Amumulumbe Jehova Akaambo Kabube Bwakwe
“Amwiiye Leza, mbomuli bana bayandwa.”—EF. 5:1.
INO INGA MWAINGULA BUTI?
Mbuti mbotukonzya kuzumanana kulumba bube bwa Jehova?
Ncinzi cipa kuti muntu kasikilika?
Mbuti mbotukonzya kwiiya kutasalulula kwa Jehova?
1. (a) Ino mbube nzi bwa Jehova mbwakonzya kulanga-langa Munakristo? (b) Ino kulanga-langa bube bwa Leza kuyakutugwasya buti?
NOMUYEEYA bube bwa Jehova, mbube nzi buboola mumizeezo yanu? Bunji bwandiswe inga tuyeeya bube mbuli luyando, bululami, busongo alimwi anguzu. Pele tujana kuti Jehova ulijisi bube abumbi bunji bubotu. Masimpe ngakuti, Jehova ulijisi bube bwiinda ku 40 busiyene-siyene, bube bumwi abumwi bwakabandikwa kale mumabbuku eesu aapandulula Bbaibbele. Mulakonzya kujana twaambo tukkomanisya kapati tujatikizya bube bwa Jehova kwiinda muciiyo canu nobeni naa ciiyo camukwasyi. Muunzila nzi motukonzya kugwasyigwa kwiinda mukucita ciiyo cili boobo? Ciiyo cili boobo cilakonzya kutugwasya kulumba ncobeni kuli Taateesu wakujulu. Kulumba kwesu mbokuyaabukomena kujatikizya Jehova, tuyakuba aluyandisyo lwakuswena kulinguwe akumwiiya.—Jos. 23:8; Int. 73:28.
2. (a) Amupe cikozyanyo mbotukonzya kutondezya kulumba bube bwa Jehova. (b) Ino ncinzi ncotuyakubandika?
2 Ino “kulumba” cintu cimwi caamba nzi? Mbubwenya mbotutiilibelesye bbala eeli mucibalo eeci, kulumba caamba kubona cintu cimwi kuti cilayandika kapati. Kulumba kuli boobu kulakomena asyoonto-syoonto. Mucikozyanyo: Tulakonzya kutalika kukkomanina cilyo cimwi ncotutanalide kwiinda mukumvwa mbocinunkila, kulabila kutegwa tumvwe mbocinona, mpoonya akutalika kulijikila cilyo eeco. Mbubwenya buyo, tulakonzya kutondezya kuti tulalumba kapati kujatikizya bube bwa Jehova kwiinda mukubuzyiba kabotu bube oobo, kukkala ansi kuyeeya alimwi akumwiiya mubuumi bwesu. (Ef. 5:1) Makanze aacibalo eeci alimwi azibalo zyobilo zitobela ngakutugwasya kutondezya kulumba bube bwa Leza butabandikwi-bandikwi. Twanoobandika bube bumwi abumwi, tunooingula mibuzyo eeyi: Ino bwaamba nzi? Ino Jehova ubutondezya buti? Ino mbuti mbotukonzya kumwiiya Jehova mukutondezya bube oobu?
JEHOVA ULASIKILIKA
3, 4. (a) Mbuti mbomukonzya kumupandulula muntu uusikilika? (b) Mbuti Jehova mbwatutondezya kuti ulasikilika?
3 Atusaangune kulanga-langa bube bwakusikilika. Mbuti mbomukonzya kumupandulula muntu uusikilika? Mulakonzya kwaamba kuti, ‘Muntu uulaaluzyalo, uutakatazyi kusikila alimwi tayoosyi kwaambaula anguwe.’ Kanji-kanji mulakonzya kuzyiba kuti muntu ulasikilika naa pe kwiinda mukuswiilila nzyaamba alimwi ambwanyanyaasya mubili—kutambaika, kumwetamweta, mbwalibonya abusyu, alimwi azyintu zimwi buyo nzyacita kakunyina majwi.
4 Mbuti Jehova mbwatondezya kuti ulasikilika? Nokuba kuti ngo Mulengi singuzuzyoonse mububumbo boonse, Jehova utusyomezya kuti ulilisungwide alimwi ulayandisisya kuswiilila akwiingula mipailo yesu. (Amubale Intembauzyo 145:18; Isaya 30:18, 19.) Tulakonzya kwaambaula a Leza kwaciindi cilamfwu kufwumbwa ciindi alimwi abusena. Tulakonzya kumusikila katwaangulukide, katuzyi kuti takonzyi kutunyemena akaambo kakucita oobo. (Int. 65:2; Jak. 1:5) Ijwi lya Leza lilamupandulula Jehova munzila njobakonzya kumvwisya bantu kutegwa atondezye kuti ulasikilika. Mucikozyanyo, sintembauzyo Davida wakalemba kuti: “Meso aa-Jehova alalangisya” alindiswe alimwi akuti ‘ijanza lyakwe lyalulyo lilitujatide.’ (Int. 34:15; 63:8) Musinsimi Isaya wakakozyanisya Jehova kumweembezi naakaamba kuti: “Ulabunganya twana akuboko kwakwe, ulatukumbatila akaango kakwe.” (Is. 40:11) Amuciyeeyele buyo! Jehova uyanda kuti tuswene munsi lyakwe mbubwenya mbuli kabelele ikafwukatilwa amweembezi uubikkila maano. Eelo kaka tulijisi Taata uusikilika! Mbuti mbotukonzya kumwiiya Jehova mumakani aaya?
BUBE IBUYANDIKA KAPATI
5. Nkaambo nzi ncociyandika kuti baalu kabasikilika?
5 Caino-ino, Bakamboni basungu ibakkala muzisi ziindene-indene nyika yoonse bakabuzyigwa kuti: “Mbube nzi mbomuyanda kapati mumwaalu?” Bunji bwabo bakaamba kuti: “Kuba muntu uusikilika.” Masimpe kuti Munakristo uuliwoonse weelede kutondezya bube oobu kusikila mpagolela, pele ikapati baalu beelede kuti kabasikilika. (Is. 32:1, 2) Mucizyi umwi naakabuzyigwa kwaamba ncaakaambila kuti bube bwakusikilika bulayandika, wakati: “Tulakonzya kugwasyigwa abube bumbi bubotu mbwajisi mwaalu lilikke buyo kuti kasikilika.” Sena mwakubona kweendelana kuliko akati kakusikilika alimwi akutondezya bube bumbi bubotu? Pele ino ncinzi cipa kuti muntu kasikilika?
6. Ncinzi ciyandika kapati kutegwa muntu kasikilika?
6 Cintu ciyandika kapati kutegwa muntu kasikilika, nkubabikkila kapati maano bantu bambi. Ikuti mwaalu kabikkila maano bamwi alimwi kalisungwide kubagwasya, bakwesu abacizyi kubikkilizya abana, bayakububona bube oobo. (Mk. 10:13-16) Carlos uujisi myaka yakuzyalwa iili 12 wakaamba kuti: “Ndilakkomana kubona baalu kabamweta-mweta akutondezya luzyalo ciindi notuli ku Ŋanda ya Bwami.” Cakutadooneka, mwaalu teelede kwaamba buyo amulomo kuti ulasikilika pe; weelede kubutondezya bube oobu. (1 Jo. 3:18) Mbuti mwaalu mbwakonzya kucita oobo?
7. Nkaambo nzi kusama kabbaaji kakumuswaangano wacooko kanji-kanji ncokutalisya mibandi, alimwi nciiyo nzi ncotwiiya kuli ceeci?
7 Amulange-lange cikozyanyo eeci. Caino-ino, mukwesu wakalisamide kabbaaji ciindi naakali mundeke kuya kuŋanda kuzwa kumuswaangano wacooko kunze aacisi. Ciindi mubelesi wamundeke naakabona kabbaaji ikakajisi majwi aakuti: “Abuboole Bwami bwa Leza!” wakaambila mukwesu kuti: “Inzya, abuboole—tweelede kubandika makani manji kujatikizya kaambo aaka.” Kumane bakaabandika amubelesi ooyu mpoonya wakatambula magazini eesu. Bunji bwesu cintu cili boobu cakatucitikila kale. Nkaambo nzi kabbaaji kamuswaangano wacooko ncokagwasya kutalisya mubandi? Nkaambo munzila imwi cili mbuli kuti mwaambila bantu kuti: “Amwaanguluke kubandika andime. Amundibuzye nkonduunka.” Kabbaaji ncitondezyo cilibonya icizyibya bantu kuti tuliyandide kubandika ambabo kujatikizya nzyotusyoma. Mbubwenya buyo, baalu Banakristo bayanda kuti kabatondezya citondezyo cilibonya icaambila basyominyina kuti: “Amwaanguluke kubandika andime.” Ino nzitondezyo nzi zimwi?
8. Mbuti baalu mbobatondezya kuti balababikkila maano bambi, alimwi ino kucita boobo kwiijatikizya buti mbungano?
8 Zilengwa zilakonzya kwiindana mucisi acisi, pele kuti katubamwetela-mwetela bakwesu abacizyi, katubaanzya mumaanza, kubaanzya cakutabinda, tutondezya kuti tulababikkila maano. Ino nguni weelede kusaanguna kubweza ntaamu eeyi? Amubone cikozyanyo ncaakapa Jesu. Matayo wakalemba kuti ciindi naakali amuswaangano abasikwiiya bakwe, ‘Jesu wakaboola akwaambaula ambabo.’ (Mt. 28:18) Mbubwenya buyo, abalo baalu mazuba aano balasaanguna kubweza ntaamu yakusikila bakombinyina akwaambaula ambabo. Mbuti eeci mbocikonzya kwiijatikizya mbungano? Mucizyi umwi mupainiya uujisi myaka yakuzyalwa iili 88, wakaamba kuti: “Ciindi nondili ku Ŋanda ya Bwami, kumweta-mweta alimwi amajwi aakulwaizya kuzwa kubaalu andipa kubayanda kapati.” Aumwi mucizyi uusyomeka wakayungizya kuti: “Ikuti mwaalu wanditambula kumiswaangano kumwi kamweta-mweta, inga cilibonya mbuli kuti tacigwasyi, pele kucita boobo kulandikkomanisya kapati.”
KUSIKILIKA ALIMWI AKUJANIKA
9, 10. (a) Ncikozyanyo nzi cibotu Jehova ncapa? (b) Mbuti baalu mbobakonzya kutondezya kuti balajanika?
9 Cakutadooneka tatukonzyi kusikilika kuti katutajaniki. Jehova ulapa cikozyanyo cibotu mumakani aaya. Bbaibbele lyaamba kuti: “Tali kulamfwu kuli umwi aumwi wesu.” (Mil. 17:27) Nzila imwi baalu mbobakonzya kutondezya kuti balajanika, nkwiinda mukujana ciindi cakubandika abakwesu abacizyi—bana abapati, miswaangano ya Bunakristo noitanatalika anoyamana. Mukwesu umwi mupainiya wakaamba kuti: “Ikuti mwaalu wandaanzya akwiima kutegwa aswiilile nondaambaula, ndilimvwa kuyandwa kapati.” Mucizyi umwi iwabelekela Jehova kwamyaka iitandila ku 50 wakaamba kuti: “Ibaalu ibajana ciindi cakubandika andime noyamana miswaangano, bandipa kulimvwa kuti ndilayandwa.”
10 Cakutadooneka, beembezi Banakristo alimwi beelede kulanganya mikuli imwi. Nokuba boobo, kumiswaangano baalu beelede kusaanguna kubikkila maano kumbelele.
JEHOVA TASALULULI
11, 12. (a) Ncinzi cijatikizyidwe mukutasalulula? (b) Mbuti Jehova mbwapa cikozyanyo cibotu kulindiswe kujatikizya kutasalulula?
11 Bube bumwi bwa Jehova bubotu, nkutasalulula. Ino kutasalulula caamba nzi? Kutasalulula caamba kucita zyintu munzila iikkomanisya boonse, kutasulaika musyobo umwi. Kutasalulula kwini-kwini kujatikizya zyintu zyobilo: mbotuyeeya alimwi anzyotucita. Nkaambo nzi zyintu eezyi zyobilo ncoziyandika? Nkaambo kakuti, kuti muntu katasalululi mukuyeeya ndendilyo nakonzya kukulwaizyigwa kulanganya bamwi kakunyina kusalulula. Mu Magwalo aa Bunakristo aa Chigiliki, bbala lyakuti “kutasalulula” lyaamba “kutalanga abusyu,” nkokuti kucita zyintu zibotu kubantu boonse kunyina makani ambwalibonya muntu. (Mil. 10:34) Aboobo, muntu uutasalululi uyakumubikkila maano muntu umwi aumwi, kutali akaambo kambwalibonya naa bukkale, pele uyakubikkila maano kubube bwamuntu ooyo.
12 Jehova nguupa cikozyanyo ciinda zyoonse cakutasalulula. Ijwi lyakwe lyaamba kuti: “Tasalululi” alimwi akuti “talangi ziimo zyabantu.” (Amubale Milimo 10:34, 35; Deuteronomo 10:17.) Icakacitika muciindi ca Musa cilatugwasya kumvwisya kaambo aaka.
13, 14. (a) Mbukkale nzi mbobakaswaanganya bana basimbi bosanwe ba Zelofehadi? (b) Mbuti Jehova mbwaakatondezya kuti tasalululi?
13 Kakuceede buyo ciindi cisyoonto kuti bana Israyeli banjile mu Nyika Yakasyomezyedwe, basimbi bosanwe ibakali banabokwabo ibatakakwetwe bakajisi penzi. Ino lyakali penzi nzi? Bakalizyi kuti mukwasyi wabo wakali kuyakupegwa nyika yakapedwe bausyi, mbubwenya mbuli mikwasyi iimbi yabana Israyeli. (My. 26:52-55) Nokuba boobo, bausyi babana aaba ba Zelofehadi bamusyobo wa Manase, bakalifwide. Kweelana acilengwa, bana basankwa ba Zelofehadi mbabakeelede kupegwa nyika, pele Zelofehadi wakajisi buyo bana basimbi. (My. 26:33) Mbwaanga kwakanyina mwana musankwa wakeelede kupegwa nyika, sena nyika iyakeelede mukwasyi ooyu yakali kuyakupegwa kubanamukwasyi bambi, mpoonya bana basimbi aaba bacaale kabanyina cikono camukwasyi?
14 Bana basimbi aaba bosanwe bakamusikila Musa akumubuzya kuti: “Sa ncibotu kuti izina lyatateesu lifwidilile muciinga cakwe nkaambo kakubula bana baalumi?” Bakalomba kuti: “Utupe lukono aswebo akati kababunyina batateesu.” Sena Musa wakabaingula kuti, ‘Kunyina bubambe buli boobo mumulawo’? Peepe, tanaakacita oobo, “Musa wakaleta makani aabo kuli-Jehova.” (My. 27:2-5) Ino Jehova wakacita buti? Wakaambila Musa kuti: “Bana basimbi ba-Zelofehadi baamba kabotu. Ncobeni uleelede kubaabila lukono akati kababunyina bawisi. Lukono lwawisaabo lulaba mumaanza aabo.” Jehova tanaakagolela waawo pe. Wakacita kuti kulomba ooko ube mulawo, wakalailila Musa kuti: “Na muntu wafwa uutazyede mwana mulombe, lukono lwakwe lulaba lwamwana wakwe musimbi.” (My. 27:6-8; Jos. 17:1-6) Kuzwa waawo, bana basimbi bamu Israyeli boonse ibakajisi penzi eeli bakatalika kukwabililwa.
15. (a) Mbuti Jehova mbwabalanganya bantu bakwe kwaambisya aabo ibapengede? (b) Nzibalo nzi zimwi zyamu Bbaibbele izitondezya kuti Jehova tasalululi?
15 Eelo kaka oobu bwakali bubambe bwaluzyalo alimwi ibutondezya kutasalulula! Jehova wakalanganya basimbi aaba cabulemu ibakanyina lugwasyo, wakacita oobo mbubwenya mbwaakacitila bana Israyeli boonse. (Int. 68:5) Eeci ncimwi buyo cazibalo zyamu Bbaibbele icitondezya kaambo aaka kamasimpe ikakkomanisya kakuti: Jehova ulalanganya babelesi bakwe boonse kakunyina kusalulula.—1 Sam. 16:1-13; Mil. 10:30-35, 44-48.
TULAKONZYA KUMWIIYA JEHOVA
16. Mbuti mbotukonzya kuba alimwi akuyumya bube bwesu bwakutasalulula?
16 Mbuti mbotukonzya kwiiya kutasalulula kwa Jehova? Mutalubi kuti, kutasalulula kujatikizya zyintu zyobilo. Lilikke buyo kuti katutasalululi ndendilyo notukonzya kulanganya bamwi kakunyina kusalulula. Masimpe kuti toonse tulayanda kulibona kuti tuli bantu batakatazyi alimwi ibatasalululi. Nokuba boobo, mulakonzya kukazumina kaambo kakuti talili lyoonse notulilingula katujisi makanze aakubona tumpenda twesu. Aboobo, ncinzi ncotukonzya kucita kutegwa tuzyibe naa tuzyibidwe kuba muntu uutasalululi? Ciindi Jesu naakali kuyanda kuzyiba bamwi bantu nzyobakali kwaamba kujatikizya nguwe, wakabuzya balongwe bakwe basyomeka kuti: “Ino bantu baamba kuti Mwana wamuntu nguni?” (Mt. 16:13, 14) Tulakonzya kumwiiya Jesu andiswe munzila eeyi. Inga twabuzya mweenzuma ngotusyoma kuti atwaambile naa tulasalulula naa pe. Ikuti watwaambila kuti kuli kusalulula kumwi nkotujisi ambweni kujatikizya musyobo naa bukkale, ncinzi ncotweelede kucita? Amupaile kuli Jehova kujatikizya mbomulimvwa, kumulomba kuti amugwasye kucinca bube bwanu kutegwa mutondezye kutasalulula kwakwe munzila iizulide.—Mt. 7:7; Kol. 3:10, 11.
17. Muunzila nzi motukonzya kulanganya bamwi cakutasalulula?
17 Mumbungano ya Banakristo, tulatondezya kuti twiiya kutasalulula kwa Jehova kwiinda mukulanganya bakwesu abacizyi boonse cabulemu alimwi caluzyalo. Mucikozyanyo, caboola kukusamausya, tuyanda kuti katutamba basyomima basiyene-siyene, kubikkilizya abaabo mbotwiindene zilengwa, bacete, bamucaala, naa bamukabafwu. (Amubale Bagalatiya 2:10; Jakobo 1:27.) Kuyungizya waawo, mulimo wesu wakukambauka Bwami, tulaucita kubantu bamisyobo yoonse cakutasalulula, kubikkilizya abamuzisi zimbi. Eelo kaka tulikkomene kuti tulijisi mabbuku aapandulula Bbaibbele mumyaambo iibalilwa ku 600! Eeco ncisinizyo cakuti tatusalululi!
18. Mbuti nywebo kumugama mbomuyakutondezya kuti mulalumba bube bwa Jehova bwakusikilika alimwi akutasalulula?
18 Masimpe, notulanga Jehova mbwasikilika alimwi mbwatasalululi, tuyakuzumanana kumulumba. Kulumba kwesu kuli boobo, kweelede kutupa kuti twiiye bube bwa Jehova oobu kusikila mpotugolela, kubutondezya muzyintu nzyotucita kubasyomima alimwi abaabo mbotukambaukila.
[Cifwanikiso icili apeeji 8]
“Jehova uli kufwaafwi kuliboonse bamwiita.”—Int. 145:18 (Amubone muncali 9)
‘Jehova Leza wanu talangi ciimo camuntu.’—Dt. 10:17 (Amubone muncali 17)
[Cifwanikiso icili apeeji 10]
Bana basimbi ba Zelofehadi bakalumba kutasalulula kwa Leza (Amubone mincali 13, 14)