Sena Mulabeleka Kamujisi Makanze?
1 Jehova ngu Leza simakanze. (Is. 55:10, 11) Tukulwaizigwa kumwiiya. (Ef. 5:1) Eci ceelede kutondezyegwa munzila njotubeleka mulimo wesu. Aboobo mubuzyo oyu uleelela wakuti: “Sena mulabeleka kamujisi makanze?”
2 Ikukambauka kwenu kwamulyango amulyango, ikukambauka kwiinda mukwiizya alimwi akumwaya mabbuku ncibeela camulimo uucitwaa makanze. Pele kamuyeeya kuti imulimo ngotutumidwe ulajatikizya akugwasya bantu kuti babe basikwiiya ikutali kwiide kukambauka buyo. (Mt. 28:19, 20) Twamana kusyanga mbuto zyakasimpe ka Bwami, tweelede kupilukila kuyooziida akuzilanganya ciindi aciindi kumwi katusyoma Jehova kuti atuyungizizye. (1 Kor. 3:6) Tweelede kupakamana kapati kumakani aakucita nyendo zyakupilukila alimwi akutalisya ziiyo zya Bbaibbele.
3 Amukomezye Mulimo Wanu: Ncintu cikkomanisya lyoonse ikuyeeya nzyomwacita mumulimo akwaamba kuti: “Ndazizuzikizya nzindali kuyanda kucita.” Paulo wakatukulwaizya boobu kubbuku lya 2 Timoteo 4:5 kuti: “Kokondezesya mulimo ngowakapegwa.” Eco cibikkilizya kusolekesya kwanu ikupilukila kooko koonse bantu nkobakatondezya kuti balayanda kwiiya. Mumulongo wanu wazyakucita wansondo ansondo amubikke ciindi cini-cini cakucita nyendo zyakupilukila. Amubelekele mbaakani yakusoleka kutalisya ziiyo zya Bbaibbele kuli baabo bayandisisya bululami. Aya ngaayelede kuba makanze anu nomutola lubazu mumulimo.
4 Amubabuzye mbobakalimvwa basikumwaya nobakabona muntu ngobakali kwiiya limwi Bbaibbele kabbapatizigwa kumuswaangano. Ambweni bakakkomana mbubwenya mbuli basikubbapatizigwa. Bakaazuzikizya makanze abo mapati! Umwi sikugwasya bantu kuti babe basikwiiya wakaamba boobu: “Ikugwasya bantu kuba basikwiiya caamba kuyungizya basikutembaula Jehova. Caamba buumi kuli baabo bazumina kasimpe. Ndilaciyanda kapati kuyiisya kasimpe kuli bamwi—ncintu cibotu kapati! . . . Ibunji bwabaabo bamuyanda Jehova baba balongwe bangu beni-beni.”
5 Amuyeeye buyo, ikukonzya kugwasya muntu kusika kuciimo cakuba mubelesi uulyaabide kuli Jehova! Cilakondelezya kaka eco! Imicelo iili boobu ilajanika kwiinda mukubeleka kamujisi makanze mumulimo.—Kol. 4:17.