Tuleelede Alimwi Tulilibambide Kuyiisya Bambi
1 Ciindi Musa naakasalwa kuba mwiiminizi wa Jehova, taakalimvwa kweelela kwaambilizya jwi lya Leza kuli Farao. (Kul. 4:10; 6:12) Jeremiya wakalitondezya kutalisyoma kuti inga wabeleka kali musinsimi wa Jehova, kaambila Leza kuti tacizi kwaambaula. (Jer. 1:6) Nokuba kuti teebakali kulisyoma kumatalikilo, boonse bobile basinsimi abo bakazooba bakamboni ba Jehova batayoowi. Leza wakabazulizya kuti beelele.
2 Sunu, mulugwasyo lwa Jehova, tulijisi nzyotuyandika kutegwa tumanizye mulimo wesu calusyomo. (2 Kor. 3:4, 5; 2 Tim. 3:17) Mbuli haazibwene kukubamba myootokala uujisi zibelesyo zizulide, aswebo tulizulizizye zibelesyo zyakuumanizya cabunkutwe mulimo ngotutumidwe. Mu January tumwaya bbuku lya Kupona Kukabe Kutamani. Nokuba kuti eeci cibelesyo cakumuuya tacili cipya, makani aaco aamu Magwalo acibeleka asunu alimwi bbuku eli liyoogwasya bantu kwiiya kasimpe. Inzila zyitobela nzyomukulwaizigwa inga zyabambululwa kukumwaya bbuku lili lyoonse limwaigwa.
3 Makani aalwiiyo alakonzya kubelesegwa kucita kuti muntu ayande Jwi lya Leza. Mulakonzya kutalisya mubandi kwiinda mukwaamba kuti:
◼ “Ano mazuba kulaambwa kapati kuti kuyandika lwiiyo lulondokede. Mwayeeya nywebo, ndwiiyo lwamusyobo nzi muntu ndweelede kubelekela ikusinizya kuti akakkomane akuzwidilila mubuumi bwakwe? [Amulindile kwiingula.] Kulakonzya kujanwa mpindu zitamani kuli baabo bajana luzibo lwa Leza. [Amubale Tusimpi 9:10, 11.] Eeli bbuku lyaciiyo litegwa [amwaambe mutwe wabbuku ndyomumwaya] lijatikizya zyamu Bbaibbele. Lilatondezya kwelikke nkoluzwa luzibo ilutola kubuumi butamani.” Amutondezye cikozyanyo cimwi mubbuku. Amusoleke kumusiila bbuku elyo akumvwana kuti mukaswaye alimwi.
4 Ciindi nomupilukila siŋanda oyo ngumwakabandikide limwi bubotu bwalwiiyo lwa Bbaibbele, mulakonzya kwaamba kuti:
◼ “Ciindi cakamana, twakabandika kuti Bbaibbele nentalisyo yalwiiyo lunga twatusinizizya buumi butamani kumbele. Aino kuyandika kusoleka kutegwa twiiye nzyetuyandika kuziba kuzwa mu Magwalo. [Amubale Tusimpi 2:1-5.] Bantu banji cilabayumina ikuteelela zibeela zimwi zya Bbaibbele. Ndalomba ndimutondezye cakukosaula-kosaula inzila njetwali kubelesya kapati kugwasya bantu kwiiya zimbi kujatikizya ziyiisyo zya Bbaibbele zyantalisyo.” Kamubelesya bbuku elyo lyakasiigwa, amujule kupeeji yeelede akutondezya cakukosaula-kosaula mbocicitwa ciiyo ca Bbaibbele. Kuti siŋanda kayanda kubaa ciiyo calyoonse, amumupandulwide kuti muyoboola abbuku lyesu lyaciiyo lya Luzibo Lutola Kubuumi Butamani.
5 Bantu banji balakatazigwa akupenga kwamamiliyoni aabana bamunyika. Ambweni inga mwamugwasya siŋanda kubona mbwalilanga penzi eli Leza, kwiinda mukwaamba kuti:
◼ “Muleelede kuti mwakateelela kale makani aajatikizya bana kuzinguluka nyika yoonse mbwiizulwa balo bafwa nzala, ibaciswa, alimwi ibatabikkilwi maanu. Nkaambo nzi mbunga zyeelede ncozyatakonzya kusumpula ciimo eci? [Amulindile kwiingula.] Leza uyanda buyo kuti bantu kabapona kabotu. Amubone nzyasyomezya kubana abapati, icilembedwe mu Bbaibbele. [Amubale Ciyubunuzyo 21:4.] Eeli bbuku [amwaambe mutwe walyo] lilapa bupanduluzi bumbi bwanyika njayoobamba Leza mwalo imutakabi kupenga.” Kuti kwakonzeka, amujule kucifwanikiso citondezya Paradaiso, akucibandika. Amusoleke kumusiila bbuku elyo akumvwana kuti mukapilukile.
6 Kuti kamuli mwakasaangunide kwaambaula zyakupenga kwabana, lino mwaswaya lwabili inga mwazumanana amubandi oyu kwiinda mukwaamba kuti:
◼ Nindakasikide mazuba masyoonto ainda, mwakaamba mbuli mbobamweetezya bana abo ibapenga akaambo kakufwa kwamaanda, inzala, malwazi, alimwi akulwana. Ncintu cikulwaizya ikubala mu Bbaibbele kujatikizya nyika mwalo nobaba bana nobaba bapati mobatakapenzegwi amalwazi, macise, alimwi alufwu. Ibusinsimi bumwi mubbuku lya Isaya bulapandulula buumi bubotu ibuzoosika anyika.” Amubale akwiibandika Isaya 65:20-25. Amusoleke kukulwaizya kuti kumbele kukayiigwe mubbuku lya Luzibo.
7 Mbokunga kupaila ncintu cinyenzi kuli basizikombelo banji, mulakonzya kutalisya mubandi uujatikizya makani aya kwiinda mukwaamba kuti:
◼ “Aciindi cimwi mumaumi esu, bunji bwesu tulasikilwa mapenzi aatucita kuti tupailile lugwasyo kuli Leza. Pele, banji balimvwa kuti mipailo yabo tayiingulwi pe. Mane kulibonya kuti basololi bazikombelo ibali mukupailila luumuno lwabuleya tabateelelwi pe. Eeci tulacaamba akaambo kankondo akulwana ikuzumanana kupenzya muntu. Sena Leza ncobeni ulaswiilila mipailo? Kuti kali ulaswiilila, nkaambo nzi mipailo minji boobu nciibaanga tiiyingulwi pe? [Amulindile kwiingula] Intembauzyo 145:18 ilapandulula ciyandika kutegwa mipailo yesu yiingulwe. [Amulubale lugwalo.] Kamwi kaambo nkakuti mipailo kuli Leza yeelede kuba yakusinizya alimwi kiiyendelana akasimpe kajanika mu Jwi lyakwe, Ibbaibbele.” Amutondezye bbuku ndyomuyaabumwaya, akutondezya ncolyaamba kujatikizya bubotu bwakupaila.
8 Ciindi nomusoleka kuzumanana mubandi ujatikizya kupaila ngumwakatalikide, mulakonzya kusoleka nzila eyi:
◼ “Ndakakkomana kubandika andinywe makani aakupaila. Mulalangilwa kugwasigwa abusolozi bwamizeezo ya Jesu iijatikizya zyeelede kupailila.” Amubale Matayo 6:9, 10, kamutondezya azintu zipati zyakabikkilizigwa mumupailo wa Jesu wacikozyanyo. Amumutondezye cibalo 16 icitegwa, “Mbomunga Mwaswena Kuli Leza,” mubbuku lya Luzibo, akulomba kuti mutondezye mbwaayiigwa makani ayo.
9 Caboola kukwaabila bambi luzibo lwa Leza, tulakonzya kubuzya kuti, “Ino nguni uuzulila milimo eyi sa?” Alo Magwalo alaingula ategwa: “Sa teensi ndiswe?”—2 Kor. 2:16, 17.