Ikwaambilizya Makani Mabotu—Kubelesya Ibbuku Lyangu Lyamakani Aa-Bbaibbele
1 “ELI ndibbuku lyamakani aamasimpe. Agwisigwa kuzwa mubbuku lipati kwiinda munyika, Ibbaibbele. Makani alamupandulwida zyakale zyanyika kuzwa ciindi Leza naakatalika kulenga mane kusikila mubuzuba bwesu. Alaamba alimwi azyazisyomezyo Leza nzyayoocita kumbele. Ibbuku elino lilamupa muzeezo wambuli mbolibede Bbaibbele. Lilatwaambila zyabantu bamu-Bbaibbele azintu nzyobakacita. Alimwi lilatondezya zyabulangizi bubotu kapati bwabuumi butamani munyika ya-paradaiso eyo Leza njaapa kubantu.”
2 Obo mbolitalika Ibbuku Lyangu Lyamakani Aa-Bbaibbele. Imakani alaambwa mumulaka muuba-uba. Ibana banji bayookonzya kulibalila lwabo beni. Ibazyali bayoojana kuti bana babo baniini banooyanda kuti kabainduludwa-induludwa kubalilwa makani aaya. Bayoojana kuti eli bbuku lilabakkomanisya bana abapati. Tuyoosola kugwasya bantu mu December kwiinda mukumwaya bbuku litegwa Ibbuku Lyangu Lyamakani Aa-Bbaibbele. Aino ikwiide kusiya mabbuku kumuntu tacili cisinizyo cakuti uyootambula busolozi bwa Leza. Tweelede kucita nyendo zyakupilukila katukanzide kutalika ciiyo ca Bbaibbele. Ilugwasyo lulisyomezyedwe kuti naa twasolekesya. (Mt. 28:19,20) Zyeezi nzila zimwi nzyotunga twabelesya:
3 Mbwaanga banji balijatikizidwe kukufwidwa bayandwa, mulakonzya kuyanda kubandika makani aajatikizya ciimo ca bafwide alimwi abulangizi bwa kubusigwa kubelesya Intembauzyo 146:4, 5 a Makani 92 mubbuku lya “Makani Aa-Bbaibbele.” Mulakonzya kutalika munzila eyi:
“Hodi kuno. Mbwaanga aakkedwe mpamwi ndakkomana kumuletela makani mabotu. Toonse twakasowekelwa kale mulongweesu naa wamukowa kwiinda mulufu. Ambweni mulalibuzya kuti ncinzi cicitika kulimbabo. [Amulindile ambweni ulaacakwaamba.] Ijwi lya Leza lilatupa bulangizi ku Intembauzyo 146:4, 5. [Amubale.] Elo ulaa luzyalo kaka Leza nkaambo wapa bulangizi kuli baabo bafwide akulindiswe notucipona. Eeci cifwanikiso [amujule ku Makani 92] citondezya kubusya nkwaakacita Kristo Jesu kutali buyo akaambo ka mwana musimbi pele akuti bakkomane bazyali bakwe. Amuyeeye buyo bazyali bakwe mbobakakkomana. Pele oyu taakali ngomuntu alikke ngwaakabusya Jesu. Imuncali wamamanino mumakani aaya utondezya kuti wakabusya amwana wa mukamufu alimwi amulongwe wakwe Lazaro. Alimwi amulange makani mabotu aambidwe mumilaini yobile yamamanino. [Amubale.] Eli bbuku libambilidwe bana abapati ikutugwasya toonse kubona luyando alimwi akulanganya Leza nkwatucitila.” Amusoleke kubasiila bbuku.
4 Mwapilukila kumuntu ngomwakasiila bbuku lya “Makani Aa-Bbaibbele” mulakonzya kwaamba kuti:
“Ciindi cakamana notwakabandika twakamvwana kuti toonse twakasowekelwa kale mulogweesu naa wamukowa kwiinda mulufu. Alimwi twakabandika aluzyalo lwa Leza akaambo kakupa bulangizi kulibaabo bafwide andiswe notucipona. Pesi lino ndaboola kuti ndimutondezye kuti Ibbaibbele lilitubikkilide bulangizi bwanyika iilikabotu kumbele. [Amubale Ciyubunuzyo 21:3, 4.] Ikuziba kuti eli ndi Jwi lya Leza kweelede kutukulwaizya kuti tulange azimbi zyaambwa mu Bbaibbele.” Amujule bbuku lya Makani Aa-Bbaibbele cibalo 115 mincali 2-4. Amubakulwaizye kubaa ciiyo ca Bbaibbele cakutabbadala.
5 Ambweni inga mwayanda kubelesya nzila eyi:
“Masimpe kuli bukkale bumwi buliko sunu bwalo butupa kuti katulibilika kujatikizya ciindi cakumbele, sena tabusi? [Amupe ciindi cakwiingula akupa zikozyanyo.] Sena muyeeya kuti bukkale kuli nobuyakubota akuti bantu bakapone anyika muluumuno alimwi kabaliibide? [Amulindile kwiingula.] Amubone cisyomezyo ca zintu zibotu zitondezyedwe mu Bbaibbele ku 2 Petro 3:13. [Amubale, mpoona amubandike.] Leza usyomezya ‘nyika mpya.’ Muyeeya kuti Leza waamba nzi naamba ‘nyika mpya’? Sena caamba kuti uyakulenga imbi pulaneti, insi mpya kunsi aamaulu eesu, akwiita kuti ‘nyika mpya’? Sena tuyandika nsi mpya, malundu, matangaziba alimwi azisamu? Amulange kapango kaamba kuti “momukala bululami” mu ‘nyika mpya.’ Ibululami nciimo ceelede kutondezyegwa abantu bacita zintu ziluleme eelyo ‘nyika mpya’ yaamba bantu bapya naa baluleme ibayookkala muluumuno alukamantano abasimukobonyina. Masimpe tatuyandiki nsi mpya pe. Tuyanda bantu basandukide.” Ikuti kamuyanda buyo nzila nguba-uba, mubandi wa lugwalo lomwe mulakonzya kumanizya awa akujula ku Makani 115 mu Ibbuku Lyangu Lyamakani Aa-Bbaibbele akulanga-langa cifwanikiso citondezya mbobuyooba bukkale mu “nyika mpya.” Amusoleke kulisiya bbuku.
6 Nomwajokela kuli siŋanda wakabweza bbuku lya “Makani Aa-Bbaibbele” mulakonzya kutalika munzila yakuti:
“Ndakakkomana kumumvwa kwaamba mbomubikkila maanu kujatikizya mbomukonzya kukkala kukabe kutamani antoomwe abana banu. Amuyeeye kuti ndakamutondezya lugwalo lwamu Bbaibbele lwakatwaambila ncotweelede kucita kuti kakubee tuyanda kupona kukabe kutamani. [Amubale Ciyubunuzyo 21: 3, 4.] Ibbuku ndindakamusiila lilasinizya kuti nzinji nzyotweelede kucita kutegwa tukabe abuumi butamani. Amubone ziyandika. [Amubale mincali 5-6 Cibalo 116.] Ikuti kamuyanda inga ndakkomana kunooyiya Bbaibbele andinywe cakutabbedela.” Ikuti naa wazumina kwiiya amumvwane kuyoobelesya bbuku lya Luzibo.
7 Inga mwatalika buti mubandi kubelesya bbuku lya “Makani Aa-Bbaibbele”? Mulakonzya kubuzya kuti:
“Sena muyeeya kuti anyika kuli niibuyooba busena bwalukkomano alimwi ibwaluumuno bwakukkala?” Amujule ku makani 71 akwaamba twaambo tupati-pati tuli ku Isaya 11:6-9 naa Ciyubunuzyo 21:3, 4. Naa mulakonzya kubuzya mubuzyo oyu: “Sena cilamuyumina kupandulula Bbaibbele kubana banu? Naa mbombuboobo, eeli bbuku lilakonzya kumugwasya. Andimutondezye mbolinga lyamugwasya kupandulula ncowaamba mupailo wa Mwami.” Amwiindulule twaambo tupati-pati tuli ku makani 91.
8 Ikuti naa nomwakasaanguna mwakabandika ncowaamba mupailo wa Mwami, mulakonzya kuzumanana mubandi wanu mwapilukila akwaamba kuti:
“Notwakaswaangana lwakusaanguna twakamvwana kuti Jesu wakayiisya bantu kujatikizya Bwami alimwi akuti tweelede kucitila bantu bambi luzyalo. Ikujatikizya makani aya ndisyoma kuti mulaakkomanina makani aamamanino aalembedwe mubbuku ndindakamusiila. [Amubale muncali wamamanino mu Cibalo 116 mubbuku Lyamakani Aa-Bbaibbele.] Lino ndamukulwaizya kubaa ciiyo ca Bbaibbele caaŋanda cakutabbadela, alimwi ndililibambilide kumutondezya mbotucita lino awa.”
9 Jehova uyoolongezya kusoleka kwesu mbotuyaa bugwasya bapati abana ikubona mboliyandika Jwi lya Leza ambolitusololela mubuumi bwesu.—Int. 119: 105.