Kabbokesi Kamubuzyo
◼ Ino ncinzi ncotweelede kuyeeya notubelesya mafooni amunkomwe alimwi atuncini tuzibya kuti tulayandika kumwi?
Zibelesyo eezi zilakonzya kutugwasya kubandika abamwi mumasena manji motukonzya kuba. Nokuba kuti zintu eezi zilagwasya, tweelede kucenjela kutegwa tutazibelesyi muziindi ziteelede alimwi akunyonganya mulimo wesu naa miswaangano ya Bunakristo. Ino mbuti zintu eezi mbozikonzya kunyonganya?
Amuyeeye cikonzya kucitika ikuti naa zintu eezi zyalilila iciindi nomuli mukupa bumboni mumulimo wamumuunda. Ino ncinzi ulaamunzi ncakonzya kuyeeya? Ino muzeezo nzi ulaamunzi ngwakonzya kuba aanguwo ikuti twaleka kukanana kulinguwe akutalika kukanana akancini aako? Masimpe, kunyina notunga twayanda kucita kufwumbwa cintu cikonzya kunyonganya bamwi ibali mukuswiilila mulumbe wa Bwami. (2 Kor. 6:3) Aboobo, ikuti naa twabwezyelezya fooni yamunkomwe naa kancini katuzyibya kuti tulayandika kumwi, tweelede kubona kuti twakabambila limwi kutegwa katatunyonganyi naa kunyonganya bamwi notuli mumulimo wamumuunda.
Ino mbuti eelyo notuli mukulindila bamwi ibali mukupa bumboni? Ikuti naa twabikka ambali ciindi cakucita mulimo wamumuunda, sena tatweelede kubikka mizeezo yesu kumulimo ooyu? Ikutegwa tutondezye bulemu kumulimo wesu uusetekene, mwalombwa kuti makani aamakwebo alimwi amakani amwi aatayandiki kapati aamugeme mwaacite aciindi cimbi. (Rom. 12:7) Pele eeci tacikonzyi kumulesya kubelesya fooni yanu kutegwa mupe bumboni naa kutuma kutegwa mupangane nomuya kubakambaukila alimwi.
Alimwi tweelede kucenjela kapati mbotubelesya mafooni aamunkomwe ciindi notuli mukweenzya mootokala akaambo kakuti kuvwuntauzya kumwi kutondezya kuti kucita boobu ziindi zinji nkokuleta ntenda. Tweelede kwiitobelezya kapati milawo yoonse iikasya kubelesya mafooni aamunkomwe notuli mukweenzya mootokala.
Tulaunka kumiswaangano ya Bunakristo, misyoonto alimwi amipati mbuli yacooko kutegwa tukombe Jehova alimwi akuyiisyigwa anguwe. Sena kusetekana kwaziindi eezi takweelede kutukulwaizya kwabambila limwi mafooni alimwi atuncini kutegwa zitatunyonganyi alimwi akunyonganya bamwi? Ikuti naa kwabuka kaambo katali kulangilwa nkotweelede kulanganya cakufwaambaana, tweelede kucita oobo anze aabusena buswaanganinwa. Pele, tweelede kulanganya twaambo ootu tutajatikizyi makani aabukombi muziindi zimwi.—1 Kor. 10:24.
Lyoonse atubelesye mafooni amunkomwe naa kufwumbwa mincini iibeleka aamagesi munzila iitondezya kuti tulabalanganya bamwi alimwi akuti tulalumba kupati kuzintu zyamuuya.