Mbaani Balangilwa Kuzumina Ciiyo ca Bbaibbele?
1 Imusinsimi Amosi wakaambilizya kuti kuyooba nzala munyika ya Israyeli, “teensi kwaamba kuti ninzala yansima nanka nyota yamaanzi pe. Ninzala yakuswiilila majwi aa-Jehova.” (Amosi 8:11) Ikutegwa bagwasigwe abo bafwide nzala anyota yakumuuya, imbunga ya Jehova ili mukumwaya mweelwe uutalikomeneni wamabbuku aabandika makani aa Bbaibbele nyika yoonse mbwiizulwa.
2 Ikusika lino, twasimba mabbuku aa Luzibo aali tuulunzuma ituli 70 alimwi amabroshuwa aa Ncayanda ituulunzuma ituli 91. Tulaiyanda nzila nguba-uba alimwi imbotu iili mumabbuku aya yakuyiisya kasimpe. Nokuba boobo, imaunda-maunda aabantu ibali kutambula mabbuku eesu tabanayiya Bbaibbele andiswe pe. Ncinzi ncotunga twacita kumakani aya?
3 Kufwumbwa Ngotwasiila Bbuku Ulangilwa Kuba Sikwiiya! Amulange cakacitika kuli sikumwaya umwi iwakalomba mukaintu umwi kuti acite ciiyo anguwe kuciindi nciconya cakusaanguna naakabandika anguwe amulyango wakwe. Oyu mukaintu wakazumina ndilyonya. Mpoonya wakazyooambila sikumwaya oyu kuti, “Ndiwe wakusaanguna kundilomba kuti ndibe aciiyo ca Bbaibbele.” Mbangaye bantu ibakkala mubusena momubelekela balo bajisi mabbuku esu ibanga baamba mbuli bwakaamba mukaintu oyu? Kufwumbwa bbuku ndyotwasiila muntu litupa coolwe cakucita lweendo lwakupilukila akutalisya ciiyo ca Bbaibbele caaŋanda.
4 Mbwaanga kanjikanji tulaswaanganya bantu ibajisi kale mabbuku esu, mbuti mbotunga twabakulwaizya kuti bayandisye kwiiya zintu izili mumabbuku esu? Kamboni umwi wakamugama buya kumubuzya siŋanda naa kuli mibuzyo njaakajisi yamu Bbaibbele, pele wakaingula kuti, “Peepe.” Imucizi wakazumanana ategwa, “Kasimpe mulijisi mibuzyo.” Oyo mukaintu wakalijisi ncobeni elyo ciiyo cakatalikwa. Sena inga tamumubuzyi siŋanda naa ulayanda kwiiya ncolyaamba Bbaibbele kujatikizya mubuzyo wakwe naa makani amwi aamulibilisya? Amulibambile kubuzya mubuzyo umwi naa kunyina ngwajisi siŋanda. Imubandi uuli boobu ulakonzya kujula nzila yaciiyo calyoonse cakasimpe kamu Bbaibbele.
5 Ikucitya ziiyo zya Bbaibbele ngomusemu wamulimo wesu. Mbwaanga tatukonzyi kuziba uunga wazumina ciiyo ca Bbaibbele, tutalengaani ikwaambila kufwumbwa muntu ngotuswaanganya. Amwaapailile makani aya kuli Jehova alimwi amucite zintu kweelana amipailo yanu. Muyoojana kuti kalitanalampa imuntu ngomwalomba kuti abe aciiyo ca Bbaibbele wazumina kucita boobo!—1 Joh. 5:14, 15.