Amupilukile Kubantu Boonse Batondezya Luyandisyo Noluceya
1 Bunji bwesu tuli mukasimpe sunu akaambo kakuti muntu umwi wakabona mbotwakautambula kabotu mulumbe wa Bwami alimwi wakapilukila kakunyina kutyompwa—ambweni kwaziindi zili mbozibede—kutegwa tube aluyandisyo lwiinda ndotwakajisi kusaanguna. Andiswe tweelede kupilukila cakubikkila maanu kubantu boonse batondezya luyandisyo noluceya. Masimpe, kupilukila kulibikkilizyidwe mumulimo wesu ‘wakuyiisya bantu.’—Mt. 28:19, 20.
2 Amuluzibe Luyandisyo: Nokuba kuti muntu tanaatambula mabbuku, mbwalibonya kubusyu, mbolimvwika jwi, naa majwi ngaamba, zilakonzya kutondezya luyandisyo noluceya ndwajisi kumulumbe wa Bwami. Akaambo kazintu eezi, tulakonzya kupilukila. Umwi mukwesu wakapilukila kumuntu umwi kwansondo zyosanwe ziccililene kakunyina kwaabila bbuku. Naakapilukila lwacisambomwe, muntu ooyu wakatambula mabbuku, eelyo mukuya kwaciindi ciiyo ca Bbaibbele cakatalisyigwa.
3 Ikuti naa mwabona luyandisyo, amupilukile cakufwambaana ambweni kwainda buyo mazuba masyoonto. Mutalekeli “mubi” kunyanzya ceeco cakaminzwa mumoyo wamuntu. (Mt. 13:19) Amube masimpe kuti mwacizuzikizya cisyomezyo canu ikuti naa mwabamba bubambe bwakupilukila aciindi cimwi.—Mt. 5:37.
4 Mubukambausi Bwamumugwagwa: Sena mulasolekesya kupilukila kubantu bajisi luyandisyo mbomujana nomuli mubukambausi bwamumugwagwa naa bwamukwiizya? Kumamanino aamubandi wanu, mulakonzya kwaamba kuti: “Ndaukkomanina mubandi ngotwajisi. Ino nkokuli nkondikonzya kumujana kutegwa tukabandike alimwi?” Nokwayandika, basikumwaya bamwi inga basala kupa namba yaluwaile lwabo kumuntu uujisi luyandisyo naa kulomba kupedana manamba aaluwaile. Ikuti bantu kabamubona lyoonse mubukambausi bwamumugwagwa abusena mbubonya, balakonzya kwaanguluka kumupa namba yaluwaile lwabo naa kkeyala. Nokuba kuti bakaka kumwaambila nkomukonzya kubajana, mulakonzya kuyoosoleka kubagwasya kuba aluyandisyo kapati ciindi ciboola mwaakubayaanya mumugwagwa.
5 Cilatukkomanisya kubona zisyango nzyotutililila akulimina nozikomena kabotu. Mbubwenya buyo, tulakonzya kujana lukkomano lupati kwiinda mukupilukila akugwasya bantu kuya ambele kumuuya. (1 Kor. 3:6) Amukanze kupilukila kubantu boonse batondezya luyandisyo noluceya.