Kuyungizya Luzyibo Lwesu Mumulimo Wakukambauka—Kulemba Twaambo Tujatikizya Bantu Batondezya Luyandisisyo

“Kolibamba lyoonse omwini akubikkila maano kapati kukuyiisya kwako.” (1 Ti. 4:16) Lulayo oolu ilwakasololelwa amuuya wa Leza mwaapostolo Paulo ndwaakapa Timoteo, lutondezya kuti nokuba kuti tuli basikumwaya bapya naa bacibwene, tweelede kusolekesya kuyaambele. Kutegwa tugwasyigwe kucita oobo, kunooli cibalo cipya cinoozwa lyoonse mu Mulimo Wesu wa Bwami cijisi mutwe wakuti “Kuyungizya luzyibo lwesu mumulimo wakukambauka.” Mucibalo cimwi acimwi kunoobandikwa kaambo ikayandika kapati kakonzya kutugwasya kuyungizya luzyibo alimwi kunoopegwa nzila nzyotukonzya kubelesya. Mumwezi nokabandikwa kaambo aako, boonse bakulwaizyigwa kubikkila maano kukabelesya. Mpoonya wamana mwezi, cibeela ca Muswaangano Wamulimo cinootupa coolwe cakwaamba mbotwakagwasyigwa kwiinda mukubikkila maano kubelesya kaambo aako. Mwezi uuno tukulwaizyigwa kulemba twaambo tujatikizya bantu batondezya luyandisisyo.

Kaambo ncociyandika: Kutegwa tuuzuzikizye mulimo ngotupedwe, tweelede kucita azimwi kunze lyakukambauka buyo. Tweelede kupiluka kuli baabo batondezya luyandisisyo alimwi akubayiisya, nkokuti kutilila mbuto zyakasimpe nzyotwakasyanga. (Mt. 28:19, 20; 1 Ko. 3:6-9) Eeci caamba kuti tweelede kupiluka alimwi, akubandika ambabo zintu zibapa kulibilika, alimwi akwaamba makani aayungizyidwe kujatikizya nzyotwakabandika ambabo. Aboobo, ciindi notujana bantu balaaluyandisisyo, cilayandika kulemba twaambo tujatikizya mbabo.