Ikukambauka Kulatuzandula
1 Ibantu banji balabuzya kuti, “Ino ncinzi cipa kuti Bakamboni ba Jehova kabaandeene azikombelo zimbi?” Inga mwaingula buti? Mulakonzya kupandulula zintu zimwi nzyotusyoma izyamu Bbaibbele. Pele sena kuli nomwakayeeyede ikwaamba mboutuzandula kuzikombelo zimbi imulimo wesu wabuleya?—Mt. 24:14; 28:19, 20.
2 Sunu mbasyoonto basibukombi ibakulwaizigwa kwaambila bamwi izintu nzyobasyoma. Balakonzya kuyeeya kuti kulizulide ikutobela milawo ya Kaisara, ikubaa bukkale buli kabotu naa ikucitila bamwi bantu imilimo mibotu. Nokuba boobo, tabalimvwi kuti baleelede ikugwasya bambi ikwiiya ncolyaamba Bbaibbele kujatikizya mbokujanwa lufwutuko. Ino twaandeene buti?
3 Imulimo wesu wabusungu ulaandeene kapati amilimo iicita zikombelo zimbi. Mukwiiya Banakristo bakusaanguna, Bakamboni ba Jehova basunu bakambauka makani mabotu kusikila kumamanino aanyika kwamyaka iinda ku 100. Imakanze esu ngakugwasya bantu banji kuti bakonzye kweendelanya maumi abo akuyanda kwa Leza.—1 Tim. 2:4; 2 Pet. 3:9.
4 Ino Mulaampuwo nzi? Sena muzibidwe kuti muli bakambausi basungweede ba Jwi lya Leza? (Inc. 17:2, 3; 18:25) Sena basimukobonyoko balafwambaana kulubona lwaandaano iluli akati kacikombelo cabo acanu akaambo kamulimo wanu wabukambausi? Sena muzibidwe kuti muli bantu bayandisisya kwaambila bamwi makani aabulangizi bwanu? Sena mulaacilengwa cakutola lubazu lyoonse mumulimo? Kamuyeeyede kuti tatulyaandaanyi buyo kwiinda muzina lyesu, pele tulacita obo akwiinda mukucita nzyolipandulula zina elyo—ikukambauka kujatikizya Jehova.—Is. 43:10.
5 Iluyando ndotujisi kuli Leza alimwi akubantu bambi ndolutukulwaizya kucita mulimo wakukambauka. (Mt. 22:37-39) Nkakaambo kaako iswebo mbubwenya mbuli Jesu abaapostolo ncotuyandila kubelesya ciindi cili coonse ncotujana ikwaambila bamwi mulumbe wa Bwami. Atuzumanane kukambauka makani mabotu cabusungu kuli baabo ibayanda kuswiilila. Ikucita boobo kuyoogwasya babombe myoyo ikubona ‘lwaandaano akati kamuntu uyoowa Leza amuntu uutamuyoowi.’—Malk. 3:18.