Ikutalisya Ziiyo Mubroshuwa ya Ncayanda
1 Nyika yoonse mbwiizulwa kuluulwa kuti broshuwa ya Ncinzi Leza Ncayanda Kulindiswe? ncibelesyo cigwasya kapati kuyiisya bantu kasimpe. Izyuulu-zyuulu zyaziiyo zya Bbaibbele zili mukutalisigwa nsondo ansondo mubroshuwa eyi. Sena kuli nomwakazwidilila kutalisya akucitya ciiyo ca Bbaibbele mubroshuwa ya Ncayanda?
2 Nokuba kuti banji cilabaubila kumwaya broshuwa eyi, bamwi cilabayumina kuziba ncobanga baamba kuti batalisye ciiyo. Ninzila nzi bamwi nzyobabona kuti zilagwasya kutalisya ziiyo zya Bbaibbele mubroshuwa ya Ncayanda? Mizeezo eyi iitobela inga yagwasya.
3 Amulombe Kutondezya Mbocicitwa Ciiyo: Nomuswaya ciindi cakusaanguna naa nomucita lweendo lwakupilukila, muciindi cakulomba buyo ciiyo ca Bbaibbele kuli siŋanda, inga twatondezya mbocicitwa ciiyo ca Bbaibbele. Eeci inga cagwisya kudooneka naa kulibilika basiŋanda banji nkobajisi nobamvwa bbala lyakuti “ciiyo.” Twaiya kutondezya mbocicitwa ciiyo, inga twanjila muciiyo antalisyo nguba-uba.
4 Ikulibambila Kulayandika Kapati: Ibusungu bwakutalisya ziiyo zya Bbaibbele buliswaangene akulibambila nkotwalibambila. Ikulibambilila limwi kulatugwasya kutawayawaya kutola lubazu mumulimo wakucita ciiyo ca Bbaibbele. Ikuti naa twaziinduluka-induluka kuziiya ntalisyo zyesu zyamakani, tunookanana mbuli mbotukanana notuli mumusalo alimwi mumajwi eesu tobeni. Eeci tacikootukkazika buyo moyo, cilamugwasya asiŋanda kulikwaya natuswiilila.
5 Nomulibambila, cilagwasya kubikka ciindi cakukanana makani aanu kutegwa mumwaambile siŋanda ciindi ncomutitole kutondezya mbocicitwa ciiyo. Naamana kulipandulula, mukwesu umwi inga waamba kuti: “Ndaleya kuti ndimutondezye pulogilamu yesu yaciiyo ca Bbaibbele icitabbadelwi. Citola buyo maminiti aali osanwe kutondezya mbocicitwa. Sena inga mwandizumizya maminiti aali osanwe?” Ciiyo 1 ca broshuwa ya Ncayanda inga cacitwa munzila yacitondezyo kwamaminiti aatandila kuli osanwe. Aino, inga kwasalwa buyo magwalo masyoonto aakubala muciindi eci, pele siŋanda ulalibonena ciiyo mbocibede kwiinda mukumanizya ciiyo cakusaanguna mumaminiti masyoonto buyo. Mpoonya amumuzibye kuti mwaakupilukila kucita Ciiyo 2, muyootola buyo maminiti aali 15.
6 Intalisyo eyi yamakani yagwasya kapati:
◼ “Njanda kumutondezya munzila nguba-uba mfwaafwi iigwasya mbotucita ciiyo ca Bbaibbele caaŋanda kubelesya broshuwa eyi ya Ncinzi Leza Ncayanda Kulindiswe? Ibanji bajana kuti balakonzya kubaa bwiinguzi bukkazika moyo kumibuzyo iiyandika kapati ya Bbaibbele muciindi buyo cisyoonto camaminiti aali 15 ansondo kwansondo zili 16.” Mukaindi kaniini amutondezye zili mukati. Amuvwunune ku Ciiyo 1 akwaamba kuti: “Ikuti naa mwatuzumizya buyo maminiti aali osanwe, inga twamutondezya mbocicitwa eci. Ciiyo 1 ncamutwe wakuti, ‘Mbomunga Mwaziba Ncayanda Leza.’” Kuzwawaawo amwiibale mibuzyo yotatwe, mpoonya mupandulule manamba aali mumakoma. Amubale muncali 1, mwamana mumutondezye siŋanda mbokujanwa bwiinguzi. Siŋanda inga mwamulomba kubala muncali 2. Mpoonya amwaambe kuti: “Kweelana amakani aaya, inga mwawiingula buti mubuzyo oyu? [Amuubale mubuzyo alimwi, mumuzumizye siŋanda kwiingula.] Mulajana kuti kuli magwalo aajatikizya cibalo cimwi acimwi. Aaya magwalo atutondezya bwiinguzi bwa Bbaibbele kumibuzyo eyi. Mucikozyanyo, atubale 2 Timoteo 3:16, 17 tubone naa ileendelana abwiinguzi mbomwapa kujatikizya sikwaanza Bbaibbele.” Mwamana kubala muncali 3 akubuzya mubuzyo alimwi akubala Johane 17:3, amumuyeezye siŋanda nzyaaiya kwiinda mukwiinduluka mibuzyo ya Cibalo 1. Mwasika waawa amuye ku Cibalo 2 mubale mubuzyo wamamanino wakuti, “Ninzila nzi zyobile motunga twaiya kujatikizya Leza?” Mpoonya amubuzye kuti: “Ndilili nomuyoobaa ciindi camaminiti aali 15 kutegwa tukacite Ciiyo 2 akujana bwiinguzi?”
7 Kulayandika kapati kuubya-ubya mubandi alimwi akulumbaizya siŋanda kuti kakukonzeka. Nomulibambila kuswaya alimwi, muciindi cakubuzya naa ulayanda kuzumanana, amumukulwaizye buyo kutobela nzila njiyonya kuciiyo citobela. Amumuzibye kuti muyanda kuyoopilukila. Bamwi basikumwaya balomba kucita ciiyo kubelesya luwaile kuti naa ciindi cabula. Alimwi inga mwamukulwaizya sikwiiya kwiibamba kabotu broshuwa yakwe kutegwa itakamusweeki mwaakuswaya alimwi.
8 Amuzumanane: Nokuba kuti icipa kuzwidilila nkulibambila, atuzumanane kupilukila. Ikuyiisya ciiyo mumaminiti masyoonto buyo nciyumu, aboobo amuzumanane kwiinduluka-induluka ntalisyo yanu yamakani ziindi zinji kutegwa mucizibe kabotu nomutondezya ciiyo. Amusole kutondezya mbocicitwa ciiyo kumuntu amuntu ngomuswaangana amunzi, nomwiizya alimwi nomucita bumboni bwaaluwaile. Naa camukatazya kutalisya ciiyo ca Bbaibbele, mutatyompwi pe. Kuzwidilila mukutalisya ziiyo zya Bbaibbele kuyanda kuzumanana alimwi akuyandisya kuyiisya bamwi kasimpe.—Gal. 6:9.
9 Kwiinda mukutobela mizeezo eyi, anywebo mulabaa coolwe cakugwasya muntu kuba munzila iisololela kubuumi kwiinda mukutalisya akucitya ciiyo ca Bbaibbele mubroshuwa ya Ncayanda.—Mt. 7:14.