Nobazyali—Amupe Cikozyanyo Cibotu Kubana Banu
1 Ijwi lya Leza litwaambila kuti ‘wisi abanyina mululami balasekelela loko.’ (Tus. 23:24, 25) Balilongezyedwe kaka bazyali ibapa cikozyanyo cibotu kubana babo! Umwi Sikkomitii ya Mutabi wakaamba boobu kujatikizya bazyali bakwe: “Ikasimpe bwakali mbobuumi bwabo elyo ndakali kuyanda kuti ambebo bube mbobuumi bwangu.” Ncinzi ncobeelede kubona bana kubazyali babo?
2 Kulilemeka Kabotu Abulemu: Mulimo wabazyali iwakuyiisya bana babo izilengwa zibotu. Ikulilemeka kabotu kulakonzya kuyiigwa ikutali buyo kwiinda mukulaililwa, pele akwiinda mukulangilila alimwi akwiiya. Aboobo nkulilemeka kwamusyobo nzi nkomutondezya? Sena bana banu balaakumumvwa kamwaamba kuti “amundijatile,” “ndalomba” alimwi akuti “ndalumba”? Sena mulalemekana mumukwasyi wanu? Sena mulaswiililisya nobabandika bamwi? Sena mulateelela nobakanana kulindinywe bana banu? Sena zilengwa zili boobu zilatondezyegwa ku Ŋanda ya Bwami alimwi anomuli nyolikke kumunzi?
3 Ikuyuma Munzila Yakumuuya Alimwi Akusungwaala Mumulimo: Imukwesu umwi iwabeleka mumulimo waciindi coonse kwamyaka iinda ku 50 ulayeeya ategwa: “Bamaama abataata bakali zikozyanyo zibotu kapati kumakani akuyandisisya miswaangano alimwi abusungu mumulimo.” Ino mubatondezya buti bana banu kuti mulabikkila maanu kumakani aabuumi bwabasiŋanda yanu munzila yakumuuya? Sena lugwalo lwabuzuba mululangila antoomwe? Sena ciiyo camukwasyi mulacicita lyoonse? Sena bana banu balamubona kamubala Bbaibbele amabbuku amwi aa Sosaiti? Nzintu nzi nzyobamvwa nomwiiminina mukwasyi mumupailo? Sena mulabandika makani aakulwaizya aakumuuya abana banu, ikubandika zintu kujatikizya kasimpe alimwi ambungano? Sena mulisungweede ikujanika kumiswaangano yoonse akutola lubazu mumulimo wamumuunda antoomwe amukwasyi?
4 Nobazyali, amuciyeeyesye cikozyanyo ncomupa kubana banu. Acibe cikozyanyo cibotu kapati elyo bana banu bayoociyandisisya mubuumi bwabo boonse. Imukaintu wamulangizi weendeenda walo lino uuli mumyaka yakwe yakuzyalwa yakuma 70 wakati: “Ndicigwasigwa acikozyanyo cibotu cabazyali bangu Banakristo basiluyando. Alimwi ndipaila kuti ndikazumanane kusinizya kulumba kwangu kucikono eci kwiinda mukucibelesya kabotu mubuumi bwangu boonse bwakumbele.”