Kabbokesi Kamubuzyo
◼ Ino mbuti umwi aumwi mbwakonzya kupa kuti kutabi kunyonganizyigwa lyamiswaangano yambungano? (Dt. 31:12)
Ikulemeka Jehova alimwi abubambe mbwaakabikka bwamiswaangano yambungano kupa kuti toonse katufwambaana kusika kutegwa tuyiisigwe anguwe. Tweelede kusaanguna kukkala kuzyuuno izili kumbele mu Ŋanda ya Bwami kutegwa aabo bajisi bana basyoonto alimwi abaabo bamuka kusika kabakkala kuzyuuno zili musyule. Tuncini twamunkomo tweelede kubambilwa limwi miswaangano kaitanatalika kutegwa tutanyonganyi baswiilizi. Zyintu zinyonganya zilakonzya kuceya ikuti naa bantu boonse bajanika bazumanana kulilemeka muciindi camiswaangano.—Muk. 5:1; Flp. 2:4.
Ciindi bapya nobatalika kujanika kumiswaangano, umwi wamumbungano uuzyibene ambabo ulakonzya kukkala ambabo. Ikucita boobo kulakonzya kugwasya, kwaambisya ikuti kabajisi bana basyoonto ibayandika kuyiisya kuti kabalilemeka lyamiswaangano. Mukwasyi ulakonzya kujana buyumu-yumu akaambo kakuti nkutalika kujanika kumiswaangano. Ikuti naa mboobo, balakonzya kulimvwa kabotu kukkalila kuzyuuno izili kusyule kwalo nkobatakonzyi kunyonganya bamwi ikapati ciindi bazyali nobazwida anze kutegwa bakalanganye nzyobayandika bana. (Tus. 22:6, 15) Bazyali ibajisi bana basyoonto tabeelede kukkalila mukaanda kabo beni mwalo bana mobakonzya kuyobeka kufwumbwa mbobayanda. Muzyali ulakonzya kuunka anze aa Ŋanda ya Bwami kuyakupa lulayo naa kulanganya zyintu zimwi nzyobayandika bana, amana akujokela mukati antoomwe abana bakwe.
Basikugwasyilizya bajisi mulimo wakubona kuti kunyina cintu cinyonganya bantu bali muŋanda yakukombela. Bagwasya mikwasyi alimwi abaabo bamuka kusika zimwi ziindi ikujana aakukkala. Basikugwasyilizya balasoleka canguzu ikugwasyilizya bamwi cabupampu acabusongo kutegwa bajane aakukkala kakunyina kunyonganya bamwi munzila iiteelede. Babelesya bupampu ciindi nokuli zyintu zyacibukila mbuta izikonzya kunyonganya miswaangano yesu. Ikuti mwana watalika kunyonganya bamwi, basikugwasyilizya balakonzya kupa lugwasyo munzila yaluyando.
Boonse bajanika kumiswaangano balakonzya kupa kuti kutabi kunyonganizyigwa ciindi notwiiya makani aajatikizya Jehova anyika mpya yaluumuno.—Heb. 10:24, 25