Nkotweelede Kujana Bwiinguzi
“Iciyiisyo cakupenga kutamani taceendelani pe alusyomo lwakuti Leza ulaa luyando kuzintu nzyaakalenga. . . . Ikusyoma kuti kuli kusubulwa kutamani kwabuumi akaambo kakulubizya kwakacitwa mumyaka misyoonto kakunyina akupa ciindi cakululamika zintu, nkutayeeya.”—NIKHILANANDA, SIBUSONGO MU HINDU.
1, 2. Akaambo kalusyomo lwaandeene-andeene kujatikizya Buumi buzumanana lwainda lufwu, mibuzyo nzi iibuka?
IBANTU banji sunu tabalimvwi kabotu pe kujatikizya ciyiisyo cakupenzyegwa bulanga kutamani, mbubwenya mbuli sibusongo mu Hindu Nikhilananda. Mbubwenya buyo, bamwi cilabayumina kapati kuteelela ziyiisyo mbuli cakujana Nirvana alimwi acakukamantanaa Tao.
2 Pele akaambo kamuzeezo wakutafwika kwabuumi, izikombelo zya Kujwe alimwi azya Kumbo zyasumpula lusyomo lutalivwulili kapati kujatikizya Buumi buzumanana lwainda lufwu. Sena cilakonzyeka kuziba masimpe kujatikizya cicitika twafwa? Sena buumi tabufwi ncobeni? Nkuli nkotunga twajana bwiinguzi?
Sayaansi a Busongo Bwabantu
3. Sena sayaansi naa nzila zyasayaansi zyakuvwuntauzya zilatupa bwiinguzi kumibuzyo iijatikizya buumi lwainda lufwu?
3 Sena sayaansi naa nzila zimwi zyasayaansi zyakuvwuntauzya zilijisi bwiinguzi kumibuzyo iijatikizya Buumi buzumanana muntu afwa? Ikweelanaa makani aalino-lino aajatikizya baabo ‘banetuka,’ bamwi bavwuntauzi basoleka kuvwuntauzya kutegwa babone naa ncobeni kuli buumi buzumanana lwainda lufwu. Naakali kulanga-langa zintu zimwi nzyobaamba bantu aaba muciiyo cakwe cakuti “Death as Entry Into Light?,” sikwiiya zya Bbaibbele wa Katolika Hans Küng wakaamba kuti: “Izintu zili boobu kunyina ncozisinizya pe kujatikizya makani aakuti kuli buumi lwainda lufwu: ezi zyaamba buyo maminiti osanwe kalutana lufwu ikutali buumi butamani lwainda lufwu.” Wakayungizya akuti: “Ikaambo kakuti kuli buumi lwainda lufwu kalayandika kapati kumuntu uucipona. Kayandika bwiinguzi bwalo bweelede kujanwa kumbi ikuti naa tabukonzyi kupegwaa basilisi.”
4. Sena busongo bwabantu bulakonzya kutugwasya kujana bwiinguzi akati katwaambo tunji tupegwaa zikombelo zyaandeene-andeene kujatikizya buumi buzumanana lwainda lufwu?
4 Ino mbuti kumakani aabusongo bwabantu? Sena inga bwatugwasya kujana bwiinguzi akati katwaambo tunji tupegwaa zikombelo zyaandeene-andeene kujatikizya buumi buzumanana lwainda lufwu? Sibusongo muna Britain wamumwaanda wamyaka wa 20 Bertrand Russell waamba kuti, ibuvwuntauzi bwabasibusongo bubikkilizya “kuzumbauzya.” Ikweelana amboyaamba The World Book Encyclopedia, ibusongo bwabantu “ninzila imwi yakuvwuntauzya—ikulanga-langa, ikuzumbauzya, ikupandulula alimwi akweezeezya.” Ikujatikizya makani aa Buumi buzumanana lwainda lufwu, ikweezeezya kwabasibusongo kwaliindene-indeene, bamwi kabaamba kuti ikutafwika nkulombozya buyo kwamuntu ibamwi ategwa ncoolwe camuntu woonse.
Ikujanwa Bwiinguzi Kulibedelede
5. Ndibbuku nzi litaanzi kulembwa kumabbuku woonse?
5 Nokuba boobo kuli bbuku lijisi bwiinguzi bwakasimpe kumibuzyo iiyandika iijatikizya buumi alufwu. Ndelitaanzi kulembwa akati kamabbuku woonse, izibeela zyandilyo zimwi zyakamanizigwa myaka iinda ku 3,500 yainda. Icibeela cakusaanguna cabbuku eli cakalembwa myaanda yamyaka misyoonto buyo kaatanaanzwa magwalo aanyimbo aakusaanguna aaba Hindu aaitwa kuti Vedas, alimwi kwakacisyeede myaka iili cuulu kuti bazyalwe ba Buddha, Mahāvīra alimwi a Confucius. Eli bbuku lyakamanizigwa kulemba mu 98 C.E., imyaka iinda ku 500 katanatalisya cikombelo ca Izilamu, Muḥammad. Eli bbuku imujanwa bwiinguzi bulibedelede alimwi imuli busongo busumpukide ndi Bbaibbele.a
6. Nkaambo nzi ncotukonzya kulangila kuti Bbaibbele lilatwaambila kuti buumi ninzi?
6 Ibbaibbele lijisi makani aansiku aaluzi kwiinda bbuku lili lyoonse liliko. Imakani aa Bbaibbele aazyaciindi alaunka kwini kumatalikilo aamukwasyi wabantu alimwi lilapandulula mbuli mbotwakaboola ano anyika. Alimwi lilaamba amakani aamusyule kusika kuciindi kabatanalengwa bantu. Masimpe, ibbuku lili boobu lilakonzya kutugwasya kumvwisya mbuli muntu mbwaakalengwa alimwi akuti buumi ninzi.
7, 8. Nkaambo nzi ncotukonzya kulanga ku Bbaibbele calusyomo kuti tujane bwiinguzi bwamasimpe alimwi bukkomanisya kujatikizya cicitika twafwa?
7 Kunze lyaboobo, Ibbaibbele ndibbuku lyabusinsimi bwalo bwazuzikizigwa cakuzwidilila. Mucikozyanyo, lyakasinsima kubuka akuwa kwamami aa Mediya a Persia alimwi aaba Helene. Aya majwi akaliluzi cakuti basikukazya bakasoleka kujana twaambo twakwaamba kuti akalembwa kazicitikide kale zintu ezi pele bakaalilwa. (Daniele 8:1-7, 20-22) Ibusinsimi bumwi bulembedwe mu Bbaibbele bulazuzikizigwa kuciindi cesu nciconya cino.b—Matayo caandaano 24; Marko caandaano 13; Luka caandaano 21; 2 Timoteo 3:1-5, 13.
8 Kunyina muntu nasongwaala buti wakali kukonzya kusinsima zintu zyakumbele munzila iiluzi boobu. Alikke singuzuzyoonse alimwi sibusongo Imulengi wajulu aansi nguwakali kukonzya kucita boobo. (2 Timoteo 3:16, 17; 2 Petro 1:20, 21) Masimpe Ibbaibbele ndibbuku lizwa kuli Leza. Cakutadooneka, ibbuku lili boobu lilakonzya kutupa bwiinguzi bwamasimpe alimwi bukkazika moyo kujatikizya cicitika twafwa. Kusaanguna, atulange ncolyaamba kujatikizya buumi.
Bupanduluzi buyungizidwe
a Amubone broshuwa ya A Book for All People, yakamwaigwa aba Watch Tower Bible and Tract Society of Pennsylvania.
b Amubone The Bible—God’s Word or Man’s?, lyakamwaigwa aba Watchtower Bible and Tract Society of New York, Inc.
[Cifwanikiso icili apeeji 18]
Ibbuku litaanzi kulembwa kumabbuku woonse
[Cifwanikiso icili apeeji 18]
Ibbuku lipa bwiinguzi busyomeka alimwi bukkazika moyo