Ikusilika Bulwazi Bwakuteelana
Imulengi uyoocitya kuti bantu boonse beelane mbubonya mbubali mukulombozya. Kacitanasika ciindi eco atusole kubweza ntaamu zyakulisilika bulwazi bwakuteelana bwalo mbotunga katujisi swebo amikwasyi yesu. Nelson Mandela iwakali musololi wacisi ca South Africa wakati: “Icaandaanya muntu amuntu ninzila njotubelesya ncotujisi ikutali ncotwakapegwa.”
IZYACITIKA musyule zipa bumboni kumajwi aakwe. Kuli baalumi abamakaintu banji ibatakazyalwaa zipego zinji, pesi kwiinda mukubelesya zipego nzyobakajisi, bakacikonzya kuzwidilila mubuumi calo cakapa kuti baandaane abeenzinyina ibakalaa zipego zinji. Pele ibantu bamwi ibakazyalwaa zipego zinji teebakazibelesya kabotu, elyo teebakazuzikizya zyoonse nzyobakali kukonzya kucita mubuumi.
Amuzibelesye Kabotu Zipego Nzyomujisi!
Bakamboni ba Jehova balayandisisya kugwasya bantu kuti bajane luzibo lwamakanze aa Leza kwiinda mukwiiya Bbaibbele. Nokuba boobo, balizi kuti bantu beelede kabacizi kubala akulemba kutegwa bagwasigwe amakani aamu Bbaibbele. Akaambo kaceeci, Bakamboni ba Jehova bayiisya makumi azyuulu zyabantu kubala akulemba, kubikkilizyaa bantu basika ku 23,000 (akati kamyaka yamuma 1990) kucisi comwe buyo ca Kumbo kwa Afulika. Kujatikizya mulimo uulibedelede wabukkale ngobacita Bakamboni ba Jehova, ipepa litegwa San Francisco Examiner lyakati: “Balibonya kuba bantu bamucisi bapa citondezyo cibotu. Cabusungu balabbadela mitelo akulanganya balwazi akuyiisya bantu kuciziba kubala akulemba.”
Kunze lyaboobo, Bakamboni ba Jehova bacikonzya kuyiisya myaanda yazyuulu zyabantu kuba bantu bacizi kwaambaula cakupasaula kubuleya kwiinda mulwiiyo ndobayiisya kuciziba kukanana kubuleya. Akati kazyuulu ezi kuli bamwi bakalaa mapenzi akwaambaula. Amumvwe mwaalumi wakucisi ca South Africa ncaakalemba, ategwa: “Ndakali kubbabbalisya kwaambaula cakunga ndakali kufwa nsoni kukanana abantu, ikanjikanji ndakali kubelesya bamwi kuti bandaambawide. . . . Nindakatalika kutola lubazu mu Cikolo Camulimo Wateokrasi akubala Bbaibbele kumbele lyakabunga kasyoonto kabantu . . . , ndakabbabbalisya cakuti teendakacikonzya kumanizya makani muciindi ncondakapedwe. Nowakamana muswaangano [imulangizi] calubomba wakandipa lulayo lugwasya. Wakandaambila kuti nkebala cakupozya nondili ndilikke. Ndakacita obo, ndakali kujana ciindi abuzuba cakubala cakupozya mu Bbaibbele lyangu amumagazini ya Ngazi Yamulindizi.” Oyu mwaalumi wakayaambele kapati cakuti lino ulakanana makani aabuleya kubantu basika kumyaanda noziba kuzyuulu.
Ikweelana Akati Kabakwesu
Bakamboni ba Jehova balaandeene kapati caboola kulwiiyo abusilisi ibuvwubi alimwi abukkale. Ooku kwiindana nkokuli akati kabo akaambo kazintu zitalondokede munyika. Pesi balo baliindene abazikombelo zimbi nkaambo akati kabo tabalanganyi mubala abuvwubi alimwi abukkale.
Bacikonzya kupona boobo kwiinda mukusola mbuli mbobakonzya ikutobela nzyobakayiya kuzwa mu Bbaibbele. Balateelela amoyo omwe njiisyo zyamu Bbaibbele mbuli bwayeeyi yakuti: “Jehova talangi mbuli mbwalanga muntu pe. Muntu ulabona busyu buyo, pele Jehova ulabona moyo.” (1 Samuele 16:7) “Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.” (Incito 10:34, 35) “Mutabeenzyi bubi bamweenzya bubi. Amulabilile ziimbo zibotu mumeso aabantu boonse. Anooli kwakonzeka, nkukuti mbuli mbumukonzya nubeni, amukalane abantu boonse caluumuno.”—Ba-Roma 12:17, 18; amubone a 1 Timoteo 6:17-19; Jakobo 2:5, 9.
Akaambo kakutobela kapati njiisyo eezi zyamu Bbaibbele zikulwaizya lukamantano, Bakamboni ba Jehova tabazumizyi ciyanza cili coonse cakulangana ziimo akaambo kakwiindana mubala abukkale nokuba kwiindana kwabuvwubi akati kabo. Ezi zintu tabazilangi nobasola kusala muntu uyelela kupegwa cuuno cijatikizya mulimo mumbunga ya Bunakristo. Izyuuno zijatikizya kuyiisya akweendelezya zilapegwa kweelanaa zyeelelo zyakumuuya.—1 Timoteo 3:1-13; Tito 1:5-9.
Cilakatalusya kaka kubantu baya bakali kupenga nobakali munyika iitalanganyi kabotu bantu ikuba abantu babalanganya kabotu, ibababona kuba bakwesu abacizi beelene mumeso aa Mulengi! Martina ulakazuminizya kaambo aka. Kuzwa ciindi bausyi nobakalekana abanyina, wakakomezegwaa banyina bakali bacete. Ibunji bwaziindi taakali kulangwa mbuli muntu abamwi, taakali kulisyoma mwini alimwi wakalaa buyumuyumu bwakuyanzana abamwi. Wakaleka kulibikkila maanu. Nokuba boobo, zintu zyakacinca naakatalika kwiiya Bbaibbele akuba umwi wa Bakamboni ba Jehova. Waamba kuti: “Ndicilwana mizeezo mibi, pele bwalino ndacikonzya. Lino ndatalika kulibona kuti ndimuntu alimwi ndilaambaula cakulisyoma. Ikasimpe kandipa bulemu. Lino ndilizi kuti Jehova ulandiyanda akuti buumi bulijisi mpindu.”
Inkamu ya Banakristo ya Bakamboni ba Jehova ibajanika mumasi aainda ku 230 baleelene munzila iilibedelede munyika sunu. Sena kuli mbunga iili yoonse yabukombi iinga yalitaminina kuti ayalo mboibede obo akupa bumboni?
Pesi balo Bakamboni ba Jehova bazilanga mbuli mbozibede cini-cini zintu. Balizi kwaamba kuti tabakonzyi kuligwisizya limwi penzi eli lyakuteelana kwabantu mbubonya mbuli mbobatakonzya bamwi ibasola kwamyaanda yamyaka nkaambo abalo tabalondokede pe. Nokuba boobo, balikkomene kuti bacikonzya kusilika bulwazi oobu bwakulangana ziimo akati kabo. Balalangila calusyomo kucisyomezyo ca Leza cakuti kuyooba nyika mpya yabululami ikutakabi penzi lyakulangana ziimo.
Inzya, bantunsi boonse ibamvwa onoono bayoobikkwa alimwi muciimo “cabulemu kabanoojisi zyeelelo zyeelene” mbuli mbwaakali kuyanda Mulengi wabo kumatalikilo kuti babe mbubo. Taciliboteli kaka eeci! Pele eci ciyoocitika ncobeni!
[Cifwanikiso icili apeeji 7]
Bakamboni ba Jehova balwana penzi lyakutaciziba kulemba akubala kwiinda mukuyiisya makumi azyuulu zyabantu kulemba akubala
[Cifwanikiso icili apeeji 8]
Ikasimpe kamu Bbaibbele kalagwasya kuzibaanya ciyanza cakulangana mibala abukkale alimwi abuvwubi