Ibbuku lya Lukkomano Mumukwasyi Amulimwaye Kubantu Baziimo Zyoonse
1 Imwana musankwa wamyaka iisika ku 11 yakuzyalwa waku California wakaamba mbwalumba kubaa bbuku lya Inzila Yakujana Lukkomano Mumukwasyi. Wakalemba kuti: “Ndalumba kubaa bbuku eli alimwi ndikulwaizya mikwasyi iimbi kulibala nkaambo ndibbotu kapati. Alimwi lili mukugwasya mukwasyi okwesu kujana luumuno alukkomano muŋanda yesu.” Eeci cakacitika kumwana oyu ceelede kutukulwaizya kumwaya bbuku lya Lukkomano Mumukwasyi kubantu baziimo zyoonse. Nzeezi nzila zisyoonto nzyomunga mwasoleka mumulimo wanu mu February.
2 Nomuswaanganya mukubusi, inga mwaamba kuti:
◼ “Ibanji baciimo cako bayeeya zyalukwatano. Ino nkuukuli nkotunga twajana malailile aagwasya mumakani aya? [Amulindile kwiingula.] Ibana baniini kanjikanji baamba kuti tabazi naa balilibambilide kukwata naa kukwatwa. Atumvwe ncolyaamba bbuku kujatikizya makani ayo.” Amuvwunune kupeeji 14 mubbuku lya Lukkomano Mumukwasyi, mubale muncali 3. Mpoonya mutondezye katwe kamwi akamwi kamakani mucibalo. Amumupe bbuku akupangana nomutikapilukile.
3 Nomubandikaa muzyali inga mwaamba kuti:
◼ “Tukananaa bazyali makani aajatikizya malailile aagwasya aambokukomezegwa bana. Aaya malailile alilembedwe mubbuku eli lya Inzila Yakujana Lukkomano Mumukwasyi.” Amuvwunune kupeeji 55. Amubale muncali 10 mpoonya mubale Deuteronomo 6:6, 7 mumuncali 11. Mwamana mumutondezye twaambo tusendekedwe mumincali 12 kusikila ku 16. Amuzumanane akwaamba kuti: “Eli bbuku lyabagwasya bazyali banji kuzwidilila kapati. Ikuti kamuyanda kulibala inga ndamusiila bbuku eli.” Amwaambe muulo walyo.
4 Nomwaambaulaa muntu mupati, inga mwaamba kuti:
◼ “Ndamanaa kubala makani aaya mafwaafwi, ndilomba kuti mundaambile ncomuyeeya.” Amuvwunune bbuku lya Lukkomano Mumukwasyi kupeeji 169, mubale twaambo tobile twakusaanguna twamumuncali 17. Mwamana inga mwamulomba kuti aingule. Ikweelana ambwanga waingula inga mwabala zimbi zibeela mubbuku kamutana musiila.
5 Nomupilukila nkomwakasiya bbuku lya Lukkomano Mumukwasyi, amube aamuzeezo wakutalisya ciiyo ca Bbaibbele. Iciiyo 8 mubroshuwa ya Ncayanda naa cibalo 15 mubbuku lya Luzibo inga ceelela kutalikila mpawo. Icaino, atusole kapati kugwasya bantu baziimo zyoonse kubaa bukkale bwamukwasyi bwa Bunakristo bukkomanisya.