Ikuteelana—Sena Oobo Mbwaakaciyanda Leza?
Ikwiingula mubufwaafwi inga twati peepe. Atubone ncocitali boobo.
LUYANDO lwa Leza lwakali lwakuti bantu boonse kabeelene muzyoolwe amulukkomano. Ikujatikizya kulengwa kwamuntu tubala kuti: “Elyo Leza wakaamba kuti, Atupange muntu mucinkozya cesu, abe mbubonya mbuli ndiswe. Baendelezye inswi zyamumaanzi, abayuni bakujulu, aŋombe, anyika yoonse, abauka boonse bayavula ansi.” Naakamana kulenga zintu zyaansi, “Leza [w]akabona zintu zyoonse nzyaakacita, wakabona kuti zyoonse zyabota loko.”—Matalikilo 1:26, 31.
Sena inga Leza waamba kuti “zyabota loko” zintu ikwaamba bukkale bwasunu buusisya bwakuteelana? Takonzyi pe, “nkaambo Leza nduluyando.” (1 Johane 4:8) Waambwa kuti “talangi ziimo zyabantu” akuti ‘milimo yakwe yoonse ililuleme, anzila zyakwe zyoonse zililuzi. Ngu-Leza uusyomeka uutakwe cibi; Uliluleme, uliluzi.’ (Deuteronomo 10:17; 32:4; amweezyanisye aa Jobu 34:19.) Imwaapostolo Petro wakati: “Nkasimpe ndabona kuti Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.”—Incito 10:34, 35.
Mbwaanga ngu Leza ulaaluyando uutalangi ziimo uliluleme alimwi uliluzi, ino mbuti mbwanga walenga bantu kabateelene kujatikizya kweelela kwabo kubaa buumi bukkomanisya? Kuzumizya ciyanza cakusalana akati kabantu akubabika munyika mobatakonzyi kweelana inga cayimpana abube bwakwe. Akali makanze akwe kwaamba kuti boonse “kabazyalwaa lwaanguluko abulemu bweelene alimwi azyeelelo.” Pesi zintu sunu tazili boobo pe. Ino nkaambo nzi?
Intalisyo Yakuteelana
Ikwaamba kuti Leza wakalenga bantu kuti kabeelene tacaambi kuti luyando lwakwe lwakali lwakuti boonse beelane munzila zyoonse. Balakonzya kabasiyene muzipego amuzintu zibakondelezya alimwi ambubaboneka. Balakonzya kuti kabasiyene kujatikizya zyuuno nzyobajisi naa kunguzu zyabweendelezi. Mucikozyanyo, imwaalumi amukaintu tabeelene muzintu zyoonse, pesi Leza wakalenga mukaintu ‘kuba sikugwasya’ kumwaalumi. (Matalikilo 2:18) Ibazyali balisiyene mubweendelezi abana babo. Nokuba kuti kuli kusiyana kuli boobu, boonse—ibaalumi abamakaintu alimwi abana—Leza wakabapa zyoolwe izyeelene caboola kukuzuzikizya zintu ziyandika kuti muntu akkomane. Boonse bakeelede kuba abulemu bweelene mumeso aa Leza.
Mbubwena buyo abana ba Leza bakumuuya ibakasaanguna kulengwa kabatanalengwa bantunsi, bakapegwa milimo amikuli iindene-iindene. (Matalikilo 3:24; 16:7-11; Isaya 6:6; Juda 9) Nokuba boobo, Leza wakabapa boonse zintu zyeelene izijatikizya buumi alukkomano nokuba kuti yakalisiyene milimo njaakabapa. Aboobo munzila iigambya bakaba citondezyo cakuti Leza talangi ciimo.
Cilausisya kwaamba kuti umwi wazilenge zyakumuuya tanaakabukkomanina bubambe bwa Leza bwakutalanga ciimo. Wakayanda zinji kwiinda nzyaakamupede Leza, wakalombozya cuuno cisumpukide. Akaambo kakuti wakacilekela cisusi eci mulinguwe, wakalibikka kuba sinkondonyina Jehova walo mbwali Mulengi iweelela cuuno cipati kwiinda. Ooyu mwana wa Leza wakumuuya muzangi kumbele wakazoongelezya bantunsi kuyanda zintu zinji kuzwa kuli Leza kwiinda nzyaakabapede. (Matalikilo 3:1-6; amweezyanisye a Isaya 14:12-14.) Aboobo, izipego zya Jehova nzyaakapa bantunsi izijatikizya buumi alukkomano zyakanyongana. Oyu muzangi wakumuuya wakayubununwa mubbuku lya Ciyubunuzyo 20:2 kuti ngu “Diabolosi a-Saatani,” nguwakaleta muuya mubi wakuteelana kwabantu.
Sena Zintu Kuli Noziyoocinca?
Ikwiingula mujwi lyomwe inga twati inzya!
Pele ino nguni uunga wapa kuti zintu zicince zibe kabotu? Ibasololi bantunsi ibamwi kwamyaanda yamyaka basola amoyo wabo oonse ikululamika zintu. Teebazwidilila kapati pe, aboobo eci capa bamwi kuti batalike kuyeeya kuti taakwe nocinga cakonzyeka kumana penzi lyakuteelana kwabantunsi. Pesi walo muzeezo wa Leza ulilembedwe mubbuku lya Isaya 55:10, 11, ategwa: “Mbuli imvula acivulamabwe mbuziloka kuzwa kujulu, alimwi tazipiluki nkuko, pele zilatilaila nyika akwiizyazya akwiisyusya, kuti ipe imbuto zyakubyala ansima yakulya, mbubonya obo mbuliyooba ijwi lyangu lizwa kumulomo wangu. Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”
Cilaumbulizya kaka kuziba kuti Jehova Leza wakaamba kuti uyoozuzikizya makanze akwe akupa bantunsi zyoolwe zyeelene zyabuumi alimwi alukkomano! Mbwali Leza wakasimpe, uyoobona kuti wazuzikizya nzyaakasyomezya. Mucoolwe, ulijisi zyoonse zyobile luyando alimwi anguzu zyakucita boobo. Ino mbuti mbwayoocicita eci?
Uyoocicita kwiinda mu Bwami bwalo Jesu Kristo mbwaakayiisya basikumutobela kuti babupailile: “Taateesu ooli kujulu, . . . abuze bwami bwako, alucitwe luyando lwako, ansi ano mbubonya mbuli kujulu.” ( Matayo 6:9, 10) Inzya, Ibwami bwa Leza ncecintu ncayoobelesya Jehova “[ku]pwayaula akumanisya mami aya oonse [aaliko lino], alimwi bwalo buyooima nji kukabe kutamani.”—Daniele 2:44.
Mubweendelezi bwa Bwami bwakujulu, kuyooba ciinga cabantu cipya. Ikujatikizya kaambo aka mwaapostolo Johane mubbuku lyamamanino mu Bbaibbele lya Ciyubunuzyo wakalemba kuti: “Ndakabona ijulu ipya anyika impya, nkaambo ijulu lyakusaanguna anyika yakusaanguna zyoonse zyakamaninina.” (Ciyubunuzyo 21:1) Inzila zyoonse zibi zyakuteelana ziyoomaninina—bucete, ikuciswa, ikubula luzibo, akusalana mubala alimwi azimwi buyo zipenzya muntunsi.a
Kwamyaka iinda kumwaanda, Bakamboni ba Jehova bagwasilizya bantu kuzibya Bwami oobo. (Matayo 24:14) Kwiinda mumabbuku alimwi aziiyo nzyobacitya, basoleka canguzu kugwasya bantu kubaa luzibo lwaluyando lwa Leza lulembedwe mu Bbaibbele. Imulimo wabo wakuyiisya munyika yoonse mboizulwa, tewagwasya buyo bantu kubaa bulangizi bwakuyooba mubukkale bantu boonse mobanooyelene alimwi mobanookkomene, pele wabagwasya ikweeleba ipenzi lyakuteelana lino. Atubone mbowabagwasya.
Bupanduluzi buyungizidwe
a Ikuti kamuyanda kumvwa makani eeni-eni aamba zya Bwami bwa Leza ino-ino mbobuyoogwasya kuti bantu boonse beelane, amubone bbuku lya Luzibo Lutola Kubuumi Butamani zibalo 10 a 11 ilyakamwaigwa aba Watchtower Bible and Tract Society of New York, Inc.
[Majwi aakwelelezya sikubala aali apeeji 5]
Luyando lwa Leza lwakali lwakuti bantu boonse kabeelene muzyoolwe amulukkomano