Kubelesya Maikulofooni

IBAKWESU abacizyi Banakristo balalyaaba kuzikujanika kumiswaangano ya Bunakristo. Ikutegwa bagwasyigwe azyeezyo zyaambwa, beelede kuzimvwa.

Mu Israyeli wansiku, kwakanyina mincini iikomezya majwi. Musa naakali kukananina bana Israyeli mu Zibanda zya Moabu kabatananjila mu Nyika Yakasyomezyegwa, ino mbuti mbobakali kukonzya kumumvwa bantu bakali kubalilwa kutuulunzuma? Kulangilwa kuti Musa wakabelesya nzila yakutambikizyanya majwi, wakali kwaatambikizya kubaalumi bakaimvwi mutukamu-kamu twabana Israyeli. (Dt. 1:1; 31:1) Kwakainda buyo ciindi cisyoonto bana Israyeli nobakatalika nkondo kulwanina nyika yakali kumbo kwa Jordano, Joshua wakabunganya cisi coonse a Cilundu ca Gerizimu aca Ebala, cakutadooneka aba Levi kabaimvwi mukkuti lyakali kubaandaanya. Ooko, ibantu boonse bakamvwa akuzuminizya kulongezyegwa akusinganizyigwa nkwaakaamba Leza. (Jos. 8:33-35) Alimwi kulangilwa kuti aciindi eeci mulumbe ooyu wakatambikizyigwa buya, pele takudoonekwi pe kuti ibuyale bwabusena oobo abwalo bwakagwasyilizya mukucita kuti mulumbe ooyu umvwugwe.

Nokwakainda myaka iitandila ku 1,500 ‘makamu aabantu nobakabungana’ kunkomwe ya Lwizi lwa Galilaya kutegwa bamvwe Jesu nzyaakali kwaamba, Jesu wakatanta bwato kuyookkalila mulwizi akutalika kukanana. (Mk. 4:1, 2) Nkaambo nzi Jesu ncaakali kwaambaula kali mumeenda? Kulangilwa kuti wakacita oobo akaambo kakuti ijwi lyamuntu lilakonzya kumvwugwa kubantu bali kule naambaula kali mumeenda aabateme.

Kautanasika mwaanda wamyaka wa 20, ikutegwa baswiilizi bamvwe zyakali kwaambwa, kanji-kanji cakayeeme abupati bwajwi lyamwaambi. Pele ikutalikila muma 1920, babelesi ba Jehova bakatalika kubelesya mincini iikomezya majwi lyamiswaangano mipati.

Mincini Yamajwi. Izibelesyo eezyi zilakonzya kukomezya jwi lyamwaambi pele kumwi kalimvwika mbubwenya mbolimvwika lyoonse. Mwaambi tayelede kulisina buya kwaamba. Baswiilizi tabeelede kuteya matwi kutegwa bamvwe izyaambwa. Pele beelede kubikkila buyo maano kumulumbe.

Kwacitwa zintu zinji ikubona kuti mincini yamajwi iili kabotu nkwiili amiswaangano yacooko, yabbazu ayaalubazu ya Bakamboni ba Jehova. Alimwi Amaanda aa Bwami manji alabelesya mincini iikomezya majwi aabaambi, ibeendelezya miswaangano naa babala acibumbili. Imbungano zimwi zilijisi mamaikulofooni aabelesyegwa abaswiilizi nobaingula lyamiswaangano. Ikuti mbungano kaijisi zibelesyo eezyi, amuzibelesye kabotu.

Malailile Aakonzya Kumugwasya. Ikutegwa muzibelesye kabotu zibelesyo eezyi, amubikkile maano kutwaambo ootu: (1) Maikulofooni yeelede kuti kaili alamfwu kwamasentimita aali 10 naa 15 kuzwa kumulomo. Ikuti maikulofooni kaili afwaafwi kapati amulomo, imajwi taakonzyi kumvwika. Alimwi ikuti kaili kulamfwu kapati, ijwi lyanu talikalimvwisyi pe. (2) Imaikulofooni yeelede kuti kaigamide amulomo ikutali kumbali. Ikuti kamweenzyeenzya mutwe, mutaambauli ccita buyo nomulangide amaikulofooni. (3) Amutole jwi mujulu asyoonto kwiinda waawo nomwaambaula amuntu. Pele tamweelede kupozomoka buya. Imuncini wamajwi uyoolimwaya jwi lyanu koonse-koonse mane akuli baabo bakkede kulamfwu. (4) Ikuti kamuyanda kulikokolola amoyo naa kukola antela kweesyemuka, amuluwe.

Nomukanana Makani. Mwaya acibumbili akwiimikila kutebule lyamwaambi, imukwesu uyoomubambila maikulofooni akwiibikka mpoiyandika. Amwiimikile kabotu kamulangide baswiilizi imukwesu namubambila maikulofooni. Amubikke pepa lyatwaambo atebule lyamwaambi akubona kuti maikulofooni taimusinkili.

Mwatalika kukanana, amuswiilile mbolimvwika jwi lyanu mulaudisipika. Sena lilasabila naa imajwi amwi amvwika mbuli kuti kuli cibbosyoka? Ikuti kakuli boobo, amujoke munsi aniini. Nomulanga twaambo apepa, amukanane akubala nomulangide amaikulofooni naa atala asyoonto pele ikutali nomusinteme.

Nomubala Acibumbili. Ncibotu kulijatila mujulu-julu Bbaibbele naa bbuku antela magazini njomubala kucita kuti kamubalanga baswiilizi. Mbwaanga maikulofooni inikumulangide buya, mulakonzya kuzijatila ambali nzyomubala. Eeci caamba kuti mweelede kulanga ambali aniini. Mpoonya mwanoobala, ijwi lyanu linoonjila kabotu mumaikulofooni.

Ibakwesu banji babala lya Ciiyo ca Ngazi Yamulindizi balaimikila nobabala mumaikulofooni. Ikubala munzila iili boobu kulabagwasya kuyoya kabotu akubala kweelana ambobalimvwa. Amuyeeye kuti kubalwa kwamincali ncecibeela cipati camuswaangano. Ilugwasyo ndobajana baswiilizi luya buyo mbuli mbobatumvwa twaambo tubalwa.

Nomwiingula lya Muswaangano. Ikuti mbungano kaibelesya mamaikulofooni mukutola lubazu kwabaswiilizi, amuzyibe kuti muciyandika kukanana ajwi lilimvwisya. Nomwiingula, amulijatile mumaanza bbuku liyiigwa naa Bbaibbele. Eeci ciyoomugwasya ikubona kabotu eezyo zilembedwe nomukanana mumaikulofooni.

Mumbungano zimwi kuli bakwesu bapedwe mukuli wakubatolela maikulofooni aabo ibaingula. Ikuti mbocibede oobo amumbungano momubede, mwatondekwa, amuzumanane kutambika kutegwa mukwesu uujisi maikulofooni amubone cakufwambaana. Ikuti maikulofooni kaili yeeyo yakulijatila, amulibambile kwiitambula. Mutataliki kukanana kusikila maikulofooni yabikkwa bweelede kumulomo. Mwamanizya kwiingula, amumupe mukwesu.

Nomutola Lubazu Mucitondezyo. Ikubelesya maikulofooni nomuli acitondezyo ciyanda kulibambila kabotu. Ikuti maikulofooni kaili yeeyo iijisi aabikkilwa, tamunoojisi cintu mumaanza pele buyo Bbaibbele apepa lyatwaambo. Ikubelesya maikulofooni iijatilwa mumaanza cipa kulikwaya, pele inga mwamvwana angomuli limwi kutegwa akamujatile. Munzila eeyo munoojisi buyo Bbaibbele mumaanza aanu. Mweelede kulibambila amwiniŋanda kucita kuti azyibile mbwayelede kujata maikulofooni. Alimwi amuyeeye kuti nomuli acibumbili tamweelede kubapa syule baswiilizi, ikapati nomukanana.

Muzitondezyo zya Muswaangano Wamulimo kulakonzya kuba bantu banji batola lubazu, aboobo balakonzya kabeendeenda acibumbili. Aboobo, inga kwayandika mamaikulofooni aali mbwaabede. Ikuti kakuli boobo, nkokuti ayelede kubikkilwa limwi kacitanasika ciindi naa ikubapa basikutola lubazu mbobaunkila buyo acibumbili. Ikubona kuti mamaikulofooni abikkwa abusena mpaayelede aciindi ceelede kuyandika kulibambila. Ikuziinduluka zitondezyo kacitanasika ciindi kulagwasya ikubatondezya basikutola lubazu kubona mbobeelede kubelesya maikulofooni. Ikuti kacitakonzyeki kwiinduluka acibumbili, inga cabota kuti basikutola lubazu babelesya buyo cintu cimwi ceelene amaikulofooni ikutegwa bazyibile mbobeelede kujata. Camana citondezyo, basikutola lubazu beelede kwaabikka kabotu-kabotu mamaikulofooni ikuti naa ngayaayo aajatilwa mumaanza akubikkila maano kuntambo kucita kuti zitabalebi nobazwa acibumbili.

Ikubikkila maano mbwaayelede kubelesyegwa mamaikulofooni kuleendelana kapati amakanze aamiswaangano yesu, nkokuti ikugwasyanya aumwi kwiinda mumubandi wa Ijwi lya Leza. (Heb. 10:24, 25) Kwiinda mukwiiya mbotunga twaabelesya kabotu mamaikulofooni, aumwi uya kuzuzikizya makanze aaya aayandika kapati.