Nkaambo nzi Bantu Bamwi Ncobalimvwa Kubula Mpindu?

**NKAAMBO NZI CILAYANDIKA KULIMVWA KUBA AMPINDU?**

Bantu ibalimvwa kuti balaampindu tabafwambaani kutyompwa ciindi nobajana buyumuyumu.

Buvwuntauzi butondezya kuti kanji-kanji bantu ibalimvwa kubula mpindu balalibilika, kutyompwa alimwi akuba alusini. Kunze lyaboobo, balakonzya kuciindizya kunywa bukoko alimwi akubelesya misamu iikola.
Bantu ibalalimvwa kuba ampindu balaceeleba cilengwa cakulyeezyanisya abamwi, calo cipa kuti kacibaubila kumvwana abamwi alimwi akupanga zilongwe ziyumu. Mpoonya kulubazu lumwi, aabo ibalimvwa kubula mpindu kanji-kanji balatongooka, calo cinyonganya zilongwe.
Nociba ciindi nobajana buyumuyumu, bantu ibalimvwa kuba ampindu balazumanana kuliyumya, tabalekeli mapenzi ngobajana kubalesya kuzuzikizya mbaakani zyabo. Mukwiimpana, kanji-kanji bantu ibalimvwa kubula mpindu babona mapenzi atayi koomoonga kuba mapenzi mapati. Eeci cibapa kufwambaana kutyompwa.

MBUTI MBOTUKONZYA KULIMVWA KUTI TULAAMPINDU?

Amusale balongwe ibakonzya kumukulwaizya. Kamuyanzana abantu ibajisi bulemu, ibabikkila maano kujatikizya mbozimweendela zintu alimwi bakonzya kumukulwaizya.

“Mulongwe mwini-mwini ulatondezya luyando ciindi coonse alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.

Amubagwasye bamwi. Ciindi nomuba aluzyalo akucitila bamwi zintu zibotu kubikkilizya abaabo ibatakonzyi kumupilusizya, mulakonzya kujana lukkomano lwini-lwini iluboola akaambo kakupa bamwi. Alimwi muyookkomana nokuba kuti bamwi tabaiboni milimo mibotu njomucitila bamwi.

“Kupa kulakkomanisya kapati kwiinda kupegwa.”—Milimo 20:35.

Amubagwasye bana banu kulimvwa kuti balaampindu. Nzila imwi mbomukonzya kucita oobo, nkwiinda mukubalekela kulanganya mapenzi ngobajisi, ikuti kabacikonzya. Eeci cilakonzya kubagwasya bana ikuzunda mapenzi. Kuti bacikonzya kucita oobo, balakonzya kutalika kulimvwa kuti balaampindu lino alimwi aleelyo baakukomena.

“Koyiisya mwana inzila njayelede kweendela; noliba leelyo aakukomena takazwi mulinjiyo pe.”—Tusimpi 22:6.

Umwi wa Bakamboni ba Jehova usololela ciiyo ca Bbaibbele kumukaintu umwi mulesitilanti.

MBUTI BAKAMBONI BA JEHOVA MBOBAKULWAIZYA BANTU KULIMVWA KUTI BALAAMPINDU?

Miswaangano ya Bakamboni ba Jehova alimwi apulogilamu yabo yakuyiisya Bbaibbele, zyabagwasya bantu kupona buumi bubotu akulimvwa kuti balaampindu.

MISWAANGANO YESU YANSONDO ANSONDO

Kumiswaangano yesu yansondo ansondo, tulaswiilila makani aamu Bbaibbele alo kanji-kanji aamba kujatikizya kulimvwa kuba ampindu. Kumiswaangano yesu kunyina kubbadela alimwi bantu boonse balitambidwe. Mucikozyanyo, kumiswaangano yesu muyakwiiya . . .

kaambo ncomuyandika kapati kuli Leza
mbomukonzya kujana mpindu mubuumi
mbomukonzya kuyumya zilongwe abamwi

Kunze lyaboobo, muyoojana balongwe beni-beni ‘ibabikkilana maano.’—1 Bakorinto 12:25, 26.

Kutegwa mwiiye zinji kujatikizya miswaangano yesu, amubone vidiyo yakuti Ino Ncinzi Cicitika ku Ŋanda ya Bwami? a jw.org

LWIIYO LWAMU BBAIBBELE

Tulasololela ciiyo ca Bbaibbele citabbadelwi kwiinda mukubelesya bbuku lyakuti Amupone Kukabe Kutamani! Bbuku eeli lyakwiiya lijisi magwalo manji, bupanduluzi busalede, mibuzyo mibotu, mavidiyo aakulwaizya alimwi azifwanikiso zibotu. Oolu lwiiyo lwamu Bbaibbele lugwasya bantu kulimvwa kuti balalemekwa.

Kutegwa mubone mbokugwasya kwiiya Bbaibbele a Bakamboni ba Jehova, amubone kavidiyo kafwaafwi kakuti Nkaambo Nzi Ncomweelede Kwiiya Bbaibbele? a jw.org