‘Ilugwasyo Muciindi Ncotubula’
1 Ino cilakatalusya kaka ikutambula lugwasyo ciindi noluyandika! (Heb. 4:16) Kumuswaangano Wacooko mwakali wa “Batumwa Baluumuno Lwa Bunaleza,” twakakkomana ciindi notwakatambula zibelesyo zilibedelede zigwasya aciindi cini mpozyeelede.
2 Ibbuku litegwa, Inzila Yakujana Lukkomano Mumukwasyi, lyakazwa aciindi ceelede. Libandika azintu zyone izisumpula buumi bwamumukwasyi bwalukkomano: (1) Ikulyeendelezya, (2) ikuzyiba busilutwe ncobwaamba, (3) ikumvwana kubotu mukukanana, alimwi a (4) luyando. Ilulayo luli mubbuku eli lya Lukkomano Mumukwasyi luya kugwasya mikwasyi yoonse iilubelesya kujana luumuno lwabunaleza. Amujane ciindi cakulibala bbuku eli cakusitikila alimwi akuliiya antoomwe amukwasyi wanu woonse na tamuna kucita obo. Amuzizibe kabotu zintu zikananwa mulindilyo kutegwa mulibambilile limwi kulibelesya cakuzwidilila lyaakumwaigwa kubuleya mumweezi wa September.
3 Ibroshuwa yakuti, Ncinzi Leza Ncayanda Kulindiswe?, ayalo yapegwa aciindi ceelede kuti igwasye kufwambya mulimo wesu wakugwasya bantu kuti babe basiciiya. Nokuba kuti inga mwaibelesya kapati kugwasya bantu ibatacizyi kapati kubala, ibunji bwabapati bayiide abana basyoonto abalo balakonzya kugwasyigwa kwiinda mubupanduluzi bwayo butakatazyi bwa ziiyo zipati-pati zyamu Bbaibbele. Ilakonzya kiili ncecintu ciyandika kutalisya ciiyo cisololela kubbuku lya Luzibo. Eeci cibelesyo ciya kugwasya bantu banji bambi kubona mbobanga balalelekwa kwiinda mukucita zintu nzyayanda Leza.
4 Davida wakakwaamba kabotu kaka kulimvwa kwesu nkotujisi ciindi naakaamba kuti ‘tanaakabula cintu, moyo wakwe wakabukulusigwa, alimwi ankomeki yakwe yakafwasuka!’ (Int. 23:1, 3, 5) Kumwi katukkomene tulangila kumwaya lugwasyo olu lubotu loko lwakumuuya kubanabunji bambi balo ibayandisya kuzyiba akubelekela Leza wakasimpe, Jehova.