Kuyungizya Luzyibo Lwesu Mumulimo Wakukambauka—Kubamba Ntalisyo Yakupilukila

Kaambo Ncociyandika: Ikuti twajana muntu iwatondezya luyandisisyo, tuyanda kuyoopilukila ciindi anooli kuŋanda kutegwa tukatilaile mbuto yakasimpe njotwakasyanga. (1 Ko. 3:6) Kanji-kanji kuyandika kuti katutanaunka, twasiya ntalisyo yakupilukila kwiinda mukubuzya mukamwini ŋanda notunga twapilukila. Kuyungizya waawo, inga cabota kusiya mubuzyo ngotuyoobandika ciindi ciboola twaakuswaya. Eeci inga capa kuti mukamwini ŋanda abe aluyandisisyo, alimwi ikuti mubuzyo kawiingulwa mubbuku ndyomwamusiila, kulalangilwa kuti inga walibala. Alimwi kubamba ntalisyo yamubandi uutobela cipa kuti cuube-ube kupilukila nkaambo mwasala kale makani aayoobandikwa, alimwi mukamwini ŋanda ulizyi ncayelede kulangila. Twapilukila, tulakonzya kwaamba kuti twaboola kuzooingula mubuzyo ngotwakasiya ciindi cainda notwakaswayide mpoonya akuzumanana amubandi.