Ibulwazi Bwakuteelana Ibuliko Lino
“Aaya masimpe aatayelede akupandulula nkaambo alaantangalala kuti bantu boonse bakalengwa kabeelene akuti Mulengi wabo wakabapa Zyeelelo nzyobatakonzyi kunyangwa, akati kazyeezi kuli Buumi a Lwaanguluko alimwi akusola kujana Lukkomano.”—Aaya makani aakazubululwa mumutwe wamakani wa Kwaambilizya Kwakulilela aakaba makanze aacisi ca United States mu 1776.
“Ibantu boonse balazyalwaa lwaanguluko alimwi baleelene kuzyeelelo nzyobajisi.”—Imakanze aakabaa Ŋanda ya Milawo yakucisi ca France mu 1789 aakazubululwa mumutwe wamakani wa Kwaambilizya Kwazyeelelo Zyabantu Azyasicisi.
“Ibantu boonse balazyalwaa lwaanguluko alimwi baleelene mubulemu alimwi akuzyeelelo.”—Ikwaambilizya Kujatikizya Nyika Yoonse Kwazyeelelo Zyamuntu, aaya ngaakaba makanze aa United Nations General Assembly mu 1948.
TAKUDOONEKWI buya pe. Bantu nyika yoonse mboizulwa balombozya kweelana. Cilausisya kwaamba kuti ikusikila lino ibantu tabeelene, ncotwaambila boobo nkaambo ipenzi lyakuteelana kwabantu lyaindulukwa-indulukwa kwaamba ziindi zinji.
Sena kuli umwi uunga waamba cakusinizya kuti lino mbotuli kumamanino amwaanda wamyaka wa 20 zintu ziyaabucinca kuba kabotu? Sena bantu bamucisi ca United States a France naa abaya bamuzisi zisika ku 185 zili mumbunga ya United Nations, balipedwe zyeelelo zyeelene zyalo nzyobakazyalwa azyo?
Nokuba kuti bantu boonse beelede kuti kabeelene, eco tacikonzyeki pe twaboola kuzyeelelo zya “Buumi a Lwaanguluko akuyandaula Lukkomano,” tazyeelene abuniini azyabantu boonse. Mucikozyanyo, sena inga twaamba kuti bantu baleelene caboola kuceelelo cabuumi kuti mwana wamu Afulika kajisi musilisi omwe antoomwe abantu bambi ibali 2,569 kakuli mwana omwe ku Europe uli buyo abantu bali 289? Alimwi sena inga twaamba kuti bantu baleelene kuzyeelelo zyalwaanguluko azyakuyandaula lukkomano ikuti cibeela catatu camweelwe wabasankwa acibeela cabili camweelwe wabana basimbi kucisi ca India bayookomena kabatacizyi kubala akulemba, kakuli mumasi amwi mbuli Japan a Germany a Great Britain mwana uli oonse ulisyomezedwe kuti uyooiya?
Sena ibantu bali mumasi amu Central America balo bavwola mali asika ku $1, 380 aaku Amelika bajisi “bulemu azyeelelo” zyeelene azyabaabo bakucisi ca France kwalo muntu amuntu nkwavwola mali aasika ku $24, 990? Sena inga mwati mwana musimbi wamu Afulika uulangilwa kupona buyo myaka iili 56 uleelene zyeelelo amwana musimbi waku North America uulangilwa kupona myaka iili 79?
Ikuteelana kuli munzila zinji, zyoonse tazikkomanisyi pe. Ikuteelana muzintu ziyandika mubuumi amuzyoolwe zyakusilikwa alimwi amulwiiyo nzimwi buyo zyazintu ezi. Zimwi ziindi, izintu zipa kuti bantu batapegwi bulemu alwaanguluko nkwaandaana kwazisi nkobazwa, amibala alimwi abukombi. Nokuba kuti makani aajatikizya kweelana alaambwa kapati, tukkede munyika bantu mobateelene. Mbuli bulwazi—“ibuyambukila naa ibupenzya kapati,” kweelana abupanduluzi bwabbala eli—ipenzi lyakuteelana lyatambukila bantu bamisyobo yoonse mbuli bulwazi. Mapenzi aaletwa akaambo kakuteelana mbuli bucete, akuciswa, akutabaa luzibo alimwi akubula milimo kubikkilizya alusalululo alapenzya kapati mumoyo.
“Ibantu boonse bakalengwa beelene.” Aka kaambo takaliboteli! Cilausisya kuti zintu tazili boobo pe!
[Nkotwakajana cifwanikiso icili apeeji 3]
UN PHOTO 152113/SHELLEY ROTNER