Banabukwetene Mbobakonzya Kuleka Cilengwa Cakutaambauzyanya

BUYUMUYUMU

Mbuti bantu bobilo bakakonka kuti banooyandana mbobakonzya kuleka kwaambauzyanya kwamawoola naa kwamazuba manji? Ambweni balakonzya kwaamba kuti, ‘Pesi mbubo, nkaambo twakacileka kulwana.’ Pele, masimpe ngakuti zyintu tazili kabotu pe, alimwi boonse tabakkomene.

ICIPA KUTI KUBE BUYUMUYUMU

Banabukwetene bamwi balaacilengwa cakutaambauzyanya akaambo kakuyanda kujola cibi kumweenzyinyina. Mucikozyanyo, cimwi ciindi mulumi ulakonzya kubikka mulongo wazyintu zyakucita kumamanino aansondo kakunyina kumwaambila mukaakwe. Ciindi mukaintu naazyiba, wanyema kapati alimwi akuyeeya kuti mulumaakwe tamubikkili maano. Mpoonya mulumi waambila mukaakwe kuti ulafwambaana kunyema. Kumane mukaintu wazwa kanyemede akuleka kumwaambauzya mulumaakwe. Kwiinda mukucita boobu, inga cili mbuli kuti waamba kuti: “Mwandinyemya, andime ndilamunyemya.”

Banabukwetene bamwi tabaambauzyanyi akaambo kakuyanda buyo kujana ncobayanda. Mucikozyanyo, banabukwetene inga kabayanda kuyooswaya kubusena bumwi, mpoonya mukaintu uyanda kutoleezya abazyali bakwe. Mulumi walo tayandi. Aboobo, ulakonzya kwaamba kuti: “Yebo ukwetwe kulindime, kutali kubazyali bako.” Akaambo kaceeci, inga waleka kumwaambauzya mukaakwe, akutayanda kuba anguwe kusikila mane aaleke makanze aakwe.

Zimwi ziindi kuti naa mwalimvwa kuti mwatalika kunyema, mulakonzya kuumuna akuzwa kusikila mane mwatontomana. Kuumuna munzila iili boobu inga kwagwasya. Ibbaibbele lyaamba kuti kuli “ciindi cakuumuna.” (Mukambausi 3:7) Pele kuti kuumuna kwabelesyegwa munzila yakuyanda kujola cibi, inga kwapa kuti mazwanga azumanane alimwi akupa kuti banabukwetene kabatalemekani. Ncinzi ncomukonzya kucita kutegwa eeci citacitiki?

NCOMUKONZYA KUCITA

Nzila yakusaanguna iikonzya kumugwasya kumana penzi lyakutaambauzyanya, nkuzyiba kuti kutaambauzyanya takukonzyi kwaamana mapenzi aanu pe. Masimpe, kuumuna ilakonzya kuba nzila yakujola cibi alimwi zimwi ziindi kulakonzya kupa kuti ngomukwetene limwi acite ncomuyanda. Pele sena masimpe kuti muntu ngomwakakonka kuti munoomuyanda inga mwayanda kumweendelezya munzila iili boobu? Nzyeezi nzila zikonzya kumugwasya kumana mazwanga:

Kamubelesya bupampu. Bbaibbele lyaamba kuti luyando “talukalali.” (1 Bakolinto 13:4, 5) Aboobo amukkazyike moyo ciindi ngomukwetene limwi naamba majwi aanyemya mbuli aakuti: “Nywebo mbomubede, tamundiswiilili” naa kuti: “Lyoonse mulamuka kusika aŋanda.” Muciindi caboobo, amuzyibe capa kuti aambe boobo. Mucikozyanyo, majwi aakuti: “Tamundiswiilili” alakonzya kwaamba kuti: “Ndilimvwa mbuli kuti tamuzibikkili maano nzyondaamba.”—Mpoijanika njiisyo eeyi mu Bbaibbele: Tusimpi 14:29.

Amutole jwi aansi. Kukazyanya kulakomena mbokuyaabuzumanana. Pele nkocili ncomukonzya kucita kutegwa mutazumanani kukazyanya. Ino ncinzi eeco? Bbuku lyakuti Fighting for Your Marriage lyaamba kuti: “Kutola jwi ansi alimwi akumvwisya ncaamba ngomukwetene limwi kulakonzya kumana mazwanga. Kanji-kanji eeci cilagwasya.”—Mpoijanika njiisyo eeyi mu Bbaibbele: Tusimpi 26:20.

Amubikkile maano mbwalimvwa mweenzinyoko. Bbaibbele lyaamba kuti: “Umwi aumwi kayandisya kugwasya bamwi ikutali buyo kuligwasya lwakwe mwini.” (1 Bakolinto 10:24) Ikuti kamumubona kuba mulongwe muntu ngomukwetene limwi kutali sinkondo, ciyoopa kuti kamutazwangani alimwi akuleka cilengwa cakutaambauzyanya.—Mpoijanika njiisyo eeyi mu Bbaibbele: Mukambausi 7:9.

Kuleka kwaambauzyanya takweendelani alulayo lwamu Bbaibbele lwakuti: “Umwi aumwi wanu ayande mukaakwe mbubonya mbwaliyanda mwini; kunze lyaboobo, mukaintu awalo weelede kumulemeka kapati mulumaakwe.” (Baefeso 5:33) Mweelede kubandika angomukwetene limwi kutegwa mumvwane kuti kutaambauzyanya takuyandiki mulukwatano lwanu.