Ciibalusyo—Iciyanza Cipati Kapati!
1 Mu Nsondo, ibuzuba bwa March 23, lyaakumana kubbila zuba, tuyoosekelela Ciibalusyo calufwu lwa Kristo. (Lk. 22:19) Eeci ncobeni nciyanza cipati kapati! Kwiinda mukusyomeka kuli Jehova kusikila kulufwu lwakwe, Jesu wakasinizya kuti cilakonzeka kuti muntunsi alipe cakumaninina kuli Leza nomuba mukupenga kupati, munzila eyi wakasinizya bululami bwabulelo bwa Jehova. (Heb. 5:8) Kunze lyaboobo, ilufwu lwa Kristo lwakapa cipaizyo cilondokede cabuntu icakali kuyandika ikunununa muntu, ikucita kuti aabo ibasyoma bapone kukabe kutamani. (Joh. 3:16) Kwiinda mukujanika ku Ciibalusyo, tulakonzya kutondezya kulumba kwesu kwamoyo woonse kuluyando lwa Jehova akucipaizyo ca Jesu ncaakatucitila.
2 Toonse twakulwaizigwa kutobela kubala kwa Bbaibbele ikubambilidwe mazuba aa March 18-23, mbuli mbokutondezedwe a 1997 Calendar of Jehovah’s Witnesses. Alimwi mubandi wamukwasyi uujatikizya zibalo 112-16 mubbuku lya Munthu Wamkulu Woposa Onse Amene Anakhalako uyoogwasya kugamika mizeezo yesu ansondo mpati kwiinda kuzwa leelyo kaindi nobakatalika bantu.
3 Sena mulakonzya kuyungizya ciindi ncomubelesya mumulimo wamumuunda muciindi eci ca Ciibalusyo? Basikumwaya banji bayooabelesya mamanino aansondo aali osanwe mu March ikucita bupainiya bwakugwasilizya. Mbuti ino kuba akati kabo? Toonse tulakonzya kubaa lubazu luzwide kwaambisya mbocili cintu cipati ikujanika ku Ciibalusyo. Mbokunga cili mu Nsondo, ibanji ciyoobaubila-ubila kujanika. Amubone kuti mwabatamba boonse basikwiiya Bbaibbele alimwi abambi bayanda kuti basangane andiswe. Amubandike ambabo imakani aali apeeji 126, muncali 18, mubbuku lya Luzibo kujatikizya buzuba bomwe mumwaka ibweelede kwiibalukwa kapati.
4 Amucilangile eci ciyanza cipati kwiinda mu 1997 akulumba kupati kuzintu zyoonse ziimininwa alufwu lwa Jesu kulindiswe. Amukajanike nkuko kumangolezya mu March 23, iciindi Banakristo beni-beni koonse-koonse nobayoosyomeka kukusekelela Ciibalusyo.