Mikwasyi Miyumu Munzila Yakumuuya—Mubuti?
1 Mikwasyi ya Banakristo ilalumbaizyigwa akaambo kakuti ‘balacita nzyayanda Leza mumikwasyi yabo.’ (1 Timo. 5:4, Ci) Aboobo, mbwaanga kuli micito minji mibyaabi kapati iicitika iikonzya kunyonganya lusyomo lwesu, cilayandika kuti mikwasyi kaibeleka canguzu kutegwa lyoonse kiili miyumu munzila yakumuuya. Ino mbuti mbocikonzya kuzuzikizyigwa eeci?
2 Amucite Busilutwe Ibuli Mbuli bwa Kristo: Basilutwe bamikwasyi beelede kumwiiya Jesu Kristo nobanyamuna mukuli wabo kutegwa bakulwaizye mikwasyi yabo. Kunze lyakutupa cikozyanyo caluyando cakacitika ciindi comwe buyo kwiinda mulufwu lwakwe lwakulyaaba akaambo kandiswe, Jesu wazumanana “kwiisanina alimwi akwiiyanda” mbungano. (Ef. 5:25-29, NW) Bazyali bajisi luyando, balaciccilila cikozyanyo eeci cakubikkila maano kwiinda mukubona kuti zintu zyakumuuya zilacitwa abuzuba kumikwasyi yabo. Eeci cilabikkilizya akuba aciiyo ca Bbaibbele camukwasyi ansondo, ikuba amibandi iiyaka alimwi iijatikizya zintu zyakumuuya nzyobayandika bamukwasyi kufwumbwa nokukonzyeka alimwi akulanganya mapenzi aabuka.—Dt. 6:6, 7.
3 Mumulimo Wamumuunda: Muntu uuli woonse wamumukwasyi weelede kuzyiba kuti, ikukambaukila bantu kujatikizya Jehova alimwi amakanze aakwe ninzila iiyandika kapati mubukombi bwabo. (Is. 43:10-12) Ikuti nobazyali kamuyanda kuti bana banu bakabe Bakamboni ba Jehova basyomeka, mweelede kutalika kabacili bana kubamba myoyo yabo kujatikizya zyamulimo. Amutubandike twaambo tutondezya ncociyandika kuba amuuya wakulyaaba mumulimo alimwi akutola lubazu mulinguwo insondo iili yoonse. (Mt. 22:37-39) Mpoonya amube aabubambe bwakuti kabatola lubazu lyoonse andinywe mumulimo wamumuunda.
4 Kuyungizya waawo, amuugwasye mukwasyi kuti ubone mbouyandika mulimo wakukambauka kwiinda mukuba aciindi mukati kansondo lyaciiyo camukwasyi cakulibambila alimwi akwiinduluka nzila imwi iibeleka kabotu mumuunda. Mwana amwana mweelede kumuyiisya mbokukambaukwa mumuunda, kamubagwasya kuyaampela kweelana aciimo cabo anzyobakonzya kucita. Mwajoka kuzyila mumuunda ambabo, amubandike mbuli mbobalibonena bubotu bwa Jehova mulweendo oolo. Amubaambile cakacitika cimwi ciyumya lusyomo. Imikwasyi mboizumanana ‘kulabila buuya bwa-Mwami,’ acalo cilongwe cabo a Jehova ciyooyuma, eelyo bayoogwasyigwa ‘kuleka bubi.’—1 Pet. 2:1-3.
5 Kumiswaangano: Elo kaka ncintu cibotu ciindi bamukwasyi nobakulwaizyanya kujanika kumiswaangano yoonse yambungano, ikapati ikuti umwi kalemede, katyompedwe naa kukatazyigwa! Mucizyi umwi uucili mwana-mwana wakati: “Iciindi bataata nobajoka kumilimo, inga balilemede. Pele ndilabandika ambabo kaambo kabotu ikayooyiigwa kumuswaangano mangolezya aayo, eelyo balakulwaizyigwa kuunka kukuswaangana. Alimwi andime iciindi nondilemede, balandiyumya-yumya kuunka kukuswaangana.”—Heb. 10:24, 25.
6 Kucita Zintu Antoomwe: Mikwasyi yeelede kucita zintu antoomwe mbuli kugwasyanya mumilimo yaaŋanda. Alimwi kweelede kuba aciindi cakucita cimwi cakulikondelezya cigwasya. Ikuya mumasena amwi mabotu, koolola maulu, kusobana alimwi akuswaya bamukowa abalongwe besu inga caba ciindi cakukkomana alimwi citalubiki.—Muk. 3:4.
7 Mikwasyi ya Bunakristo imiyumu ilabuzunda buyumuyumu bwabuzuba abuzuba mubuumi bwabo bwakumuuya. Kwiinda mukuba acilongwe ciyumu a Jehova, balayumizyigwa anguzu nzyapa.—Ef. 6:10.