Ncinzi Ncomunga Mwamwaambila mu Hindu?
1 Mbuli mbomuzi kale, mbanji bama Hindu ibakkede mumasena aandeene-andeene kubikkilizya amucisi muno. Eci caamba kuti talikalampi muyooswaangana amu Hindu mumulimo wanu. Caakucitika boobo ncinzi ncomuyooamba?
2 Amutuyeeye Twaambo Otu: Ibamishinali ibakazwidilila kukambaukila ba Hindu baamba kuti takuyandiki kusinizya buya kwiiya bukombi bwaba Hindu kutegwa mubakambaukile kabotu. Ikanjikanji, inzila nguuba-uba alimwi yabusongo kujatikizya kasimpe iletela mpindu. Kusaanguna, amulombe kukanana aulaa munzi. Ikuti naa wamwiingula kabotu nkokuti ciyoouba-uba kukambaukila banamukwasyi bamwi. Ikuzwa kumatalikilo nkukonya, mutatondezyi kwaamba kuti mwaleta mulumbe uusumpukide kwiinda nzyasyoma siŋanda naa ikuti muyanda kubandika kujatikizya Leza mwini-mwini alikke naa malembe aasalala aakusaanguna. Mbwaanga bama Hindu baamba kuti Bbaibbele ndibbuku Lyakumbo naa lyabamakuwa, mulakonzya kuzwisya muzeezo oyo kwiinda mukupandulula kuti kwiina nolikulwaizya cisi comwe kuti ceendelezye cisinyina naa kusumpula musyobo omwe ali umwi.
3 Amubelesye Zibelesyo Ziluzi: Imabroshuwa obile akabambwa amuzeezo wakugwasya bama Hindu. Iburoshuwa yakuti Why Should We Worship God in Love and Truth? yakasimbwa mumwaambo waci Gujarati aci Punjabi. Elyo yakuti Our Problems—Who Will Help Us Solve Them? ilisimbidwe mumyaambo iimbi iili 11 yaku India. Oonse obile alajanika mu Cingisi. Alimwi imabroshuwa aakuti “Amubone! Ndalengulula Zintu Zyoonse Kuti Zibe Zipya” alimwi alyakuti, Sena Leza Ulatulanganya? ajanika kuti aalo alagwasya kapati ikukambaukila baabo ibakakomenena mubu Hindu. Ibroshuwa ya Ncayanda alimwi abbuku lya Luzibo alakonzya kubelesyegwa kabotu ikweendelezya ziiyo zya Bbaibbele.
4 Amujane Kaambo Komwe Nkomuzuminizyanya: Tacikatazyi pe ikujana kaambo komwe nkomuzuminizyanya abama Hindu. Basyoma kuti tukkede kuciindi nobwaindila bubi akuti Leza uyoozwisya mapenzi woonse aya aali munyika kwiinda mumapenzi mapati ayootobelwaa ciindi nokuyoozula kasimpe. Mwabona mbuli twaambo otu mbotukonzya kuswaanganizigwa anjiisyo zya Bbaibbele zijatikizya mazuba aakumamanino, mapenzi mapati alimwi anyika mpya iiboola. Mbwaanga bunji bwabama Hindu babona kuti buumi mulongo buyo wamapenzi aanyina mbwaamanizigwa, balaiyandisisya mitwe iijatikizya buumi bwamukwasyi, milandu akuliiba alimwi acicitika twafwa. Zyeezi nzila zyuuba-uba zyobile nzyomunga mwasoleka.
5 Eyi ilakonzya kukkomanisya muntu uujisi mukwasyi:
◼ “Ndiyaabuswaya bantu ibabikkila maanu kuciimo cabukkale bwamumukwasyi mumasi manji sunu. Ino muyeeya kuti ncinzi cinga cagwasya kutaandaanya mikwasyi? [Amulindile bwiinguzi.] Ibantu bamwi balizi ncaamba magwalo aaci Hindu kujatikizya mikwasyi, pele tabanajanide ciindi cakweezyanisya ncolyaamba Bbaibbele kumakani aya. Ndiyanda kuti ndimutondezye makani aali kubbuku lya Ba-Kolose 3:12-14.” Mwamana kubala lugwalo amumutondezye siŋanda cibalo 15 mubbuku lya Luzibo mpoonya mwaambe kuti: “Inga ndakkomana kumubalila cibalo eci kwakaindi kasyoonto buyo.”
6 Imukubusi alakonzya kumukonda makani aya:
◼ “Tandidooneki pe kuti ulasyoma muli Leza. Ino uyeeya kuti Leza ujisi makanze nzi kulindiswe?” Amulindile bwiinguzi. Mpoonya amubale bbuku lya Matalikilo 1:28 akwaamba kuti: “Mumasena manji, inyika ijisi bantu banji kapati alimwi izwide mapenzi. Sena uyeeya kuti Mulengi inga kalisungwide kutugwasya kumanizya mapenzi esu?” Mwamana kumvwa bwiinguzi amubweze bbuku lyeelede.
7 Amuzikkomanine Mpindu Zijanika: Imwaalumi umwi mu Hindu ulaamyaka yakuzyalwa iili 22 wakaunka kumucizi umwi wakali kukambauka kumusyika akulomba kuti ayiisigwe Bbaibbele. Oyu mwaalumi wakamupanduluda mucizi kuti imyaka iili lusele yainda, wakateelela mubandi wa Bbaibbele ngobaajisi banyina amucizi oyu. Nokuba kuti bwakamukkomanisya bwiinguzi bugwasya bwamu Bbaibbele kujatikizya mapenzi aajisi bantu, banyina tiibakazibikkila maanu aboobo wakalimvwa kuti wakali musyoonto kapati kuti atobele kasimpe alikke. Lino mbwaakakomena wakali kuyanda kuti ayiye zintu zinji. Tanaakasowa ciindi pe mulombwana oyu. Mumazuba aali 23 buyo wakamanizya kwiiya bbuku lya Luzibo elyo nokwakainda myezi yone buyo kuzwa ciindi naakaswaanganya mucizi oyu kumusyika, wakalomba kuti abbapatizigwe!
8 Umwi mukwesu wakatalisya ciiyo kumwaalumi umwi mu Hindu walo ngwaakaswaanganya mucitima. Oyu mwaalumi wakajisi mapenzi mulukwatano lwakwe. Alimwi wakali sibukoko. Imwaalumi oyu wakazumina kuswayigwa a Kamboni kutegwa babandike malailile aa Bbaibbele kujatikizya bukkale bwamumukwasyi. Injiisyo zyamu Bbaibbele zyabukkale zyakamukonda kapati elyo wakazumina kuti inga wabaa ciiyo ca Bbaibbele. Walo amukwasyi wakwe bakatalika kujanika kumiswaangano antoomwe. Mpoonya bakaambila kasimpe kubalongwe babo abasazinyina. Lino ibali cisambomwi akati kabantu aba bakazumina kasimpe!
9 Leza uyandisisya kuti “bantu boonse bafutulwe akuboola kuluzibo lwakuziba lusinizyo.” (1 Tim. 2:4) Eco cibikkilizya baalumi abanakazi ibalyaamba kuti bali mucikombelo citali ca Bunakristo mbuli caba Hindu. Ikuti kakuli ba Hindu mubusena momubelekela, sena inga tamubaswayi akubelesya nzila zimwi zyaambwa mucibalo eci?