Ino Bantu Tweelede Kubabona Buti Ibuzuba bwa Jehova Mbobuyaabuswena?

“Jehova taamusya ngaakasyomezya kale, . . . pele ucimukazikila moyo, nkaambo tayandi kuti bantu bafwidilile, ulayanda kuti boonse bajane ciindi cakweempwa.”—2 PETRO 3:9.

1, 2. (a) Ino Jehova ubabona buti bantu sunu? (b) Ino mmibuzyo nzi njotweelede kulibuzya?

BABELESI ba Jehova balijisi mulimo ‘wakugwasya bantu bamisyobo yoonse kuba basikwiiya.’ (Matayo 28:19) Mbotuyaabuzuzikizya mulimo ooyu alimwi akulindila “buzuba bupati bwa-Jehova,” ibantu tweelede kubabona mbuli Jehova. (Zefaniya 1:14) Ino Jehova ubabona buti? Mwaapostolo Petro waamba kuti: “Jehova taamusya ngaakasyomezya kale, mbobayeeya bamwi kuti wamuka, pe, pele ucimukazikila moyo, nkaambo tayandi kuti bantu bafwidilile, ulayanda kuti boonse bajane ciindi cakweempwa.” (2 Petro 3:9) Leza bantu ubabona kuti balakonzya kweempwa. “Uuyandisya kuti bantu boonse bafutulwe akuboola kuluzibo lwakuziba lusinizyo.” (1 Timoteo 2:4) Cili boobu nkaambo Jehova ulakondwa ikuti muntu ‘waleka bubi bwanzila zyakwe akulijanina buumi.’—Ezekieli 33:11.

² Sena swebo kutugama bantu tubabona mbwababona Jehova? Sena swebo bantu bamisyobo yoonse azisi tubabona kuti balakonzya kuba “mbelele zyabutanga bwakwe” mbuli walo mbwababona? (Intembauzyo 100:3, BT; Incito 10:34, 35) Atulange-lange zikozyanyo zyobilo zitondezya mbociyandika kubona bantu Leza mbwababona. Mumbazu zyoonse zyobilo, lunyonyooko lwakali afwaafwi alimwi ibabelesi ba Jehova bakalipedwe luzibo lwamakani aaya kakucili ciindi. Izikozyanyo eezi zilayandika kapati mbotuyaabulindila buzuba bupati bwa Jehova.

Abrahamu Bantu Wakababona Mbuli Jehova

3. Ino Jehova wakababona buti ibantu bamuminzi ya Sodoma a Gomora?

³ Icikozyanyo cakusaanguna ncasinsiku usyomeka Abrahamu aminzi mibyaabi ya Sodoma a Gomora. Jehova naakamvwa “kulila [kwakutongooka] kwa Sodoma a Gomora,” tanaakafwaambaana kwiinyonyoona minzi eeyo abantu bayo boonse. Cakusaanguna wakatalika kuvwuntauzya. (Matalikilo 18:20, 21) Ibangelo bobilo bakatumwa ku Sodoma kwalo nkobakaakukkala kumulombwana uusyomeka Loti. Imangolezya aayo bangelo ngobakasika, “bantu bamunzi . . . nibaba banike nibaba bapati, bakazyunguluka iŋanda,” kabayanda kuti boonane abangelo. Kakunyina kudooneka, ibubi bwabantu ibakali kukkala mumunzi ooyu bwakasinizya kuti wakeelede kunyonyoonwa. Pele, bangelo bakaambila Loti kuti: “Sa ulijisi bantu abamwi okuno? Bakw[e] bako, bana bako balombe, bana bako basimbi, aboonse mboli abo mumunzi, kobagwisya omuno.” Jehova wakabamba nzila yakufwutwida bantu bamwi bamumunzi, pele kumamanino Loti abana bakwe basimbi bobilo mbabakapuluka.—Matalikilo 19:4, 5, 12, 16, 23-26.

4, 5. Ino nkaambo nzi Abrahamu ncaakakombeleda bantu ibakali kukkala mu Sodoma, alimwi sena mbwaakali kubabona bantu bwakali kozyenyi a Jehova mbwaakali kubabona?

⁴ Lino atulange-lange cakacitika musyule Jehova naakayubununa makanze ngaakajisi aakuvwuntauzya minzi ya Sodoma a Gomora. Eeci nceciindi Abrahamu ncaakakombelela kuti: “Ambweni nkubali baluleme ibali makumi osanwe mukati kamunzi. Sa ulabamanisya boonse? Sa tokonzyi kufwida munzi luzyalo nkaambo kabaluleme bali makumi osanwe bakede mulinguwo? Ncobeni cilatondwa kulinduwe kucita obo, kujaya uululeme antoomwe asizibi, uululeme acitilwe mbubonya mbuli sizibi. Ncobeni cilatondwa kulinduwe. Sa oyo uubeteka nyika yoonse takooyoocita cakululama?” Abrahamu wakabelesya mabala aakuti “cilatondwa kulinduwe” ziindi zyobilo. Kweelana ambwaakazi, Abrahamu wakalizi kuti Jehova takonzyi kujaya uululeme antoomwe asizibi. Jehova naakaamba kuti takanyonyooni munzi wa Sodoma ikuti naa kwakali bantu “baluleme ibali makumi osanwe,” Abrahamu wakali kuyaabucesya mweelwe kusikila kubantu ibali kkumi.—Matalikilo 18:22-33.

⁵ Sena Jehova naakaswiilila kukukombelezya kwa Abrahamu nikwali kuti tiikwakeendelenyi amuzeezo wakwe? Peepe. Mbwaanga wakali “mulongwaakwe Leza,” kakunyina kudooneka Abrahamu wakalizi, eelyo wakaba amuzeezo ngomunya. (Jakobo 2:23) Jehova naakabukila Sodoma a Gomora, wakaliyandide kubikkila maano kukulomba kwa Abrahamu. Nkaambo nzi? Nkaambo kakuti Taateesu wakujulu “tayandi kuti bantu bafwidilile, pele ulayanda kuti boonse bajane ciindi cakweempwa.”

Jona Mbwaakali Kubabona Bantu Bwakaliindene Kapati

6. Ino bana Nineve bakacita buti kumakani aakaambilizya Jona?

⁶ Lino amulange-lange cikozyanyo cabili, nkokuti ica Jona. Muciindi eeci munzi iwakeelede kunyonyoonwa wakali wa Nineve. Imusinsimi Jona wakaambilwa kuti, aambilizye kuti ibubi bwamunzi ooyo ‘bwakasika kuli Jehova.’ (Jona 1:2) Nineve wakali munzi mupati cakunga kubikkilizya atunzuunzi tuli mumbali-mbali “wakali kweendwa mazuba otatwe.” Jona naakazoozumina kuya ku Nineve, naakasika mumunzi wakazumanana kwaambilizya kuti: “Kwainda mazuba aali makumi one, Nineve uyoonyonyoonwa.” Nibakamvwa boobo, “bantu ba-Nineve bakazumina Leza, baliimya kulya, bakasama zisani zyasaka.” Naba mwami wa Nineve wakeempwa.—Jona 3:1-6.

7. Ino mbuti Jehova mbwaakakubona kweempwa kwabana Nineve?

⁷ Eelo kaka eeci cakaindana kapati ambubakacita bantu baku Sondoma! Ino mbuti Jehova mbwaakababona bana Nineve bakeempwa? Ibbuku lya Jona 3:10 lyaamba kuti: “Leza naakabona milimo yabo, kuti baleka inzila yabubi, Leza wakafwa insoni kumakani aamapenzi ngaka[ti] bacitile, nkabela takaacita pe.” Jehova “wakafwa insoni” mukuti wakacinca mizeezo yakwe kubana Nineve, nkaambo bakacinca nzila zyabo. Izyeelelo zya Leza tiizyakacinca pe, pele Jehova ngowakacinca ncaakali kuyanda kucita naakabona kuti bana Nineve beempwa.—Malaki 3:6.

8. Ino nkaambo nzi Jona ncaakacimwa?

⁸ Jona naakabona kuti Nineve takoonyonyoonwa, sena zintu wakazibona mbuli Jehova? Peepe, nkaambo twaambilwa kuti: “Jona wakabijilwa kubijilwa kupati, wakanyema loko.” Ino ncinzi acimbi ncaakacita? Cibalo caamba kuti: “Wakakomba kuli-Jehova, kuti, Ndakukomba, O Jehova, sa teendakaambide obo na, nindakacili mucisi cangu? Aboobo ndakasaanguna kucijila ku-Tarisi, nkaambo ndalizi kuti uwe uli Leza siluyando, uli sibuuya, tofwambi kukalala, aluzyalo lwako ndupati, aboobo ulafwa insoni kumakani aakubisizya bantu.” (Jona 4:1, 2) Jona wakalibuzi bube bwa Jehova. Nokuba boobo, muciindi eeci musinsimi ooyu wakacimwa alimwi kunyina bana Nineve bakeempwa naakababona mbuli Leza mbwaakababona.

9, 10. (a) Ino nciiyo nzi Jehova ncaakayiisya Jona? (b) Ino nkaambo nzi ncotukonzya kwaamba kuti bantu bamu Nineve Jona wakazootalika kubabona mbuli mbwaakali kubabona Jehova?

⁹ Jona wakazwa mu Nineve, waliyakila civwuka akukkala mucimvwule “kuti akabone ci[ti] kacitike mumunzi.” Jehova wakameneka ibonobono ikutegwa limupe cimvwule Jona. Pele, buzuba bwakatobela ibonobono lyakayuma. Jona naakakalala akaambo kaceeci, Jehova wakati: “Wafwida insoni eli ibonobono, . . . Lino ime sa nsyeelede kufwida insoni oyu munzi mupati waku-Nineve? Mulinguwo muli bantu bainda zyuulu zili mwaanda amakumi obile batana kwiiya kwaandaanya ijanza lyabo lyalulyo ajanza lyabo lyalum[wensi], alimwi muli iŋombe zinji.” (Jona 4:5-11) Elo kaka Jona wakaiya ciiyo cijatikizya mbuli Jehova mbwababona bantu!

¹⁰ Takulembedwe mbuli Jona mbwaakacita kumakani Leza ngaakaamba aakufwida nsoni bantu bamu Nineve? Pele cilalibonya kuti musinsimi ooyu wakacinca ndangilo njaakajisi kubana Nineve bakeempwa. Tulakonzya kwaamba boobo nkaambo Jehova wakamubelesya Jona ikulemba cibalo eeci cakasololelwa amuuya.

Ino Mujisi Ciimo Nzi?

11. Ino Abrahamu naali kubabona buti bantu ibapona sunu?

¹¹ Sunu tulindila lunyonyooko alumbi, nkokuti ilwabweende bwazintu oobu bubyaabi mubuzuba bwa Jehova bupati. (Luka 17:26-30; Ba-Galatiya 1:4; 2 Petro 3:10) Ino Abrahamu naali kubabona buti bantu ibapona munyika eeyi iiyanda kunyonyoonwa? Kuboneka kuti naali kubikkila maano kuli baabo ibatana kumvwa “Makani Mabotu aa-Bwami.” (Matayo 24:14) Abrahamu wakakombelela cakwiinduluka-induluka kuli Leza akaambo kabaluleme ibakali kulangilwa kujanika mu Sodoma. Sena lwesu tulabikkila maano kubantu ibakonzya kuleka milimo yanyika eeyi yeendelezyegwa a Saatani ikuti naa bapegwa ciindi cakweempwa akubelekela Leza?—1 Johane 5:19; Ciyubunuzyo 18:2-4.

12. Ino nkaambo nzi ncocikonzya kuuba-uba ikuba amuzeezo mbuli wakajisi Jona kubantu mbotuswaanganya mumulimo wesu, alimwi ino ncinzi ncotweelede kucita kumakani aaya?

¹² Cililuzi kulombozya mamanino aabubi. (Habakuku 1:2, 3) Aboobo, ncuuba-uba ikuba aciimo cakajisi Jona, icakutabikkila maano kubantu bakonzya kweempwa. Cilakonzya kuba boobu ikapati kuti kamuswaanganya bantu bataakkomanini makani, bayandisya kukazyanya naa basilunya ciindi notubatolela mulumbe wa Bwami kumaandaabo. Tulakonzya kuleka kubikkila maano kubantu aabo Jehova mbaciyobolola kuzwa mubweende oobu bwazintu bubyaabi. (Ba-Roma 2:4) Ikuti notwalilingula cakusinizya twajana kuti kuli muzeezo nouceya uuli mbuli wakajisi Jona kusaanguna kubana Nineve, tulakonzya kupailila lugwasyo kutegwa tube amuzeezo mbuli wa Jehova.

13. Ino nkaambo nzi ncotukonzya kwaambila kuti Jehova ulibabikkilide maano ibantu sunu?

¹³ Jehova ulababikkila maano aabo ibataninga talika kumubelekela alimwi ulaswiilila kukukombelezya kwabantu bakwe balyaabide. (Matayo 10:11) Mucikozyanyo, ‘uyoobacitila cabululami’ naingula mipailo yabo. (Luka 18:7, 8, Ci) Kunze lyaboobo, Jehova uyoozuzikizya zisyomezyo amakanze aakwe oonse muciindi cakwe. (Habakuku 2:3) Eeci cibikkilizya kugusya bubi boonse, mbubwenya mbuli mbwaakanyonyoona Nineve, ibantu bamumo nobakatalika kucita bubi alimwi.—Nahumu 3:5-7.

14. Ino ncinzi ncotweelede kunoocita notulindila buzuba bupati bwa Jehova?

¹⁴ Kusikila mane bweende bwazintu oobu bukagusyigwe mubuzuba bupati bwa Jehova, tunoolindila cakukkazika moyo kumwi katujisi bubi ikucita kuyanda kwakwe? Tatuzi makani woonse aajatikizyidwe mubulamfwu bwaciindi camulimo wakukambauka mamanino kaatanasika. Pele tulizi kuti makani mabotu aa Bwami ayookambaukwa kusikila kumamanino aanyika kweelana a Leza mbwayanda imamanino kaatanasika. Masimpe tuleelede kubikkila maano ‘kuzintu ziyandisi’ izyeelede kuletwa Jehova mbwayaabuzuzya ŋanda yakwe bulemu.—Hagai 2:7.

Kubona Kwesu Kweelede Kutondezyegwa a Milimo Yesu

15. Ino ncinzi cikonzya kutupa kuyandisya mulimo wakukambauka?

¹⁵ Ambweni tukkede mubusena mulimo wakukambauka moutazuminwi alimwi tatulibambilide kulongela kooko kuyandika basikwaambilizya Bwami. Amweezyeezye ikuti naa ibali kkumi balakonzya kujanika mucilawo canu mamanino kaatanasika, sena tulimvwa kuti aabo ibali kkumi baleelede kuyandaulwa? Jesu ‘wakafwida luzyalo’ makamu aabantu “nkaambo kakuti bakalikatede akumwaika mbuli imbelele zitakwe mweembezi.” (Matayo 9:36) Kwiinda mukuliyiisya Bbaibbele alimwi akubala kabotu zibalo zya Ngazi Yamulindizi alimwi a Galamukani!, tulakonzya kujana luzibo lunji kujatikizya mapenzi aali munyika. Eelyo tuyoobona mbokuyandika kapati kukambauka makani mabotu. Kunze lyaboobo, ikwaabelesya kabotu mabbuku aamba zyamu Bbaibbele aazwa ku “muzike musyomesi uucenjede,” kulakonzya kutugwasya kuba bantu bapandulula makani cakulimvwisya mucilawo cibelekelwa-belekelwa.—Matayo 24:45-47; 2 Timoteo 3:14-17.

16. Ino mbuti mbotukonzya kuyungizya busungu bwesu mumulimo wesu?

¹⁶ Ikubikkila maano kwesu kuli baabo ibalangilwa kuzumina mulumbe wa Bbaibbele uupa buumi, kulatukulwaizya kulanga-langa ziindi anzila ziindene-indene zyakusikila bantu mumaanda mumulimo wesu. Sena banji tatubajani aŋanda notuswaya? Ikuti naa tatubajani, tulakonzya kuyungizya busungu bwesu mumulimo wesu kwiinda mukucinca-cinca ziindi amasena mumulimo wesu wakukambauka. Bazubi banswi balaunka kukuzuba ciindi nobakonzya kujaya nswi. Sena tatukonzyi kucita munzila njiyonya mumulimo wesu wakuzuba kumuuya? (Marko 1:16-18) Sena tamukonzyi kusola kucita bukambausi ciindi camangolezya naa kubelesya luwaile ikuti naa balazumizya? Ibamwi bajana kuti mumasena musiilwa myootokala, mwiimina magotokala, mobanywisyila myootokala mungwimba alimwi amumantoolo ‘mmasena aakuzubila’ aali kabotu kapati. Alimwi ikuba aciimo cili mbuli ca Abrahamu kubantu kulalibonya ciindi notucita bukambausi bwamukwiizya.

17. Ino mbuti mbotukonzya kukulwaizya bamisyinali alimwi abamwi ibabelekela mumasi aatali aakwabo?

¹⁷ Bantu banji tabaningamvwa mulumbe wa Bwami. Kunze lyakukambauka kwesu, sena tatukonzyi kubikkila maano kubantu bali boobo kwiinda mukutalonga buya? Sena kuli bamisyinali naa babelesi ibali mumulimo waciindi coonse ibabelekela kunze aacisi? Ikuti naa nkobali, tulakonzya kubalembela magwalo ikubalumba akaambo kamulimo ngobacita. Ino mbuti ooku mbokuli kubikkila maano kubantu banji? Imagwalo aakulwaizya akulumbaizya alakonzya kubayumya-yumya bamisyinali kutegwa bazumanane mumulimo wabo, eelyo bayoogwasya bantu banji kuti babe aluzibo lwakasimpe. (Babetesi 11:40) Alimwi tulakonzya kubapailila bamisyinali kubikkilizya abaabo ibafwide nzala yakasimpe mumasi aambi. (Ba-Efeso 6:18-20) Inzila aimbi mbotukonzya kutondezya kubikkila maano, nkwiinda mukusanga mali kumulimo wa Bakamboni ba Jehova wanyika yoonse.—2 Ba-Korinto 8:13, 14; 9:6, 7.

Sena Mulakonzya Kulonga?

18. Ino ncinzi Banakristo bamwi ncobacita ikutolaambele makani aa Bwami mucisi mobakkala?

¹⁸ Aabo ibakalonga akuya mumasena muyandika bakambausi ba Bwami bajana coolwe akaambo kakulyaaba kwabo. Nokuba boobo, Bakamboni ba Jehova bamwi ibanyezi kakunyina kulonga buya, baiya mwaambo uumwi ikutegwa kababagwasya kumuuya basikuswaya. Ikucita boobo kwagwasya kapati. Mucikozyanyo, Bakamboni ibali lusele ibagwasya bantu baku China mudolopo lya Texas mu U.S.A., bakatambula bantu ibali 114 ku Mulalilo wa Mwami mu 2001. Aabo ibakagwasya bantu aabo bakajana kuti myuunda yabo iyanda kutebulwa.—Matayo 9:37, 38.

19. Ino ncinzi cikulwaizyigwa kucita ikuti naa muyeeya zyakulongela kucisi cimbi ikutegwa mukatole ambele mulimo wakukambauka Bwami ooko?

¹⁹ Ambweni nywebo amukwasyi wanu mukanza kulongela kubusena bubulide bakambausi ba Bwami. Cakusaanguna, cilayandika kapati ‘kukkala aansi, akubala mali aayandika.’ (Luka 14:28) Eeci cilayandika kapati ikuti naa muntu uyeeya zyakulongela kucisi cimbi. Imuntu uuyeeya makani aaya weelede kulibuzya mibuzyo iili mbuli bwayeeyi: ‘Sena ndiyoocikonzya kujana mali aayandika kumukwasyi wangu? Sena ndilakonzya kujana cipepa cizumizya kuya kucisi cimbi ceelede (visa)? Sena mulaka wakucisi eeco ndiluuzi kale naa kuti ndililibambilide kuwiiya? Sena ziindi zyamwaka ndazibikkila maano alimwi azilengwa? Sena ndilakonzya kuba ‘sikuyumya-yumya’ kutali sikulemezya basyomima mucisi eeco?’ (Bakolose 4:10, 11, Ci) Ikuti muzibe mbuli mbokubulide bakambausi mucisi eeco ncomuyeeya kuunka, kuleelede kulembela ofesi yamutabi ya Bakamboni ba Jehova ibalanganya mulimo wakukambauka mucisi eeco.a

20. Ino mbuti mukubusi umwi Munakristo mbwaakalyaaba mukugwasya basyominyina alimwi abambi mucisi citali cakwabo?

²⁰ Munakristo umwi wakali mumulimo wakuyaka Maanda aa Bwami ku Japan, wakamvwa kuti kulayandika bantu bacibwene mukuyaka maanda abwami ku Paraguay. Mbwaanga tanaakakwete alimwi wakacililimvwide, wakalongela kucisi eeci akuyoobeleka kwamyezi iili lusele kali ngomubelesi uuli mumulimo waciindi coonse alikke mumulimo ooyo. Naakali kooko, wakaiya mulaka wabana Spain alimwi akusololela ziiyo zya Bbaibbele. Wakabona kuti kwakali kuyandika basikwaambilizya Bwami mucisi eeci. Nokuba kuti wakapilukila ku Japan, wakaunka alimwi ku Paraguay akugwasya mukutamba bantu mu Ŋanda ya Bwami njimunya eeyo.

21. Ino ncinzi ncotweelede kubikkila maano kapati alimwi akubona mbotuyaabulindila buzuba bupati bwa Jehova?

²¹ Leza uyoobona kuti mulimo wakukambauka wacitwa bweelede kweelana ambwayanda walo. Mazubaano, uli mukubinzyaanya mulimo wakutebula kumuuya. (Isaya 60:22) Aboobo, mbotuyaabulindila buzuba bwa Jehova, atutole lubazu cakusungwaala mumulimo wakutebula akubona bantu mbuli Leza siluyando mbwababona.

Bupanduluzi buyungizidwe

Sena Muciyeeyede?

• Mbutuyaabulindila buzuba bwa Jehova, ino mbuti mbotweelede kubabona bantu?

• Ino Abrahamu wakababona buti bantu baluleme ibakali kulangilwa kujanika mu Sodoma?

• Ino bantu bamu Nineve bakeempwa wakababona buti Jona?

• Ino mbuti mbotukonzya kutondezya kuti bantu ibatanamvwa makani mabotu tubabona mbuli Jehova mbwababona?

[Cifwanikiso icili apeeji 16]

Abrahamu bantu wakababona mbuli mbwaakababona Jehova

[Cifwanikiso icili apeeji 17]

Ibana Nineve bakeempwa Jona naakababona mbwaakali kubabona Jehova

[Zifwanikiso izili apeeji 18]

Ikubabikkila maano bantu kutukulwaizya kulanga-langa ziindi anzila zyakukambauka makani mabotu