Amumulumbe Jehova Akaambo Kakusyomeka Kwakwe Alimwi Akulekelela

‘Yebo, O Jehova, uli mubotu, ulafwambaana kujatila. Ulatila luzyalo lwako kuli boonse bakukwiilila.’—INT. 86:5.

SENA INGA MWAPANDULULA?

Muunzila nzi motukonzya kwiiya kusyomeka kwa Jehova?

Mbuti mbotukonzya kwiiya kulekelela kwa Jehova?

Nkaambo nzi ncomuyanda kuzumanana kutondezya kulumba kubube bwa Jehova?

1, 2. (a) Nkaambo nzi ncotukkomana kuba abalongwe basyomeka alimwi ibalekelela? (b) Mibuzyo nzi njotutiilange-lange?

INO inga mwamupandulula buti mulongwe mwini-mwini? Mucizyi Munakristo uulaazyina lyakuti Ashley wakaamba kuti: “Kulindime mulongwe mwini-mwini nguyooyo uundigwasya lyoonse mumapenzi alimwi uundilekelela ikuti ndamubisizya.” Toonse tulakkomana kapati kuba abalongwe basyomeka alimwi ibalekelela. Balatugwasya kulimvwa kuliiba alimwi akuyandwa.—Tus. 17:17.

² Jehova ngo Mulongwe wiinda kusyomeka alimwi akulekelela ngotukonzya kuba anguwe. Sintembauzyo wakalemba kuti: ‘Yebo, O Jehova, uli mubotu, ulafwambaana kujatila. Ulatila luzyalo lwako kuli boonse bakukwiilila.’ (Int. 86:5) Ino kusyomeka alimwi akulekelela caamba nzi? Mbuti Jehova mbwabutondezya bube oobu bubotu? Alimwi mbuti mbotukonzya kwiiya cikozyanyo cakwe? Bwiinguzi kumibuzyo eeyi buyakutugwasya kuyungizya luyando lwesu ku Mulongwe wesu wiinda boonse, Jehova. Alimwi bulatugwasya kuyumya cilongwe akati kesu.—1 Jo. 4:7, 8.

JEHOVA ULASYOMEKA

3. Ino kusyomeka caamba nzi?

³ Kusyomeka mbube ibukkomanisya kapati ibubikkilizya kulyaaba alimwi akukakatila kakunyina kuzungaana. Muntu uusyomeka tacinci-cinci pe. Muciindi caboobo, caluyando ulakakatila kumuntu umwi (naa kucintu cimwi), kukakatila kumuntu ooyo (naa kucintu eeco) nomuba muziindi zikatazya. Inzya, Jehova nguuinda ‘kusyomeka.’—Ciy. 16:5.

4, 5. (a) Mbuti Jehova mbwatondezya kuti ulasyomeka? (b) Mbuti mbotukonzya kugwasyigwa kwiinda mukulanga-langa zyintu nzyaakacita Leza cakusyomeka?

⁴ Mbuti Jehova mbwatondezya kuti ulasyomeka? Kunyina nabalekelezya bakombi bakwe basyomeka. Mukombi umwi, Mwami Davida, wakazumina kuti Jehova ulasyomeka. (Amubale 2 Samuele 22:26.) Ciindi Davida naakali mumapenzi, Jehova cakusyomeka wakamusololela, wakamukwabilila, alimwi wakamuvwuna. (2 Sam. 22:1) Davida wakalizyi kuti kusyomeka kwa Jehova takuli kwakwaamba buyo amulomo pe. Nkaambo nzi Jehova ncaakalanganya Davida cakusyomeka? Nkaambo kakuti Davida wakali ‘muntu uusyomeka.’ Jehova ulakukkomanina kusyomeka kwabakombi bakwe, alimwi ulabalumbula kwiinda mukubacitila zyintu cakusyomeka.—Tus. 2:6-8.

⁵ Tulakonzya kuyumizyigwa kwiinda mukulanga-langa zyintu nzyaakacita Jehova cakusyomeka. Mukwesu umwi uusyomeka uulaazyina lyakuti Reed, wakaamba kuti: “Cilandigwasya kapati kubala zibalo zyaamba Jehova mbwaakalanganya Davida ciindi camapenzi. Nociba ciindi Davida naakali kuccija basinkondonyina, kukkala mumampangala, Jehova lyoonse wakali kumulanganya. Eeci cilandikulwaizya kapati! Cindigwasya kubona kuti kufwumbwa mubukkale mondikonzya kulijana, kufwumbwa naa zyintu zyayuma buti, Jehova uyakundigwasya ikuti ndazumanana kusyomeka kulinguwe.” Cakutadooneka, andinywe mbomulimvwa oobo.—Lom. 8:38, 39.

6. Muunzila nzi zimwi Jehova mwatondezya kuti ulasyomeka, alimwi mbuti mbobagwasyigwa bakombi bakwe?

⁶ Muunzila nzi zimwi Jehova mwatondezya kuti ulasyomeka? Tacinci zyeelelo zyakwe. Utusyomezya kuti: “Kusikila kubucembele bwanu ndime oyo nguwenya.” (Is. 46:4) Lyoonse ulasala zyakucita kweelana azyeelelo zyakwe zitacinci zijatikizya ciluzi acitaluzi. (Malk. 3:6) Kuyungizya waawo, Jehova ulatondezya kuti ulasyomeka kwiinda mukuzuzikizya zisyomezyo zyakwe. (Is. 55:11) Aboobo, kusyomeka kwa Jehova kulabagwasya bakombi bakwe boonse ibasyomeka. Munzila nzi? Ikuti twacita zyoonse nzyotukonzya ikutobela zyeelelo zya Jehova, tulakonzya kusinizya kuti uyakuzuzikizya cisyomezyo cakwe akutulongezya.—Is. 48:17, 18.

AMWIIYE KUSYOMEKA KWA JEHOVA

7. Muunzila nzi imwi motukonzya kwiiya kusyomeka kwa Leza?

⁷ Mbuti mbotukonzya kwiiya kusyomeka kwa Jehova? Nzila imwi nkwiinda mukubweza ntaamu akugwasya baabo ibali mumapenzi. (Tus. 3:27) Mucikozyanyo, sena kuli mukombinyoko ngomuzyi uutyompedwe, andiza akaambo kakuciswa, kukazyigwa abanamukwasyi, naa akaambo kakulezya kwakwe mwini? Amubweze ntaamu yakugwasya muntu ooyo kwiinda mukumwaambila ‘majwi aaluzyalo aaumbulizya.’ (Zek. 1:13)a Kwiinda mukucita boobo, mutondezya kuti muli mulongwe uusyomeka alimwi mwini-mwini ‘walusinizyo wiinda munyina.’—Tus. 18:24.

8. Mbuti mbotukonzya kwiiya kusyomeka kwa Jehova mucikwati?

⁸ Tulakonzya alimwi kwiiya kusyomeka kwa Jehova kwiinda mukuzumanana kusyomeka kubayandwa besu. Mucikozyanyo, ikuti katukwete naa kukwatwa, tulizyi kuti tweelede kuzumanana kusyomeka kuli yooyo ngotukwetene limwi. (Tus. 5:15-18) Aboobo, tatuciti cintu cili coonse cikonzya kupa kuti tucite bumambe. (Mt. 5:28) Kuyungizya waawo, tulatondezya kuti tulasyomeka kubasyomima kwiinda mukutavwiya, mukutamwaya twaambo twakubeja kujatikizya bamwi nokuba kuswiilila kumakani aali boobo.—Tus. 12:18.

9, 10. (a) Nkuuli ni nkotuyandika kusyomeka kapati? (b) Nkaambo nzi kumvwida milawo ya Jehova ncocitali cuuba-uba lyoonse?

⁹ Ciyandika kapati kwiinda zyoonse, nkuzumanana kusyomeka kuli Jehova. Mbuti mbotukonzya kucita oobo? Nkwiinda mukusolekesya kuzilanga mbuli mbwazilanga zyintu walo—kuyanda zyeezyo nzyayanda alimwi akusulaika zyeezyo nzyasulaika—alimwi akulilemeka kweelana anzyatwaambila. (Amubale Intembauzyo 97:10.) Ikuti mizeezo yesu alimwi ambotulimvwa kazyeendelana amizeezo ya Jehova alimwi ambwalimvwa, tuyakuba aaluyandisisyo lwakutobela milawo yakwe.—Int. 119:104.

¹⁰ Masimpe kuti talili lyoonse nocili cuuba-uba kumvwida milawo ya Jehova. Kuyandika kubeleka canguzu kutegwa tuzumanane kusyomeka. Mucikozyanyo, Banakristo bamwi batanakwata naa kukwatwa balayanda kukwata naa kukwatwa, pele tabanajana muntu weelela wakukwatana limwi uukomba Jehova. (1 Ko. 7:39) Mucizyi uutanakwatwa ulakonzya kubona babelesinyina batali Bakamboni lyoonse kabasola kumuletela muntu umwi ngobayeeyela kuti inga bakwatana limwi. Aciindi eeco andiza mucizyi inga kalwana penzi lyakulendelelwa. Nokuba boobo, ulabeleka canguzu kutegwa azumanane kusyomeka kuli Jehova. Cakutadooneka, zikozyanyo zili boobu zyakusyomeka zilatukulwaizya! Masimpe, Jehova uyakubalongezya boonse ibazumanana kusyomeka kulinguwe nomuba muziindi zikatazya.—Heb. 11:6.

JEHOVA ULALEKELELA

11. Ino kulekelela caamba nzi?

¹¹ Akati kabube bwa Jehova ibukkomanisya kapati, mbube bwakwe bwakuyandisya kulekelela. Ino kulekelela caamba nzi? Mubufwaafwi, caamba kujatila muntu iwatubisizya ikuti kakuli kaambo kamvwika ncotweelede kucitila boobo. Eeci tacaambi kuti muntu uulekelela ulaubya-ubya cibi naa tazumini kuti cakacitika. Muciindi caboobo, caamba kuti muntu ooyo wasala kuti atabikkilili cibi eeco. Magwalo atuyiisya kuti Jehova ‘ulafwambaana kubajatila’ aabo batondezya kweempwa ncobeni.—Int. 86:5.

12. (a) Mbuti Jehova mbwatondezya kuti ulalekelela? (b) Ino ‘kumwaigwa’ kwazibi zyamuntu caamba nzi?

¹² Mbuti Jehova mbwatondezya kulekelela? Jehova “nguuinda kulekelela” alimwi ulacita oobo cakumaninina alimwi inga taciyeeyi limbi cibi eeco. (Is. 55:7) Ino tuzyi buti kuti Jehova ulalekelela cakumaninina? Amulange-lange cisyomezyo cili mulugwalo lwa Milimo 3:19. (Amubale.) Mwaapostolo Petro wakakulwaizya baswiilizi bakwe kuti ‘beempwe akusanduka.’ Ciindi sizibi neempwa ncobeni, ulausa kapati akaambo kacibi ncaakacita. Alimwi ulaba amakanze aakuti atakaciinduluki cibi ncaakacita. (2 Ko. 7:10, 11) Kuyungizya waawo, kweempwa kwini-kwini kupa kuti sizibi ‘asanduke,’ kusiya nzila zyakwe zibi akweendela munzila iikkomanisya Leza. Ncinzi cakali kukonzya kucitika ikuti baswiilizi ba Petro batondezya kweempwa kwini-kwini? Petro wakaamba kuti zibi zyabo zyakali ‘kuyakumwaigwa.’ Bbala lyakumwaya lizwa kubbala lya Chigiliki lipandulula “kuzibaanya.” Aboobo, ikuti Jehova walekelela, ulazibaanya cibi kutegwa tusalale. Ulalekelela cakumaninina.—Heb. 10:22; 1 Jo. 1:7.

13. Ino majwi aakuti “zibi zyabo nsikoozooziibalukwa limbi” atusyomezya nzi?

¹³ Ino tuzyi buti kuti Jehova nalekelela taciyeeyi limbi cibi ncaakacita muntu? Amulange-lange businsimi bwa Jeremiya ibwaamba zyacizuminano cipya, icijatikizya Banakristo bananike, calo cipa kuti aabo ibasyoma mucinunuzyo balekelelwe ncobeni. (Amubale Jeremiya 31:34.) Jehova waamba kuti: “Nzoobalekelela milandu yabo, azyalo zibi zyabo nsikoozooziibalukwa limbi.” Aboobo, Jehova utusyomezya kuti, ikuti watulekelela, kunyina alimwi nayakutubeteka kujatikizya zibi eezyo nzyaakatulekelela. Leza tatuyeezyi zibi nzyotwakacita nzyaakatulekelela kale kutegwa atupe mulandu naa kutusubula cakwiinduluka-induluka. Muciindi caboobo, Jehova ulatulekelela zibi eezyo akuzibikka kusyule lyakwe—taziyeeyi limbi pe.—Lom. 4:7, 8.

14. Ino kuzinzibala kuyeeya kulekelela kwa Jehova inga kwatuumbulizya buti? Amupe cikozyanyo.

¹⁴ Tulakonzya kuumbulizyigwa kwiinda mukuzinzibala kuyeeya kulekelela kwa Jehova. Atulange-lange cikozyanyo eeci. Myaka minji yainda, mucizyi ngotutiipe zyina lyakuti Elaine wakagwisyigwa mumbungano. Myaka yakatobela wakazikupilusyigwa. Wakazumina akwaamba kuti: “Nokuba kuti ndakali kulyaambauzya mumoyo akwaambila beenzuma kuti ndakali kusyoma kuti Jehova wakandilekelela, lyoonse ndakacili kulimvwa kuti tanaakali afwaafwi andime akuti bamwi bakali afwaafwi anguwe, alimwi akuti Leza wakali mwini-mwini kulimbabo.” Nokuba boobo, Elaine wakajana luumbulizyo kwiinda mukubala alimwi akuzinzibala kuyeeya zikozyanyo zimwi zyaambidwe mu Bbaibbele izitondezya mbwalekelela Jehova. Wakayungizya akwaamba kuti: “Ndakabona kuti Jehova ulandiyanda alimwi ulandifwida luzyalo munzila njondatakazyi kaindi.” Kaambo kapati ikakamukulwaizya nkakuti: “Ciindi Jehova natulekelela zibi zyesu, tatweelede kulimvwa mbuli kuti kuli tubala tumwi twacibi eeco ituzumanana kuba aali ndiswe mubuumi bwesu boonse.”b Elaine wakaamba kuti: “Ndakabona kuti tiindakali kusyoma kuti Jehova ulakonzya kundilekelela cakumaninina, ndakali kuyeeya kuti mubuumi bwangu boonse ndakali kuyakulimvwa bubi. Ndilizyi kuti ciyakunditolela ciindi kuti ndicileke kulimvwa boobu, pele lino ndilimvwa kuti ndilakonzya kuswena kuli Jehova, alimwi ndilimvwa kuti mukuli ooyu mulemu wagwisyigwa alindime.” Eelo kaka taciliboteli kubelekela Leza siluyando alimwi uulekelela!—Int. 103:9.

AMWIIYE KULEKELELA KWA JEHOVA

15. Mbuti mbotukonzya kwiiya kulekelela kwa Jehova?

¹⁵ Tulakonzya kwiiya kulekelela kwa Jehova kwiinda mukusala kulekelelana kuti kakuli kaambo kamvwika ncotweelede kucitila boobo. (Amubale Luka 17:3, 4.) Amuyeeye kuti ciindi Jehova natulekelela, ulaziluba zibi zyesu mukuti taakwe natusubula alimwi akaambo kanzizyo. Ciindi notulekelela bambi, andiswe tulakonzya kuluba kwiinda mukutaabusya makani aacibi eeco ncobakatucitila.

16. (a) Sena kulekelela caamba kuti tweelede kuubya-ubya zibi nzyobatucitila bamwi naa kubazumizya kuti batalike kutudyaaminina? Amupandulule. (b) Ncinzi ncotweelede kucita kutegwa Leza atulekelele?

¹⁶ Kulekelela tacaambi kuti tweelede kuubya-ubya zibi nzyobatucitila bamwi naa kubazumizya kuti batalike kutudyaaminina. Oobo tabusyi mboceelede kuba pe. Mubufwaafwi, kulekelela caamba kutabikkilila bamwi kumoyo. Aboobo, iciyandika kapati kutegwa Leza atulekelele, tweelede kwiiya kulekelela kwakwe muzyintu nzyotucita abamwi. (Mt. 6:14, 15) Kayi lweetelelo ndolupa Jehova kuti kaibaluka kuti “tuli bulongo buyo.” (Int. 103:14) Aboobo, cilayandika kuti lweetelelo kalutweendelezya kutegwa tutanookomezyi kulezya kwabamwi, katubalekelela camoyo woonse.—Ef. 4:32; Kol. 3:13.

17. Ncinzi cikonzya kutugwasya kuti musyomima watunyemya?

¹⁷ Mubwini, talili lyoonse nocili cuuba-uba kulekelela. Kulibonya kuti nobaba Banakristo bananike bamwi mumwaanda wamyaka wakusaanguna cakali kubayumina kumana mazwanga akati kabo. (Flp. 4:2) Ikuti musyomima watunyemya, ncinzi cikonzya kutugwasya? Amuyeeye Jobu. Ciindi “balongwe” bakwe—Elifazi, Bilidadi, alimwi a Zofari nobakaamba twaambo twakubeja kujatikizya nguwe—wakabijilwa kapati. (Job. 10:1; 19:2) Kumamanino, Jehova wakabasinsa basikutamikizya aabo ibabi. Leza wakabaambila kuti baunke kuli Jobu akupa zipaizyo akaambo kazibi zyabo. (Job. 42:7-9) Pele Jehova alimwi wakaambila Jobu kuti acite cintu cimwi. Ino ncinzi ncaakamwaambila kucita? Jehova wakaambila Jobu kuti apailile basikumutamikizya aabaya. Jobu wakacita kweelana a Jehova mbwaakamwaambila, alimwi Jehova wakamulongezya akaambo kamuuya wakulekelela. (Amubale Jobu 42:10, 12, 16, 17.) Ncinzi ncotwiiya? Kupaila camoyo woonse kujatikizya bamwi ibakatubisizya kulakonzya kutugwasya kutabikkilila cibi ncobakatucitila.

AMUZUMANANE KULUMBA BUBE BUBOTU BWA JEHOVA

18, 19. Mbuti mbotukonzya kuzumanana kutondezya kulumba kubube bubotu bwa Jehova?

¹⁸ Cakutadooneka twakatalusyigwa kulanga-langa bube bwiindene-indene bwa Jehova bubotu bwaluyando. Twabona kuti ulasikilika, tasalululi, mwaabi, ulanyoneka, ulasyomeka alimwi ulalekelela. Nokuba boobo, twalanga-langa buyo bube busyoonto bwa Jehova. Tulakonzya kujana lukkomano lwakwiiya zinji kujatikizya Jehova kukabe kutamani. (Muk. 3:11) Tulaazumina majwi ngaakalemba mwaapostolo Paulo aakuti: “Eelyo talweeli kaka lubono, busongo aluzyibo lwa Leza!”—Lom. 11:33.

¹⁹ Aboobo, toonse atuzumanane kutondezya kulumba kwesu kubube bubotu bwa Jehova. Tulakonzya kucita oobo kwiinda mukubuzyiba kabotu bube bwakwe, kubuyeeya alimwi akubutondezya mubuumi bwesu. (Ef. 5:1) Notucita boobo, cakutadooneka tuyakucita kweelana amajwi aasintembauzyo iwakaimba kuti: “Pele mebo, kulandibotela kuswena kuli-Leza.”—Int. 73:28.

[Bupanduluzi buyungizidwe]

[Cifwanikiso icili apeeji 19]

“Kuli muzwalani umwi walusinizyo kwiinda munyoko.”—Tus. 18:24 (Amubone muncali 7)

‘Amulekelelane camoyo woonse.’—Ef. 4:32 (Amubone muncali 16)

[Cifwanikiso icili apeeji 21]

Mipailo yesu yakulekelela yeelede kucitwa camoyo woonse (Amubone muncali 17)