Ikumwaya Bbuku Kubantu lya Inzila Yakujana Lukkomano Mumukwasyi
1 Mukwasyi nceciinga cipati mubukkale bwabantu, alimwi mumukwasyi momuzwa minzi, madolopo, zyooko alimwi azisi zyoonse mbozizulwa. Sunu ciinga camukwasyi cili mumapenzi mapati kwiinda lyoonse. Kuli zintu zikatazya izili mukucitika izinyonyoona bukkale bwamukwasyi. Tatulilumbili kuti Jehova Sikwaanza bubambe bwamukwasyi wapa malailile aakutugwasya kujana lukkomano mumukwasyi! Aabo batobela malailile aakwe mumukwasyi wabo bajana kuti mapenzi alaceya alimwi balazwidilila. Mumwezi wa September tulijisi coolwe cakumwaya bbuku kubantu lya Inzila Yakujana Lukkomano Mumukwasyi. Amubasikile bantu amakani aajatikizya buumi bwamukwasyi. Amubasikile amuuya wakusamausya, wakutadooneka, alimwi amubelesye bupampu. Ino makani aanu mulaatalika buti?
2 Mulakonzya mwatalika kwiinda mukubuzya mubuzyo wakuti:
◼ “Tee mulibwene kuti mumikwasyi minji ciyabuyumina limwi kulwana mapenzi aabuumi? [Amulindile kwiingula.] Kuli mpuwo yakuti bantu banji balapenga mumaanda. Ncinzi ncomuyeeya kuti inga cagwasya mikwasyi kukkalikila akukkomana kapati kwiinda mboibede ino? [Amulindile kwiingula.] Mbwaanga Leza nguwakatalisya bubambe bwamukwasyi, sena inga tacikoobota kulanga malailile ngaapa? [Amubale 2 Timoteo 3:16, 17.] Aaya malailile aagwasya alilembedwe mubbuku eli lyakuti Inzila Yakujana Lukkomano Mumukwasyi.” Mpoonya amumubuzye muntu oyo amwaambile penzi ndyayeeya kuti ndelikatazya mikwasyi, amutondezye cibalo icibandika penzi elyo, mwamana mulombe kusiya bbuku.
3 Nomucita lweendo lwakupilukila, mulakonzya mwakanza kuyootalisya ciiyo ca Bbaibbele kwiinda mukwaamba kuti:
◼ “Ndakaayeeya makani aanu ngomwakaamba aajatikizya bukkale bwamukwasyi, elyo ndamuletela cintu cimwi ncondiyeeya kuti inga camukonda. [Amutondezye broshuwa ya Ncayanda, amuvwunune kupeeji 16, mubale mibuzyo yaatala iili cisambomwi.] Aino muntu umwi aumwi wamumukwasyi weelede kucita mulimo wakwe kugwasilizya kuleta lukkomano mumukwasyi. Ikuti naa mwandipa buyo ciindi cisyoonto ndamutondezya makani aya mbwaanga amugwasya.” Mpoonya amutalike kwiiya ciiyo 8.
4 Inzila imbi yakutalisya mubandi njakwaamba penzi limwi, ambweni inga mwaamba kuti:
◼ “Nokuba kuti bantu boonse bayanda kukkala kabotu cakuliiba, kuboneka kuti mikwasyi minji teeyazwidilila kucita boobo. Ncinzi ncomuyeeya kuti inga cabagwasya kujana lukkomano lwini-lwini? [Amulindile kwiingula.] Ikale-kale Ibbaibbele lyakaamba mapenzi ngotubona mumikwasyi sunu. [Amubale 2 Timoteo 3:1-3.] Pele Bbaibbele alimwi lilailila mikwasyi mboinga yamana mapenzi aya akujana lukkomano lutamani. Injiisyo zyalyo zililembedwe mubbuku eli, lya Inzila Yakujana Lukkomano Mumukwasyi.” Mpoonya amutondezye kabbokesi kakwiinduluka kali kumamanino aacibalo ncomubandika, amubale kabbokesi aka, mwamana mulombe kusiya bbuku.
5 Nomwapilukila, amubelesye broshuwa ya “Ncayanda” kutalisya ciiyo. Mulakonzya mwaamba kuti:
◼ “Cakandikonda kapati kubona kuti mulayanda kulanga-langa njiisyo zya Bbaibbele izijatikizya bukkale bwamumukwasyi. Izicitika mubuumi zitondezya kuti impindu zipati izijanwa zilajanwa kwiinda mukutobela lulayo lugwasya lwamu Bbaibbele. Mboobu bupanduluzi busyoonto bwazintu ncozili boobu.” Amubale muncali wakusaanguna waciiyo 1 mubroshuwa lya Ncayanda, kubikkilizyaa lugwalo lwa Intembauzyo 1:1-3 naa Isaya 48:17, 18. Ikuti naa kakucili ciindi, amubale cibalo ciceede. Amubalombe kumuzumizya kupilukila kuzooyiya ciiyo citobela antoomwe.
6 Ibbuku lya Lukkomano Mumukwasyi lilakonzya kumwaigwa ciindi nomucita bumboni bwamukwiizya nomulaamulimo, nomuli kucikolo, mupaaki, naa mubbaasi, kubikkilizya aciindi nomuswaya basazinyoko. Mubandi wanu nomwapiluka weelede kugwasya muntu kubona ciiyo ca Bbaibbele mbocinga cayumya lukamantano lwamukwasyi. Iziiyo zilakonzya kucitwa mubroshuwa lya Ncinzi Leza Ncayanda Kulindiswe?, acicitwe amuzeezo wakunjila mubbuku lya Luzibo, naa ambweni mulakonzya kutalisya ciiyo mubbuku ndyoonya lya Luzibo.
7 Basikulaya banyika tabakonzyi kutondezya mikwasyi nzila yakujana lukkomano, pele baliisiya kiityompedwe. Atusole mbuli mbotukonzya kugwasya bantu kwiiya nzila yakujana lukkomano mumukwasyi—katutobela malailile aali mu Jwi lya Leza.—Int. 19:7-10.