Lyoonse Kuli Zyakucita Zinji
1 Bantu ba Jehova mbantu bajisi bubi lyoonse. Tujisi mikuli minji iijatikizya mikwasyi yesu, milimo yakumubili, alimwi ayakuzikolo. Alimwi kwiinda zyoonse, kuli zyakucita “lyoonse kumilimo ya-Mwami.” (1 Kor. 15:58) Tweelede kulibambila alimwi akujanika kumiswaangano yambungano yansondo ansondo. Tulakulwaizigwa kuti takweelede kwiinda nsondo kakutakwe kutola lubazu mumulimo wamumuunda. Ciindi ceelede cileelede kubikkwa ambali lyoonse cakubaa ciiyo ca Bbaibblele caumwi aumwi alimwi acamukwasyi woonse. Ibaalu abakutausi bajisi mikuli minji yamumbungano. Zimwi ziindi tulalombwa kuti tugwasye beelede ibayandika lugwasyo.
2 Muziindi zimwi, bamwi bandiswe balakonzya kulimvwa kulemenwa naa kuvwulilwa azintu nzyotweelede kucita. Pele, ibantu bajisi bubi balakonzya kubalilwaa bantu bakkomana kapati ikuti naa zintu zyayendelezegwa mbuli mbozyeelede.—Muk. 3:12, 13.
3 Imwaapostolo Paulo wakali umwi iwakajisi zyakucita zinji lyoonse. Kumwi kalanganya zintu zyakwe zyakumubili kwiinda mukubeleka mulimo wakumubili kali muluki wamatente, wakabeleka cabusungu kwiinda bwakabeleka maapostolo bambi. Wakabeleka cakulitakata kali mukambausi, wakakambauka mumasena aakubuleya alimwi akuŋanda aŋanda, pele katalekelezyi mikuli yakwe yabweembezi bwabutanga. (Inc. 20:20, 21, 31, 34, 35) Nokuba kuti lyoonse wakajisi bubi, Paulo lyoonse wakali kuyandisya kubeleka kwiinda mbwabeleka lyoonse mumulimo wa Jehova.—Amweezyanisye Ba-Roma 1:13-15.
4 Icakamugwasya Paulo kweendelezya zintu mbuli mbozyeelede, nkusyoma muli Jehova wakali kumupa nguzu. Imulimo wakwe wakaubona kuba mulimo uujisi mpindu kapati alimwi uukkomanisya kuucita. (Flp. 4:13) Wakalizi kuti Leza kwiina naakali kuyooiluba milimo yakwe. (Heb. 6:10) Ilukondo lwakugwasya bamwi kuti bazyibe Jehova lwakamukulwaizya. (1 Tes. 2:19, 20) Icisyomezyo cakuti bulangizi bwakwe ibuyeeme aazisyomezyo zyamu Bbaibbele buyoozuzikizigwa kwakamukulwaizya kuzumanana kujatisya mumulimo.—Heb 6:11.
5 Aswebo mbubwena tweelede kulanga mpindu iizwa mumulimo wesu. Ikujanika kwesu akutola lubazu mumiswaangano yansondo ansondo kulabakulwaizya bamwi. (Heb. 10:24, 25) Ikusolekesya kwesu kusikila bantu boonse amakani mabotu kugwasilizya kukomena kwambungano ciindi kuyanda nokubusigwa alimwi ibapya nobayanzana andiswe. (Joh. 15:8) Ikugwasya bamwi ibabulide kusumpula muuya walukamantano, uuli mbuli muuya wamumukwasyi mumbungano. (Jak. 1:27) Kuyungizya waawa, mbubwena mbuli Paulo, tatweelede kuluba kuti ikujata bubi kwesu mumilimo iilaampindu kulamukkomanisya kapati Jehova Leza. Tucibona kuba coolwe cipati ikumubelekela. Kulindiswe kwiina buumi bubotu bwiinda waawa!
6 Alimwi kuli mpindu iimbi mukubaa zyakucita zinji. Ciindi notujisi bubi kubeleka milimo yakumuuya munzila yeelede, ciindi cilafwambaana kweenda. Kwiinda mukuzyiba kuti buzuba bumwi abumwi mbobwiindila tuswena afwaafwi anyika impya, tulabukkomanina buumi buzwide milimo mbotulaabo lino. Alimwi tulizyi kuti ikujata bubi cilagwasya, nkaambo inga kwiina ciindi cakujatikizigwa muzintu zyabuyo zyamunyika.—Ef. 5:15, 16.
7 Mmasimpe, kuli zintu zinji zyakucita mumulimo wa Mwami. Pele tulakonzya kuzumanana kuba bantu bakkomene kuti na twazumanana kusyoma muli Jehova Leza alimwi a Jesu Kristo, balo ibapa kuti mulimo wesu kuukatalusya alimwi kaulaampindu.—Mt. 11:28-30; 1 Joh. 5:3.
8 Ino kaka tulaacoolwe cipati kuba bantu bajisi kasimpe! Akaambo kakulyaaba kwesu kuli Jehova, twaba bantu “[iba]syomenwa milimo ya-Makani Mabotu.” (1 Tes. 2:4) Eci citupa kuti tube aamikuli mipati minji. Jesu wakaamba kuti: “Nkaambo muntu uupegwa kunji, kuyoolangilwa kunji kuzwa kulinguwe.”—Luka 12:48b, Ci.
9 Ma! Aayo majwi ngamasimpe kapati. Mbwaanga toonse tulilongezedwe mukubaa luzibo lwa Jwi lya Leza, iluyanzano lwabunyina ilukkomanisya, alimwi abulangizi bubotu, cilakonzeka kwaambwa cakululama kuti tulipedwe kunji. Aboobo, kunji kulalangilwa kuzwa kulindiswe.
10 Amuzumanane Kuzilanga Munzila Yeelede Zintu Nzyotupedwe Kucita: Bamwi bayeeya kuti zyavwulisya zintu zilangilwa kulindiswe. Mbwali Mutwe wambungano ya Bunakristo, Jesu Kristo nguusala akweendelezya zintu ‘zyoonse nzyoibambilidwe’ kutegwa ibeleke kabotu. (Ef. 4:15, 16) Ulatusyomezya kuti ‘ijokwe lyakwe lilibulungusene, awalo mukuli wakwe muuba.’ (Mt. 11:28-30) Kwiinda muluyando, talangilili bantu kucita zintu kwiinda mpobagolela. (Lk. 21:1-4) Ikuti naa twacita mpotugolela, kunyina makani akuvwula kwamulimo ngotwacita, tuyakulongezegwa.—Kol. 3:23, 24.
11 Amulibuzye nobeni kuti, ‘Sena ziyandika zya Bwami ndizibikkide acibeela citaanzi mubuumi bwangu? Sena ndilimukubelesya ciindi cangu ambono zyangu munzila iileta ntembauzyo kuzina lya Leza alimwi akukugwasya bamwi? Sena ndijana kuti kukkomana kwangu kupati kuzwa mukubelekela Jehova muciindi cakubaa zintu zinji zyakumubili?’ Ibwiinguzi bwesu bwamoyo woonse kumibuzyo eeyi butondezya zintu zili mumyoyo yesu.—Lk. 6:45.
12 Amukweelebe Ikusunkwa Kucita Cintu Cibi: Taakwe notwalina sunkwa akwaatikizigwa amuuya wakuliyanda, bulyatu, akuyandisya kulikondelezya. Buzubaa buzuba tubona bukkale butaluzi ibutusunka kutola nzila eyo. Ikutegwa tuzunde masunko ayo, tweelede kumulomba Jehova kuti atugwasye. (Mt. 26:41) Kwiinda mumuuya wakwe, ulakonzya kutuyumya. (Is. 40:29) Ikubala Jwi lya Leza buzubaa buzuba cilagwasya kapati. (Int. 1:2, 3) Ikulilemeka akulyeendelezya azyalo ezi zilabeleka kapati.—1 Kor. 9:27.
13 Tacizyulide ikuyanda buyo kucita ziluleme—pele alimwi tweelede kusulaika bubi. (Int. 97:10) Eci caamba kutalombozya zintu zibyaabi. Tusimpi 6:16-19 tupa mulongo wazintu izili ciloba Jehova nzyasulaika akusesemwa kulinzizyo. Cakutadooneka, muntu uuyanda kukkomanisya Jehova weelede kuzisulaika zintu zili boobo awalo. Mbwaanga tulilongezedwe aluzibo lwini-lwini lwa kasimpe, tweelede kucita zintu kweelena aluzibo olo, kucita myoyo kuti iicite zintu zibotu.
14 Cilayandika kupailila bukkale bukonzya kutugwasya kutegwa tukonzye kubaa zyakucita zinji “lyoonse kumilimo ya-Mwami.” Ibantu banji bajana kuti ikujata bubi lyoonse mumulimo wa Jehova ncikwabililo nkaambo kubacitya kuti batajani ciindi cakucita zintu zinyina mpindu.
15 Kweelana azyoonse zyalangwa, Jehova ncayanda kulindiswe cilatobeleka. (Mik. 6:8) Tujisi twaambo tunji twakukkomanina mukuli wamulimo woonse. (Ef. 5:20) Aboobo, tulazumanana “[k]ubeleka canguzu akulwanina,” kumwi katusinizizye kuti bulumbu bwesu bunikuli bupati kapati kwiinda cintu cili coonse ncituyandika kucita.—1 Timo. 4:10, Ci.