Muswaangano wa Cooko wa Bakamboni ba Jehova wa 1998 wa “Kupona Munzila Njayanda Leza”
1 Imwaka amwaka ibakombi ba Jehova basunu nyika yoonse mbwiizulwa lyoonse cakukkomana inga balangila kuswaangana kabali banji kapati aamiswaangano yacooko. Munzila eyi, batondezya muuya wababelesi ba Jehova basyomeka mu Israyeli yansiku ibakaimba cakukondwa imajwi aaku Intembauzyo 122 munzila nobaali kuya mukukomba Jehova ku Jerusalemu. Ikapango 1 kantembauzyo eyo kaamba kuti: “Ndakakondwa nibakandaambila kuti, katuya kuŋanda ya-Jehova.” Ciindi eci aswebo tulalibonena ibumboni buyabuvwula ciindi aciindi bwamajwi aa Leza aakuli Isaya 2:2, 3 kaali mukuzuzikizigwa.
2 Mwaka uno tulaa kaambo kalibedelede kakukondwa twayeeya kuti mumiswaangano imwi mipati kunoozwide zyuulu-zyuulu zyabantu bazwa mumasi aambi. Bamishinali ibatikapilukile kwabo kuti bakaswaye mikwasyi alimwi abalongwe babo bayakujanika aamiswaangano minji. Eelyo, ipulogilamu yamuswaangano kubusena bomwe-bomwe iyoobaa zyakuluula zyamumuunda alimwi akuluula kujatikizya kuyaambele kwakukambaukwa kwamulimo wa Bwami mumasi aambi.
3 Aino, ibantu ibasalidwe aa Sosaiti balikke buyo mbabatikajanike kumiswaangano yamasi. Ncintu ciyandika kapati ikutobela kulailila oku ikutegwa miswaangano yoonse ikeendelezyegwe kabotu. Imuuya wabantu bamuzisi zisiyene-siyene uyoobonwa aamiswaangano yoonse muzibeela zyamapulogilamu zimwi akuluula, alimwi amuli bamishinali ibatikajanike. Aboobo, nokuba kuti bunji bwesu tatukajaniki kumiswaangano yamasi, ikusungwaala kwesu kulibambila kuyoojanika kumuswaangano wacooko nkotwaambilidwe kuyootuletela lukkomano. Bukwesu bwanyika yoonse mbwiizulwa butaliboteli butupa coolwe cakuyanzanaa bakwesu abacizi basiluyando ibazwa muzyooko zyoonse zyanyika.—Joh. 13:35.
4 Mbokuyabuyaambele kulibambila kwesu kwa Muswaangano wa Cooko wa 1998 wa “Kupona Munzila Njayanda Leza,” tuyanda kwiinduluka twaambo tumwi ituyoomugwasya. Ikubelekela antoomwe kwanu kuyootondezya kulumba kwanu kububambe boonse mbomuyoocitilwa.
5 Bubambe Bwamasena Aakoona: Kanjikanji bakwesu balalibambila beni kwakuyookkala kubasazinyina naa kubeenzinyina bali mumadolopo mucitilwa miswaangano. Mumiinzi, ibakwesu balayaka zivwuka naa koona muzilabba zipati iziyakwaa basikulisungula baamuswaangano. Mumiswaangano mumwi babelesya maanda aakoona aazikolo kutegwa bajane aakukkala basimuswaangano bamwi. Notupegwaa koona kubakwesu naa basazima, taceelede kuti basimuswaangano bakutolela mumbi kusamausya kwabakwesu kwiinda mukulangila kuti balazumizigwa kukkala kwamazuba aaindilila kutegwa balyookezye wamana muswaangano. Aaya maanda ngaciindi buyo camuswaangano. Aabo ibapegwa aakoona munzila eeyi beelede kubona kuti balo abana babo balilemeka kubalaaŋanda alimwi akutajaya cili coonse naa kulanga-langa mumpasya naa mumasena aatasikwi-sikwi muŋanda. Ikuti naa uulaaŋanda wabaa buyumuyumu buyeeme kumakani aaya, cakufwambaana-fwambaana weelede kuzibya Cibeela Cilanga Aakoona kubusena bucitilwa muswaangano, eelyo ibakwesu ooko banoolibambilide kugwasya.
6 Ikulikwabilila Kumililo Antenda Zimwi: Cakutadooneka, iciletelezya mililo kumiswaangano takuli kujikila munsi aazilabba pe, pele nkuteendelezya bana basobana naa basosela mililo. Aboobo, ikutegwa mukwabililwe nywebo abanyoko, mutalekeli bana banu kweendeenda kakunyina uubalanga; mutalekeli bana kulanga maanzi aawalauka kubila amulilo naa munzila imwi kulekela bana kusosela mulilo. Balakonzya kabacizi kucita zintu ezi kabotu-kabotu kumunzi, pele kumuswaangano mbusena bumbi alimwi kweelede kucenjelelwa kapati kutegwa tweelebe kucitika kwantenda. Bantu banji bakkede antoomwe alimwi bana balayanda kucita zisobano nobali aabananyina. Balafwambaana koongwa alimwi inga tababoni kuti inga kwaba ntenda elyo akaambo kaboobo, tatweelede kubasiila nkendulu, mancisi amalampi. Alimbi penzi lilaboola ciindi bazyali nobaunka kumiswaangano cifwumofwumo akumazuba bamana basiya bana basyoonto kakunyina aubalanga muzivwuka. Bana beelede kukkala antoomwe abazyali babo ciindi camapulogilamu. Kuti bagwasilizi babona kuti bana baile kweendeenda mubusena bwamuswaangano kakunyina aubalanga, balakonzya kubajola bana kubazyali babo. Nobazyali, twamulomba amubelekele antoomwe ababelesi bamuswaangano elyo munzila eeyi muyootondezya kuti ‘mulabayanda babunyina.’—1 Pet. 2:17.
7 Imbunga ya Jehova caluyando ilapa malailile aayelede kujatikizya miswaangano. Pele cilausisya kujana kuti mumiswaangano iilimbwiibede mumyaka yainda, basimiswaangano bamwi bakanyonyaukilwa mpasya zyabo mumililo yakali kunga yeelebwa. Aabo bakwesu bajatikizidwe mumiswaangano, ikapati bazyali, balombwa kubikkila maanu kapati kutwaambo ootu tuyandika loko kutegwa mumiswaangano yesu tukayanzane munzila iikulwaizya alimwi iikkomanisya, kutali yamapenzi abuumba akaambo kabubaya buleta ntenda.
8 Amutondezye kuti mulakutobela kulailila kwa Sosaiti: Ikaambo aka keelede kuba akati katooto ntotubikkila maanu kapati. Ibbuku lya Ba-Hebrayo 13:17 lyaamba kuti: “Kamubaswiililisya baalu banu, mulitesye kulimbabo, nkaambo mbabalangilila myuuya yanu, alimwi babaanga basikuyoolyaambilila lwabo beni. Amusungwaale kuti kabacita boobo cakubotelwa, citali cakuusa, nkaambo eco tacimuleteli kululama pe.” Twalombwa kuti tubelekele antoomwe mutwaambo otu twabandikwa. Cikozyanyo cesu cibotu, cibonwa mubakwesu, cisumpula muuya waluyando, walukamantano alimwi awakugwasyanya.—Amubone 1 Ba-Korinto 16:16; Ba-Filipi 2:1-4.
9 Iziyandika Zyaalubazu: Ibacembeede, ibalema, aabo bali mumulimo waciindi coonse naa bamwi buyo balakonzya kuyandika lugwasyo kutegwa bajanike kumuswaangano. Ibanamukwasyi, baalu alimwi abamwi mumbungano ibanga kababuzyi bukkale bwabo bulibedelede balakonzya kucita bubambe buyandika kuleka kulonzya mukuli oyu wamukwasyi naa wambungano kubweendelezi bwamuswaangano.—Amweezyanisye 1 Timoteo 5:4.
10 Kuli baabo ibanyina bakubalanga munzila eyi, ifoomu ya Sosaiti Yakulomba Aakoona ilapa zyeelelo zinga zyabelesyegwa kulemba akutuma foomu eyi. Ibubambe obu bujatikizya buyo basikumwaya ibalaa ciimo cibotu, kubikkilizya abaabo ibalaa bana balilemeka, balo ibazuminidwe a Kkomitii Yamulimo Yambungano. Kamutana ilemba foomu Yakulomba Aakoona, amubale kabotu-kabotu makani aalembedwe aansi aafoomu. Ikulomba ooku kweelede kutuminwa cakufwambaana ku Cibeela Cilanga Aakoona.
11 Ikujanika Kumuswaangano Umbi: Imbungano yomwe-yomwe yaambilwa kujanikaa muswaangano uucitilwa munsi-munsi acilawo mpoibede. Kwiinda mumweelwe wabasikumwaya ibayandika kujanika kumuswaangano omwe-omwe, iba Sosaiti balauyeeyela mweelwe uutikajanike ikutegwa balibambile busena bwakukkala, bwakoona, bwamabbuku azimwi-zimwi. Pele, ikuti kuli kaambo kalimvwisya ncomuyoojanikila kumuswaangano kumbi kuleka kooko nkomweelede elyo muyandika aakoona, mulembi wambungano ulakonzya kooda foomu Yakulombela Aakoona kuzwa ku Sosaiti yalo njomweelede kulemba akusaina. Mpoonya amwiitume kuofesi pati lyamuswaangano nkomuyooswaanganina.
12 Iba Sosaiti balatambula magwalo manji kuzwa kubakwesu abacizi ibatondezya kulumba kwabo kububambe mbobakacitilwa. Imukwasyi umwi wakati: “Twati tumuzibye buyo kuti muswaangano wacooko kwiina notwakaubona kuba ciyanza buyo. Tulizyi kuti kwiina nowakaile kucitika buyo pe, pele nkaambo ibakwesu banji bakabeleka canguzu. Twalemba kuti tumuzyibye kulumba kwesu.”
13 Cilalibonya kulindiswe toonse kuti Jehova ulagwasilizya mububambe boonse bwamiswaangano yamwaka amwaka. Ikutondezya kuti ‘tulasyomeka kuciniini’ kutucitya kuti tweelele kutambula zilongezyo zipati zibikkilidwe baabo Jehova mbayanda.—Lk. 16:10.