Malifalensi Aamu Kabbuku Kamuswaangano Wabuumi Amulimo Wesu
MAY 6-12
MBONO IZILI MU JWI LYA LEZA | 2 BAKORINTO 4-6
“Tatulengaani Pe”
(2 Bakorinto 4:16) Aboobo tatulengaani pe, pele nokuba kuti buntu bwesu bwaanze buyaabunyonyooka, buntu bwesu bwamukati buyaabubukulusyigwa buzuba abuzuba.
Ibakatede Pele Batawizukide
Ikulanganya bukkale bwesu bwakumuuya kulayandika kapati. Ikuti katujisi cilongwe ciyumu a Jehova Leza, tulakonzya kukatala kumubili, pele tatukonzyi kukatala kumukomba pe. Jehova “ulakatalusya bakateede, abaabo batakwe inguzu ulabayumya.” (Isaya 40:28, 29) Imwaapostolo Paulo walo iwakacitikilwa cintu cili boobu wakalemba kuti: “[Tatukonzyi] kutyompokelwa. Nikuba kuti buntu bwesu bwaanze bulaloba, pele buntu bwesu bwamukati buya bulengululwa mazuba oonse.”—2 Ba-Korinto 4:16.
Amulange majwi aaya aakuti “mazuba oonse.” Eeci cipandulula kubelesya nzyatupa Jehova abuzuba. Mumisyinali umwi wakabeleka cakusyomeka kwamyaka iili 43 wakali kukatala akutyompwa. Pele tanaakakatala cakumaniina pe. Wakaamba kuti: “Ndijisi cilengwa cakubuka kubucedo ikutegwa kanditanatalika mulimo ndikonzye kujana ciindi cakupaila kuli Jehova alimwi akubala Jwi lyakwe. Ikucita boobu lyoonse candigwasya kuliyumya kusikila lino.” Masimpe, tulakonzya kusyoma nguzu zya Jehova izyakutuyumya ikuti naa “mazuba oonse” tulapaila kulinguwe alimwi akuzinzibala kuyeeya zyeelelo zyakwe zisumpukide kubikkilizya azisyomezyo zyakwe.
(2 Bakorinto 4:17) Nkaambo nokuba kuti mapenzi eesu ngakaindi buyo kaniini alimwi mauba-uba, atuletela bulemu bupati kapati butakonzyi kweezyanisyigwa alimwi ibutamani;
it-1 724-725
Kuliyumya
Cilayandika kapati kuzumanana kubikkila maano kubulangizi bwa Bunakristo, nkokuti buumi butamani katutajisi cibi. Noluba lufwu mumaanza aabasikupenzya talukonzyi kubunyonganya bulangizi oobu. (Rom. 5:4, 5; 1Tes. 1:3; Ciy. 2:10) Mapenzi aatucitikila mazuba aano masyoonto kapati twaayezyanisya akuzuzikizyigwa kwabulangizi oobu butaliboteli. (Rom. 8:18-25) Akaambo kakuti tuyoopona mane kukabe kutamani, mapenzi aali woonse aakonzya kutucitikila nokuba kuti alakatazya aciindi cino, “ngakaindi buyo kaniini alimwi mauba-uba.” (2Kor. 4:16-18) Muntu uuyeeya kuti mapenzi ngajisi ngakaindi buyo kaniini alimwi uuzumanana kubikkila maano kubulangizi bwa Bunakristo takonzyi kutyompwa alimwi akuleka kusyomeka kuli Jehova Leza.
(2 Bakorinto 4:18) kumwi meso eesu alanga zintu zitalibonyi ikutali zintu zilibonya. Nkaambo zintu zilibonya nzyakaindi kaniini buyo, pele izintu zitalibonyi tazimani pe.
Kuyandaula Mbono Zyakumuuya
(2 Bakorinto 4:7) Nokuba boobo, tujisi lubono oolu muziyobwedo zyabulongo, ikutegwa kulibonye kuti nguzu zigambya iziinda zyabantu nzyotujisi nzizya Leza ikutali zyesu tobeni pe.
w12 2/1 28-29
“Amupe Kuti Jehova Akkomane”
Ba David Splane bamu Kabunga Keendelezya bakaulanga-langa mutwe ooyu wamu Magwalo. (2 Bakorinto 4:7) Ino lubono ninzi? Sena nduzyibo naa mbusongo? Mwaambi wakati: “Peepe. Lubono ndwaakali kwaamba mwaapostolo Paulo ‘mulimo ooyu’ ‘wakuyiisya kasimpe.’” (2 Bakorinto 4:1, 2, 5) Mukwesu Splane wakayeezya basicikolo kuti myezi yosanwe njobakatola kwiiya yakali yakulibambila mulimo waalubazu mumulimo ooyu. Aboobo mulimo ooyu ncintu ciyandika kapati iceelede kubikkilwa maano.
Mwaambi wakapandulula kuti ‘ziyobwedo zyabulongo’ ziiminina mibili yesu yanyama. Wakeezyanisya ciyobwedo cipangidwe aabulongo alimwi aciyobwedo cipangidwe aangolida. Ziyobwedo zyangolida kanji-kanji tazibelesyegwi. Pele kulubazu lumwi, ziyobwedo zipangidwe aabulongo zyakabambilwa kuti kazibelesyegwa kapati. Ikuti twabikka lubono muciyobwedo cangolida, tulakonzya kubikkila kapati maano kuciyobwedo kwiinda lubono luli mukati. Mukwesu Splane wakaamba kuti: “Nywebo nobasicikolo tamweelede kuba aamakanze aakulipangila mpuwo. Mbomuli bamisyinali, mweelede kupa kuti bantu balemeke Jehova. Nkaambo nywebo muli zibelesyo buyo zyabulongo.”
(2 Bakorinto 6:13) Aboobo, ikutegwa tupane maanzaasokwe, ndimwaambila mbuli bana bangu kuti anywebo amujalule myoyo yanu kulindiswe.
Kamuzumanana Kuyandana
Ino mbuti swebo? Mbuti mbotukonzya ‘kujalula myoyo yesu,’ notumvwana abakwesu? Bantu bamusela naa musyobo omwe kanji-kanji balamvwana. Alimwi abaabo bayanda zyintu zikozyanya bunji bwaziindi baba antoomwe. Pele ikuti katutamvwani a Banakristoma bamwi akaambo kakuti zyintu nzyotuyanda balo tabaziyandi, tweelede ‘kujalula moyo wesu.’ Inga cagwasya kulibuzya kuti: ‘Sena ndilaakuunka buyo mumuunda naa kwiizya abaabo bakwesu abacizyi mbondimvwana limwi? Ku Ŋanda ya Bwami, sena tandiyandi kwiizya abapya mumbungano akaambo kakuyeeya kuti tuyakumvwana mukuya kwaciindi baakusima kumuuya? Sena ndilabaanzya boonse mumbungano, ibana abapati?’
AMUSUNGWAALE MUMULIMO WAMUMUUNDA
Mibuzyo Yabasikubala
Kulugwalo lwa 2 Ba-Korinto 6:14, ino mbaani Paulo mbaamba nabelesya bbala lyakuti “batali bazumini”?
Kulugwalo lwa 2 Ba-Korinto 6:14 tubala kuti: “Mutabi nimusungwa mujoko antoomwe abaabo batali bazumini.” Ikuti twalanga mbocilembedwe cibalo eeci, cilalibonya kuti Paulo waamba bantu bamwi batali mucibeela cambungano ya Banakristo. Iluzibo oolu luleendelana atupango tumwi twamu Bbaibbele twaamba Paulo mbwaakali kubelesya bbala lyakuti ‘utali muzumini’ naa “batali bazumini.”
Mucikozyanyo, Paulo usinsa Banakristo mukuunka kunkuta ‘yabaabo batali bazumini.’ (1 Ba-Korinto. 6:6) Aawa batali bazumini mbabetesi babeleka munkuta yaku Korinto. Mulugwalo lwakwe lwabili, Paulo waamba kuti Saatani “waofwaazya meso aabaabo batazumi[ni].” Meso abaabo batali bazumini ‘alivwumbidwe’ kumakani mabotu. Aaba batali bazumini tabajisi aluyandisyisyo mukubelekela Jehova, mbwaanga Paulo kumatalikilo wakapandulula kuti: “Anukuti kufumbwa ciindi ncibapilukila [kuli Jehova], cilisitilizyo cilagwisigwa.”—2 Ba-Korinto 3:16; 4:4.
Bamwi batali bazumini balajanika mumicito mibyaabi naa kukomba mituni. (2 Ba-Korinto 6:15, 16) Nokuba boobo, tabali boonse bakazya babelesi ba Jehova. Bamwi balatondezya luyandisyisyo kukasimpe. Banji bakwete naa kukwatwa ku Banakristo, balikkomene kukkala ambabo. (1 Ba-Korinto 7:12-14; 10:27; 14:22-25; 1 Petro 3:1, 2) Nokuba boobo, Paulo mumagwalo oonse cakutalekezya wabelesya bbala lyakuti “batali bazumini” kubantu bamwi mbuli mbokwaambwa kumatalikilo, batali mucibeela cambungano ya Banakristo yalo iibambwa ‘abasyomi ku Mwami.’—Incito 2:41; 5:14; 8:12, 13.
Injiisyo iijanika ku 2 Ba-Korinto 6:14 ilabasololela kabotu Banakristo mubuumi bwabo boonse alimwi kanjikanji yazubululwa kuti ndulayo lwabusongo ku Banakristo aabo bayandaula mweenzinyina wamulukwatano. (Matayo 19:4-6) Munakristo uulyaabide uubbapatizyidwe, camaano tayandauli mweenzyinyina wamulukwatano akati kabaabo batali bazumini, mbwaanga mbobalilemeka, imbaakani njobajisi alimwi anzyobasyoma batali bazumini ziliindene kapati anzyabaabo Banakristo bakasimpe.
Nokuba boobo, ino mbuti aabo bamwi bayiya Bbaibbele alimwi ibajanika mumbungano ya Banakristo? Ino mbuti aabo basikumwaya batana bbapatizyigwa? Sena abalo mbantu batazumini? Peepe. Aabo bazumina kasimpe kamakani mabotu alimwi bayaambele asyoonto-syoonto akweelela kubbapatizyigwa tabeelede kwaambwa kuti batali bazumini. (Ba-Roma 10:10; 2 Ba-Korinto 4:13) Katana bbapatizyigwa Korneliyo wakali kwiitwa kuti, “muntu uukomba, uuyoowa Leza.”—Incito 10:2.
Sena inga caba camaano ku Munakristo ulyaabide kweeba alimwi akukwata naa kukwatwa kumuntu wazumizyigwa caino kuba sikumwaya uutana bbapatizyigwa mbwaanga kwaamba masimpe, ilulayo lwa Paulo lulembedwe ku 2 Ba-Korinto 6:14 talukonzyi kubeleka mubukkale oobo? Peepe tacili camaano. Nkaambo nzi? Nkaambo kalulayo lugaminide Paulo ndwaakapa lujatikizya bamukabafwu Banakristo. Paulo wakalemba kuti: ‘Ulilubukide kukwatana kufwumbwa ngwayanda, ccita buyo mu Mwami.’ (1 Korinto 7:39) Ikweelana alulayo oolo, Banakristo balyaabide balakulwaizyigwa kuyandaula beenzyinyina bamulukwatano akati kabaabo buyo ‘bali mu Mwami.’
Ino mabala aakuti “wamu-Mwami” alimwi aakonzyenyi aakuti “wamuli-Kristo” aamba nzi? Paulo ku Ba-Roma 16:8-10 alimwi aku Ba-Kolose 4:7 waamba zyabantu bamwi bakali “muli-Kristo” naa “mu-Mwami.” Ikuti mwabala tupango ooto, mulakonzya kubona kuti aaba bali boobo ‘mbaasimilimoma,’ bayumu, ‘mbakwesu bayandika,’ ‘basimilimoma basyomeka’ alimwi ‘mbazikema.’
Ino ndilili muntu naba ‘muzike mu Mwami’? Ulaba muzike mu Mwami ciindi nacita cakulisungula milimo muzike njacita alimwi akuliimya mwini. Jesu upandulula kuti: ‘Ikuti muntu kayanda kunditobela, aliimye, abweze cisamu cakupenzyezya akunditobela.’ (Matayo 16:24) Muntu utalika kumutobela Kristo akulyaaba mwini cakumaninina kucita kuyanda kwa Leza ciindi nalyaaba alikke kuli Leza. Kwamana boobo, ulalipa mwini kuti abbapatizyigwe akuba mubelesi uuzuminizyidwe kumeso aa Jehova Leza. Aboobo ‘kukwata naa kukwatwa mu Mwami’ caamba kukwata antela kukwatwa kumuntu umwi uutondezya kuti musyomi ncobeni, ulyaabide kuba “muzike wa-Leza awa Mwami Jesu Kristo.”—Jakobo 1:1.
Muntu wiiya Bbaibbele a Bakamboni ba Jehova alimwi uuyaambele kapati kumuuya weelede kulumbaizyigwa. Nokuba boobo, taningalyaaba kuli Jehova alimwi akulipa kubeleka mulimo mubuumi bwakwe. Ucicita kucinca kuyandika. Weelede kumanizya kucinca kupati kujatikizyidwe mukuba Munakristo ubbapatizyidwe ulyaabide katanayeeya zyakucinca kumwi kupati mubuumi mbuli lukwatano.
Sena ncamaano ku Munakristo kweebana amuntu ulibonya kuti uyaambele muciiyo cakwe ca Bbaibbele, andiza amakanze akulindila kusikkila wabbapatizyigwa? Peepe. Makanze aasikwiiya Bbaibbele alakonzya kunyongana ikuti kazyi Munakristo ulyaabide uyanda kumukwata naa kukwatwa, pele takonzyi kucita oobo kusikila wabbapatizyigwa.
Kanjikanji imuntu uutana bbapatizyigwa ngusikumwaya buyo kwaciindi cisyoonto, weelede kuyaambele kusikila wabbapatizyigwa. Aboobo lulayo luli kumatalikilo lwakukwata naa kukwatwa buyo mu Mwami taluli luyumu. Ino mbuti ikuti muntu wasika mpakonzya kutwata naa kukwatwa waazyalilwa mumukwasyi wa Banakristo, kali musungu mumbungano kwamyaka minji alimwi kali sikumwaya uutana bbapatizyigwa? Ikuti naa mboobo, ino ncinzi camulesya kwaaba buumi bwakwe kuli Jehova? Ino ncinzi cimupa kuwayawaya? Sena uladooneka? Nokuba kuti tali muzumini, takonzyi kwaambwa kuti ‘ngwamu Mwami.’
Lulayo lwa Paulo kujatikizya lukwatano lulatugwasya. (Isaya 48:17) Ciindi aabo bayanda kukwatana nobalyaaba kuli Jehova, ikusinizya kwabo kuli umwi aumwi mulukwatano kulijisi kaambo kabotu kakumuuya. Bayandisya zintu zyeelene ambaakani zikozyene. Eeci ciletela lukkomano kapati mulukwatano. Kuyungizya waawo, kwiinda ‘mukukwata naa kukwatwa buyo mu Mwami,’ imuntu ooyo ulasyomeka kuli Jehova alimwi kucita boobo kusololela kuzilongezyo zitamani, nkaambo ‘kuli yooyo uusyomeka, O Mwami Leza ulasyomeka.’—Intembauzyo 18:25.
MAY 13-19
MBONO IZILI MU JWI LYA LEZA | 2 BAKORINTO 7-10
“Mulimo Wesu Ulabikkilizya Akugwasya Bakwesu Ciindi Nobacitikilwa Ntenda”
(2 Bakorinto 8:1-3) Lino bakwesu tuyanda kumuzyibya luzyalo lwa Leza ilwakatondezyegwa kumbungano zyaku Makedoniya. 2 Ciindi bantu bamumbungano eezyi nobakali kusunkwa kapati mumapenzi, lukkomano lwabo lutalivwulili abucete bwabo butaambiki zyakapa kuti bwaabi bwabo buvwule kapati. 3 Nkaambo bakapa kweelana ambobakali kukonzya, inzya, ndilakonzya kubacitila bumboni kuti, bakacita boobo kwiindilila ambobakali kukonzya.
w98 11/1 25 ¶1
“Leza Uyanda Muntu Uupa Kumwi Kakkomene”
Cakusaanguna, Paulo wakaambila bana Korinto kujatikizya bana Makedoniya, balo ibakajisi cikozyanyo cibotu cakufwambaana kugwasya. Paulo wakalemba kuti: “Ciindi bantu bamumbungano eezyi nobakali kusunkwa kapati mumapenzi, lukkomano lwabo lutalivwulili abucete bwabo butaambiki zyakapa kuti bwaabi bwabo buvwule kapati.” Bana Makedoniya kunyina nobakasinikizyigwa buya pe. Mukwiimpana, Paulo wakaamba kuti “cakulisungula bakazumanana kutulomba akutukombelezya kapati kuti bazumizyigwe kuba acoolwe cakupa.” Bwaabi bwabana Makedoniya mbobwiinda kapati ciindi notulanga kuti abalo kubagama bakali ‘bacete citaambiki.’—2 Bakorinto 8:2-4.
Kukomba Jehova Kulabikkilizya Akugwasya Bamwi Kumubili
MUUMWAKA wa 46 C.E., alimwi mu Judaya muli nzala mpati. Akaambo kakuceya kwazyakulya, myuulo yazyakulya yatanta kapati alimwi basikwiiya ba Kristo ba Juda tabakonzyi kuzyuula. Balifwide nzala kapati. Nokuba boobo, basikwiiya ba Kristo balaafwaafwi kukwabililwa a Jehova munzila njobatanabwene kuzwa kaindi. Ncinzi ciyanda kucitika?
(2 Bakorinto 8:4) Cakulisungula bakazumanana kutulomba akutukombelezya kapati kuti bazumizyigwe kuba acoolwe cakupa alimwi akutola lubazu mumulimo wakugwasya basalali.
Kukomba Jehova Kulabikkilizya Akugwasya Bamwi Kumubili
Mulugwalo lwakwe lwabili ndwaakalembela bana Korinto, Paulo wakapandulula kuti mulimo uusetekene ngobajisi Banakristo uli muzibeela zyobilo. Nokuba kuti lugwalo lwa Paulo lwakalembelwa Banakristo bananike, majwi aakwe alabeleka ‘akumbelele zimbi’ mazuba aano. (Joh. 10:16) Cibeela cimwi camulimo wesu cijatikizya “mulimo wakuyanzanya,” nkokuti, mulimo wesu wakukambauka akuyiisya. (2Kor. 5:18-20; 1Tim. 2:3-6) Cibeela cimwi cijatikizya mulimo ngotubelekela basyomima. Paulo wakawaamba cacigaminina kuti “mulimo wakugwasya.” (2Kor. 8:4) Kujatikizya majwi aakuti “mulimo wakuyanzanya” alimwi aakuti “mulimo wakugwasya,” mumasena oonse obilo ibbala lyakuti “mulimo” lisandululwa kuzwa kubbala lya Chigiriki lyakuti di·a·ko·niʹa. Nkaambo nzi ncotweelede kukabikkila maano kaambo aaka?
Kwiinda mukubelesya bbala lyomwe lyamu Chigiriki kwaamba milimo yoonse yobilo, Paulo wakatondezya kuti mulimo wakugwasya ulikozyenye amisyobo iimbi yamilimo iyakali kubelekwa a Banakristo mumbungano. Kumatalikilo wakaamba kuti: “Kuli milimo yiindene-indene, pele kuli buyo Mwami omwe; alimwi kuli nzila zyakubeleka ziindene-indene, . . . Pele milimo yoonse eeyi ilacitwa amuuya omwe nguwenya ooyu.” (1Kor. 12:4-6, 11) Paulo wakatondezya kuti milimo yambungano iisiyene-siyene ileendelana a “mulimo uusetekene.” (Rom. 12:1, 6-8) Nkakaambo kaako wakalimvwa kuti cakali kuyandika kulinguwe kwaaba ciindi cakwe kuti ‘akutaukile basalali’!—Rom. 15:25, 26.
Paulo wakagwasya bana Korinto kubona ikaambo mulimo wakugwasya bamwi ncowakali cibeela camulimo wabo uusetekene alimwi acibeela cabukombi bwabo kuli Jehova. Amubone ncaakali kupandulula: Banakristo ibagwasya bamwi balacita oobo nkaambo ‘balalibombya kumakani mabotu aamba Kilisito.’ (2Kor. 9:13) Aboobo, kwiinda mukukulwaizyigwa aluyandisisyo lwabo lwakubelesya njiisyo zya Kristo, Banakristo balabagwasya basyominyina. Paulo wakaamba kuti milimo mibotu njobabelekela Banakristonyina ‘nduzyalo lwa Leza lulibedelede.’ (2Kor. 9:14; 1Pet. 4:10) Aboobo, kujatikizya kugwasya bakwesu babulide, kwalo ikubikkilizya amulimo wakugwasyilizya kumubili, Ngazi Yamulindizi yamu Chingisi ya December 1, 1975, yakaamba kuti: “Tatweelede kudooneka kuti Jehova Leza alimwi a Mwanaakwe Jesu Kristo balaubikkila kapati maano mulimo uuli boobu.” Inzya, mulimo wakugwasyilizya bamwi kumubili ncibeela iciyandika kapati camulimo uusetekene.—Rom. 12:1, 7; 2Kor. 8:7; Heb. 13:16
(2 Bakorinto 9:7) Umwi aumwi acite mbuli mbwaasala mumoyo wakwe, ikutali kupa kumoyo kakusiya naa cakusinikizyigwa buya, nkaambo Leza uyanda muntu uupa kumwi kakkomene.
Nkwaajanwa Mali Aakubelesya Mumilimo ya Bwami
Kaambo kakusaanguna nkakuti, tulasanga cakuliyandila akaambo kakuti tulamuyanda Jehova alimwi tuyanda ‘kucita zintu zibotu mumeso aakwe.’ (1Joh. 3:22) Jehova ulakkomana ncobeni amukombi uupa kuzwa aansi aamoyo. Atulange-lange majwi aamwaapostolo Paulo aajatikizya kupa kwa Banakristo. (Amubale 2 Bakorinto 9:7.) Munakristo wakasimpe tali sikupa uuwayawaya naa uusinikizyigwa buya. Muciindi caboobo, ulapa akaambo kakuti ‘wasala mumoyo wakwe’ kuti acite oobo. Ulacita oobo ciindi naabona cintu cibulide ambwakonzya kugwasya. Sikupa uuli boobo ulakkomaninwa a Jehova, “nkaambo Leza uyanda muntu uupa kumwi kakkomene.” Busanduluzi bumwi bwaamba kuti: “Leza ulabayanda bantu ibakkomanina kupa.”
Kuyandaula Mbono Zyakumuuya
(2 Bakorinto 9:15) Aalumbwe Leza akaambo kacipego cakwe citabbadelwi citakonzyi kupandululwa.
w16.01 9-10 ¶2
Amukulwaizyigwe ‘Acipego ca Leza Citabbadelwi Citakonzyi Kupandululwa’
Paulo wakalizyi kuti cituuzyo ca Jesu cipa cisyomezyo cakuti zisyomezyo zya Leza zyoonse zitaliboteli ziyoozuzikizyigwa. (Amubale 2 Bakorinto 1:20.) Eeci caamba kuti ‘cipego ca Leza citabbadelwi citakonzyi kupandululwa’ cibikkilizya cituuzyo ca Jesu, bubotu boonse alimwi aluyando lutamani eezyo Jehova nzyatutondezya. Cipego citaliboteli cili boobu tacikonzyeki pe kucipandulula munzila njotukonzya kumvwisya cakumaninina. Ino cipego eeci cilibedelede ceelede kutupa kulimvwa buti? Alimwi mbuti cipego eeci mboceelede kutukulwaizya ciindi notulibambila Ciibalusyo calufwu lwa Kristo iciyoocitwa muli Bwatatu, mu March 23, 2016?
(2 Bakorinto 10:17) “Pele ooyo uulidunda, aalidunde muli Jehova.”
g99 7/8 20-21
Sena Cililubide Kulidunda?
Mu Magwalo aa Banakristo aa Chigiriki, ibbala lyakuti kau·khaʹo·mai, ilyakasandululwa kuti “kulilumbaizya, kukkomana, kulidunda,” lilabelesyegwa munzila iitaluzi alimwi ailuzi. Mucikozyanyo, Paulo wakaamba kuti tulakonzya ‘kukkomana akaambo kabulangizi bwakutambula bulemu bwa Leza.’ Alimwi wakakulwaizya kuti: “Ooyo uulidunda, aalidunde muli Jehova.” (Baroma 5:2; 2 Bakorinto 10:17) Eeci caamba kulilumbaizya muli Jehova akaambo kakuti ngu Leza wesu, imajwi aakonzya kutupa kukkomana akaambo kazina lyakwe libotu alimwi ampuwo yakwe.
MAY 20-26
MBONO IZILI MU JWI LYA LEZA | 2 BAKORINTO 11-13
“‘Mumvwa Mumubili’ wa Paulo”
(2 Bakorinto 12:7) akaambo buyo kakutambula ziyubunuzyo eezyo zigambya. Ikutegwa nditalisumpuli cakwiindilila, ndakayaswa mumvwa mumubili, imungelo wa Saatani kuti kanduuma lyoonse, ikutegwa nditalisumpuli cakwiindilila.
Kuba Anguzu Nokuba Kuti Mulikompeme
Mubelesi uusyomeka aumbi wakalomba Jehova kuti amugusyile “bumvwa buyasa mumubili,” nkokuti penzi ilyakali kumuzumanana. Mwaapostolo Paulo wakakombelezya Leza ziindi zyotatwe kuti acigusye cakali kumukatazya. Kufwumbwa naa cakamukatazyide cakali nzi, mbubwenya mbuli bumvwa bupenzya, ambweni cakali kupa kuti Paulo katakkomani mumulimo wa Jehova. Penzi eeli Paulo wakalikozyanisya kucintu cipenzya lyoonse. Jehova wakamwiingula kuti: “Luse lwangu lulikkwene, nkaambo nguzu zyangu zilalondoka mubuteteete.” Jehova tanaakabugusya pe bumvwa buyasa mumubili. Paulo wakazumanana kulwana apenzi eeli, pele wakayungizya kuti: “Ciindi nendili muteteete, ndendilyo nendaanguzu.” (2 Bakorinto 12:7-10, BT) Ino ncinzi ncaakali kupandulula?
(2 Bakorinto 12:8, 9) Ziindi zyotatwe ndakakombelezya Mwami akaambo kaceeci, kuti cindileke. 9 Pele walo wakandaambila kuti: “Luzyalo lwangu lulizulide kulinduwe, nkaambo nguzu zyangu zilalondolwa mukubula nguzu kwako.” Aboobo cakukondwa, ndilalidunda kujatikizya kubula nguzu kwangu, ikutegwa nguzu zya Kristo zizumanane kundivwumba mbuli tente.
Jehova Ulapa “Muuya Uusalala Abakumbila Kulinguwe”
Ikwiingula mipailo ya Paulo, Leza wakamwaambila kuti: “Luse lwangu lulikkwene, nkaambo nguzu zyangu zilalondoka mubuteteete.” Paulo wakati: “Aboobo, ndalikankaizya abuteteete bwangu cakukondwa, kuti nguzu zya Kilisito zibe alindime [mbuli itente, NW].” (2 Bakorinto 12:9, Ci; Intembauzyo 147:5) Aboobo, Paulo wakabona kuti kwiinda muli Kristo, inguzu zya Leza zyakali muvwumbilide mbuli itente. Mazuba aano, Jehova ulaingula mipailo yesu munzila njiyonya. Mbuli citabilizyo, Jehova ulakwabilila babelesi bakwe.
Masimpe, itente talilesyi mvwula kuwa naa myuuwo kuunga, pele lilapa bukwabilizi kuzintu eezi. Mbubonya buyo, citabilizyo cipegwa kwiinda mu “nguzu zya Kilisito” tacilesyi masukusyo kutusikila naa kupa kuti tutasikilwi makatazyo. Nokuba boobo, cilaakutupa lukwabililo lwakumuuya kuzintu zibyaabi zyanyinka eeyi alimwi anotulwanwa amuleli wanjiyo, Saatani. (Ciyubunuzyo 7:9, 15, 16) Aboobo, nokuba kuti mulanganya sukusyo limwi ‘litazwi,’ mulakonzya kusyoma kuti Jehova ulibwene kuliyumya kwanu alimwi akuti waingula “ijwi lyakukwiila kwanu.” (Isaya 30:19; 2 Ba-Korinto 1:3, 4) Paulo wakalemba kuti: “Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.”—1 Ba-Korinto 10:13; Ba-Filipi 4:6, 7.
(2 Bakorinto 12:10) Aboobo ndilabotelwa eelyo nonditajisi nguzu, nonditukilwa, nondibula ziyandika, nondipenzyegwa akucitikilwa mapenzi aambi akaambo ka Kristo. Nkaambo eelyo nonditajisi nguzu, ndendilyo nondijisi nguzu kapati.
“Muntu Uukatede Ulamupa Nguzu”
Amubale Isaya 40:30. Nokuba kuti inga katujisi luzyibo lunji buti, tulalezya kujatikizya zintu nzyotukonzya kucita munguzu zyesu. Eeci nceciiyo toonse ncotweelede kwiiya. Nokuba kuti wakali mwaalumi uucibwene, mwaapostolo Paulo wakali kulezya mumbazu zimwi calo cakali kumupa kuti aalilwe kucita zyoonse nzyaakali kuyanda kucita. Ciindi naakaambila Leza kujatikizya kulibilika kwakwe, wakaambilwa kuti: “Nguzu zyangu zilalondolwa mukubula nguzu kwako.” Paulo wakakabona kaambo. Wakamanizya kwiinda mukwaamba kuti: “Eelyo nonditajisi nguzu, ndendilyo nondijisi nguzu kapati.” (2Kor. 12:7-10) Ino ncinzi ncaakali kupandulula naakaamba boobo?
Paulo wakalizyi kuti nzisyoonto zintu nzyaakali kukonzya kucita kakunyina kugwasyigwa amuntu uusumpukide. Muuya uusalala wa Leza wakali kukonzya kumupa Paulo nguzu nzyaakabulide. Tacili ceeco buyo pe, pele alimwi muuya uusalala wa Leza wakali kukonzya kumupa nguzu Paulo zyakucita milimo eeyo njaatakali kukonzya kuzuzikizya munguzu zyakwe mwini. Ncimwi buyo andiswe mazuba aano. Ikuti naa nguzu nzyotujisi zizwa kuli Jehova, tuyooba bayumu ncobeni!
Kuyandaula Mbono Zyakumuuya
(2 Bakorinto 12:2-4) Kuli muntu umwi uukamantene a Kristo ngondizyi, ooyo myaka iili 14 yainda wakakwempelwa kujulu lyatatu. Lino tandizyi naa wakakwempwa kali amubili wanyama naa pe; Leza alikke nguuzyi. 3 Inzya, muntu uuli boobo ndilimuzyi, pele tandizyi naa wakali amubili wanyama naa wakalaandeene amubili; Leza nguuzyi. 4 Ncondizyi ncakuti wakakwempelwa muparadaiso akumvwa majwi aataambiki alimwi aatazumizyidwe kwaambwa amuntu.
Mibuzyo Yabasikubala
“Julu lyatatu” ilyaambidwe kulugwalo lwa 2 Bakorinto 12:2 kweelede kuti lyaamba Bwami bwabu Mesiya ibuli mumaanza aa Jesu Kristo alimwi aba 144,000, nkokuti “majulu mapya.”—2Pet. 3:13.
Lyaambwa kuti “julu lyatatu” akaambo kakuti Bwami mbweendelezi bubotu, ibusumpukide kapati.
“Paradaiso” mwalo Paulo ‘mwaakakwempelwa’ mucilengaano kweelede kuti yaamba (1) Paradaiso iini kwiigama iiyooboola anyika, (2) paradaiso yakumuuya iyooba kumbele, yalo iyookomena kapati kwiinda paradaiso yakumuuya iiliko lino, alimwi (3) ‘aparadaiso ya Leza’ iili kujulu yalo iiyoobako aciindi comwe munyika mpya.
(2 Bakorinto 13:12) Kamwaanzyanya akumyontana kusalala.
it-2 177
Kumyonta
‘Kumyontana Kusalala.’ Akati ka Banakristo bakusaanguna kwakali ‘kumyontana kusalala’ (Rom. 16:16; 1Kor. 16:20; 2Kor. 13:12; 1Tes. 5:26) naa ‘kumyontana kwaluyando’ (1Pet. 5:14), kwalo ikulangilwa kuti kwakali kucitwa abantu ibakakozyenye zizo. Kwaanzyanya ooku kwa Banakristo bakusaanguna ambweni kuleendelana acilengwa cakwaanzyanya cabana Hebrayo bansiku ibakali kwaanzyanya kwiinda mukumyontana. Nokuba kuti Magwalo kunyina naamba twaambo tunji, ‘kumyontana kusalala’ naa ‘kumyontana kwaluyando’ kweelede kuti kwakali kutondezya luyando alimwi alukamantano ilwakali mumbungano ya Banakristo.—Joh. 13:34, 35.
MAY 27–JUNE 2
MBONO IZILI MU JWI LYA LEZA | BAGALATIYA 1-3
“Ndakamukazya Cakaanzambwene”
(Bagalatiya 2:11-13) Nokuba boobo, Kefasi naakaboola ku Antiokeya, ndakamukazya cakaanzambwene akaambo kakuti wakalilubizyide. 12 Nkaambo kabatanasika baalumi bamwi bazwa kuli Jakobo, wakali kulya abantu bamasi; pele nobakasika, wakacileka alimwi wakalyaandaanya kulimbabo, ikuyoowa baabo bakapalwidwe. 13 Ba Juda bamwi boonse abalo bakamusangana mukulicengeezya ooku, cakuti naba Barnaba awalo wakayungwa antoomwe ambabo mukulicengeezya kwabo.
Sena Bululami Mububona Mbuli Mbwabubona Jehova?
Amubale Bagalatiya 2:11-14. Petro wakacegwa mukakole kakuyoowa bantu. (Tus. 29:25) Nokuba kuti wakatondezyegwa cacigaminina kujatikizya Jehova mbwaakali kuyeeya mumakani aaya, Petro wakayoowa ncobakali kukonzya kwaamba ba Juda bamumbungano yaku Jerusalemu balo ibakapaludwe. Mwaapostolo Paulo, walo iwakaliko kumuswaangano waku Jerusalemu mu 49 C.E., wakamusikila Petro ku Antiyokeya akukuyubununa kuupaupa ameso kwakwe. (Mil. 15:12; Gal. 2:13, bupanduluzi buyungizyidwe) Ino bakali kuyoolimvwa buti Banakristo Bamasi balo ibakajatikizyigwa akutalulama nkwaakatondezya Petro? Sena bakali kuyoolekela kuti balebwe akaambo kaceeci? Sena Petro wakali kuyoonyangwa mikuli njaakajisi akaambo kakulubizya kuli boobu?
(Bagalatiya 2:14) Pele nondakabona kuti tabeendi kweelana akasimpe kamakani mabotu, ndakaambila Kefasi kumbele lyabo boonse kuti: “Ikuti yebo, nokuba kuti uli mu Juda, kopona mbobapona bamasi, ikutali bupona ba Juda, ino mbuti mbokonzya kusinikizya bantu bamasi kuti kabapona kweelana acilengwa caba Juda?”
Aabo Ibayandisya Jehova, “Tabajisi Cibalebya”
Zimwi ziindi, Petro wakalebwa bubi akaambo kakuyoowa muntu, nokuba boobo, wakazumanana kusyomeka kuli Jesu a Jehova. Mucikozyanyo, wakamukaka Simalelaakwe, kutali buyo ciindi comwe, pele ziindi zyotatwe. (Lk. 22:54-62) Nikwakainda ciindi, Petro wakaalilwa kucita zyintu mbuli Munakristo, Bamasi basyomi wakali kubabona kuti tiibakali kuyandika kapati mbuli Banakristo ba Juda ibakapalwidwe. Nokuba boobo, mwaapostolo Paulo wakakabona kaambo munzila iili kabotu—mbungano tiiyakali busena bwakusalana. Muuya ngwaakatondezya Petro tiiwakali kabotu. Bukkale bwa Petro kabutananyonganya bunyina boonse, Paulo wakabweza ntaamu kwiinda mukulaya Petro cacigaminina. (Gal. 2:11-14) Sena kulisumpula kwa Petro kwakapa kuti acileke muzundano wabuumi? Peepe. Wakalubikkila maano kapati lulayo lwa Paulo kwiinda mukulubelesya alimwi akuzumanana mumuzundano.
Kuyandaula Mbono Zyakumuuya
(Bagalatiya 2:20) Lino ndiligagailidwe aacisamu antoomwe a Kristo. Nsicili ndime ndipona pe, pele ngu Kristo uupona mulindime. Masimpe, ibuumi mbondipona lino mumubili ooyu ndilapona akaambo kalusyomo ndondijisi mu Mwana wa Leza, iwakandiyanda akulyaaba akaambo kandime.
Amubelekele Leza Cakusyomeka Nokuba Kuti Kuli “Mapenzi Manji”
Mbuti kujatikizya kulwanwa cabucenjezu? Mucikozyanyo, mbuti mbotukonzya kulwana kutyompwa? Nzila yiinda kugwasya nkuzinzibala kuyeeya kujatikizya cinunuzyo. Eeci ncaakacita mwaapostolo Paulo. Wakalizyi mbwaakali kulimvwa ziindi zimwi—kulimvwa kupenga kapati. Pele alimwi wakalizyi kuti Kristo wakafwida bantu basizibi kutali bantu balondokede. Paulo wakali muntu uutalondokede awalo. Alimwi buya wakalemba kuti: “Ndilapona akaambo kalusyomo ndondijisi mumwana wa Leza, iwakandiyanda akulyaaba akaambo kandime.” (Gal. 2:20) Inzya, Paulo wakacitambula cinunuzyo. Wakazyiba kuti cinunuzyo cakali kubeleka kulinguwe lwakwe kumugama.
Kaambo nkamunya aaka ikakubona cinunuzyo kuba cipego cesu kutugama kuzwa kuli Jehova, kalakonzya kutugwasya citaambiki. Eeci tacaambi kuti kutyompwa kulamana mpoonya-mpoonya. Bamwi bandiswe inga bayandika kulwana nzila yabucenjezu eeyi kusikila munyika mpya. Pele mutalubi kuti: “Bulumbu buyakupegwa buyo baabo ibazumanana kulwana buyumuyumu. Tuyaabuswena kubuzuba Bwami bwa Leza nobuyakuleta luumuno alimwi akupa kuti bantu boonse basyomeka balondoke. Amube aamakanze aakunjila mu Bwami—nokuba kuti mweelede kwiinda mumapenzi manji kapati.
(Bagalatiya 3:1) Inywebo nobana Galatiya bafwubafwuba! Ino nguni wakamucenga boobu, nywebo nomwakapandulwidwa munzila iisalede kuti Jesu Kristo wakagagailwa aacisamu?
it-1 880
Bana Galatiya, Lugwalo Ku
Majwi aabukali aa Paulo aakuti, “Inywebo nobana Galatiya bafwubafwuba,” taambi kuti wakali kwaamba buyo musyobo umwi wabantu uugaminide iwakazwa ku Galatiya nkoili kunyika. (Gal. 3:1) Muciindi caboobo, Paulo wakali kukalalila bantu bamwi mumbungano zyakokuya akaambo kakuzumina kuyungwa amilawo yaba Juda ibakali akati kabo, balo ibakali kusola kulipangila milawo yabo yabululami kwiinda mububambe bwa Mulawo wa Musa, muciindi cakutobela mulawo wakwaamba muntu kuti ‘mululami akaambo kalusyomo’ walo iwakapegwa kwiinda mucizuminano cipya. (2:15–3:14; 4:9, 10) Bantu ibakali “mumbungano zyamu Galatiya,” (1:2) balo Paulo mbaakalembela bakalisangene aba Juda alimwi abaabo ibatakali ba Juda, mpoonya bamwi bakali ba Juda basandule ibakapalwidwe alimwi a Bamasi ibatakapalwidwe, alimwi tacidoonekwi kuti bamwi bakali kuzwa ku Europe nkoili kumbo. (Mil. 13:14, 43; 16:1; Gal. 5:2) Boonse antoomwe, bakali kwiitwa kuti Banakristo bana Galatiya akaambo kakuti busena mbobakali kukkala bwakali kwiitwa kuti Galatiya. Lugwalo oolu lutondezya kuti Paulo wakali kulembela baabo mbaakazyi kabotu-kabotu ibakali kukkala kulubazu lwakumusanza kwacooko eeci caku Roma, ikutali bantu mbaatakazyi ibakali kukkala kulubazu lwakunyika, kwalo ambweni nkwaatakaswaya akuswaya.