Sena Tuyoocita Obo Alimwi? Ikulomba ba Painiya Bakugwasilizya Alimwi
1 Ikucita nzi alimwi? Sena tuyoocita bupainiya bwakugwasilizya muciindi eci ca Ciibalusyo? Ipepa lyamukati lya Mulimo Wesu Wabwami wa February 1997 lyakatukwelelezya amutwe wakuti: “Kulayandika Bapainiya Bakugwasilizya Ibali 6,000.” Twakalaa lusyomo lwakuti muyookutobela kulomba oko. Ilipooti yamulimo ya March 1997 noyakabikkwa antoomwe twakakkomana kubona kuti ibali 6,414 mbabakalilembya mumulimo wabupainiya bwakugwasilizya! Ikuti naa oyo mweelwe twausanganizya kuli wabapainiya baciindi coonse ibali 6,990 alimwi awabapainiya baalubazu ibali 117 balo bakatumizya malipooti abo mumwezi oyo tujana kuti ikutandila ku 16 pasenti yabasikumwaya boonse bakali kucita mulimo wabupainiya. Sena tuyoocita obo alimwi muciindi eci ca Ciibalusyo?
2 Twamulumbaizya nyoonse nywebo nomwakasolekesya ikuyungizya mulimo wenu wamumuunda mwakali. Cakutadooneka, inywebo nyoonse mwakakulwaizigwaa luyando ndomujisi kuli Jehova Leza alimwi akubeenzinyoko. (Lk. 10:27; 2 Pet. 1:5-8) Basikumwaya ibalaa bukkale bwandeene-andeene mubuumi bakajana ciindi cakucita mulimo wabupainiya bwakugwasilizya. Mumbungano imwi, basikumwaya ibali 51 bakacita mulimo wabupainiya antoomwe mumwezi omwe, kubikkilizya abunji bwabaalu, imutumbu umwi wakajisi mwana musimbi wamyezi iili 15, imucizi umwi wakaleka mulimo wakwe akujana wakugwaza ikutegwa ajane ciindi cakucita bupainiya alimwi amucizi umwi mupati watakainacitide bupainya. Imulangizi wabbazu wakalemba kuti: “Ikusolekesya mumulimo wakukambauka kuyaambele. . . . Eci tacilibonyi buyo mubusena bubelekelwa pele imbungano zilisungweede kapati. Ibakwesu balakkomana kuzibana alimwi akubona mpindu zijanika mumulimo.”
3 Ibana abalo bakatola lubazu mwaka wakamana kuciindi caciibalusyo. Sikumwaya uutabbapatizidwe wamyaka iili 13 wakali kucilangila kapati ciindi naakali kunga watondezya kulyaaba kwakwe kuli Jehova. Naakabbapatizigwa mu February, wakalemba mbuli mbwaakali kulombozya kucita mulimo wabupainiya bwakugwasilizya mu March ategwa: “Kakunyina acakali kundisinkilila lino, ndilyonya ndakalembela. . . . Izyakuluula zinji zibotu nzyotwakajana nozyatakacitika kuti nokwatakali kwiita kwanu kwaluyando kuti tucite bupainiya. Ndamulumba kapati Jehova walo wakapa kuti ndibe acoolwe eci cakuba akati [kazyuulu] ibakatola lubazu.” Oyu mucizi ulikanzide kuyoocita obo alimwi.
4 Ambweni mwakali akati kabaabo ibakatola lubazu mumulimo wabupainiya bwakugwasilizya ibali 6,414 mu March naa ibali 6,532 mu April naa ibali 7,695 mu May. Sena muyoocita obo alimwi uno mwaka? Ikuti naa teemwakakonzya kucita mulimo wabupainiya ciindi caciibalusyo mwakali, sena inga mwacita obo uno mwaka? Sena tuyoowiinda mweelwe uuli 7,695, iwabaabo bakacita mulimo wabupainiya bwakugwasilizya mu 1997? Oyo ngowakali mweelwe wiinda kukomena wabapainiya bakugwasilizya mumwezi omwe buyo mu Zambia.
5 Amubikkile Maanu Kumwezi wa April a May: Uno mwaka, Iciibalusyo ciyooba mu Mujibelo mu April 11, calo cipa kuti April ube mwezi mubotu wakuyungizya mulimo mubukambausi. (2 Kor. 5:14, 15) Mumazuba aali 11 aakusaanguna mumwezi tuyoobikkila maanu ikutamba baabo bayanda kwiiya kuti bakajanike ku Ciibalusyo. Ikuti naa mukanza kuyoocita bupainiya bwakugwasilizya, amukatole foomu yanu yakulomba kucita boobo ibuzuba kabucili kulamfwu mbomuyanda kuyootalika.—1 Kor. 14:40.
6 Mbwaanga May ulaansondo zyosanwe, basikumwaya bacili kucikolo naa abo babeleka mulimo wakumubili balakonzya kuubaubilwa kucita bupainiya bwakugwasilizya mumwezi oyo. Ikwiinda mukulipimina mawoola aali kkumi mumulimo wamumuunda kumamanino aansondo yomwe-yomwe munsondo ezi zyosanwe, mulakonzya kuyandika kuyungizya mawoola aali kkumi buyo mumwezi oyo kutegwa musike amawoola aayandika aali 60.
7 Mumyezi yoonse yobile wa April awa May tunoolembya Ngazi Yamulindizi. Imagazini yomwe-yomwe ilakonzya kumwaigwa awo mpokwatatambulwa kulembya. Eci ceelede kukulwaizya bunji bwesu ikusola kucita bupainiya. Nkaambo nzi ncotwaambila boobo? Imamagazini taakatazyi pe kumwaya alimwi cilakondelezya kwaabelesya mumulimo. Alakonzya kubelesyegwa muzibeela zyoonse zyamulimo—mumulimo wakuŋanda aŋanda alimwi akucintoolo acintoolo antoomwe anotusikila bantu mumugwagwa, mumasena musiigwa myootokala alimwi amumapaaki amumasena aamwi buyo. Kunze lyaboobo, Ngazi Yamulindizi alimwi a Galamukani! zilakasumpula kapati kasimpe ka Bwami. Abandika kuzuzikizigwa kwabusinsimi bwa Bbaibbele, ikusinizya kuti Bwami bwa Leza bulalela. Alimwi alaajatikizya maumi aabasikubala kwiinda mukubandika zintu nzyobayandika ncobeni. Ikuti naa twayeeya mamagazini aya mbwaajatikizya maumi eesu, tuyookulwaizigwa kutondezya busungu bwesu twanoomwaya kulembya kwa Ngazi Yamulindizi mu April amu May.
8 Abo balembya naa kubweza magazini yomwe-yomwe balakonzya kwiiya zinji kujatikizya Jehova alimwi kulalangilwa kuti abalo bayoobaa coolwe cakuyumuna zina lya Jehova. (Rom. 10:13) Ikulibambila mulimo oyu wamamagazini muyoogwasigwa kwiinda mukulanga-langa zibalo ezi: “Ngazi Yamulindizi a Galamukani!—Mamagazini Aaciindi Ceelede aa Kasimpe” (Ngazi Yamulindizi, January 1, 1994), “Amwaabelesye Kabotu Mamagazini Eesu” (September 1995 Mulimo Wesu Wabwami), alimwi acakuti “Amulibambile Nzila Yanu Njomunga Mwabelesya Kumwaya Mamagazini” (October 1996 Mulimo Wesu Wabwami).
9 Ibaalu Basololela: Ikutegwa bagwasilile basikumwaya banji ibakali kucita bupainiya mwakali, ibaalu bamumbungano imwi bakasala buzuba bomwe bwa Mujibelo mumwezi kuti mbuzuba bwaalubazu ibwamulimo wamumuunda kumbungano yoonse. Ibubambe bwakacitwa bwakuti kube kuswaangana aziindi zyaandeene-andeene zili mbozibede mubuzuba bomwe, ikugwasya boonse mumbungano kuti bajane coolwe cakutola lubazu munzila zinjaanji zyabukambausi. Ezi zyakalikubikkilizya kubelekela mumasena aamakwebo, kukambauka mumugwagwa, kuŋanda aŋanda, kucita nyendo zyakupilukila, kulemba magwalo alimwi akukambauka kwiinda muluwaile. Icakacitika cakali kugambya, basikumwaya ibali 117 mbobakatola lubazu mumulimo wamumuunda buzuba boonse obo. Bakabeleka mawoola aali 521 mumulimo alimwi bakamwaya mamagazini, mabroshuwa alimwi amabbuku aali 617! Ikukkomana kwa mu Mujibelo kwakazumanana amu Nsondo lyalo nokwakajanika mweelwe uutalivwulili wabantu ku Muswaangano Wabuleya alimwi a Ciiyo ca Ngazi Yamulindizi.
10 Kumuswangaano omwe-omwe wa Mulimo mu April alimwi amu May, imbungano yeelede kuyeekezyegwa kuti naa ndilili alimwi nkuli ikunoobeda miswaangano yamulimo munsondo iitobela, ikapati kuti naa kwacitwa bubambe bumbi kunze lyaboobo buliko lyoonse. Ibapainiya baciindi coonse antoomwe abasikumwaya ibatali bapainiya bakugwasilizya bakulwaizigwa kugwasilizya bubambe obu bwamutukamu kufwumbwa kuti kacikonzyeka.
11 Imulangizi wamulimo weelede kubonanaa mukwesu uupa masena aakubelekela ikutegwa bakacite bubambe bwakubelekela muliyaayo aatabelekwi-belekwi. Ikweelede kubikkilwa maanu kapati nkuubantu batajaniki aŋanda alimwi akukambauka mumigwagwa alimwi akucintoolo acintoolo. Ikukambauka kwakumangolezya kulakonzya kukankaizigwa. Mweelede kubaa mamagazini manji aakubelesya mumulimo.
12 Basikumwaya Banji Balakonzya Kweelela: Ikaambo kakusaanguna afoomu yakulombela kuba mupainiya wakugwasilizya kaamba kuti: “Akaambo kaluyando ndondijisi kuli Jehova alimwi akulombozya kwangu kwakuti ndigwasye bamwi kwiiya zyanguwe alimwi amakanze aakwe, ndiyanda kuyungizya lubazu ndonditola mumulimo wamumuunda kwiinda mukulilembya bupainiya bwakugwasilizya.” Ikuyanda Jehova akulombozya kugwasya bamwi munzila yakumuuya nzintu zyakusaanguna mukulyaaba kwesu. (1 Tim. 4:8, 10) Ikutegwa muntu ayelele bupainiya bwakugwasilizya, weelede kuti kabbapatizidwe, kali muntu uulilemeka kabotu alimwi kalibambilide kubeleka mawoola aali 60 mumulimo amwezi. Toonse twabulanga-langa bukkale bwesu, sena swebo tobamwi notutanacitide bupainiya tatukonzyi kucita obo uno mwaka mu April naa mu May?
13 Ibanji mumbungano bayooziba kuti abalo balakonzya kucita bupainiya baakubona bamwi ibalaa bukkale mbuli bwabo balilembya. Ibana basicikolo, ibapati, abo babeleka mulimo wakumubili kubikkilizyaa baalu alimwi abakutausi antoomwe abamwi-bamwi bacita bupainiya bwakugwasilizya akuzwidilila. Umwi mutumbu wabana bobile walo uubeleka mulimo wakumubili wakasisya mawoola 60, wakamwaya mamagazini aali 108 alimwi wakatalika ziiyo zya Bbaibbele zyotatwe mumwezi omwe ngwaakacita bupainiya bwakugwasilizya. Ino wakacita buti? Wakali kubelesya ciindi cakulyookezya masikati kuncito ikukambauka mubusena bubelekelwa buli afwaafwi, wakali kukambauka kwiinda mukulemba magwalo alimwi wakali kukambauka mumasena musiigwa myootokala alimwi amumigwagwa. Alimwi wakali kububelesya kabotu buzuba bwakwe bwakulyookezya kumilimo nsondo ansondo kwiinda mukubelekaa mbungano mumulimo wamumuunda. Nokuba kuti kukusaanguna wakali kuyeeya kuti bupainiya bwakugwasilizya ncintu catakali kukonzyeka, kwiinda mukukulwaizigwa abamwi alimwi akubaa mulongo wazintu zyakucita uuli kabotu, ibuyumuyumu boonse bwakakonzyeka.
14 Jesu wakasyomezya basikwiiya bakwe kuti: “Ijokwe lyangu lilibulungusene, awalo mukuli wangu muuba.” (Mt. 11:30) Oyo nguwakali mutwe wacibalo cikulwaizya icakali mu Ngazi Yamulindizi ya August 15, 1995. Ciluula mucizi umwi wakajisi mulimo wakumubili watakali kumupa ciindi pe. Sena wakayeeya kuti bupainiya bwakugwasilizya ncintu catakali kukonzyeka kulinguwe? Peepe. Mane wakali kukonzya kucita bupainiya bwakugwasilizya mwezi amwezi. Nkaambo nzi? Nkaambo kakuti wakalimvwa kuti bupainiya bumugwasya kutaciindizya kuyanda mulimo wakwe. Ikugwasya bantu kwiiya kasimpe ka Bbaibbele akubabona kabacinca maumi aabo kutegwa bazuminwe a Leza kwakamuletela lukkomano kapati mubuumi bwakwe.—Tus. 10:22.
15 Ikulyaaba alimwi akubambulula bukkale koonse kucitwa ikutegwa muntu acite bupainya kulalongezyegwa kwiinda muzilongezyo zijanika. Umwi mucizi wakalemba kaluula kujatikizya bupainiya bwakugwasilizya ategwa: “Bwakandigwasya kuleka kuliyanda akutalika kubikkila maanu kukugwasya bamwi. . . . Ndabakulwaizya kuti bacite bupainiya abo bakonzya.”
16 Kuyandika Mulongo Wazyakucita Uuli Kabotu: Kupeeji lyamamanino lyapepa eli lyamukati, twalembulula bubambe bwaciindi bwalo bwakali mu Mulimo Wesu Wabwami wa February 1997. Ambweni kuli bubambe bweelela bukkale bwanu. Mwabulanga-langa mweelede kuyeeya mbomulaakubeleka lyoonse mumulimo mwezi oonse. Milimo nzi yaaŋanda yalo iikonzya kucitwa kamutana talika bupainiya bwanu naa eeyo iikonzya kulekwa akuya kucitwaa kale? Sena ciindi ncomutola ikulikondelezya, kulyookezya naa kucita milimo imbi cilakonzya kuzwisigwa? Muciindi cakulanga mawoola aayandika aali 60, amube abubambe bwabuzubaa buzuba naa nsondo ansondo. Kuyandika buyo mawoola obile abuzuba naa aali 15 ansondo. Amubulange bubambe bwaciindi kamujisi ampesele kumaanza, amubone mbomunga mwakonzya nobeni mumulimo ibukonzya kubeleka kulindinywe alimwi akumukwasyi wanu.
17 Ikutola lubazu nkoyakacita mbungano alimwi alugwasyo ndoyakatondezya mumulimo mwaka wakamana kwakayungizya busungu bwamupainiya waciindi coonse walo wakalemba kuti: “Ndalumba kapati kukulwaizya kwaluyando ikwakuti tuyungizye mulimo wesu ikugwasilizya mulimo wabupainiya bwakugwasilizya. . . . Ibubambe bwaciindi mbomwakalemba bwakabagwasya banji batanacitide bupainiya ikubona kuti bakali kukonzya kucita obo. . . . Ndilikkomene kapati kuti ndili mumbunga ya Jehova akutobela busolozi bwaluyando bwamuzike musyomesi uucenjede.”
18 Ibbuku lya Tusimpi 21:5 litusyomezya kuti: “Makanze aabasungu alaleta zilyo zinji.” Ilya Tusimpi 16:3 litukulwaizya kuti: “Leka milimo yako mumaanza aa-Jehova, nkabela uyoozuzikizya makanze aamumoyo wako.” Inzya, kwiinda mukubikkilizya Jehova mukusala kwesu alimwi akusyoma nguwe cakumaninina kuti atugwasye kuzwidilila, tulakonzya kusyoma kuti makanzeesu aabupainiya bwakugwasilizya ayoozwidilila. Cilakonzya kucitika kuti twabona mbotwazwidilila mububambe bwesu bwaciindi mumwezi omwe naa yobile yabupainiya bwakugwasilizya, tuyookonzya kumaka kabbokesi ikali afoomu yabupainiya bwakugwasilizya kajisi majwi aakuti: “Kamumaka awa ikuti kamuyanda kuzumanana kubeleka kamuli bapainiya bakugwasilizya kusikila mpomuyooyandila.” Nokuba boobo, tulakonzya kulangila kuyoocita bupainiya bwakugwasilizya alimwi mu August nokunooli nsondo zyosanwe zizwide. Mbotunoomanizya mwaka wamulimo mu August, kuyoocitwa bubambe bwakuti toonse tukatole lubazu luzwide mumulimo kusikila waawo mpotukonzya.
19 Jesu wakasinsima kuti: “Oyo uundisyoma, uyoocita milimo iili mbuli njencita, mane do akiicite mipati iinda eyi.” (Johane 14:12) Ncoolwe cesu cibotu ikubeleka katuli babelesinyinaa Leza nobuyabuzuzikizigwa cakumaninina ibusinsimi obu. Lino nceciindi cakukambauka makani mabotu cakusungwaala kwiinda lyoonse, ikucibelesya kabotu ciindi ikucita mulimo oyu. (1 Kor. 3:9; Kol. 4:5) Ikutola lubazu mumulimo wabupainiya bwakugwasilizya ciindi aciindi ninzila mbotu yakucita cibeela cesu cabwaambilizi bwa Bwami. Tulalangila cabusungu kuti tubone lwiimbo olu lwakutembaula mbolunoobede kuzwa kubapainiya bakugwasilizya kuciindi eci ca Ciibalusyo. (Int. 27:6) Twayeeya zyakacitika mwakali, tuleezyeezya kuti, ‘Sena tuyoocicita alimwi?’ Tulasyoma kuti tuyoocita obo!
Kabbokesi kali apeeji 3]
Sena Mulakonzya Kucita Bupainiya Bwakugwasilizya?
“Kufwumbwa naa mulaabukkale buli buti, ikuti naa muli bbapatizidwe, mulalilemeka kabotu, mulakonzya kulibambila kusisya mawoola aali 60 aayandika mwezi amwezi mumulimo wamumuunda alimwi kamusyoma kuti mulakonzya kubeleka kwamwezi omwe naa yobile kamuli bapainiya bakugwasilizya, ibaalu bambungano bayookkomana kulanga-langa foomu yanu yakulomba kucita mulimo oyu.”—Olinganizidwa Kutsiriza Uminisitala Wathu, Peeji 114.
Kabbokesi kali apeeji 6]
Mulongo Waziindi Wabapainiya Bakugwasilizya
Nzila Zyacitondezyo Zyakubeleka Mawoola Aali 15 Mumulimo Wabukambausi Nsondo Ansondo
Cifwumofwumo—Kuzwa mu Muhhulo Kuyakusika mu Mujibelo
Abuzuba bwa Nsondo kulakonzya kwabikkwa buzuba bumbi
Buzuba Ciindi Mawoola
Mu Muhhulo Cifwumofwumo 2 1⁄2
Muli Bwabili Cifwumofwumo 2 1⁄2
Muli Bwatatu Cifwumofwumo 2 1⁄2
Muli Bwane Cifwumofwumo 2 1⁄2
Muli Bwasanu Cifwumofwumo 2 1⁄2
Mu Mujibelo Cifwumofwumo 2 1⁄2
Mawoola Oonse Kwaasanganya: 15
Buzuba Boonse Kwamazuba Obile
Kufwumbwa mazuba obile mukati kansondo alakonzya kusalwa
Buzuba Ciindi Mawoola
Muli Bwatatu Buzuba Boonse 7 1⁄2
Mu Mujibelo Buzuba Boonse 7 1⁄2
Mawoola Oonse Kwaasanganya: 15
Kwamazuba Obile Mangolezya alimwi amu Mujibelo amu Nsondo
Kufwumbwa mazuba obile mukati kansondo alakonzya kusalwa
Buzuba Ciindi Mawoola
Mu Muhhulo Kumangolezya 1 1⁄2
Muli Bwatatu Kumangolezya 1 1⁄2
Mu Mujibelo Buzuba Boonse 8
Mu Nsondo Cisela Cabuzuba 4
Mawoola Oonse Kwaasanganya: 15
Mukati Kansondo Kumazuba alimwi amu Mujibelo
Mu Nsondo kulakonzya kwabikkwa buzuba bumbi
Buzuba Ciindi Mawoola
Mu Muhhulo Kumazuba 2
Muli Bwabili Kumazuba 2
Muli Bwatatu Kumazuba 2
Muli Bwane Kumazuba 2
Muli Bwasanu Kumazuba 2
Mu Mujibelo Buzuba Boonse 5
Mawoola Oonse Kwaasanganya: 15
Mulongo Wangu Wamulimo
Amubikke mbaakani yamawoola ngomunoobeleka ciindi cimwi acimwi
Buzuba Ciindi Mawoola
Mu Muhhulo
Muli Bwabili
Muli Bwatatu
Muli Bwane
Muli Bwasanu
Mu Mujibelo
Mu Nsondo
Mawoola Oonse Kwaasanganya: 15