Cibalo 132
Kujanza Lyalulyo lya Leza
IKUTILA kwamuuya uusalala aciindi ca Pentekoste ncitondezyo cakuti Jesu wasika kujulu. Acalo cilengaano catondezyegwa kuli sikwiiya Stefano ciindi cisyoonto buyo kuzwa waawa citondezya kuti wasika okuya. Katana buyo kufwuswa mabwe akaambo kakukambauka cakusyomeka, Stefano ulaamba: “Amulange, ndabona ijulu lili bukwazi, a-Mwana a-Muntu uliimvwi kululyo lwa-Leza.”
Kacili kujanza lyalulyo lya Leza, Jesu ulindila malailile kuzwa kuli Usyi aakuti: “Ube mweendelezi akati kabasinkondonyoko.” Pele aciindi awa, ikuyakusika ciindi nayoobweza ntaamu kuli basinkondonyina, ino Jesu utyani? Ulalela naa kweendelezya basikwiiya bakwe bananike, ikubasololela mumulimo wabo wakukambauka akubagwasya kulibambila kuti babe baminyina mu Bwami bwa Usyi kwiinda mukubabusya.
Mucikozyanyo, Jesu wasala Saulo (iwakazyoozyibwa kabotu kumbele azina lyakwe lyaci Roma lyakuti, Paulo) kuti asololele mumulimo wakugwasya bantu kuba basikwiiya mumasi ambi. Saulo mmusungu ku Mulawo wa Leza pele ulacengwa abasololi bacikombelo baci Juda. Nkakaambo kaako Saulo taazuminizya buyo kuti Stefano ajaigwe pele waunka ku Damasko kwiinda mukulaililwa amupaizi mupati Kayafa kuti alete baalumi abakaintu kabaangidwe ku Jerusalemu abo mbajana kuti batobela Jesu. Nokuba boobo, Saulo kacili mulweendo olu, kwamumwekela mumuni elyo wawida ansi.
Ijwi litalibonyi nkolizila lyabuzya ategwa: “Saulo, Saulo, undipenzezyanzi?” Saulo wabuzya ategwa: “Ino nduweni, Mwami?”
Ibwiinguzi ategwa: “Ndime Jesu ngopenzya.”
Jesu waambila Saulo walo woofwazigwa amumuni wamaleele kuti anjile mu Damasko akulindila malailile. Mpoonya Jesu walibonya mucilengaano kuli Hananiya, umwi wabasikwiiya bakwe. Ikujatikizya Saulo, Jesu waambila Hananiya kuti: “Oyu ndamusala abe uutola zina lyangu kulibamasi, akubami, akubana ba-Israyeli.”
Masimpe kwiinda mulugwasyo lwa Jesu, Saulo (uutegwa Paulo) alimwi abamwi bakambausi bazwidilila kapati mumulimo wabo wakukambauka akuyiisya. Mane myaka iitandila ku 25 kuzwa ciindi naakalibonya Jesu kulinguwe mumugwagwa waku Damasko, Paulo wakalemba kuti “Makani Mabotu . . . aakakambaukilwa bantu boonse baansi ano.”
Nokwainda myaka minji aimbi, Jesu wapa mulongo wazilengaano kumwaapostolo wakwe uuyandika Johane. Kwiinda muzilengaano ezi Johane zyapandulula mubbuku lyamu Bbaibbele lya Ciyubunuzyo, cili mbuli kuti wabona kuboola kwa Jesu munguzu zya Bwami. Johane ulaamba “mu-Muuya” wakatolwa kumbele “kubuzuba bwa-Mwami.” Ino “buzuba” obu ninzi?
Ikubulanga kabotu-kabotu businsimi bwa Bbaibbele kubikkilizya abusinsimi bwa Jesu mwini kujatikizya mazuba aamamanino, kuyubulula kuti “buzuba bwa-Mwami” bwakatalika mumwaka wa 1914! Aboobo mmuu 1914 Jesu naakaboola cakutalibonya, kakutakwe kulibonya kubuleya alimwi balikke babelesi basyomeka mbobakubona kuboola kwakwe. Mumwaka oyo Jehova wakapa Jesu malailile akuya kuba mweendelezi akati kabasinkondonyina!
Ikutobela malailile aa Usyi, Jesu wakasalazya julu kwiinda mukugwisya Saatani amadaimona aakwe ikubafwusila ansi. Naazibona ezi mucilengaano, Johane wamvwa jwi lizwa kujulu kaliti: “Sunu kwasika lufutuko, anguzu, abwami bwa-Leza wesu, abwami bwa-Kristo wakwe.” Inzya, mu 1914 Kristo wakatalika kulela kali Mwami!
Elo makani mabotu kaka aya kubakombi ba Jehova bakujulu! Bakulwaizigwa kuti: “Amusekelele nomajulu, anywebo nomukala mulingao.” Pele ino zintu zili buti kuli baabo bakkala anyika? Ijwi lyazumanana ategwa: “Pele nywebo nonsi alwizi, muli mumapenzi, ikuti Diabolosi wamuselukila abukali bupati, nkaambo ulizi kuti ciindi ncacijisi nciniini buyo.”
Tuli muciindi eco ciniini lino. Ibantu lino balalitondezya kuti naa baleelela ikunjila munyika ya Leza mpya naa ikunyonyoonwa. Imasimpe ngakuti, nkomuya kwini kuya mbuli mbomwaacita makani mabotu aa Bwami bwa Leza lino alo aakambaukwa nyika yoonse mubweendelezi bwa Kristo.
Kuzwawaawo, Jesu Kristo uyoobeleka mbuli Mubelesi wa Leza ikugwisya bweende bwazintu bwa Saatani boonse abaabo boonse babutobela. Jesu uyoozwidilila kugwisya bubi boonse obu munkondo iitwa kuti Harmagedoni naa Amagedoni mu Bbaibbele. Mpoonya, Jesu, uuli ngo Muntu mupati kwiinda koonse-koonse ikugwisya buyo Jehova Leza, uyoojata Saatani amadaimona aakwe akumwaanga kwamyaka iili cuulu “mumulindi uutagoli” nkokwaamba kuti muciimo cili mbuli cakufwa. Incito 7:55-60; 8:1-3; 9:1-19; 16:6-10; Intembauzyo 110:1, 2; Ba-Hebrayo 10:12, 13; 1 Petro 3:22; Luka 22:28-30; Ba-Kolose 1:13, 23; Ciyubunuzyo 1:1, 10; 12:7-12; 16:14-16; 20:1-3; Matayo 24:14.
▪ Jesu naaunka kujulu, nkuli nkwaakkala, alimwi ulindilila nzi?
▪ Mbaani mbalela Jesu naaunka kujulu, alimwi ikulela kwakwe kulibonya buti?
▪ Ino “buzuba bwa-Mwami” bwakatalika lili, alimwi ncinzi cakacitika nobwakatalika?
▪ Ino mulimo wakukambauka uucitwa lino umujatikizya buti omwe-omwe wesu?
▪ Waakumana mulimo wakukambauka oyu, zintu nzi ziyootobela?