Amubagwasye Bantu Kubaa Bulangizi Bwabuumi Butamani
1 Nokuba kuti muntu wayandaula nzila zyakumusya kucembaala alimwi akulansya buumi, kucembaala alimwi alufwu nkozicili. Tatulilumbili kuti Ibbaibbele lilapandulula bantu ncobacembaalila akufwa, alimwi akucembaala mbokuyoomana alimwi akuti lufwu talucinooliko. Ootu twaambo twakasimpe tulisalazidwe mubbuku lya Luzibo Lutola Kubuumi Butamani. Ibbuku eeli lilasalazya kwiingula mibuzyo iikatazya iijatikizya buumi alimwi alufwu, akutondezya sikubala kuti ciyoosika ciindi noyiyoobweedezegwa Paradaiso.
2 Mu March tunoomwaya bbuku lya Luzibo katujisi mbaakani yakutalisya ziiyo zya Bbaibbele zyaaŋanda. (Mt. 28:19, 20) Mpoona tuyoopilukila kulibaabo boonse bakatondezya luyandisisyo mumakani aa Bwami. Munzila eyi ambweni tulagwasya bantu kubaa bulangizi bwabuumi butamani. (Tit. 1:2) Ikutegwa eeci cikonzeke, mizeezo eyi ambweni inga yamugwasya.
3 Nomuswaya ciindi cakusaanguna, mulakonzya mwabuzya mubuzyo oyu wakuti:
◼ “Sena kuli nomwakalibuzyide kuti ino nkaambo nzi bantu ncobayandisya koongola? [Amulindile bwiinguzi.] Iba Buda, Banakristo, ba Hindu, ba Mozilemu, alimwi abamwi boonse basyoma kuti bantu balazumanana kupona nobafwa.” Amujule bbuku lya Luzibo kucibalo 6 camutwe wakuti, “Nkaambo nzi Ncotucembaala Akufwa?,” mubale muncali 3. Amupandulule kubelesya magwalo aambidwe. Kamubelesya mibuzyo yobile iili kumamanino aamuncali, amumubuzye siŋanda naa ulayanda kujana bwiinguzi walo mwini. Ikuti kayanda, amuzumanane kubandika mincali iitobela. Mbocitalika ciiyo oobu! Amulombe kumusiila bbuku kuti azumanane kubala, mpoona mupangane nomuyoopilukila, inga cabota kuti mwapilukila kuyoolingula kwainda buzuba bomwe naa obile.
4 Nomupilukila nkomwakasiya bbuku lya “Luzibo” mulakonzya kwaamba kuti:
◼ “Ndaboola kuti tubandike mibuzyo yobile iijatikizya lufwu yatakaingulwa.” Amumuyeezye siŋanda mibuzyo eyo. Mwamana mubandike makani aali mucibalo 6 alaakatwe kakuti “Muzeezo Waluciso.” Kweelana ambozibede zintu, mulakonzya kuzumanana aciiyo naa kubelesya mubuzyo wamamanino mwamana kubala cibalo 7 ikutegwa mujule mulyango waciiyo citobela. Amupangane nomuyoopilukila. Mupandulule mubufwaafwi miswaangano mbwiicitwa. Amumukulwaizye kuti akajanike.
5 Mubukambausi bwaŋanda-aŋanda naa bwamukwiizya, mulakonzya kutalisya mubandi akwaamba kuti:
◼ “Sena kuli nomwakalibuzizye kuti ino ncinzi ciyoocitika kulindiswe alimwi akunyika kumbele? [Amulindile bwiinguzi.] Ibbaibbele lilaamba mbuli mbokunoobede kumbele mubbala lyomwe—Paradaiso! Lipandulula kuti kumatalikilo, Leza wakapanga cimwi cibeela canyika kuti cibe paradaiso mbotu mwaakabikka banabukwetene bobile mbaakalenga. Bakeelede kwiizuzya nyika, bucebuce kabayabwiisandula kuba paradaiso. Amumvwe bupanduluzi obu bujatikizya mbuli mboyakabede.” Amujule bbuku lya Luzibo kupeeji 8 mubale muncali 9 wakatwe kakuti “Buumi mu Paradaiso.” Mpoona amubandike twaambo tuli mumuncali 10, mwamana mubale lugwalo lwaambidwe lwa Isaya 55:10, 11. Amulombe kuzumanana amubandi uujatikizya buumi mbobunoobede mu Paradaiso iiyoobweedezegwa akubandika mincali 11-16 antoomwe. Naa ambweni inga mwakulwaizya muntu ooyo kulibalila mwini, mpoona amupangane kuswaangana kutegwa mukabandike makani ayo.
6 Ikuti naa ciiyo teecaatalisigwa kumatalikilo, mulakonzya kusola kucitalisya nomwapilukila kwiinda mukwaamba kuti:
◼ “Mbweena mbuli mbotwakabandika mumubandi wesu wakucaalizya, Leza ukanza kuti nyika yoonse mbwiizulwa ikasandulwe kuba paradaiso. Eeci cibusya mubuzyo wakuti, Ino Paradaiso inooli buti?” Amujalule bbuku lya Luzibo kucibalo 1 akucita ciiyo mumincali 11-16 iili aakatwe kakuti “Buumi mu Paradaiso Iipilusidwe.” Kwamana amutondezye cifwanikiso cili amapeeji 4-5 akumubuzya muntu oyo naa ulayanda kukkala mubukkale bubotu buli boobu. Mpoona amubale majwi aakusaanguna mumuncali 17 apeeji 10. Kweelana ambozibede zintu, mulakonzya mwazumanana amubandi naa ambweni inga mwaamba kuti mwaakupilukila muyoopandulula iciyandika ikutegwa muntu akakkale mu Paradaiso iipilusidwe. Amwaambe ciindi camiswaangano, kuzwa waawo mumukulwaizye muntu oyo kuti akajanike ku Ŋanda ya Bwami.
7 Ibbuku lya Luzibo ncibelesyo cigwasya kapati kukutondezya bantu “buumi butamani” mbwaakasyomezya Leza. Iziiyo zya Bbaibbele nzyomucita abantu zilakonzya kubagwasya kubaa bulangizi oobu ibwakazwa kuli Leza “uutabeji.”