Kabbokesi Kamubuzyo

◼ Nkaambo nzi ncotweelede kujatisya kumakani aakusama alimwi akulibamba ciindi notuswaya zilawo zya Sosaiti ku Brooklyn, Patterson, alimwi a Wallkill, New York alimwi amitabi iijanika munyika yoonse mbwiizulwa?

Banakristo beelede kuboneka kabotu. Coonse ciindi tweelede kusama akulibamba munzila yabulemu yeelela babelesi ba Jehova Leza. Eeci cilayandika, ikapati ciindi notuswaya zilawo zya Sosaiti yaku New York alimwi amitabi iijanika munyika yoonse mbwiizulwa.

Mumwaka wa 1998, kuyoocitwa miswaangano yacooko alimwi ayamasi. Zyuulu-zyuulu zyabakwesu bazwa mumasi manji bayooswaya maofesi mapati aa Sosaiti ku New York alimwi amitabi mumasi aambi. Ciindi notuswaya zilawo ezi alimwi aziindi zimbi, tweelede ‘kutondezya muzintu zyoonse kuti tuli basimilimo benibeni ba-Leza,’ kubikkilizya ansamino yesu alimwi ambotulibamba kabotu.—2 Kor. 6:3, 4.

Nolibandika mbokuyandika kapati kusama munzila yeelede alimwi akulibamba kabotu, ibbuku lya Olinganizidwa Kutsiriza Uminisitala Wathu lyaamba kuti bulondo bulayandika alimwi akusama akulibamba cabulemu notutola lubazu mumulimo wabukambausi alimwi anotuli kumiswaangano ya Bunakristo. Mpoona apeeji 131, muncali 2, lyaamba kuti: “Mbubonya buyo anotuswaya munzi wa Beteli ku Brooklyn noiba mitabi iili yoonse yamaofesi aa Sosaiti. Mutalubi kuti izina lyakuti Beteli lyaamba ‘Ŋanda ya Leza,’ aboobo kusama kwesu, kube kulibamba akulilemeka kwesu kweelede kakutaindene anotuli kumiswaangano yabukombi ku Ŋanda ya Bwami.” Ooyu mulawo weelede kutobelwa abasikumwaya ba Bwami ibazwa mubusena mujanika maofesi aaya, abaabo bazwa kule ibaboola kubona akuyanzana abamukwasyi wa Beteli alimwi akuswaya cilawo camutabi.

Ikusama kwesu kweelede kupa kuti bantu babulemeke bukombi bwakasimpe bwa Jehova. Pele, kwajanika kuti bakwesu abacizi bamwi tabasami munzila yabulemu pe nobaswaya zilawo zya Sosaiti. Kusama kwamusyobo oyu takweelede pe ciindi nomuswaya minzi iili yoonse ya Beteli. Kumakani aaya alimwi amuzintu zimbi zyoonse zijatikizya bukkale bwesu bwa Bunakristo, atutobele bukkale busumpukide mbweena ibwaandaanya bantu ba Leza kunyika kwiinda mukucita zintu zyoonse zinga zyaleta bulemu kuli Leza. (Rom. 12:2; 1 Kor. 10:31) Alimwi kweelede kubandika abaabo mbotuyiisya Bbaibbele abamwi balangilwa kuswaya ku Beteli lwakusaanguna akubayeezya kuti beelede kusama alimwi akulibamba kabotu.

Aboobo nomuswaya cilawo ca Sosaiti, amulibuzye kuti: ‘Sena kusama kwangu alimwi akulibamba nkwabulemu?’ (Amweezyanisye a Mika 6:8.) ‘Sena kuleta bulemu kuli Leza ngwekomba? Sena bantu bamwi balatyompwa ambweboneka? Sena ndipa cikozyanyo cibotu kuli bamwi baswaya lwakusaanguna?’ Kwiinda munsamino yesu alimwi ambotulibamba, ‘atulemeke muziyanza zyoonse lwiisyo lwa-Leza Mufutuli wesu.’—Tit. 2:10.