Amujane Zintu Nzyomuyandika Munzila Yakumuuya
1 Muswaangano Wacooko uuboola wa “Basikwaambilizya Bwami Ibasungu” uya kutupa coolwe citaliboteli cakujana zintu nzyotuyandika munzila yakumuuya. Mbubwenya mbuli cakulya cakumubili cizwide busani bubotu, eeyi ipulogilamu iyakutusanina ncobeni munzila yakumuuya ‘amajwi aabuzumino.’ (1 Tim. 4:6) Iyakutugwasya kubaa cilongwe cini-cini a Jehova. Alimwi tulakonzya kulangila kuyootambula lulayo akukulwaizyigwa ikukonzya kutugwasya kuliyumya notuli mumasunko mubuumi bwesu. Jehova utusyomezya kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.” (Int. 32:8) Elo tulilongezyedwe kapati kaka akaambo kakusololelwa anguwe munzila yaluyando mubuumi bwesu! Amulange-lange zintu zigwasya nzyotukonzya kucita ikutegwa tukagwasyigwe kapati kupulogilamu yamuswaangano.
2 Tweelede Kuubamba Moyo Wesu: Umwi aumwi wesu ulijisi mukuli wakukwabilila moyo wakwe wacikozyanyo. (Tus. 4:23) Ikutegwa tucite boobo, tweelede kulyeendelezya alimwi akulizyiba kabotu tobeni mbotubede mukati. Imuswaangano wacooko nciindi cakuzinzibala kuyeeya kujatikizya cilongwe cesu a Jehova ‘cakulanga mulawo uulondokede alimwi uupa lwaanguluko.’ Ikutegwa tubambe moyo wesu kuti tuzumine ‘majwi aasyangwa,’ tweelede kumulomba Jehova kuti atulingule, akututondezya cacigaminina kufwumbwa “nzila imbi” iili mulindiswe iiyandika kululamikwa alimwi akutweenzya “munzila iitamani.”—Jemu. 1:21, 25, Ci; Int. 139:23, 24.
3 Amuswiilile Akuzinzibala Kuyeeya: Jesu wakamulumbaizya kapati Mariya akaambo kakuti wakaswiililisya kumajwi aakwe, kaamba kuti: “Mariya walisalila caabilo cibotu ncatakooyoonyangwa.” (Lk. 10:39, 42) Ikuti katujisi miyeeyo iili boobu, kunyina notuya kulekela zintu zitayandiki kapati kutunyonganya. Tuyoobona kuti twakkalikila akuswiililisya kupulogilamu yoonse. Kunyina notuya kukanana naa kwiide kweendeenda buyo, alimwi tunoopakamene kutegwa tutanyonganyi bamwi amafooni amunkomwe, tuncini tuzibya kuti muntu ulayandika kumwi, zyakufwotozya alimwi amincini yakulekooda amavidiyo.
4 Iciindi notuswiilila kumakani aakananwa, cili kabotu kulemba twaambo mubufwaafwi itukonzya kutugwasya kuyeeyesya mbuli makani mbwaali mukupandululwa. Tweelede kweendelanya makani ngotuli mukumvwa ayaayo ngotuzyi kale. Ikucita boobo kuya kutugwasya kwaamvwisya makani alimwi akwaabikka mumizeezo. Notuli mukwiinduluka twaambo ntotwali kulemba, tweelede kucita oobo katujisi makanze aakuya kutubelesya twaambo ootu. Umwi aumwi wesu ulakonzya kulibuzya kuti: ‘Ino mbuti makani aaya mbwaajatikizya cilongwe cangu a Jehova? Ino nkucinca nzi nkondeelede kucita mubuumi bwangu? Mbuti mbondikonzya kwaabelesya makani aaya mukuyanzana kwangu abantu bambi? Mbuti mbondikonzya kwaabelesya mumulimo wamumuunda?’ Atubandike abantu bamwi twaambo ooto itwakatubotela kapati. Ikucita zintu eezi kuya kutugwasya kwaajatisya majwi aa Jehova “mukati kamoyo wesu.”—Tus. 4:20, 21.
5 Atuzibelesye Nzyotwiiya: Naakazwa kumuswaangano wacooko, imwaalumi umwi wakaamba kuti: “Ipulogilamu yakali kujatikizya bukkale bwamuntu buya kumugama, kukulwaizya kulingula bube bwamoyo wakwe alimwi abanamukwasyi wakwe alimwi akupa lugwasyo lwamu Magwalo luyandika. Yandipa kuuzyiba kabotu mukuli ngondijisi wakugwasya, ikapati mumbungano.” Cakutadooneka, ibunji bwesu kuli notwakalimvwide munzila eeyo. Pele takuyandiki kuyiila buyo akulimvwa kuti twakulwaizyigwa alimwi akukatalusyigwa pe. Jesu wakaamba kuti: “Mwanoozizi zintu ezi, muli acoolwe mwanoozicita.” (Joh. 13:17) Tweelede kusungwaala kutubelesya twaambo ooto tujatikizya ndiswe kutugama. (Flp. 4:9) Eeyi njenzila yakujanina zintu nzyotuyandika munzila yakumuuya.
Kabbokesi kali apeeji 5]
Amuzinzibale Kuyeeya Aazintu Nzyomumvwa:
■ Ino mbuti zintu nzyondimvwa mbozicijatikizya cilongwe cangu a Jehova?
■ Ino mbuti mbondeendelezya bamwi mbokujatikizyidwe?
■ Ino mbuti mbondikonzya kuzyibelesya mubuumi bwangu alimwi amumulimo wamumuunda?