene kuli Jehova Leza wanu. Tamweelede kubeleka mulimo uuli woonse.+

9 “Mweelede kubala nsondo zili ciloba. Muyootalika kubala nsondo zili ciloba mubuzuba mbomuyootalika kucesa maila mumuunda.+ 10 Mpoonya muyoosekelela Pobwe lya Mvwiki kuli Jehova Leza wanu+ azyakusanga zyanu zyakuliyandila nzyomuyoopa kweelana ambwaamulongezya Jehova Leza wanu.+ 11 Alimwi mweelede kukondwa kubusyu bwa Jehova Leza wanu, nywebo abana banu basankwa abasimbi, muzike wanu musankwa amusimbi, aba Levi bali muminzi* yanu, mweenzu, mucaala alimwi amukamufwu ibali akati kanu, mubusena oobo Jehova Leza wanu mbwayoosala kuti abikke zina lyakwe.+ 12 Koyeeya kuti wakali muzike mu Egepita,+ alimwi weelede kubamba milawo eeyi akwiicita.

13 “Mweelede kusekelela Pobwe lya Zivwuka+ mazuba aali ciloba mwayobolola maila kuzwa kuzyuumino zyanu zyamaila amafwuta awaini kuzwa kuzisinino zyanu. 14 Amukondwe ciindi capobwe lyanu,+ nywebo abana banu basankwa abasimbi, muzike wanu musankwa amusimbi, ba Levi, mweenzu, mucaala alimwi abamukabafwu ibali muminzi yanu. 15 Kwamazuba aali ciloba muyoosekelela pobwe+ kuli Jehova Leza wanu mubusena oobo Jehova mbwayoosala, nkaambo Jehova Leza wanu uyoomulongezya mubutebuzi bwanu boonse amumilimo yanu yoonse,+ alimwi muyookondwa kapati.+

16 “Ziindi zyotatwe mumwaka, baalumi boonse bali akati kanu beelede kulibonya kubusyu bwa Jehova Leza wanu mubusena oobo mbwayoosala: ku Pobwe lya Zinkwa Zitajisi Bumena+ aku Pobwe lya Mvwiki+ aku Pobwe lya Zivwuka,+ alimwi kunyina weelede kuboola kubusyu bwa Jehova cinkwamaanza. 17 Cipego umwi aumwi ncayelede kupa, weelede kucipa kweelana ambwaamuleleka Jehova Leza wanu.+

18 “Mweelede kubikka babetesi+ abasilutwe kumusyobo umwi aumwi muminzi* yoonse Jehova Leza wanu njayoomupa, beelede kubeteka bantu cakululama. 19 Tamweelede kuzimaanya mulandu,+ kusalulula+ naa kutambula cisinkamulomo, nkaambo cisinkamulomo ciloofwaazya meso aabasongo+ akupa kuti bantu baluleme baambe zyakubeja. 20 Mweelede kutobela buyo bululami+ kutegwa kamupona akuti mukakone nyika eeyo Jehova Leza wanu njayoomupa.

21 “Tamweelede kusyanga cisamu cili coonse kuti cibe musemu wacisamu wakukomba*+ afwaafwi acipaililo ca Jehova Leza wanu ncomuyooyaka.

22 “Alimwi tamweelede kulipangila musemu wamabwe wakukomba,+ icintu Jehova Leza wanu ncatayandi.

17 “Tamweelede kutuulila Jehova Leza wanu ŋombe naa mbelele iijisi kampenda nociba cintu cili coonse cibi, nkaambo ciyoomusesemya Jehova Leza wanu.+

2 “Ikuti naa kwajanwa mwaalumi naa mukaintu akati kanu, mumunzi umwi akati kaminzi eeyo Jehova Leza wanu njayoomupa, uucita cibi mumeso aa Jehova Leza wanu akusotoka cizuminano cakwe,+ 3 alimwi waleya akutalika kukotamina baleza bambi akubakomba naa kukomba zuba naa mwezi naa makamu oonse aakujulu,+ icintu ncondatakamulailila.+ 4 Ikuti mwaambilwa naa kwaamvwa makani aaya, mweelede kwaavwuntauzya cakulomya. Ikuti naa mwasinizya kuti cintu eeci cisesemya cakacitika+ ncobeni mu Israyeli, 5 mwaalumi naa mukaintu ooyo iwakacita cintu eeco cibi mweelede kumuleta kumulyango wamunzi, eelyo weelede kupwaigwa mabwe kutegwa afwe.+ 6 Muntu ooyo iweelede kujaigwa, inga wajaigwa buyo ikuti kakuli bakamboni bobilo naa botatwe.+ Teelede kujaigwa ikuti kakuli buyo kamboni omwe.+ 7 Bakamboni mbabeelede kusaanguna kumupwaya mabwe kutegwa afwe, kuzwa waawo bantu boonse bayoomupwaya mabwe. Mweelede kugwisya bubi buli akati kanu.+

8 “Ikuti naa kwabuka mulandu uukatazya mumunzi wanu ngomutakonzyi kubeteka, ube mulandu wakujaya muntu+ naa mulandu iwaletwa kunkuta naa wakulwana naa twaambo tumbi twakuzwangana, mweelede kunyamuka akuunka kubusena oobo Jehova Leza wanu mbwayoosala.+ 9 Amuunke kubapaizi iba Levi akumubetesi+ uunoobeteka kuciindi eeco kuti mukabuzye, eelyo bayoomwaambila mboweelede kukosolwa mulandu ooyo.+ 10 Mpoonya mweelede kucita kweelana ambobamwaambila kubusena oobo Jehova mbwayoosala. Mweelede kuba masimpe kuti mwacita zyoonse nzyobamulailila. 11 Mweelede kucita kweelana amulawo ngobayoomutondezya alimwi ambeta nzyobayoomwaambila.+ Tamweelede kuleya kululyo naa kulumwensyi kuzwa kumalailile ngobayoomupa.+ 12 Muntu uulisumpula akukaka kuswiilila mupaizi uubelekela Jehova Leza wanu naa mubetesi, weelede kufwa.+ Mweelede kugwisya bubi mu Israyeli.+ 13 Mpoonya bantu boonse bayoomvwa akuyoowa, eelyo tabakalisumpuli limbi pe.+

14 “Mwaakunjila munyika eeyo Jehova Leza wanu njayoomupa akwiibweza kuti ibe yanu akukkala mulinjiyo, alimwi mwaakwaamba kuti, ‘Atulibikkile mwami mbubonya mbuli misyobo yoonse iituzingulukide,’+ 15 mweelede kubikka mwami ooyo Jehova Leza wanu ngwayoosala.+ Mweelede kubikka umwi akati kabanabokwanu kuti abe mwami wanu. Tamweelede kubikka muzwakule uutali munyoko kuti abe mwami wanu pe. 16 Pele tayelede kulijanina mabbiza manji,+ nokuba kupa kuti bantu bapiluke ku Egepita kuti bakaliyungizizye mabbiza,+ nkaambo Jehova wakamwaambila kuti, ‘Tamweelede kupiluka alimwi ku Egepita.’ 17 Tayelede kukwata bamakaintu banji kutegwa moyo wakwe utaleyi;+ alimwi tayelede kulilundaikila nsiliva angolida.+ 18 Lino aakukkala acuuno cabwami bwakwe, weelede kulilembela Mulawo ooyu mubbuku lyakwe* kuzwa mubbuku lyamulawo eelyo liyobolwa abapaizi, iba Levi.+

19 “Weelede kuba andilyo alimwi weelede kulibala mazuba oonse aabuumi bwakwe,+ kutegwa aiye kuyoowa Jehova Leza wakwe akubamba majwi oonse aaya aali mu Mulawo ooyu alimwi amalailile aaya akwaacita.+ 20 Aboobo moyo wakwe tuukalisumpuli kwiinda banabokwabo, alimwi takaleyi kuzwa kumulawo nokuba kululyo naa kulumwensyi, kutegwa akoongole mubwami bwakwe, walo abana bakwe akati kabana Israyeli.

18 “Bapaizi ba Levi alimwi amusyobo wa Levi woonse, tabakapegwi caabilo naa lukono akati kabana Israyeli. Bayoolya zituuzyo zyuumpwa kuli Jehova, eezyi ndolukono lwabo.+ 2 Aboobo tabeelede kuba alukono akati kabanabokwabo. Jehova ndolukono lwabo, mbubonya mbwaakabaambila.

3 “Lino eeci ceelede kuzumanana kuba caabilo cabapaizi kuzwa kubantu: Kufwumbwa uutuula cipaizyo, ŋombe naa mbelele, weelede kupa mupaizi mweendo wakucamba, myeebo acifwu. 4 Maila aako mataanzi, waini wako mupya, mafwuta alimwi aboya butaanzi bwagelwa kumbelele zyako weelede kumupa mupaizi.+ 5 Jehova Leza wanu wasala mupaizi abana bakwe kuzwa kumisyobo yanu yoonse kuti kabeleka muzina lya Jehova lyoonse.+

6 “Pele kuti naa mu Levi wazwa mumunzi umwi akati kaminzi ya Israyeli mwaali kukkala,+ alimwi wayanda kuunka kubusena oobo Jehova mbwaasala,*+ 7 ulakonzya kubeleka ooko muzina lya Jehova Leza wakwe mbubonya mbuli banabokwabo boonse iba Levi ibaimvwi ooko kumbele lya Jehova.+ 8 Uyoopegwa cakulya ceelene acakulya cabo,+ kunze lyazyeezyo nzyajana kwiinda mukusambala zintu nzyobakasiya bamausyi.

9 “Mwaakunjila munyika eeyo Jehova Leza wanu njayoomupa, tamweelede kwiiya kucita zintu zisesemya nzyobacita aabo bamasi.+ 10 Takweelede kujanwa akati kanu muntu uumpa* mwanaakwe musankwa naa musimbi mumulilo,+ muŋanga,+ simasalamuzi,+ sibusangu,+ mulozi,+ 11 simabibo, muntu uubuzya makani kubaŋanga,+ simaloto+ naa muntu uubuzya makani kubafwu.+ 12 Nkaambo kufwumbwa muntu uucita zintu eezyi ncisesemyo kuli Jehova, alimwi akaambo kazintu eezyi zisesemya, Jehova Leza wanu ncabatandila kubusyu bwanu. 13 Mweelede kuba bantu batakwe kampenda kubusyu bwa Jehova Leza wanu.+

14 “Nkaambo bamasi aaba mbomwaatula bali kubaswiilila aabo basimasalamuzi+ abasondi,+ pele Jehova Leza wanu tanaakamuzumizya kucita cintu cili boobu. 15 Jehova Leza wanu uyoomubusizya musinsimi uuli mbuli ndime akati kabanabokwanu. Mweelede kumuswiilila.+ 16 Eeci cili boobu kweelana ambomwakamulomba Jehova Leza wanu ku Horebu buzuba noyakabungene mbungano,+ nomwakaamba kuti, ‘Tutamvwi limbi ijwi lya Jehova Leza wesu, nokuba kubona mulilo ooyu mupati kutegwa tutafwi.’+ 17 Kumane Jehova wakandaambila kuti, ‘Makani ngobaamba ali buyo kabotu. 18 Ndiyoobabusizya musinsimi uuli mbuli nduwe akati kabanabokwabo,+ alimwi ndiyoobikka majwi aangu mumulomo wakwe,+ eelyo uyoobaambila zyoonse nzyondiyoomulailila.+ 19 Masimpe, muntu uutakaswiilili majwi aangu ngayakwaamba muzina lyangu ndiyoomupa mulandu.+

20 “‘Ikuti musinsimi uuli woonse cakulisumpula waamba makani muzina lyangu ngondatamulailila kwaamba, naa waamba muzina lyabaleza bambi, weelede kufwa.+ 21 Pele ambweni mumyoyo yanu mulakonzya kwaamba kuti: “Ino inga twazyiba buti kuti tali Jehova waamba makani aaya?” 22 Ikuti musinsimi waamba muzina lya Jehova pele nzyaamba tiizyacitika ncobeni, nkokuti majwi aayo taazwi kuli Jehova. Musinsimi ooyo cakulisumpula wakalipungila buya makani aayo. Tamweelede kumuyoowa pe.’

19 “Jehova Leza wanu aakunyonyoona bamasi ibali munyika eeyo Jehova Leza wanu njayoomupa, alimwi mwaakubaatula akukkala muminzi yabo amumaanda aabo,+ 2 mweelede kuzandula minzi yotatwe munyika eeyo Jehova Leza wanu njayoomupa.+ 3 Mukaapaule nyika eeyo Jehova Leza wanu njayoomupa muzibeela zyotatwe, alimwi mukabambe nzila kutegwa muntu uuli woonse iwajaya muntunyina katijila kuli umwi waminzi eeyo.

4 “Lino mboobu mbomweelede kucita kujatikizya sikujaya muntu uutijila nkuko kutegwa atajaigwi: Ikuti naa wajaya muntunyina cakutazyiba alimwi kali tanaakamusulide;+ 5 mbuli ciindi naaunka kukutebba nkuni amweenzinyina, eelyo naavwuumuka kugonka cisamu, keembe kakuka kumwiini akuyasa mweenzinyina kumane wafwa, sikujaya muntu ooyo weelede kutijila kuli umwi waminzi eeyi kutegwa azumanane kupona.+ 6 Akaambo kakuti sikupilusya mulandu wabulowa+ ulinyemede* kapati, ulakonzya kumutandila sikujaya muntu ooyo akumweenzya mpoonya akumujaya, nkaambo musinzo mulamfwu kuya kumunzi wamayubilo. Nokuba boobo, tanaayelede kujaigwa pe, nkaambo tanaakamusulide mweenzinyina.+ 7 Nkakaambo kaako ncindamulailila kuti: ‘Muzandule minzi yotatwe.’

8 “Ikuti naa Jehova Leza wanu wakomezya cilawo canu kweelana ambwaakakonkezya kuli bamauso+ akumupa nyika yoonse njaakasyomezya kupa bamauso+ 9 —kufwumbwa kuti mwabamba mulawo ooyu oonse ngondamupa sunu, kuyanda Jehova Leza wanu akweenda munzila zyakwe lyoonse+—nkokuti mweelede kuyungizya minzi iimbi yotatwe kuli yeeyo yotatwe yakusaanguna.+ 10 Munzila eeyi, takukabi nokutilwa bulowa bwamuntu uunyina mulandu+ munyika eeyo Jehova Leza wanu njayoomupa kuti ibe lukono lwanu, alimwi tamukabi amulandu wabulowa.+

11 “Pele kuti naa muntu wakalimusulide mweenzinyina+ eelyo wamuyubilila akumuumputa kumane wafwa, mpoonya muntu ooyo watijila kuli umwi waminzi eeyi, 12 baalu bamumunzi wakooko nkwazwa beelede kutuma bantu kuti bakamulete akumwaaba kuli sikupilusya mulandu wabulowa, eelyo weelede kufwa.+ 13 Tamweelede kumufwida luse pe, alimwi mweelede kugwisya mulandu wabulowa bwamuntu uunyina mulandu mu Israyeli,+ kutegwa mukkale kabotu.

14 “Mwaakutambula lukono lwanu munyika Jehova Leza wanu njayoomupa kuti ibe yanu, tamweelede kuswenzya minyinza yabeenzinyoko+ kuzwa waawo basikale mpobakaibikka.

15 “Takweelede kuba buyo kamboni omwe uucitila bumboni kujatikizya mulandu naa cibi cili coonse muntu ncaakacita.+ Kubumboni bwabakamboni bobilo naa botatwe makani ayelede kusinizyigwa.+ 16 Ikuti naa kwaba muntu uupa bumboni bwakubeja kujatikizya muntu umwi akumubejelezya kuti watyola mulawo,+ 17 bantu bobilo aaba ibajisi mazwanga beelede kwiima kubusyu bwa Jehova, kumbele lyabapaizi ababetesi ibanoobeteka mumazuba aayo.+ 18 Babetesi bayoovwuntauzya cakulomya,+ eelyo ikuti naa kwajanika kuti kamboni ooyo ngusikubejelezya buyo munyina, 19 mweelede kumucitila mbubonya mbwaakakanzide kucitila mweenzinyina,+ alimwi mweelede kugwisya bubi akati kanu.+ 20 Aabo basyaala baakumvwa, bayooyoowa eelyo tabakaciti limbi cintu cibi mbuli ceeci akati kanu.+ 21 Tamweelede kumufwida luse pe:+ Mulawo weelede kuba buumi kubuumi, liso kuliso, janza kujanza acituta kucituta.+

20 “Ikuti naa mwaunka kuyoolwana basinkondonyoko alimwi mwabona kuti bajisi mabbiza, nkalaki zyankondo alimwi abasikalumamba banji kwiinda ndinywe, tamweelede kubayoowa pe, nkaambo Jehova Leza wanu iwakamugwisya mucisi ca Egepita ulaandinywe.+ 2 Nomuyanda kuunka kunkondo, mupaizi weelede kuboola akwaambaula abantu.+ 3 Weelede kubaambila kuti, ‘Amuswiilile nobana Israyeli, mulaafwaafwi kulwana abasinkondonyoko. Mutalibiliki pe. Mutayoowi nokuba kukankama akaambo kambabo, 4 nkaambo Jehova Leza wanu uli andinywe kuti amulwanine basinkondonyoko akumufwutula.’+

5 “Abalo basololi beelede kwaambila bantu kuti, ‘Sena kuli wakayaka ŋanda pele tanatalika kukkala mulinjiyo? Kapiluka kuŋanda yakwe, nkaambo ambweni uyoofwa munkondo eelyo muntu uumbi uyookkala mulinjiyo. 6 Sena kuli wakalima muunda wamisaansa pele tanatalika kulya micelo yayo? Kapiluka kuŋanda yakwe, nkaambo ambweni uyoofwa munkondo eelyo muntu uumbi uyootalika kwiilya. 7 Sena kuli uusinkilide mukaintu pele tanamukwata? Kapiluka kuŋanda yakwe,+ nkaambo ambweni uyoofwa munkondo eelyo muntu uumbi uyoomukwata.’ 8 Alimwi basololi beelede kubuzya bantu kuti, ‘Ino nguni mukandu alimwi muyoofwu?+ Kapiluka kuŋanda yakwe kutegwa atatyompyi banabokwabo mbuli nguwe.’*+ 9 Eelyo basololi bamana kwaambaula abantu, beelede kubikka basilutwe bamakamu kuti basololele bantu.

10 “Kuti naa mwaswena afwaafwi amunzi ngomuyanda kulwana, mweelede kusaanguna kwaambilizya cizuminano caluumuno kumunzi ooyo.+ 11 Ikuti naa bazumina kumvwana andinywe akumujalwida milyango, nkokuti bantu boonse bajanika mumo bayooba bazike banu alimwi bayoomubelekela.+ 12 Pele ikuti naa bakaka kumvwana andinywe alimwi bamulwana, mweelede kubasinkilizya, 13 Jehova Leza wanu uyoobaaba mumaanza aanu, alimwi mweelede kujaya bamaalumi boonse bali mumo apanga. 14 Pele bamakaintu, bana, banyama bavwubwa azintu zyoonse zyajanika mumunzi, nkokuti zisaalo zyoonse, mulakonzya kuzibweza,+ alimwi muyoolya zisaalo zyabasinkondonyoko eezyo Jehova Leza wanu nzyaamupa.+

15 “Oobo mbomuyoocita kuminzi yoonse iili kule kapati alimwi iitali imwi yaminzi yabamasi aaba bali afwaafwi. 16 Pele muminzi yabantu aaba eeyo Jehova Leza wanu njayoomupa kuti ibe lukono lwanu, tamweelede kusiya cintu cili coonse cuumi kuti kacipona.+ 17 Muciindi caboobo, mweelede kubanyonyoona cakumaninina, bana Heti, bana Amori, bana Kanana, bana Perizi, bana Hivi abana Jebusi,+ mbubonya Jehova Leza wanu mbwaakamulailila; 18 kutegwa batakamuyiisyi micito yabo yoonse iisesemya eeyo njobacitila baleza babo akumupa kubisizya Jehova Leza wanu.+

19 “Ikuti naa mwausinkilila munzi mazuba manji kutegwa muusaale, tamweelede kunyonyoona masamu kwiinda mukwaagonkaula; mulakonzya kulya micelo yawo, pele tamweelede kwaagonkaula pe.+ Sena azyalo zisamu zyamusyokwe mweelede kuzisinkilila mbuli bantu? 20 Mweelede buyo kugonkaula zisamu nzyomuzyi kuti tazizyali micelo iiligwa. Mulakonzya kuzigonka kutegwa muyake zyakusinkilizya munzi ooyo iwabusya nkondo andinywe kusikila uwe.

21 “Ikuti naa kwajanika muntu uujaidwe musyokwe munyika eeyo Jehova Leza wanu njayoomupa, alimwi iwakamujaya katazyibidwe, 2 baalu banu ababetesi banu+ beelede kuunka ooko akuyoopima misinzo kuminzi iizingulukide muntu ooyo uujaidwe. 3 Mpoonya baalu bamunzi ooyo uuli afwaafwi kapati amutunta beelede kubweza ŋombe mpwizi akati kabutanga iitanabelesyedwe mulimo alimwi iitanapopedwe, 4 alimwi baalu bamunzi ooyo beelede kutola ŋombe mpwizi eeyo kukalonga kakunka maanzi ooko nyika nkwiitana kulimwa naa kusyangwa, mpoonya beelede kutyola nsingo yaŋombe eeyo ooko mukalonga.+

5 “Alimwi bapaizi, iba Levi, bayooboola nkaambo Jehova Leza wanu wakabasala kuti kabamubelekela+ akulongezya muzina lya Jehova.+ Bayakwaamba mbwaayelede kukosolwa makani oonse aajatikizya mazwanga.+ 6 Mpoonya baalu boonse bamunzi ibali afwaafwi amuntu ooyo uujaidwe beelede kusamba kumaanza+ atala aampwizi iyatyolwa nsingo mukalonga, 7 alimwi beelede kwaamba kuti, ‘Maanza eesu taakwe naakatila bulowa oobu pe, naa meso eesu kubona bulowa oobu bwakatilwa. 8 Utabapi mulandu ooyu bantu bako ibana Israyeli mbookanununa,+ O Jehova, alimwi utalekeli mulandu wabulowa bwamuntu uunyina mulandu kuba alimbabo.’+ Eelyo tabakapegwi mulandu wabulowa. 9 Munzila eeyi muyoogwisya mulandu wabulowa bwamuntu uunyina mulandu akati kanu kwiinda mukucita ciluleme mumeso aa Jehova.

10 “Ikuti naa mwaunka kuyoolwana basinkondonyoko, eelyo Jehova Leza wanu wabazunda alimwi mwabatola mubuzike,+ 11 mpoonya wabona mukaintu mubotu akati kabazike aabo alimwi wamumenena mate akuyanda kumubweza kuti abe mukaintu wako, 12 ulakonzya kumutola muŋanda yako. Mpoonya weelede kugela masusu aakwe akutenda mala aakwe, 13 akumusamununa zisani eezyo nzyaakajatwa azyalo akukkala muŋanda yako. Uyoolila bausyi abanyina mwezi woonse,+ amana kucita boobo, ulakonzya koonana anguwe; yebo uyooba mulumaakwe walo uyooba mukaintu wako. 14 Pele ikuti naa tonoomukkomanina, weelede kumuleka kuti aunke+ kufwumbwa nkwayanda. Pele toyelede kumusambala naa kumupenzya pe nkaambo wamusofwaazya kale.

15 “Ikuti naa mwaalumi kakwete bamakaintu bobilo, umwi kamuyandisya kwiinda umwi, mpoonya boonse bobilo bamuzyalila bana basankwa alimwi mutaanzi kali wayooyo ngwatayandi,+ 16 mubuzuba oobo mbwapa lukono lwakwe kubana bakwe basankwa, takazumizyigwi kuti mwana wamukaintu ngwayandisya abe ngomwanaakwe mutaanzi mucibaka camwana wayooyo ngwatayandi, imutaanzi kuzyalwa. 17 Weelede kupa mwana wayooyo ngwatayandi bulemu bwamwana musankwa mutaanzi kuzyalwa kwiinda mukumupa zipaanzi zyobilo zyazintu zyoonse nzyajisi, nkaambo ooyo ngamatalikilo aanguzu zyaluzyalo lwakwe. Coolwe cakuba mutaanzi kuzyalwa ncicakwe.+

18 “Ikuti muntu kajisi mwana sicinguni alimwi muzangi, uutaswiilili bausyi abanyina,+ alimwi kakuli bakali kumulaya pele tamvwi,+ 19 bausyi abanyina beelede kumujata akumutola kubaalu bamunzi wakwe kumulyango wamunzi, 20 eelyo beelede kwaambila baalu kuti, ‘Mwaneesu ooyu ngusicinguni alimwi muzangi, tatuswiilili pe. Mulyato+ alimwi ngucakolwa.’+ 21 Mpoonya bantu bamumunzi wakwe boonse beelede kumupwaya mabwe kutegwa afwe. Mweelede kugwisya bubi akati kanu alimwi bana Israyeli boonse bayoomvwa akuyoowa.+

22 “Ikuti muntu umwi wacita cibi ceelede lufwu alimwi wajaigwa,+ eelyo mwamwaanzika acisamu,+ 23 mutunta wakwe taweelede kuba acisamu+ masiku oonse pe. Pele mweelede kumuzikka buzuba mbubonya oobo, nkaambo kufwumbwa waanzikwa acisamu ulisinganizyidwe a Leza,+ alimwi tamweelede kusofwaazya nyika yanu eeyo Jehova Leza wanu njayoomupa kuti ibe lukono lwanu.+

22 “Ikuti naa wajana ŋombe naa mbelele yamunyoko iisweekede, toyelede kwiileka buyo pe.+ Weelede kwiitola kumunyoko. 2 Pele ikuti munyoko katakkali afwaafwi anduwe alimwi kotamuzyi, nkokuti weelede kwiitola kuŋanda yako, ikkale kulinduwe kusikila munyoko akaboole kwiiyandaula. Mpoonya uyoomupa njiyo.+ 3 Oobu mboyelede kucita akumbongolo yakwe, kucisani cakwe akucintu camunyoko cili coonse cisweekede ncoojana. Toyelede kucileka buyo pe.

4 “Ikuti naa wabona mbongolo yamunyoko naa ŋombe yakwe iliwide munzila, toyelede kwiinda buyo pe. Weelede kumugwasya kwiibusya.+

5 “Mukaintu teelede kusama cisani camwaalumi awalo mwaalumi teelede kusama cisani camukaintu. Nkaambo kufwumbwa uucita boobo ncisesemyo kuli Jehova Leza wanu.

6 “Ikuti wajana citeente cakayuni munzila naa mucisamu naa ansi imuli twana naa mayi alimwi nyina kakkede atwana naa amayi, toyelede kubweza nyina antoomwe atwana.+ 7 Weelede kuleka nyina kuti aunke, pele ulakonzya kubweza twana. Weelede kucita boobu kutegwa zintu zikweendele kabotu akuti upone mazuba manji.

8 “Ikuti naa wayaka ŋanda mpya, ciluli weelede kuciyakila citabililo+ kutegwa ŋanda yako itabi amulandu wabulowa nkaambo muntu ulakonzya kuloka kuzwa alinjiyo.

9 “Toyelede kusyanga misyobo yobilo yambuto mumuunda wako wamisaansa.+ Buyo-buyo, butebuzi bwambuto eeyo abwamisaansa buyootolwa kutente lisalala.

10 “Toyelede kulimya musune antoomwe ambongolo.+

11 “Toyelede kusama cisani cisumidwe aboya bwambelele antoomwe amulembo muuba-uba.+

12 “Weelede kusuma maaya kuzyooko zyone zyacisani cako ncosama.+

13 “Ikuti naa mwaalumi wakwata mukaintu akoonana anguwe, mpoonya waleka kumuyanda, 14 akumutamikizya kuti tanaakali kulilemeka, eelyo wamubisizya zina kwiinda mukwaamba kuti, ‘Ndakakwata mukaintu ooyu, pele nindakoonana anguwe tiindakajana citondezyo cakuti ngunakalindu,’ 15 bausyi abanyina musimbi beelede kuleta citondezyo cabunakalindu bwamusimbi ooyo kubaalu kumulyango wamunzi. 16 Bausyi musimbi ooyo beelede kwaambila baalu kuti, ‘Ndakakwasya mwanaangu kumwaalumi ooyu, pele lino tacimuyandi 17 alimwi umutamikizya kuti tanaakali kulilemeka kwiinda mukwaamba kuti: “Tiindakajana citondezyo cabunakalindu mumwanaanu.” Nceeci citondezyo cabunakalindu bwamwanaangu.’ Mpoonya beelede kubikka cisani eeco kumbele lyabaalu bamunzi. 18 Baalu bamunzi+ beelede kujata mwaalumi ooyo akumuuma.+ 19 Bayoomubbadelesya masyekeli* aansiliva aali 100 akwaapa bausyi musimbi, nkaambo mwaalumi ooyo wabisya zina lyanakalindu muna Israyeli,+ alimwi uyoozumanana kuba mukaintu wakwe. Takazumizyigwi kumuleka mubuumi bwakwe boonse.

20 “Ikuti makani aaya kaali aamasimpe, akuti citondezyo cabunakalindu tiicakajanwa mumusimbi, 21 beelede kumuleta musimbi ooyo kumulyango waŋanda yabausyi, eelyo baalumi bamumunzi wakwe beelede kumupwaya mabwe kutegwa afwe, nkaambo wakacita cintu cuusya nsoni+ mu Israyeli kwiinda mukucita buvwuule muŋanda yabausyi.+ Aboobo mweelede kugwisya bubi akati kanu.+

22 “Ikuti mwaalumi wajatwa bumambe amukamuntu, boonse bobilo beelede kufwa, mwaalumi amukaintu ooyo.+ Aboobo mweelede kugwisya bubi mu Israyeli.

23 “Ikuti kakuli nakalindu uusinkilidwe kumwaalumi, eelyo mwaalumi uumbi wamujana mumunzi akoonana anguwe, 24 mweelede kubaleta boonse bobilo kunze aamunzi akubapwaya mabwe kutegwa bafwe. Musimbi ulajaigwa akaambo kakuti tanaakakwiila nokuba kuti wakali mumunzi naakajatwa, eelyo mwaalumi ulajaigwa akaambo kakuti wasofwaazya mukamweenzinyina.+ Aboobo mweelede kugwisya bubi akati kanu.

25 “Nokuba boobo, ikuti kamuli musyokwe mwaalumi ooyo mwaakamujana musimbi uusinkilidwe, eelyo wakamujata akoonana anguwe, nkokuti mwaalumi ooyo iwakoonana anguwe weelede kujaigwa alikke, 26 musimbi tamweelede kumucita cintu cili coonse pe. Tajisi cibi ceelede lufwu. Eeci cili mbuli muntu umwi wajaya mweenzinyina.+ 27 Nkaambo wakamujana musyokwe, alimwi musimbi ooyo uusinkilidwe wakakwiila pele kwakanyina uumuvwuna.

28 “Ikuti mwaalumi wajana musimbi nakalindu uutasinkilidwe, eelyo wamujata akoonana anguwe mpoonya bajatwa,+ 29 mwaalumi ooyo iwoonana anguwe weelede kupa bausyi musimbi masyekeli aansiliva aali 50, alimwi uyooba mukaintu wakwe+ akaambo kakuti wamusofwaazya. Takazumizyigwi kumuleka mubuumi bwakwe boonse.

30 “Kunyina mwaalumi weelede koonana amukausyi kutegwa atabausyi nsoni bausyi.*+

23 “Kunyina mwaalumi wakazibwa naa uukoswedwe bwaalumi weelede kuboola mumbungano ya Jehova.+

2 “Kunyina mwana wamusyokwe weelede kuboola mumbungano ya Jehova.+ Nobaba bana bakwe kusikila kuzyalani lyakkumi tabakonzyi kuboola mumbungano ya Jehova.

3 “Kunyina muna Amoni naa muna Moabu weelede kuboola mumbungano ya Jehova.+ Nobaba bana bakwe kusikila kuzyalani lyakkumi tabakonzyi kuboola mumbungano ya Jehova, 4 akaambo kakuti tiibakamugwasya acakulya alimwi amaanzi mulweendo lwanu lwakuzwa mu Egepita,+ alimwi akaambo kakuti bakamutambila Balamu mwana wa Beori kuzwa ku Petori yaku Mesopotamiya kutegwa azoomusinganye.+ 5 Nokuba boobo, Jehova Leza wanu tanaakamuswiilila Balamu.+ Muciindi caboobo Jehova Leza wanu wakasandula kusinganya kuti kube cilongezyo,+ akaambo kakuti Jehova Leza wanu ulamuyanda.+ 6 Tamweelede kubagwasya kutegwa babe aluumuno akuzwidilila mazuba aabuumi bwanu oonse.+

7 “Tamweelede kumusula muna Edomu, nkaambo munyoko.+

“Tamweelede kumusula muna Egepita, nkaambo mwakali beenzu mucisi cakwe.+ 8 Bana babo bazyalani lyatatu balakonzya kuboola mumbungano ya Jehova.

9 “Nomuli munkambi, kulibambila kulwana abasinkondonyoko, tamweelede kucita cibi* cili coonse.+ 10 Ikuti mwaalumi wasofwaala akaambo kakusowa bwaalumi ciindi camasiku+ weelede kuunka kunze aankambi, mpoonya teelede kuboola alimwi munkambi. 11 Kwaba kumazuba weelede kusamba, mpoonya ulakonzya kuboola alimwi munkambi lyabbila zuba.+ 12 Mweelede kuba abusena* kunze aankambi, ooko nkomukonzya kwiinka kuyooligwasya. 13 Mweelede kuba acibelesyo cakusyisya, eelyo mwamana kuligwasya mweelede kuvwikkila tubi ooto. 14 Nkaambo Jehova Leza wanu uleendeenda munkambi yanu+ kuti amuvwune akwaaba basinkondonyoko kulindinywe, alimwi nkambi yanu yeelede kusalala,+ kutegwa ataboni cintu cili coonse cisofweede akati kanu akuleka kweenda andinywe.

15 “Toyelede kupilusya muzike kuli simalelaakwe ikuti naa waloboka akuboola kulinduwe. 16 Ulakonzya kukkala akati kanu abusena buli boonse mbwaasala mumunzi umwi akati kaminzi yanu. Toyelede kumupenzya pe.+

17 “Kunyina musimbi+ naa musankwa uuli woonse muna Israyeli weelede kuba muvwuule wamutempele.+ 18 Mutaleti zyakuvwola zyamukaintu muvwuule naa zyamusankwa muvwuule* muŋanda ya Jehova Leza wanu kuti muzuzikizye cikonke, nkaambo zyoonse zyobilo zilamusesemya Jehova Leza wanu.

19 “Toyelede kukweletesya munyoko kutegwa ujane cinyonamucila,+ naaba mali, cakulya nociba cintu cili coonse muntu mpakonzya kujanina cinyonamucila. 20 Muzwakule ulakonzya kumubbadelesya cinyonamucila,+ pele munyoko toyelede kumubbadelesya cinyonamucila pe,+ kutegwa Jehova Leza wako akakulongezye mumilimo yako yoonse munyika eeyo njomuyoobweza kuti ibe yanu.+

21 “Ikuti naa wakonka cikonke kuli Jehova Leza wako,+ toyelede kumuka kucizuzikizya pe.+ Nkaambo ncobeni Jehova Leza wako uyoociyanda kulinduwe; buyo-buyo uyooba amulandu.+ 22 Pele naa tiiwakonka, tokabi amulandu pe.+ 23 Kufwumbwa ncowaamba amulomo wako weelede kucizuzikizya,+ alimwi weelede kucita mbubonya mbowakonka kuli Jehova Leza wako kacili cituuzyo cakuliyandila.+

24 “Ikuti naa wanjila mumuunda wamisaansa wamweenzinyoko, ulakonzya kulya misaansa njokonzya kukkuta, pele toyelede kubikka imwi muciyumwido cako.+

25 “Ikuti wanjila mumuunda wamweenzinyoko wamaila, ulakonzya kupulula aakabizwa, pele toyelede kucesa* maila aamweenzinyoko pe.+

24 “Ikuti mwaalumi wakwata, pele musyule lyaboobo waleka kumuyanda mukaintu ooyo akaambo kakuti wajana cintu cuusya nsoni mulinguwe, weelede kulemba lugwalo lwakumuleka+ akumupa, mpoonya akumutanda muŋanda yakwe.+ 2 Azwa muŋanda yakwe ulakonzya kuunka kuyookwatwa kumwaalumi umbi.+ 3 Kuti mwaalumi wabili wamuleka akumulembela lugwalo lwakulekana akumupa eelyo wamutanda muŋanda yakwe, naa ikuti mwaalumi ooyo wabili iwakamukwata wafwa, 4 mwaalumi wakusaanguna iwakamutanda takazumizyigwi kumukwata alimwi naamana kusofwaazyigwa amwaalumi umbi nkaambo eeci ncintu cisesemya kuli Jehova. Tamweelede kuleta cibi munyika eeyo Jehova Leza wanu njaamupa kuti ibe lukono lwanu.

5 “Ikuti naa mwaalumi wakakwata ino-ino, teelede kuunka kunkondo naa kupegwa milimo imbi iili yoonse pe. Weelede kukkala aŋanda yakwe mwaka omwe akukkomanisya mukaintu wakwe.+

6 “Kunyina weelede kunyanga umwi ziyo naa mwanaankando kuti cibe cijatilizyo,+ nkaambo cili mbuli kumunyanga buumi bwakwe kuti bube cijatilizyo.

7 “Ikuti naa muntu wajanika kuti wakabba muna Israyelinyina, alimwi wakamupenzya akumusambala,+ ooyo sikubba muntunyina weelede kujaigwa.+ Mweelede kugwisya bubi akati kanu.+

8 “Ikuti naa kwabuka bulwazi bwacinsenda,* mweelede kulomya kutobela malailile ngobamupa bapaizi ba Levi.+ Mweelede kubikkila maano kucita mbubonya mbondakabalailila. 9 Amuyeeye Jehova Leza wanu ncaakacita kuli Miriamu ciindi nimwakali munzila kuzwa ku Egepita.+

10 “Ikuti naa wakweletesya mweenzinyoko cintu cili coonse,+ toyelede kunjila muŋanda yakwe kuti ubweze cintu ncaasyomezya kuti cibe cijatilizyo. 11 Weelede kwiima anze, eelyo muntu ooyo ngookakweletesya weelede kuleta cintu eeco anze. 12 Ikuti naa muntu ooyo ulipengede, cintu cakwe taceelede koona kulinduwe pe.+ 13 Mbolyabbilila buyo zuba weelede kumujosezya cintu eeco ncaakupa kuti cibe cijatilizyo, kuti aone acisani cakwe,+ eelyo uyookulongezya; alimwi uyooba mululami kuli Jehova Leza wako.

14 “Toyelede kuunina mubelesi wako uupengede alimwi mucete, kufwumbwa naa ngumwi wabanabokwanu naa mweenzu uukkede muminzi* yanu.+ 15 Mubuzuba mbwayelede kuvwola weelede kumuvwozya,+ zuba talyeelede kubbila kocijisi cakuvwola cakwe, nkaambo ulipengede alimwi uponena acakuvwola cakwe. Buyo-buyo ulakwiilila Jehova akaambo kanduwe, eelyo yebo ulaba amulandu.+

16 “Bamausyi tabeelede kujaigwa akaambo kazibi zyabana babo, abalo bana tabeelede kujaigwa akaambo kazibi zyabamausyi.+ Muntu weelede kujaigwa akaambo kacibi cakwe mwini.+

17 “Utapilinganyi lubeta lwamweenzu naa lwamucaala,+ alimwi toyelede kunyanga mukamufwu cisani cakwe kuti cibe cijatilizyo.+ 18 Koyeeya kuti wakali muzike mucisi ca Egepita alimwi Jehova Leza wako wakakunununa kuzwa kooko.+ Nkakaambo kaako ncondikulailila kucita cintu eeci.

19 “Ikuti naa watebula mumuunda wako, eelyo waluba cilwi cimwi, toyelede kupiluka kuti ukacibweze pe. Weelede kucisiila mweenzu, mucaala amukamufwu;+ kutegwa Jehova Leza wako akakulongezye mumilimo yako yoonse.+

20 “Waonza maolifa kucisamu cako, toyelede kupiluka kuti ukaonze yaayo aasyaala. Weelede kwaasiila mweenzu, mucaala amukamufwu.+

21 “Watebula misaansa mumuunda wako, toyelede kupiluka kuti ukacele yeeyo yasyaala. Weelede kwiisiila mweenzu, mucaala amukamufwu. 22 Koyeeya kuti wakali muzike mucisi ca Egepita. Nkakaambo kaako ncondikulailila kucita cintu eeci.

25 “Ikuti naa bantu bobilo bazwangana, balakonzya kutolana kubabetesi,+ eelyo bayoobabeteka akwaamba uululeme kuti unyina mulandu ayooyo uulubizyide kuti ulaamulandu.+ 2 Ikuti ooyo uulubizyide weelede kuumwa,+ mubetesi uyoolailila kuti abbandamikwe akuumwa zimboko kalangilila mubetesi. Mweelwe wazimboko weelede kweelana acibi ncaacita. 3 Ulakonzya kumuuma zimboko zili 40,+ pele kutali kwiindilila waawo. Ikuti wazumanana kumuuma zimboko zinji kwiinda waawo, munyoko ulasampuka mumeso aako.

4 “Mutamwaangi kumulomo musune ciindi nomuuma maila.+

5 “Ikuti naa banabunyina kabakkala antoomwe eelyo umwi wabo wafwa katajisi mwana musankwa, mukamufwu tayelede kukwatwa kumbi. Mulamwaakwe weelede kumukwata akuzuzikizya lukwatano lwamunyina.+ 6 Mwana mutaanzi ngwayoozyala weelede kulya zina lyamunyina wakafwa,+ kutegwa zina lyakwe litalobi mu Israyeli.+

7 “Lino ikuti mwaalumi katayandi kumukwata mukamunyina, mukamufwu ooyo weelede kuunka kubaalu kumulyango wamunzi akubaambila kuti, ‘Mwanookwabo mulumaangu wakaka kubusizya mwanookwabo zina mu Israyeli. Tayandi kuzuzikizya lukwatano lwamunyina andime.’ 8 Baalu bamumunzi wakwe beelede kumwiita akubandika anguwe. Ikuti wazumanana kwaamba kuti, ‘Tandiyandi kumukwata pe,’ 9 mukamufwu ooyo weelede kuswena afwaafwi kabalangilide baalu akumusamununa mpato kumaulu aakwe,+ weelede kumuswida mate kubusyu akwaamba kuti, ‘Oobu mboceelede kucitwa kumwaalumi uukaka kubusizya munyina lunyungu.’ 10 Kuzwa waawo, zina lyakwe lyamukwasyi mu Israyeli linakwiitwa kuti ‘Ŋanda yamuntu ooyo wakasamununwa mpato.’

11 “Ikuti baalumi bobilo balwana, eelyo mukaintu waumwi waboola afwaafwi kuti avwune mulumaakwe kuli yooyo uumulwana, eelyo mukaintu ooyo wajata mwaalumi ooyo kubwaalumi, 12 mweelede kumukosola janza lyakwe mukaintu ooyo. Tamweelede kumweengelela pe.

13 “Toyelede kuba amabwe obilo aakupimya munkomo yako,+ lipati alisyoonto. 14 Toyelede kuba azyeelekelo zyaefa* zyamisyobo yobilo muŋanda yako,+ cipati acisyoonto. 15 Weelede kuba acipimyo ciluzi alimwi aceelesyo ciluzi, kutegwa woongole munyika Jehova Leza wanu njayoomupa.+ 16 Nkaambo kufwumbwa muntu uutaluleme uucita zintu zili boobu, ncisesemyo kuli Jehova Leza wanu.+

17 “Amuyeeye bana Amaleki ncobakacita kulindinywe ciindi nomwakali kuzwa mu Egepita,+ 18 mbobakaboola akubalwana boonse aabo ibakali musyule, kamukatede akuwizuka. Tiibakayoowa Leza pe. 19 Jehova Leza wanu aakumupa kulyookezya kuli basinkondonyoko boonse ibeengelede munyika Jehova Leza wanu njayoomupa kuti ibe lukono lwanu,+ mweelede kubanyonyoona bana Amaleki kutegwa batakayeeyegwi limbi anyika.+ Mutakalubi pe.

26 “Mwaakunjila munyika eeyo Jehova Leza wanu njaamupa kuti ibe lukono lwanu akwiibweza akukkala mulinjiyo, 2 mweelede kubweza imwi yamicelo mitaanzi njomuyootebula munyika eeyo Jehova Leza wanu njayoomupa, akwiibikka mumutaanga* akuunka kubusena ooko Jehova Leza wanu nkwayoosala kuti abikke zina lyakwe.+ 3 Mweelede kuunka kumupaizi uunooliko kuciindi eeco akumwaambila kuti, ‘Sunu ndaboola kuzikwaamba kuli Jehova Leza wako kuti ndanjila munyika eeyo Jehova njaakakonkezya kuli bamatata kuti uyootupa.’+

4 “Lino mupaizi uyoobweza mutaanga kuzwa kulinduwe akuubikka kumbele lyacipaililo ca Jehova Leza wako. 5 Mpoonya weelede kwaambila Jehova Leza wako kuti, ‘Taata wakali simutuntuli muna Aramu,+ eelyo wakaunka ku Egepita+ akuyookkala mbuli mweenzu kali abantu basyoonto bamuŋanda yakwe.+ Pele ooko wakaba musyobo mupati, wanguzu alimwi wakavwula kapati.+ 6 Kumane bana Egepita bakatucitila lunya, bakatupenzya kapati akutubelesya cabuzike.+ 7 Aboobo twakatalika kumukwiilila Jehova Leza wabamatata, aboobo Jehova wakakumvwa kulila kwesu akwaabona mapenzi eesu, kulemenwa kwesu akudyaamininwa kwesu.+ 8 Kumane Jehova wakatugwisya mu Egepita ajanza lyanguzu litandabede+ alimwi azintu zigambya ziyoosya kapati azitondezyo alimwi amaleele.+ 9 Mpoonya wakatuleta mubusena oobu akutupa nyika eeyi, iikunka buci amukupa.+ 10 Lino njeeyi micelo mitaanzi njindaleta yanyika eeyo Jehova njaandipa.’+

“Weelede kwiibikka kumbele lya Jehova Leza wako akuvwuntama ansi kumbele lya Jehova Leza wako. 11 Mpoonya muyookondwa akaambo kabubotu boonse Jehova Leza wako mbwaakucitila abaŋanda yako, yebo amu Levi amweenzu uukkede akati kanu.+

12 “Wamana kuyobolola cipaanzi cakkumi+ coonse cabutebuzi bwako mumwaka watatu, imwaka wakupa cakkumi, uyoopa mu Levi, mweenzu, mucaala amukamufwu, eelyo bayoolya akukkuta muminzi* yanu.+ 13 Mpoonya weelede kwaamba boobu kumbele lya Jehova Leza wako, ‘Ndacigwisya cipaanzi cisalala muŋanda yangu akucipa mu Levi, mweenzu, mucaala amukamufwu,+ mbubonya mbowakandilailila. Tiindasotoka milawo yako naa kwiiluba. 14 Tiindakacilya ciindi cakulila, naa kugwisya cili coonse muciindi cakusofwaala kwangu, naa kupa cili coonse kumuntu uufwide. Ndakaswiilila ijwi lya Jehova Leza wangu alimwi ndacita zyoonse nzyookandilailila. 15 Lino langa ansi kuzwa kucikkalilo cako cisalala kujulu akulongezya bantu bako bana Israyeli anyika njookatupa+ iikunka buci amukupa,+ mbubonya mbowakakonkezya kuli bamatata.’+

16 “Obuno buzuba Jehova Leza wako wakulailila kwaatobela malailile aaya ambeta. Weelede kwaatobela akwaacita amoyo wako woonse+ abuumi bwako boonse. 17 Sunu mwapa kuti Jehova aambe kuti uyooba Leza wanu, mwanakweenda munzila zyakwe akutobela malailile aakwe,+ milawo yakwe,+ mbeta zyakwe+ alimwi akuswiilila jwi lyakwe. 18 Alimwi sunu Jehova wamupa kwaamba kuti muyooba bantu bakwe, lubono lwakwe luyandisi,*+ mbubonya mbwaakamusyomezya, akuti muyoobamba milawo yakwe yoonse, 19 alimwi uyoomusumpula kapati kwiinda misyobo imbi yoonse njaakalenga,+ eelyo muyootembaulwa, muyooba ampuwo alimwi abulemu, ikuti kamuli bantu basalala kuli Jehova Leza wanu,+ mbubonya mbwaakasyomezya.”

27 Mpoonya Musa antoomwe abaalu bamu Israyeli bakalailila bantu. Eelyo Musa wakati: “Amubambe milawo yoonse njondimulailila sunu. 2 Alimwi mubuzuba oobo mbomuyoozabuka Jordano akunjila munyika Jehova Leza wanu njaamupa, amukaimike mabwe mapati akwaalamba mulambo.+ 3 Mpoonya mukalembe alingawo majwi oonse aali mu Mulawo ooyu, mwaakuzabuka kuti munjile munyika eeyo Jehova Leza wanu njaamupa, nyika iikunka buci amukupa, mbubonya Jehova Leza wabamauso mbwaakamusyomezya.+ 4 Mwaakuzabuka Jordano, mweelede kwiimika mabwe aaya aa Cilundu ca Ebala+ akwaalamba mulambo, mbubonya mbondimulailila sunu. 5 Alimwi nkukonya ooko mweelede kuyakila Jehova Leza wanu cipaililo camabwe. Mutakabelesyi zibelesyo zyalubulo alingawo pe.+ 6 Mweelede kuyaka cipaililo ca Jehova Leza wanu amabwe aatabezedwe, akutuula zituuzyo zyuumpwa alincico kuli Jehova Leza wanu. 7 Mweelede kutuula zipaizyo zyalumvwano+ akuzilya nkukonya ooko,+ alimwi muyookondwa kumbele lya Jehova Leza wanu.+ 8 Mpoonya amabwe aayo mukalembe kabotu-kabotu majwi oonse aali mu Mulawo ooyu.”+

9 Mpoonya Musa abapaizi ba Levi bakaambila bana Israyeli boonse kuti: “Nobana Israyeli, amuumune akuswiilila. Obuno buzuba mwaba bantu ba Jehova Leza wanu.+ 10 Mweelede kuswiilila jwi lya Jehova Leza wanu akubamba malailile aakwe amilawo yakwe+ njondimulailila sunu.”

11 Mubuzuba oobo Musa wakalailila bantu kuti: 12 “Mwaakuzabuka Jordano, njeeyi misyobo iiyakwiima aa Cilundu ca Gerizimu+ kulongezya bantu: Simeoni, Levi, Juda, Isakara, Josefa a Benjamini. 13 Misyobo iiyakwiima aa Cilundu ca Ebala+ kwaamba majwi aakusinganya njeeyi: Rubeni, Gadi, Aseri, Zebuloni, Dani a Nafutali. 14 Alimwi ba Levi bayakwaambila mwaalumi uuli woonse wa Israyeli ajwi lipati kuti:+

15 “‘Ulisinganizyidwe muntu uupanga cikozyanyo cibezedwe+ naa cikozyanyo calubulo,+ icintu cisesemya kuli Jehova+ icakapangwa amaanza aamufwuzi,* alimwi akucisisa.’ (Bantu boonse bayakwaamba kuti, ‘Ameni!’*)

16 “‘Ulisinganizyidwe muntu uusampaula bausyi naa banyina.’+ (Bantu boonse bayakwaamba kuti, ‘Ameni!’)

17 “‘Ulisinganizyidwe muntu uuswenzya munyinza wamweenzinyina.’+ (Bantu boonse bayakwaamba kuti, ‘Ameni!’)

18 “‘Ulisinganizyidwe muntu uupa kuti moofwu aleye kuzwa munzila.’+ (Bantu boonse bayakwaamba kuti, ‘Ameni!’)

19 “‘Ulisinganizyidwe muntu uupilinganya lubeta+ lwamweenzu, mucaala naa mukamufwu.’+ (Bantu boonse bayakwaamba kuti, ‘Ameni!’)

20 “‘Ulisinganizyidwe muntu woonana amukaintu wabausyi, nkaambo wausya bausyi nsoni.’*+ (Bantu boonse bayakwaamba kuti, ‘Ameni!’)

21 “‘Ulisinganizyidwe muntu woonana amunyama uuli woonse.’+ (Bantu boonse bayakwaamba kuti, ‘Ameni!’)

22 “‘Ulisinganizyidwe muntu woonana amucizyi wakwe, imwana wabausyi naa mwana wabanyina.’+ (Bantu boonse bayakwaamba kuti, ‘Ameni!’)

23 “‘Ulisinganizyidwe muntu woonana abanyinazyala.’+ (Bantu boonse bayakwaamba kuti, ‘Ameni!’)

24 “‘Ulisinganizyidwe muntu uuyubilila mweenzinyina akumujaya.’+ (Bantu boonse bayakwaamba kuti, ‘Ameni!’)

25 “‘Ulisinganizyidwe muntu uutambula cisinkamulomo kutegwa ajaye muntu uutakwe mulandu.’+ (Bantu boonse bayakwaamba kuti, ‘Ameni!’)

26 “‘Ulisinganizyidwe muntu uutakatobeli majwi aali mu Mulawo ooyu akwaacita.’+ (Bantu boonse bayakwaamba kuti, ‘Ameni!’)

28 “Lino ikuti naa mwaswiilila jwi lya Jehova Leza wanu akulomya kutobela milawo yakwe yoonse njondimulailila sunu, ncobeni Jehova Leza wanu uyoomusumpula kwiinda misyobo yoonse yamunyika.+ 2 Zilongezyo eezyi zyoonse ziyoomusikila,+ nkaambo mwazumanana kuswiilila jwi lya Jehova Leza wanu:

3 “Muyoolongezyegwa muminzi alimwi anyika yanu iyoolongezyegwa.+

4 “Bayoolongezyegwa bana banu,+ butebuzi bwanu alimwi abana babanyama banu bavwubwa alimwi abana baŋombe zyanu abambelele zyanu.+

5 “Mitaanga yanu azikandilo zyanu ziyoolongezyegwa.+

6 “Muyoolongezyegwa kufwumbwa nkomuyakuunka amuzintu zyoonse nzyomuyoocita.

7 “Jehova uyoopa kuti basinkondonyoko ibamulwana bazundwe kubusyu bwanu.+ Baakuboola kumulwana bayooletezya nzila yomwe, pele baakutija kubusyu bwanu bayoomwaikizyanya munzila ziindene-indene zili ciloba.+ 8 Jehova uyoolailila kuti matala aanu alongezyegwe+ alimwi amilimo yanu yoonse, ncobeni uyoomulongezya munyika eeyo Jehova Leza wanu njaamupa. 9 Jehova uyoomucita kuti mube bantu bakwe basalala,+ mbubonya mbwaakakonkezya kulindinywe,+ nkaambo mwazumanana kutobela milawo ya Jehova Leza wanu akweenda munzila zyakwe. 10 Bantu boonse bamunyika bayoobona kuti zina lya Jehova lili alindinywe+ alimwi ncobeni bayoomuyoowa.+

11 “Jehova uyoomupa kuba abana banji, banyama banji alimwi abutebuzi bunji,+ munyika eeyo Jehova njaakakonkezya kuli bamauso kuti uyoomupa.+ 12 Jehova uyoomujalwida ciyobwedo cakwe cibotu, nkokuti ijulu, kuti amupe mvwula aciindi cayo ceelede+ akumulongezya muzintu zyoonse nzyomucita. Muyookweletesya bamasi banji, pele nywebo tamukakweleti pe.+ 13 Jehova uyoomupa kuba basololi kutali micila; alimwi muyooba atala+ kutali ansi, ikuti mwazumanana kuswiilila milawo ya Jehova Leza wanu njondimulailila sunu kuti mwiitobele akwiicita. 14 Tamweelede kuleya kuzwa kumajwi aaya oonse ngondimulailila sunu, kube kululyo naa kulumwensyi,+ kutegwa mutobele baleza bambi akubakomba.+

15 “Pele ikuti mutaswiilili ijwi lya Jehova Leza wanu akutobela milawo yakwe yoonse amalailile aakwe ngondimulailila sunu, kusinganizyigwa ooku koonse kuyoomusikila:+

16 “Muyoosinganizyigwa muminzi, ayalo nyika yanu iyoosinganizyigwa.+

17 “Mitaanga yanu azikandilo zyanu ziyoosinganizyigwa.+

18 “Bayoosinganizyigwa bana banu,+ butebuzi bwanu, bana baŋombe zyanu abambelele zyanu.+

19 “Muyoosinganizyigwa kufwumbwa nkomuyakuunka amuzintu zyoonse nzyomuyoocita.

20 “Jehova uyoomusinganya, uyoomutumina manyongwe acisubulo muzintu zyoonse nzyomusoleka kucita kusikila mukanyonyoonwe akufwa cakufwambaana akaambo kamicito yanu mibi akuti mwaleka kunditobela.+ 21 Jehova uyoopa kuti zilwazi zizumanane kuba alindinywe kusikila akamulobye munyika eeyo njomuyoobweza.+ 22 Jehova uyoomuletela kakweekwe, ntuntumaanzi,+ mulilo waleza, kupya mubili, panga,+ cilanga acilwazi cazisyango;+ alimwi zintu eezyi tazikamuleki kusikila mukafwe. 23 Julu lyanu liyooba mbuli mukuba, anyika iili kunsi amaulu aanu iyooba mbuli butale.+ 24 Jehova uyoomupa musenga alusuko kuba mvwula munyika yanu iziyoomuwida kuzwa kujulu kusikila mukanyonyoonwe. 25 Jehova uyoopa kuti muzundwe kuli basinkondonyoko.+ Mwaakuunka kuyoobalwana muyootozya nzila yomwe, pele mwaakutija muyoomwaikizyanya munzila ziindene-indene zili ciloba; alimwi masi oonse aamunyika ayakugambwa akaambo kazintu ziyoomucitikila.+ 26 Alimwi mitunta yanu iyooba cakulya cabayuni boonse bauluka mujulu abanyama baansi kakunyina muntu naba omwe uubakonga.+

27 “Jehova uyoomuletela zyuute zyaku Egepita, tulonda, bweele azilonda, izitakonzyi kupona. 28 Jehova uyoomupa kusondoka, koofwaala+ alimwi akumunyonganya mizeezo. 29 Muyootalika kwaampaampa ciindi casyikati mbuli moofwu mbwaampaampa mumudima,+ alimwi tamukooyoozwidilila muzintu zyoonse nzyomucita; lyoonse munakuuninwa akubbidwa, kakunyina uumuvwuna.+ 30 Uyoosinkilila mukaintu kuti ukwate, pele mwaalumi umbi uyoomujata. Uyooyaka ŋanda, pele tokakkali mulinjiyo.+ Uyoolima muunda wamisaansa, pele tokalyi micelo yayo.+ 31 Ŋombe yako iyoojaigwa kolangilila, pele tokailyi pe. Uyoobbidwa mbongolo yako kolangilila, pele tiikapilusyigwi kulinduwe pe. Mbelele yako iyootolwa abasinkondonyoko, pele kunyina uuyookugwasya. 32 Bana bako basankwa abasimbi bayootolwa abantu bambi+ kolangilila alimwi unoobayeeya lyoonse, pele kunyina ncoyookonzya kucita. 33 Bantu mbotazyi bayoolya butebuzi bwako boonse azintu nzyookabelekela,+ alimwi lyoonse unakuuninwa akudyaamininwa. 34 Uyoosondoka akaambo kazintu nzyaayoobona meso aako.

35 “Jehova uyoomuletela zyuute zizunta alimwi zitasilikiki, mumagondo amumaulu aanu, kuzwa kuzituta zyanu kusikila atala aamitwe yanu. 36 Jehova uyoomutola nywebo amwami wanu ooyo ngomuyoolibikkila kunyika njomutazyi, nywebo nobaba bamauso,+ alimwi ooko muyookomba baleza bambi bazisamu abamabwe.+ 37 Alimwi muyooba cintu ciyoosya, iciweelwa alimwi cisampaulwa akati kabantu boonse ooko Jehova nkwayoomutola.+

38 “Muyoosyanga mbuto zinji mumyuunda yanu, pele muyootebula buyo zisyoonto+ nkaambo cikwikwi ciyoozilya. 39 Muyoolima myuunda akusyanga misaansa, pele tamukanywi waini alimwi kunyina ncomuyootebula pe,+ nkaambo basyaanyungwa bayoozilya. 40 Muyooba azisamu zyamaolifa mucilawo canu coonse, pele tamukanani mafwuta aali woonse, nkaambo maolifa aanu ayookulumbuka. 41 Muyoozyala bana basankwa abasimbi, pele tabakazumanani kuba banu pe, nkaambo bayootolwa mubuzike.+ 42 Cisozi ciyoolya zisamu zyanu zyoonse amicelo yamunyika yanu. 43 Mweenzu uukkede akati kanu unooyaabusumpuka lyoonse kwiinda ndinywe, pele nywebo munooyaabuwa. 44 Uyoomukweletesya, pele nywebo tamukamukweletesyi pe.+ Uyooba musololi, nywebo muyooba micila.+

45 “Kusinganizyigwa koonse ooku+ ncobeni kuyoomusikila mane mukanyonyoonwe,+ nkaambo tiimwakaswiilila jwi lya Jehova Leza wanu kwiinda mukutobela milawo yakwe amalailile aakwe ngaakamupa.+ 46 Alimwi kuyoozumanana kuba alindinywe abana banu kakuli citondezyo ancenjezyo lyoonse,+ 47 nkaambo kakuti tiimwakabelekela Jehova Leza wanu cakukondwa alimwi akukkomana mumoyo ciindi nomwakajisi zintu zinji.+ 48 Jehova uyoomutumina basinkondonyoko, eelyo muyoobabelekela+ anzala,+ anyota, amantanda alimwi kamubulide zintu zyoonse. Uyoomupopa ajoko lyabutale munsingo zyanu kusikila akamunyonyoone.

49 “Jehova uyoomubusizya musyobo uuzwa kule,+ kuzwa kumagolelo aanyika; uyoomufwuumukila mbuli sikwaze,+ imusyobo waamba mwaambo ngomutamvwi,+ 50 musyobo uujisi busyu buyoosya, uutalemeki bapati nokuba kufwida balombe luzyalo.+ 51 Bayoomulida bana babanyama banu bavwubwa amicelo yanyika yanu kusikila mukanyonyoonwe. Tabakamusiili noiba nseke yamaila, waini mupya naa mafwuta, bana baŋombe naa bambelele kusikila bakamunyonyoone.+ 52 Bayoomusinkilila akumujalila muminzi* yoonse iili mucisi canu coonse kusikila malambo aanu malamfwu ngomusyoma akawe. Inzya, bayoomusinkilila muminzi yoonse iili munyika yanu yoonse, eeyo Jehova Leza wanu njaamupa.+ 53 Mpoonya muyoolya bana banu basankwa abasimbi,+ aabo Jehova Leza wanu mbaakamupa, akaambo kakusinkililwa ooku amapenzi ngobayoomuletela basinkondonyoko.

54 “Naba mwaalumi mubombe alimwi mubotu takooyooba alubomba kumunyina naa kumukaintu wakwe ngwayandisya nokuba kubana bakwe basyeede, 55 alimwi takabapi nyama yabana bakwe njayoolya, nkaambo tacijisi cintu cili coonse akaambo kakusinkililwa ooku amapenzi ngobayoomuletela basinkondonyoko muminzi yanu.+ 56 Awalo mukaintu mubombe alimwi mubotu akati kanu uutakonzyi kuyeeya kulyata ansi akaambo kakuba muteteete,+ takabi alubomba kumulumaakwe ngwayandisya naa kumwanaakwe musankwa naa kumwanaakwe musimbi, 57 nokuba kucamacembele cizwa mwida lyakwe akubana bakwe mbaakalizyalila, nkaambo uyoozilya cakusisikizya akaambo kakubula zintu zili zyoonse akaambo kakusinkililwa ooku amapenzi ngobayoomuletela basinkondonyoko muminzi yanu.

58 “Ikuti mutakaitobeli cakulomya Milawo eeyi yoonse iilembedwe mubbuku eeli,+ akutayoowa zina eeli lya Jehova+ Leza wanu ililemekwa alimwi liyoosya,+ 59 Jehova uyooleta mapenzi mapati alindinywe alimwi aalunyungu lwanu, mapenzi mapati alimwi aatamani,+ amalwazi mabi kapati aataponi. 60 Uyoomuletela malwazi oonse aaku Egepita aayo ngomwakali kuyoowa, alimwi masimpe taakamuleki pe. 61 Kuyungizya waawo, Jehova uyoomuletela malwazi aamisyobo yoonse naa cipenzyo citalembedwe mubbuku eeli lya Mulawo kusikila mukanyonyoonwe. 62 Nokuba kuti mwavwula mbuli nyenyeezi zyakujulu,+ mbasyoonto kapati ibayoosyaala akati kanu+ nkaambo tiimwaswiilila jwi lya Jehova Leza wanu.

63 “Alimwi mbubonya mbocakamubotelede Jehova kumucitila bubotu akumuvwuzya, mbubonya oobo Jehova mbociyoomubotela kumunyonyoona akumulobya; muyoomaninina munyika eeyo njomuyanda kubweza.

64 “Jehova uyoomumwaila akati kabantu boonse bamunyika kuzwa kumagolelo aanyika aamwi kusikila kumagolelo aanyika aambi,+ alimwi ooko muyookomba baleza bambi bazisamu abamabwe mbomutazyi nywebo nobaba bamauso.+ 65 Tamukaliibi akati kamisyobo eeyo+ nokuba kuba abusena bwakukkala bumugeme. Muciindi caboobo, Jehova uyoomupa moyo wakukankama,+ kubaya meso alimwi akutyompwa.+ 66 Buumi bwanu bunooli muntenda mpati, alimwi munooyoowede lyoonse syikati amasiku; alimwi tamukabi abulangizi bwakupona pe. 67 Mafwumofwumo muyakwaamba kuti, ‘Eelo kaka nikwali kumangolezya!’ akwalo kumangolezya muyakwaamba kuti, ‘Eelo kaka naali mafwumofwumo!’ akaambo kabuyoofwu bunooli mumyoyo yanu alimwi akaambo kazintu nzyomuyoobona ameso aanu. 68 Jehova uyoomupilusya alimwi ku Egepita amato, kunzila eeyo njondakamwaambila kuti, ‘Tamukaiboni limbi,’ alimwi ooko muyoolisambala kuli basinkondonyoko kuti mube bazike baalumi ababelesi bakaintu, pele takukabi sikumuula pe.”

29 Aaya ngamajwi aacizuminano eeco Jehova ncaakalailila Musa kupangana abana Israyeli munyika ya Moabu kuyungizya acizuminano ncaakapangene ambabo ku Horebu.+

2 Mpoonya Musa wakabaita bana Israyeli boonse antoomwe akubaambila kuti: “Mwakalibonena zintu zyoonse Jehova nzyaakacita kubusyu bwanu mucisi ca Egepita kuli Farao akubabelesi bakwe boonse akunyika yakwe yoonse,+ 3 milimo mipati njomwakabona ameso aanu, eeziya zitondezyo zipati amaleele.+ 4 Pele Jehova tanamupa moyo wakumvwisya ameso aakubonya alimwi amatwi aamvwa kusikila buzuba buno.+ 5 ‘Nindakali kumusololela myaka iili 40 munkanda,+ zisani zyanu tiizyakazakala amibili yanu alimwi mpato zyanu tiizyakamana kumaulu aanu.+ 6 Tiimwakalya cinkwa nokuba kunywa waini azyakunywa zimwi zikola, kutegwa muzyibe kuti ndime Jehova Leza wanu.’ 7 Mpoonya mwakasika mubusena oobu, eelyo Sihoni mwami wa Hesiboni+ a Ogi mwami wa Basani+ bakaboola kuzootulwana, pele twakabazunda.+ 8 Kuzwa waawo twakabweza nyika yabo akwiipa bana Rubeni, bana Gadi acisela camusyobo wabana Manase kuti ibe lukono lwabo.+ 9 Aboobo amubambe majwi aacizuminano eeci akwaacita, kutegwa zintu zyoonse nzyomucita zimweendele kabotu.+

10 “Sunu nyoonse muliimvwi kubusyu bwa Jehova Leza wanu, basilutwe bamisyobo yanu, baalu banu, basololi banu, mwaalumi uuli woonse muna Israyeli, 11 bana banu, bamakaintu banu+ alimwi amweenzu uuli munkambi yanu,+ kuzwa kuli basikumutebbela nkuni kusikila kuli basikumutekela maanzi. 12 Muli waano kutegwa mupangane cizuminano a Jehova Leza wanu kwiinda mukukonka, eeco Jehova Leza wanu ncatiipange andinywe sunu+ 13 kutegwa mube bantu bakwe+ akuti abe Leza wanu,+ mbubonya mbwaakamusyomezya ambwaakakonkezya kuli bamauso, Abrahamu,+ Izaka+ a Jakobo.+

14 “Lino tamuli ndinywe nyolikke mbonditiipangane limwi cizuminano eeci acikonke eeci, 15 pele ndilapangana amuntu uuli woonse wiimvwi waano kubusyu bwa Jehova Leza wesu alimwi abaabo mbotutali limwi aano sunu. 16 (Nkaambo mulizyi kabotu mbotwakakkede mucisi ca Egepita ambotwakainda akati kamisyobo iindene-indene mulweendo lwesu.+ 17 Alimwi mwakali kubona zintu zyabo zisesemya amituni*+ yabo iisesemya yazisamu, yamabwe, yansiliva ayangolida, eezyo izyakali akati kabo.) 18 Amucenjele kuti akati kanu sunu kutabi mwaalumi naa mukaintu naa mukwasyi naa musyobo uli amoyo uuleya kuzwa kuli Jehova Leza wesu akutalika kukomba baleza bamisyobo eeyo,+ kutegwa akati kanu kutabi muyanda wacisamu cikomena akuzyala micelo iilula alimwi iijaya.+

19 “Pele kuti naa umwi wamvwa majwi aacikonke eeci, nokuba boobo watalika kulisumpula mumoyo wakwe akwaamba kuti, ‘Zintu zinooli buyo kabotu, nokuba kuti ndazumanana kucita nzyouyanda moyo wangu,’ kayaabunyonyoona kufwumbwa muntu ngwaajana, 20 Jehova takamulekeleli pe.+ Pele bukali bwa Jehova bupati buyoomubukila muntu ooyo, eelyo kusinganizyigwa koonse kulembedwe mubbuku eeli kuyooba alinguwe,+ alimwi Jehova uyoolobya zina lyakwe munyika. 21 Jehova uyoomunomona akati kamisyobo yoonse yabana Israyeli kutegwa amusubule kweelana akusinganizyigwa koonse kwacizuminano kulembedwe mubbuku eeli lya Mulawo.

22 “Izyalani lyabana banu liboola kumbele alimwi amuzwakule baakubona zipenzyo zyamunyika eeyo, malwazi aayo Jehova ngaakaleta alinjiyo— 23 sulufa amunyo alimwi anyika iipide, cakuti yoonse tiicikonzyeki kusyangwa nokuba kumeneka cisyango cili coonse, iinyonyookede mbuli Sodoma a Gomora+ alimwi a Adima a Zeboimu,+ minzi eeyo Jehova njaakanyonyoona mulunyemo amubukali bwakwe— 24 balo amasi oonse bayakwaamba kuti, ‘Ino nkaambo nzi Jehova ncaakaicitila boobu nyika eeyi?+ Ino ncinzi cakamupa kunyema kapati boobu?’ 25 Mpoonya bayakwaamba kuti, ‘Nkaambo kakuti bakasiya cizuminano ca Jehova+ Leza wabamausyi, eeco ncaakapangana ambabo naakabagwisya mucisi ca Egepita.+ 26 Pele bakaunka kuyookotamina baleza bambi akubakomba, baleza aabo mbobatakazyi alimwi aabo Leza mbaatakabazumizya kukomba.+ 27 Mpoonya bukali bupati bwa Jehova bwakaibukila nyika eeyo, kwiinda mukwiiletela kusinganya koonse kulembedwe mubbuku eeli.+ 28 Aboobo cabukali alimwi kanyemede+ akulutila Jehova wakabazyula akubagwisya munyika yabo akubasowela munyika iimbi, ooko nkobacibede asunu.’+

29 “Makani aasisidwe ngaakwe Jehova Leza wesu,+ pele makani aayubunwidwe ngeesu abana besu kukabe kutamani, kutegwa tuswiilile majwi woonse aa Mulawo ooyu.+

30 “Zintu eezyi zyoonse zyaakumucitikila, izilongezyo akusinganya nzyondabikka kubusyu bwanu,+ mwaakuziyeeya+ akati kabamasi boonse ooko Jehova Leza wanu nkwayoomumwaila,+ 2 alimwi nywebo abana banu mwaakupiluka kuli Jehova Leza wanu+ akuswiilila jwi lyakwe amoyo wanu woonse abuumi bwanu boonse kweelana azintu zyoonse nzyondimulailila sunu,+ 3 Jehova Leza wanu uyoopilusya baange banu+ akumufwida luse+ alimwi akumuyobolola kuzwa akati kabamasi boonse ooko Jehova Leza wanu nkwaakamumwaila.+ 4 Nokuba kuti bantu banu balimwaikide kusikila kumagolelo aanyika, Jehova Leza wanu uyoomuyobolola akumuleta kuzwa kooko.+ 5 Jehova Leza wanu uyoomuleta munyika eeyo bamauso njobakabweza alimwi iyooba yanu; alimwi uyoomuvwubya akumuvwuzya kwiinda bamauso.+ 6 Jehova Leza wanu uyoosalazya* myoyo yanu amyoyo yabana banu,+ kutegwa muyande Jehova Leza wanu amoyo wanu woonse abuumi bwanu boonse kutegwa kamupona.+ 7 Eelyo masimpe Jehova Leza wanu uyooleta kusinganya koonse ooku aali basinkondonyoko abaabo bamusulide akumupenzya.+

8 “Mpoonya muyoopiluka akuswiilila jwi lya Jehova akutobela milawo yakwe yoonse njondimulailila sunu. 9 Jehova Leza wanu uyoomulongezya kapati mumilimo yoonse yamaanza aanu,+ uyoomupa bana banji, banyama bavwubwa banji alimwi abutebuzi bunji, nkaambo Jehova uyookkomana kumucitila zibotu mbubonya mbwaakabakkomanina bamauso.+ 10 Nkaambo muyooswiilila jwi lya Jehova Leza wanu kuti mutobele milawo amalailile aakwe aalembedwe mubbuku eeli lya Mulawo, nkaambo muyoopiluka kuli Jehova Leza wanu amoyo wanu woonse abuumi bwanu boonse.+

11 “Lino mulawo ooyu ngondimulailila sunu tauli muyumu kutobela, alimwi tauli kule.+ 12 Tauli kujulu kutegwa mwaambe kuti, ‘Nguni utiitante kujulu kuti akatuletele kutegwa tuuswiilile akuutobela?’+ 13 Alimwi tauli kutala lyalwizi kutegwa mwaambe kuti, ‘Ino nguni uukonzya kuzabuka mutala lyalwizi kuti akatuletele, kutegwa tuuswiilile akuutobela?’ 14 Nkaambo jwi eeli lyamulawo lili afwaafwi kapati andinywe, lili mukanwa lyanu amumoyo wanu+ kutegwa mulitobele.+

15 “Amubone, sunu ndabikka kubusyu bwanu buumi abubotu, alimwi lufwu abubi.+ 16 Ikuti naa mwaswiilila milawo ya Jehova Leza wanu njondimulailila sunu, kwiinda mukuyanda Jehova Leza wanu,+ kweenda munzila zyakwe, kubamba milawo yakwe amilazyo yakwe alimwi ambeta zyakwe, nkokuti muyoozumanana kupona+ akuvwula, alimwi Jehova Leza wanu uyoomulongezya munyika eeyo njomuyoobweza.+

17 “Pele ikuti myoyo yanu ikaleye akuleka kuswiilila,+ alimwi akuti mukoongelezyegwe kukotamina baleza bambi akubakomba,+ 18 sunu ndimwaambila kuti ncobeni muyoonyonyooka.+ Tamukoongoli munyika eeyo njomuyookona mutala lya Jordano. 19 Ndatamba julu anyika kuti zimubede bakamboni sunu, kuti ndabikka buumi alufwu, cilongezyo akusinganya kumbele lyanu;+ aboobo mweelede kusala buumi kutegwa muzumanane kupona,+ nywebo abana banu,+ 20 kwiinda mukuyanda Jehova Leza wanu,+ kuswiilila jwi lyakwe akukakatila kulinguwe,+ nkaambo nguumupa buumi akoongola kutegwa mukkale munyika eeyo Jehova njaakakonkezya kupa bamauso, Abrahamu, Izaka a Jakobo.”+

31 Mpoonya Musa wakaunka akwaambila bana Israyeli boonse majwi aaya 2 aakuti: “Lino ndili amyaka iili 120.+ Tandicikonzyi kumusololela, nkaambo Jehova wandaambila kuti, ‘Tokauzabuki Mulonga wa Jordano.’+ 3 Jehova Leza wanu nguutiizabuke kumbele lyanu alimwi uyakwiinyonyoona misyobo eeyi kubusyu bwanu, eelyo muyakwiitanda.+ Joshua nguutiizabuke kumbele lyanu akumusololela+ mbubonya Jehova mbwaamba. 4 Jehova uyoocita kulinjiyo mbubonya mbwaakacita kuli Sihoni+ a Ogi,+ ibami babana Amori anyika yabo ciindi naakabanyonyoona.+ 5 Jehova uyoopa kuti mubazunde alimwi mweelede kubacitila kweelana amulawo woonse ngondamupa.+ 6 Amuyume akuba basicamba.+ Mutayoowi nokuba kukankama kubusyu bwabo,+ nkaambo Jehova Leza wanu nguumusololela. Takamusiyi nokuba kumulekelezya pe.”+

7 Mpoonya Musa wakaita Joshua akumwaambila kubusyu bwabana Israyeli boonse kuti: “Koyuma akuba sicamba,+ nkaambo yebo ndonduwe uuyoonjizya bantu aaba munyika eeyo Jehova njaakakonkezya kuli bamausyi kuti uyoobapa, alimwi yebo uyoobapa njiyo kuti ibe lukono lwabo.+ 8 Jehova nguukusololela alimwi uyoozumanana kuba anduwe.+ Takakusiyi nokuba kukulekelezya pe. Utayoowi nokuba kukankama.”+

9 Mpoonya Musa wakalemba Mulawo ooyu+ akuupa bapaizi iba Levi, basikunyamuna bbokesi lyacizuminano ca Jehova alimwi akubaalu boonse babana Israyeli. 10 Musa wakabalailila kuti: “Lyoonse kumamanino aamyaka iili ciloba, aciindi cibikkidwe mumwaka walwaanguluko,+ nkokuti ciindi ca Pobwe lya Zivwuka,+ 11 bana Israyeli boonse nobaboola kubusyu bwa Jehova+ Leza wanu mubusena oobo mbwayoosala, mweelede kuubala Mulawo ooyu kuti bana Israyeli boonse baumvwe.+ 12 Mweelede kunoobunganya bantu,+ baalumi, bamakaintu, bana amweenzu uuli muminzi* yanu, kuti baswiilile akwiiya kuyoowa Jehova Leza wanu akulomya kutobela majwi oonse aa Mulawo ooyu. 13 Mpoonya bana babo ibatanauzyiba Mulawo ooyu bayooswiilila+ akwiiya kulemeka Jehova Leza wanu mazuba oonse ngomuyoopona munyika eeyo njomuyoobweza mwazabuka Jordano.”+

14 Mpoonya Jehova wakati kuli Musa: “Bona! Ulaafwaafwi kufwa.+ Komwiita Joshua, muunke kutente lyakuswaanganina kutegwa ndimubikke kuba musololi.”+ Aboobo Musa a Joshua bakaunka akuyakwiima kutente lyakuswaanganina. 15 Mpoonya Jehova wakalibonya mumusumpuululu wakkumbi kutente lyakuswaanganina, eelyo musumpuululu wakkumbi wakaima amulyango watente.+

16 Lino Jehova wakaambila Musa kuti: “Bona! Yebo ulaafwaafwi kufwa,* eelyo bantu aaba bayootalika kuvwuula kwakumuuya abaleza beenzu ibali munyika eeyo nkomuunka.+ Bayoondisiya+ akutyola cizuminano cangu ncondakapangana ambabo.+ 17 Aciindi eeco bukali bwangu buyoobabukila,+ eelyo ndiyoobasiya+ akusisa busyu bwangu+ kusikila bakanyonyooke. Mpoonya aakubasikila mapenzi manji akukatazyigwa+ bayakwaamba kuti, ‘Sena tiitwasikilwa mapenzi aaya akaambo kakuti Leza wesu tali akati kesu?’+ 18 Pele ndiyoosisa busyu bwangu mubuzuba oobo akaambo kazibi zyoonse nzyobakacita kwiinda mukukomba baleza bambi.+

19 “Lino amulembe lwiimbo oolu+ akubayiisya ndulo bana Israyeli.+ Mubagwasye kuti baluzyibe kabotu kutegwa kalubayeezya cicitika ikuti naa baleka kumvwida Leza.+ 20 Ndaakubasisya kunyika eeyo njindakakonkezya kuli bamausyi+–inyika iikunka buci amukupa+–alimwi baakulya cakukkuta akuvwuba,*+ bayooleya akutalika kukomba baleza bambi akuleka kundilemeka alimwi bayootyola cizuminano cangu.+ 21 Lino aakubasikila mapenzi manji amakatazyo,+ lwiimbo oolu luyoobabeda ciyeekezyo, (nkaambo bana babo tabeelede kululuba pe), nkaambo ndiliizyi kale mizeezo yabo njobajisi+ kanditana akubasisya munyika eeyo njindakakonkezya.”

22 Aboobo Musa wakalulemba lwiimbo oolu mubuzuba oobo akubayiisya ndulo bana Israyeli.

23 Mpoonya Leza wakabikka Joshua+ mwana wa Nuni kuti abe musololi akumwaambila kuti: “Koyuma akuba sicamba,+ nkaambo yebo ndonduwe uuyoonjizya bana Israyeli munyika eeyo njindakakonkezya kulimbabo,+ alimwi ndiyoozumanana kuba anduwe.”

24 Musa mbwaakamanina buyo kulemba majwi oonse aa Mulawo ooyu mubbuku,+ 25 wakatalika kulailila ba Levi, basikunyamuna bbokesi lyacizuminano ca Jehova kuti: 26 “Amubweze bbuku lya Mulawo eeli+ akulibikka kumbali lyabbokesi lyacizuminano+ ca Jehova Leza wanu, alimwi liyoomubeda kamboni. 27 Nkaambo ndilibuzyi kabotu buzangi bwanu+ abusicinguni bwanu.*+ Ikuti lino nondicili muumi akati kanu mulamuzangila Jehova, ino ciyooba buti ndaakufwa? 28 Amubunganye baalu boonse bamisyobo yanu abasilutwe banu, kuti ndaambe majwi aaya kabamvwide, nditambe julu anyika kuti zibabede bakamboni.+ 29 Nkaambo ndilizyi kabotu kuti ndaakufwa, ncobeni muyoobisya+ akuleya kuzwa munzila njondakamulailila. Alimwi masimpe muyoosikilwa mapenzi+ kumbele aamazuba, nkaambo muyoocita bubi mumeso aa Jehova akumukalazya akaambo kamilimo yamaanza aanu.”

30 Mpoonya Musa wakaamba majwi aalwiimbo oolu mbungano yoonse yabana Israyeli kaimvwide kusikila walumanizya:+

 3 Nkaambo ndiyakwaambilizya zina lya Jehova.+

Amwaambe zyabulemu bwa Leza wesu!+

 5 Balo mbabamubisizya.+

Tabacili bana bakwe, nkaambo katumpenda twabo.+

Ndizyalani lipilingene alimwi linyongene!+

15 Eelyo Jesuruni* naakaneneya, wakazanga.

Wakaneneya, wakakkwana, wakaindila kukkuta.+

29 Eelo kaka nobali basongo!+ Nibazinzibala kuyeeya makani aaya.+

Nibayeeya mamanino aabo mbwaayakuba.+

Ababoole bamugwasye.

Ababe mayubilo aanu.

Ndilajaya alimwi ndilapa buumi.+

Akusalazya nyika yabantu bakwe.”

44 Aboobo Musa wakaboola akwaamba majwi aalwiimbo oolu kabamvwide bantu,+ walo a Hosea*+ mwana wa Nuni. 45 Musa naakamana kwaamba majwi oonse aaya kubana Israyeli boonse, 46 wakati kulimbabo: “Amwaabikke mumyoyo yanu majwi oonse ngondamucenjezya sunu,+ kutegwa mulailile bana banu kubikkila maano kucita majwi oonse aa Mulawo ooyu.+ 47 Nkaambo majwi aaya taali aabuyo kulindinywe pe, pele aamba buumi kulindinywe,+ alimwi kwiinda mumajwi aaya mulakonzya koongola munyika eeyo njomuyoobweza mwazabuka Jordano.”

48 Mubuzuba mbubonya oobo Jehova wakaambila Musa kuti: 49 “Koya mucilundu eeci ca Abarimu,+ Cilundu ca Nebo+ icili munyika ya Moabu cilangene a Jeriko, ukabone nyika ya Kanana eeyo njendiyanda kupa bana Israyeli kuti lube lukono lwabo.+ 50 Mpoonya uyoofwa kucilundu ooko nkoya, alimwi ulazikkwa mbubonya mbuli basikale bako, mbubonya mbuli Aroni munyoko mbwaakafwa aa Cilundu ca Hori+ akuzikkwa mbubonya mbuli bantu bakwe; 51 nkaambo nyoonse nyobilo tiimwakasyomeka kulindime akati kabana Israyeli kumaanzi aa Meriba+ ku Kadesi munkanda ya Zini; nkaambo nywebo nobaalumi tiimwakandilemeka akati kabana Israyeli.+ 52 Uyakwiibona nyika kulaale, pele tokanjili munyika eeyo njindapa bana Israyeli.”+

33 Lino nceeci cilongezyo Musa muntu wa Leza mwini-mwini ncaakalongezya bana Israyeli katanafwa.+ 2 Wakaamba kuti:

 7 Nceeci cilongezyo ncaakaamba kuli Juda naakati:+

 8 Kuli Levi wakati:+

12 Kuli Benjamini wakati:+

13 Kuli Josefa wakati:+

18 Kuli Zebuloni wakati:+

19 Bayakwiita bantu kuzilundu.

Ooko bayootuula zipaizyo zyabululami.

20 Kuli Gadi wakati:+

“Ulilongezyedwe ooyo uukomezya minyinza ya Gadi.+

Basilutwe babantu bayoobungana antoomwe.

22 Kuli Dani wakati:+

“Dani mwana wasyuumbwa.+

Uyoosotoka kuzwa ku Basani.”+

23 Kuli Nafutali wakati:+

Kobweza lukono luli kumbo akumusanza.”

24 Kuli Aseri wakati:+

“Aseri ulilongezyedwe kuba abana basankwa.

29 Ulikkomene, O Israyeli!+

34 Mpoonya Musa wakazwa muzibanda zya Moabu akutanta Cilundu ca Nebo,+ atala lya Pisiga,+ busena bulangene a Jeriko.+ Eelyo Jehova wakamutondezya nyika yoonse, kutalikila ku Gileadi kuyoosikila ku Dani,+ 2 Nafutali yoonse, nyika ya Efraimu a Manase alimwi anyika yoonse ya Juda kusikila kulwizi lwakumbo,*+ 3 Negebi+ a Cooko ca Jordano,+ kkuti lya Jeriko, imunzi wazisamu zyamakunka, kusikila ku Zoari.+

4 Mpoonya Jehova wakamwaambila kuti: “Eeyi njenyika njindakakonkezya kuli Abrahamu, Izaka a Jakobo nindakati, ‘Ndiyakwiipa kulunyungu lwako.’+ Ndakutondezya kuti wiibone ameso aako, pele tokazabuki kuya mulinjiyo.”+

5 Kuzwa waawo Musa mubelesi wa Jehova wakafwa munyika ya Moabu mbubonya Jehova mbwaakaamba.+ 6 Wakamuzikka mukkuti lyanyika ya Moabu lilangene a Beti-peori, alimwi kunyina naba omwe uuzyi nkocibede cuumbwe cakwe kusikila sunu.+ 7 Musa wakali amyaka iili 120 naakafwa.+ Meso aakwe tanaakoofwaala, alimwi nguzu zyakwe tiizyakalinamana pe. 8 Bana Israyeli bakamulila Musa mucibanda ca Moabu mazuba aali 30.+ Mpoonya mazuba aakulila Musa akamana.

9 Joshua mwana wa Nuni wakazwide muuya wabusongo, nkaambo Musa wakabikkide maanza aakwe alinguwe;+ alimwi bana Israyeli bakatalika kumuswiilila akucita mbubonya Jehova mbwaakalailila Musa.+ 10 Takunabede musinsimi mu Israyeli uuli mbuli Musa,+ ooyo Jehova ngwaakazyiba cakaanzambwene.+ 11 Wakacita zitondezyo zyoonse amaleele Jehova ngaakamutumide kuti acite mucisi ca Egepita kuli Farao, kubabelesi bakwe boonse akucisi cakwe coonse,+ 12 munguzu zinji alimwi amilimo mipati yoonse iigambya Musa njaakacita kubusyu bwabana Israyeli boonse.+