Amukambauke Kufwumbwa Kuli Bantu
1 Akaambo kakuziba mulimo wakabeleka muuya wa Leza mumulimo wakwe, imwaapostolo Paulo wakati: “Leza nguwakamenya.” Alimwi wakazuminizya kuti: “Tuli basimilimonyina Leza.” (1 Kor. 3:5-9) Eci ncoolwe cipati kapati. Mbuti mbotunga twatondezya caantangalala kuti tulalumba kuba basimilimonyina Leza? Nkwiinda mukwaambilizya makani mabotu kuli boonse mbotuswaanganya mumulimo wakuŋanda aŋanda akumwi-kumwi koonse.
2 Tulailidwe ‘kubaiisya bantu bamisyobo yoonse.’ (Mt. 28:19) Ikuti naa twaambaula buyo abantu basyoonto notutola lubazu mumulimo, tulakonzya kutyompwa kufwambaana alimwi akulimvwa kuti taakwe ncotwabeleka pe. Pele, tulakkomana mumulimo wesu ciindi notucikonzya kujana bantu banji akubandika ambabo. Eci cilakonzya kuyuma nkaambo inga caamba kuti tubelesye maanu ikuunka kuli koonse kuli bantu kutegwa tukonzye kubandika ambabo.
3 Izikonzyanyo Zigwasya: Tulakonzya kukambauka kubantu bali mumisyika, mumapaaki, mulyookezyegwa alimwi amukkwelelwa zyeendelo. Iciindi nomubelesya zyeendelo zyabuleya, sena inga muli libambilide kupa bumboni nomuyaabuya? Bakamboni bobile ibakakkwelede bbaasi lyakazwide kapati ciindi nobakali kuya kumuswaangano wamulimo wamumuunda, bakatalika mubandi kujatikizya cifwanikiso ca Paradaiso icili mubbuku lya Luzibo, kababandika zisyomezyo zyakumbele zya Leza. Mbubwena mbobakali kuyeeya, imusankwa wakaimvwi munsi lyabo wakali kuswiilila elyo cakamukonda ncaakateelela. Kabatanazwa mubbaasi, wakazumina kubweza bbuku alimwi wakalomba kuti umwi akamuswaye kuŋanda yakwe.
4 Basikumwaya banji balakkomana ikucita bukambausi bwamukwiizya. Umwi mucizyi wakaunka kumantoolo kumazuba elyo wakali kubandika abantu bakamanide kuula-ula pele batakabindide pe. Wakamwaya mabbuku oonse ngaakajisi mubbeeke lyakwe. Umwi mwaalumi wakakkede mumootokala wakwe wakakkomana kapati kutambula mamagazini kuzwa kuli nguwe. Wakali janikide kumiswaangano cimwi ciindi musule elyo mubandi wabo wakabukulusya kuyandisisya kwakwe.
5 Ncoolwe kusumpula zina lya Jehova. Kwiinda mukutondezya busungu bwesu kumulimo wakukambauka, tutondezya kuti luzyalo lwa Leza taluli lwabuyo kujatikizya ndiswe. Akaambo kakuti “lino [nce]ciindi ceelede nkukuti sunu,” ikugwasya bamwi, atuunke kufwumbwa kuli bantu akupa bumboni kuli mbabo kujatikizya “buzuba bwalufutuko” bwa Jehova.—2 Kor. 6:1, 2.