Imulimo Uuyandika Kapati
1. Ino nkulyaaba kuli buti nkotucita akaambo kakubona kuti mulimo wakukambauka ulayandika kapati?
1 Ino nkaambo nzi ncotukulwaizigwa lyoonse ikubelesya ciindi cesu, nguzu zyesu alimwi azyintu nzyotujisi mumulimo wakukambauka? Nkaambo kakuti kunyina mulimo uumbi uuyandika kwiinda mulimo ooyu! Ikulanga-langa mbobagwasyigwa bantu banji amulimo ooyu uutakaindululwi kuya kutukulwaizya kutola lubazu cabusungu.—Inc. 20:24.
2. Ino mbuti mulimo wesu wakukambauka mboupa kuti izyina lipati lya Jehova lisalazyigwe?
2 Usalazya Zyina lya Jehova: Mulimo wakukambauka ukankaizya kuti Bwami bwa Jehova kwiinda muli Kristo Jesu buya kunjila mubusena bwamfwulumende zyabantu akupa kuti mapenzi oonse aakatazya bantu amane. (Mt. 6:9, 10) Jehova ulalemekwa akubonwa kuti ngonguwe alikke uukonzya kugusya mapenzi oonse aakatazya bantu. (Is. 25:8; 33:24) Akaambo kuti tulaitwa azyina lyakwe, bantu babona milimo yesu mibotu abusungu mbotujisi balakonzya kumulemeka. (1 Pet. 2:12) Eelo kaka citupa kukkutila ikwaambilizya zyina lya Mwami Jehova imuleli wakoonse-koonse munyika yoonse!—Int. 83:18.
3. Ino nzilongezyo nzi nzyobajana aabo batambula mulumbe wa Bwami amaanza obilo?
3 Upa Lufwutuko: Jehova “tayandi kuti bantu bafwidilile, ulayanda kuti boonse bajane ciindi cakweempwa.” (2 Pet. 3:9) Aboobo, ino mbuti bantu mbobakonzya kwiiya bukkale mbwayanda ambwatayandi Jehova ikuti kakunyina uubayiisya? (Jon. 4:11; Rom. 10:13-15) Ciindi bantu nobatambula makani mabotu amaanza obilo, bukkale bwabo bulabota ciindi nobaleka micito mibi. (Mik. 4:1-4) Kuyungizya waawo, balaba abulangizi bwakuya kuba abuumi butamani. Ikukambauka akuyiisya cabusungu kupa kuti tulifwutule tobeni akufwutula baabo batuswiilila. (1 Tim. 4:16) Eelo kaka ncoolwe cipati ikutola lubazu mumulimo ooyu uuyandika kapati!
4. Ino nkaambo nzi ncotweelede kutola lubazu cabusungu mumulimo wakukambauka akugwasya bantu kuba basikwiiya?
4 Lino-lino mapenzi mapati aya kumanizya nyika eeyi iitaluleme mukulaba kwaliso. Bakombi ba Jehova baya kufwutulwa. Aboobo, mulimo wakukambauka akugwasya bantu kuba basikwiiya ngomulimo uuyandika kapati uucitwa mazuba aano. Tweelede kuubikkila maano kapati!—Mt. 6:33.